Taialaina ma le Saogalemu i le Aiga

Uso e, ua tatou potopoto o se tino tele o le perisitua, iinei i le Maota Autu mo Konafesi faapea ai ma nofoaga i le lalolagi atoa. Ua faamamaluina lava au ma faamaualaloina i lo’u tiutetauave e talanoaina ni nai manatu ma outou. Ou te tatalo mo le Agaga o le Alii ia faatasi mai ia te au a o ou lauga atu.

I le fitusefulu-lima tausaga talu ai, i le aso 4 Fepuari, 1939, i Hamburg, Siamani, sa faamanatuina ai se aso malolo i le malo. I le taimi o lauga faagauloto, o motu o tagata fiafia, ma le taina o vii o le malo, sa faatofu atu ai i le sami e auala atu i le Vaitafe o Elbe le vaatau fou o Bismarck. O lenei vaa sili ona malosi ua opeopea, o se masini ma se talita mata’ina ma ofoofogia. O lona fausaga sa manaomia ai ni mamanu o ata se 57,000 mo fana sautualua tetele e pei o ni fogafale e 380 milimita, e faatonutonu e masini alu mamao. Sa i ai i le vaa ni faataamilosaga faaeletise e 28,000 maila (45,000 km). O lona mamafa e silia ma le 35,000 tane atoa ai ma uamea talita sa maua ai le saogalemu tele. Sa mamalu ona foliga, ma matua telē naua lona tino, ofoofogia ana auupega, sa manatu ai o lenei vaa telē ma malosi o le a le goto lava.

O le taimi atofaina a Bismarck mo lona taunuuga na oo mai i le silia ma le lua tausaga mulimuli ane, i le aso 24 o Me, 1941, ina ua fetaua’i vaatau sili ona malolosi o le Neivi a Peretania, le Prince of Wales ma le Hood, ma le Bismarck ma le vaatau laitiiti a Siamani, le Prinz Eugen. Na o le lima lava minute ae faatamaia e le Bismarck le Hood ma goto ifo ai i le taele o Atelani faatasi ai ma le auvaa atoa vagana ai alii e toatolu mai le silia ma le 1,400. O le isi vaatau a Peretania, le Prince of Wales, sa matua faaleagaina lava ma sola ese ai.

I le isi tolu aso mulimuli na sosoo ai, sa osofaia pea lava pea le Bismarck e vaatau ma le fuavaalele tau a Peretania. Sa taulai faatasi atu uma le malosi o vaatau e lima a Peretania, vaalele tau e lua, vaatau laiti e 11, ma isi vaatau e 21 i se taumafaiga e faagoto le Bismarck malosi.

I le taimi o nei taua, sa na o ni nai mea laiti o fafo o le Bismarck na faaleagaina e roketi na tafana atu. Pe sa lē goto ea la? Ona fana atu lea o se roketi tele ma lavea lelei ai loa, lea na mau ai le foeuli o le Bismarck. Sa lē aoga taumafaiga e toe faaleleia. Faatasi ai ma fana ua sauni e faapā ma le autau ua sauni foi, sa na o sina faataali’oli’o teisi lava na mafai e le Bismarck ona uli i ai. Sa le mafai foi ona maua se fesoasoani mai le fuāvaalele tau malosi a Siamani. Sa le mafai e le Bismarck ona oo atu i le saogalemu o lona uafu. Ae sa le mafai uma [e le fuavaalele tau ma le uafu] ona tuuina atu le malutaga sa manaomia, aua ua le o toe gafatia e le Bismarck ona uli i se alavaa fuafuaina. Leai se foeuli, leai se fesoasoani, leai se uafu. Sa tulalata atu i le i’uga. Sa tafana atu pea e Peretania ma faaleagaina ai le vaa Siamani ma goto ifo ai le vaa sa manatu lava e le mafaatama’iaina. O galu matelaina o Atelana na tā atu muamua i ona itu ma folo ifo ai le mitamitaga o le neivi a Siamani i lona ta’ele. Ma mou atu ai le Bismarck.¹

E pei foi o le Bismarck, o i tatou taitoatasi o se vavega o le enisinia. Peitai, o lo tatou foafoaga, sa le faatapulaaina i le atamai o le tagata. E mafai e le tagata ona fau ni masini sili ona faigata ae le mafai ona latou tuu atu i ai se ola pe tuu atu ia i latou ni mana e filifili ai ma fai ai ni faaiuga. O meaalofa faalelagi nei, ua na o le Atua e faaeeina maia.

E pei foi o le foeuli taua tele o se vaa, uso e, ua tuuina mai ia i tatou se auala e fuafua ai le itu tatou te malaga i ai. O le molī o le āva a le Alii o loo susulu mai i tagata uma a o tatou folau ai i vasa o le olaga. O lo tatou faamoemoega ia uli i se auala sa’o e agai atu i la tatou sini manaomia—le malo selesitila o le Atua. O se tagata e aunoa ma se faamoemoega e pei lava o se vaa e aunoa ma se foeuli, ua le faamoemoeina e taunuu i lona uafu saogalemu. E oo mai ia i tatou le faailoilo: faailoga lou auala e te malaga ai, sauni loa e folau, faatutonu lau foeuli, ma amata folau loa.

