Kuv Paub tej No Kuv tus Kheej

Qhov uas peb kawm paub rau peb tus kheej hais tias Yexus Khetos txoj moo zoo uas raug muab txum tim rov qab los muaj tseeb muab tau kev zoo siab tshaj plaws rau peb hauv lub neej no. Tej zaum thaum xub thawj peb yuav tsum vam lwm tus neeg zaj lus tim khawv—ces hais, tib yam li cov tub rog hluas hais tias, “Peb yeej tsis ua xyem xyav peb niam yeej paub lawm.”³ Qhov ntawd yog ib qho chaw pib uas zoo, tiam sis peb yuav tsum ntxiv rau qhov ntawd. Yog yuav muaj zog txaus ua raws li txoj moo zoo, tsis muaj ib yam uas tseem ceeb ntau npaum qhov uas peb yuav txais thiab ntxiv zog rau peb zaj lus tim khawv. Peb yuav tsum muaj cuab kav tshaj tawm, ib yam li Amas hais, “Kuv … paub tej no rau kuv tus kheej.”⁴

Amas hais ntxiv tias, “Nej ho xav li cas tias kuv ho paub txog qhov tseeb ntawm tej no?” Saib seb, kuv hais rau nej tias lawv raug ua rau kuv paub los ntawm Vajtswv tus Ntsuj Plig Dawb Huv. Saib seb, kuv tau yoo mov thiab thov Vajtswv tau ntau hnub xwv kom kuv yuav paub txog tej no kuv tus kheej. Thiab nim no kuv twb paub kuv tus kheej lawm tias lawv muaj tseeb.”⁵

Zoo li Amas, Nifais tau kawm paub qhov tseeb rau nws tus kheej. Tom qab mloog nws txiv hais ntau ntau txog tej yam ntawm sab ntsuj plig, Nifais xav paub tib yam uas nws txiv paub. Tsis yog nws lam xav paub xwb—twb yog ib yam uas nws ntshaw thiab nqhis heev. Tab txawm nws “tseem hluas heev,” los nws “muaj lub siab xav paub txog Vajtswv tej txuj ci uas neeg tsis paub txog.”⁶ Nws xav “pom, thiab yuav hnov, thiab yuav paub txog tej yam no, los ntawm lub hwj chim ntawm tus Vaj Ntsuj Plig Dawb Huv.”⁷

Thaum Nifais “tseem zaum xav ntsoov hauv kuv nruab siab,” ces “Tswv tus Ntsuj Plig tau coj kuv tawm mus … saum ib lub ncov roob uas siab kawg,” ces tau nug nws hais tias, “Koj xav tau dab tsi?” Nws teb ib lo lus zoo hais tias: “Kuv xav pom tej yam uas kuv txiv tau pom lawm.”⁸ Vim hais tias nws muaj kev ntseeg thiab tau rau siab nrhiav, Nifais muaj hmoov vim nws tau kawm ib zaj lus zoo kawg nkaus. Nws tau lus tim khawv txog tus Cawm Seej Yexus Khetos txoj kev yuav yug los, nws lub neej, thiab Kev Ntsia Saum Ntoo Khaub Lig; nws pom qhov uas Phau Ntawv Maumoos yuav los thiab yuav muab txoj moo zoo Txum Tim Rov Qab Los thaum lub caij nyoog kawg—nws pom txhua yam no vim nws muaj lub siab xav paub rau nws tus kheej xwb.⁹

Tej kev nrog tus Tswv sib raug li no tau pab Nifais npaj rau kev tawm tsam thiab kev cov nyom uas nws yuav raug tsis ntev tom qab ntawd. Tej no tau pab nws sawv ruaj khov thaum lwm tus hauv nws tsev neeg tab tom muaj teeb meem. Nws muaj cuab kav ua li no rau qhov nws tau kawm rau nws tus kheej lawm thiab nws paub rau nws tus kheej. Nws tau txoj koob hmoov uas yog nws ib zaj lus tim khawv.

Zoo li Nifais, tus Yaj Saub Yauxej Xamiv “tseem hluas heev” thaum nws “pheej xav tob tob thiab raug kev nyuaj siab ntau” txog tej kev tseeb ntawm sab ntsuj plig. Rau Yauxej, nws yog ib lub caij muaj “kev kub ntxhov,” vim muaj kev sib tawm tsam thiab tej zaj xov sib txawv txav txog kev teev ntuj. Nws xav paub seb lub koom txoos twg thiaj muaj tseeb.¹⁰ Phau Vaj Lug Kub Npainpaum cov lus no tau tshoov nws siab thaum nws nyeem tias: “Yog nej cov leej twg tsis muaj tswv yim, kom nws cia li thov Vajtswv,”¹¹ nws tau mus rau nws tus kheej kom thiaj tau lus teb. Thaum lub caij nplooj ntoo hlav xyoo 1820 ib tag kis sawv ntxov zoo nkauj heev, nws tau mus hauv ib koog ntoo thiab tau txhos caug thov Vajtswv. Vim nws ntseeg heev thiab vim Vajtswv tau npaj ib txoj hauj lwm tshwj xeeb rau nws, Yauxej tau ua yog toog pom Vajtswv Leej Txiv thiab Nws Tib Leeg Tub, Yexus Khetos, thiab kawm rau nws tus kheej tias nws yuav tsum ua dab tsi.

Nej puas pom ib tug qauv txog txoj kev txais yuav los sis ntxiv zog rau nej zaj lus tim khawv thaum nej hnov Yauxej zaj dab neeg no? Yauxej tau cia tej nqe vaj lug kub tog mus rau hauv nws nruab siab. Nws tau muab xav mus xav los thiab tau muab tej lus ntawd nruab rau hauv nws lub neej. Ces nws tau mus ua raws li nws kawm lawm. Thiaj tau muaj Thawj Zaj Ua Yog Toog Pom—ces txawm muaj txhua yam tsav tom qab ntawd. Tiag tiag mas lub hauv paus rau lub Koom Txoos no yeej yog qhov uas leej twg los tau—kuj suav ib tug tub hluas uas ua teb uas muaj 14 xyoos—yeej muaj cai “thov Vajtswv” thiab yuav tau lus teb rau nws tej zaj lus thov.

Muaj ntau zaus peb hnov cov mej zeej hauv lub Koom Txoos hais tias lawv zaj lus tim khawv txog txoj moo zoo yog qhov uas lawv saib rau nqi tshaj plaws li hauv lawv lub neej. Nws yog ib qho khoom plig uas los ntawm Vajtswv los dhau ntawm tus Vaj Ntsuj Plig Dawb Huv lub hwj chim. Nws yog qhov uas ua rau peb paub qhov tseeb thaum peb kawm, thov Vajtswv, thiab ua raws li txoj moo zoo. Nws yog qhov uas tus Vaj Ntsuj Plig Dawb Huv ua tim khawv rau peb tus ntsuj plig tias peb tab tom kawm thiab ua qhov yog.

Ib txhia neeg tham txog ib zaj lus tim khawv zoo li yog thaum yus taw teeb—nws yeej yog qhib los sis muab tua; koj muaj ib zaj lus tim khawv, los sis tsis muaj li. Tab sis mas, ib zaj lus tim khawv muaj ntsis zoo li ib tsob ntoo uas loj hlob tuaj. Tej ntoo siab tshaj plaws hauv ntiaj teb no nyob hauv Redwood National Park hauv Teb Chaws Amelikas tim sab hnub poob. Thaum koj sawv ntawm hauv paus ntoo, yus xav tsis thoob thaum yus xav tias tsob ntoo loj loj no loj hlob tuaj ntawm ib lub noob me me xwb. Peb zaj lus tim khawv yeej yog li ntawd thiab. Txawm tias pib loj hlob tuaj thaum hnov tus ntsuj plig me me xwb, nws yeej loj hlob tuaj thaum pheej ua tib zoo tu xyuas sab ntsuj plig tsis tu tsis tseg.

Yog li ntawd, thaum tus yaj saub Amas piav seb peb yuav ua li cas thiaj tau ib zaj lus tim khawv, nws thiaj tau hais txog ib lub noob uas loj hlob tuaj ua ib tsob ntoo. Nws hais tias “xwv kom ib lub noob yuav raug muab cog rau hauv nej lub siab, saib seb, yog tias nws yog ib lub noob tseeb, los sis ib lub noob zoo, yog nej tsis muab nws ntiab tawm los ntawm nej txoj kev tsis ntseeg, … nws yuav pib hlob nyob rau hauv nej tej hauv siab; thiab thaum nej hnov nws hlob tuaj, nej yuav pib hais rau nej tus kheej tias—Nws yuav tsum yog ib lub noob zoo, los sis txoj lus yeej zoo, vim nws tau pib ua rau kuv tus ntsuj plig loj tuaj; muaj tseeb tiag, nws tau pib ua rau kuv to taub tuaj, muaj tseeb tiag, nws tau pib qab heev rau kuv”¹²

Feem ntau ib zaj lus tim khawv yuav pib li no: thaum muaj tej kev xav dawb ceev uas qhia rau peb tias Vajtswv txoj lus muaj tseeb. Tiam sis, txawm tej kev xav no zoo npaum li cas los, tej ntawd tsuas yog qhov pib xwb. Nej txoj hauj lwm los tu nej zaj lus tim khawv tsis tau tiav—ib yam nkaus qhov uas ib tsob ntoo loj loj tsum tsis loj hlob ntxiv thaum uas lub noob xub tawm hauv av ua yub. Yog tias peb tsis quav ntsej los sis tsis tu tej kev tshoov siab no, yog tias peb tsis saib xyuas tej no thaum peb pheej kawm cov vaj lug kub thiab thov Vajtswv thiab nrhiav kom tau tus Ntsuj Plig, ces peb tej kev xav thiab peb zaj lus tim khawv yuav pib ploj mus.