E pei ona oo i ai le vaatau malosi o le Bismarck, e faapena foi i le tagata. O le taavale o le afi ma le malolosi o pe’ape’a e matuā lē aoga lava pe a leai se lagona o le taitaiga, lea e faaaogaina le malosi, lea e taitaia le malosi o loo maua mai le foeuli, lea e le iloa atu, e matua laitiiti lava lona tino, ae e matua taua tele lona aoga.

Ua saunia e lo tatou Tama le la, masina, ma fetu—o aniva faalelagi ia e taiala ai tagata folau o ē folau atu i atuvasa. Ia i tatou, a o tatou savavali ai i le ala o le olaga, ua Ia saunia se faafanua manino ma faasino mai le ala e agai atu i lo tatou taunuuga manaomia. Ua Ia lapatai mai: ia faaeteete i auala ‘alo, auala lamatia, ma mailei. E le tatau ona faaseseina i tatou e i latou e taitaiseseina i tatou, i latou o e popoto e faatosina mai le agasala o loo tauvalaau mai i i ma o. Ae, tatou te tutū ma tatalo; tatou te faalogo i lena leo filemu ma itiiti lea e fetalai mai i le taele o o tatou agaga i le valaaulia mālū a le Matai, “Sau, mulimuli mai ia te au.”²

Ae o loo i ai foi i latou o ē e le faalogo, o ē e le usiusitai, o ē e fiafia i latou e savavali i se ala e fai lava e i latou ia. E tele lava la ina faatoilaloina i latou e faaosoosoga o loo siomia ai i tatou uma ma mea ia e mafai ona foliga faatosina mai.

I le avea ai ma ē tauaveina le perisitua, ua tuuina i tatou i luga o le fogaeleele i taimi faigata. Ua tatou ola i se lalolagi faigata faatasi ma āu o feteenaiga o loo maua i soo se mea. O faiga faaupufai ua faaleagaina ai le malosi o malo, o taitai faaloloto ua uumau le pule, ma vaega o malo ua foliga mai ua faatoilaloina pea, lē maua ni avanoa ma tuua ai i se lagona o le toilalopopo. O filosofia a tagata ua tatagi pea i o tatou taliga, ma le agasala o loo siomia ai pea i tatou.

O lo tatou tiutetauave o le ola agavaa lea mo faamanuiaga uma ua faapolopoloina e lo tatou Tama i le Lagi mo i tatou. Po o fea lava tatou te o i ai, tatou te ō ma ave lo tatou perisitua faatasi ma i tatou. O tatou tutu ea i ni nofoaga paia? Faamolemole, ae e te lei tuua oe lava ia ma lou perisitua i se tulaga lamatia e ala i lou alu i nofoaga po o le auai i ni gaoioiga e le agavaa mo oe po o lena perisitua, ia tu ma toe mafaufau tasi lava i taunuuga.

O i tatou o e ua faauuina i le perisitua a le Atua e mafai ona faia se eseesega. A tatou faatumauina lo tatou mama faaletagata lava ia ma faamamalu lo tatou perisitua, e avea i tatou ma faataitaiga amiotonu mo isi e mulimuli i ai. Sa apoapoai mai le Aposetolo o Paulo, “Ia fai oe ma faaa’oa’o i e faatuatua, i le upu, ma le amio, ma le alofa, ma le loto, ma le faatuatua, ma le le gaoia.”³ Sa ia tusia foi e tatau i soo o Keriso ona avea ma ē “e faamalamalama a’i le lalolagi.”⁴ O le faaalia o se faataitaiga o le amiotonu e mafai ona fesoasoani lea e faateleina le malamalama i se lalolagi pogisa.

E toatele outou e manatuaina Peresitene N. Eldon Tanner, o le sa auauna atu o se fesoasoani i Peresitene e toafa o le Ekalesia. Sa ia tuuina mai se faataitaiga mausali o le amiotonu i lana matata faalegaluega, i le taimi o tautua ai i le malo o Kanata, ma le taimi a o avea ma se Aposetolo a Iesu Keriso. Sa ia tuu mai ia i tatou lenei fautuaga musuia: “E leai se mea na te aumaia le olioli tele ma le manuia i lo le ola ai e tusa ma aoaoga o le talalelei. Ia avea ma se faataitaiga; ia avea ma se faatosinaga mo le lelei.”