Li Amas tau hais: “yog nej tsis quav ntsej tsob ntoo, thiab tsis xav txog txoj kev tu nws, saib seb nws yuav tuaj tsis tau ib tug cag li; thiab thaum tshav kub tuaj thiab kub nws, vim nws tsis muaj cag nws yuav qhuav mus, thiab nej yuav muab nws rho thiab muab nws pov tseg.”¹³

Feem ntau mas, peb zaj lus tim khawv yuav loj hlob ib yam li ib tsob ntoo: maj mam loj hlob, yus tsis tshua pom, thaum uas peb ua tib zoo tu thiab rau siab ntso ua. Amas cog lus hais tias, “Tiam sis yog nej yuav tu txoj lus, muaj tseeb tiag, tu tsob ntoo thaum nws pib hlob, rau siab ntso nrog nej txoj kev ntseeg, thiab nrog txoj kev ua siab ntev, tos ntsoov rau cov txiv ntawd, nws yuav tuaj tau cag; thiab saib seb nws yuav yog ib tsob ntoo loj tuaj mus rau txoj sia kav mus ib txhis.”¹⁴

Kuv zaj lus tim khawv tau pib thaum kuv kawm thiab xav mus xav los txog tej kev qhia hauv Phau Ntawv Maumoos. Ces thaum kuv txo hwj chim txhos caug thov Vajtswv, tus Vaj Ntsuj Plig Dawb Huv tau ua tim khawv rau kuv tus ntsuj plig hais tias tej yam uas kuv tau nyeem lawm yeej muaj tseeb. Zaj lus pov thawj no tau pab kuv zaj lus tim khawv txog ntau yam kev tseeb hauv txoj moo zoo, vim yam li Thawj Tswj Hwm Monson qhia: “Thaum peb paub tias Phau Ntawv Maumoos muaj tseeb, ces yus thiaj paub tias Yauxej Xamiv yog ib tug yaj saub thiab tias nws tau pom Vajtswv Leej Txiv uas Nyob Mus Ib Txhis thiab Nws Tib Leeg Tub, Yexus Khetos. Ces yus thiaj paub tias tau muab txoj moo zoo txum tim rov qab los hauv lub caij nyoog kawg dhau ntawm Yauxej Xamiv—qhov no yeej hais txog txoj kev muab lub Pov Thawj Hwj Aloos thiab Mekixedes txum tim rov qab los thiab.”¹⁵ Txij hnub ntawd los, kuv tau hnov tus Vaj Ntsuj Plig Dawb Huv ntau zaus uas rov qab qhia kuv tias Yexus Khetos txoj moo zoo uas raug muab txum tim rov qab los yeej muaj tseeb tiag. Nrog Amas, kuv thiaj hais tau tseeb tseeb hais tias kuv paub tej no kuv tus kheej.

Kuv cov me phooj ywg, nim no yog lub sij hawm thiab hnub no yog hnub uas peb yuav tau kawm los sis rov qab kawm paub rau peb tus kheej tias txoj moo zoo no muaj tseeb. Peb txhua tus muaj ib txoj hauj lwm tseem ceeb uas peb yuav tsum ua. Yog yuav ua tau txoj hauj lwm ntawd, thiab tau kev pov hwm los ntawm tej yam tsis zoo hauv ntiaj teb no uas nyob ntawm peb ib puag ncig, peb yuav tsum muaj kev ntseeg ib yam li Amas, Nifais thiab tus tub hluas Yauxej Xamiv uas pab tau peb muaj ib zaj lus tim khawv thiab cia nws loj hlob tuaj.

Zoo li tus dikas uas puag tas kuv tham txog, kuv qhuas Thawj Tswj Hwm Monson vim nws muaj ib zaj lus tim khawv zoo. Nws zoo li ib tsob ntoo loj loj, tab sis mas Thawj Tswj Hwm Monson zaj lus tim khawv tau siv sij hawm thiaj tau loj hlob li ntawd. Peb yuav paub tau rau peb tus kheej, ib yam li Thawj Tswj Hwm Monson tau kawm hais tias, Yexus Khetos yog peb tus Cawm Seej thiab tus Txhiv Dim rau lub ntiaj teb, tias Yauxej Xamiv yog tus yaj saub rau txoj Kev Muab Txum Tim Rov Qab Los, kuj hais txog txoj kev muab Vajtswv lub pov thawj hwj txum tim rov qab los. Peb yeej tuav lub pov thawj hwj dawb huv. Kuv txo hwj chim thov kom peb yuav kawm tej no thiab paub tej no rau peb tus kheej los ntawm Yexus Khetos lub npe dawb ceev, amees.