Sa ia faaauau lana saunoaga: “O i tatou uma taitoatasi na muai faauuina mo se galuega i le avea ai ma se auauna filifilia [a le Atua] o e ua Ia silafia ua agavaa e faaee mai i ai le perisitua ma le mana e galulue ai i lona suafa. Ia manatua i taimi uma o loo tulimatai atu tagata ia te oe mo le taitaiga ma o loo e faatosinaina olaga o tagata taitoatasi a lē mo le lelei, o le leaga, le faatosinaga lea o le a lagonaina e augatupulaga i le lumanai.”⁵

O loo faamalosia i tatou e le upumoni e faapea o le malosiaga silisili lava i le lalolagi i aso nei o le mana o le Atua pe a galue e ala mai i le tagata. Ina ia folau ma le saogalemu i vasa o le olaga faitino, tatou te manaomiaina le taiala mai o lena Tagata Folau e Faavavau—le Ieova Sili. Tatou te aapa atu, tatou te aapa i lugā ina ia maua ai le fesoasoaniga faalelagi.

O se faataitaiga lauiloa o se tagata sa lei aapa atu i lugā o Kaino, le atalii o Atamu ma Eva. E mamana ona gafatia ae vaivai le loto, sa faatagaina ai e Kaino le faaloloto, lotovale, le usiusitai, ma na oo lava i le fasioti tagata e mau ai le foeuli faaletagata lea semanu e ono taiala o ia i le saogalemu ma le faaeaga. O le sailia o mea a le lalolagi e sili atu i lo mea a le lagi, na pa’u ai Kaino.

I se isi taimi ma i se tupu amioleaga, sa tofotofoina ai se auauna a le Atua. Sa fesoasoani i ai le musumusuga a le lagi, sa faaliliu ai e Tanielu mo le tupu ia tusitusiga na i luga o le pa puipui. E tusa ai ma taui na ofo atu ia te ia—e aofia ai se ofutalaloa, se asoa auro, ma se pule faalemalo—sa fai atu ai Tanielu, “Tuu ai pea ia te oe au mea alofa, ia e avatu i se tasi au taui.”⁶ Sa tele le oa ma le pule na ofo atu ia Tanielu, o taui na fai ma faatusa o mea a le lalolagi ae le o mea a le Atua. Sa teena e Tanielu ma tumau i le faamaoni.

Mulimuli ane, ina ua tapuai atu Tanielu i le Atua e ui lava i se tulafono na folafola atu ai le faasaina o lea mea, sa lafo ai o ia i le lua o leona. Ua faamatala mai ia i tatou e le tala i le Tusi Paia o le taeao na sosoo ai, sa “aveina a’e Tanielu ai le lua, ua le afaina lava o ia, aua na ia faatuatua i [le] … God.”⁷ I se taimi tele o le mafatia, o le naunautaiga o Tanielu e uli i se ala mausali sa gauai atu i le puipuiga faalelagi ma sa maua ai se malutaga o le saogalemu. O sea puipuiga ma le saogalemu e mafai foi ona avea ma ā tatou, a o tatou uli atu foi i lena lava ala mausali e agai atu i lo tatou aiga e faavavau.

O le taimi o le talafaasolopito, e pei o se oneone o le fagutioata faitau itula, ua faailoga ai le auala o le taimi. O tagata fou e faatumuina vaitau o le olaga. O faafitauli o o tatou aso ua matuai taufaamatau mai lava i o tatou luma. I le talafaasolopito atoa lava o le lalolagi, o loo galue ai pea Satani ma le le faavaivai mo le faafanoga o soo o le Faaola. Afai tatou te lolo atu i ana faatosinaga, o le a—pei foi [i tatou] o le vaatau malosi o le Bismarck—o le a maumauina lena foeuli lea e mafai ona taiala ai i tatou i le saogalemu. E ui lava e siosiomia i tatou e le atamai o mea faaonapo nei e faia e tagata, ae ia tatou tepa atu i le lagi mo lena lagona lemafaatoilaloina o le taitaiga, ina ia mafai ai ona tatou fuafua ma mulimuli i se auala atamai ma tatau. O le a le tuua lava e lo tatou Tama Faalelagi a tatou aioiga faamaoni e le taliina. A tatou saili atu i le fesoasoaniga faalelagi, o le tatou foeuli, o le a le pei o le Bismarck, o le a le toilalo lava.

A o tatou amatalia a tatou malaga taitoatasi, tau ina ia tatou folau ma le saogalemu i vasa o le olaga. Ia tatou maua le lototele o Tanielu, ina ia mafai ai ona tatou tumau ma le faamaoni ma le faatuatua e ui lava i le agasala ma faaosoosoga o loo siomia ai i tatou. Ia matuai loloto ma malolosi a tatou molimau e pei o Iakopo, le uso o Nifae, o lē, ina ua fetaiai ma lē na saili i auala uma e mafai ai ona faatamaia lona faatuatua, sa ia tautino mai, “sa le mafai ai ona luluina o a’u.”⁸

Faatasi ai ma le foeuli o le faatuatua o loo taialaina ai lo tatou ala, uso e, o le a tatou maua foi lo tatou ala ma le saogalemu—le aiga i le Atua, e mau ai faatasi ma Ia e faavavau. Faamoemoe o le a avea lena ala mo i tatou taitoatasi, ou te tatalo ai i le suafa paia o Iesu Keriso, lo tatou Faaola ma le Togiola, amene.