Josef Smit

Long fas visit blong hem, long Profet Josef Smit we i gat 17 yia, wan enjel i singaotem Josef long nem blong hem mo talem se hem, Moronae, i wan mesenja we i kam long ples blong God, mo God i gat wan wok blong hem i mekem. Traem tingbaot tingting blong Josef taem enjel i talem long hem se bae oli save nem blong hem long gud saed mo nogud saed long medel blong evri nesen, famle, mo lanwis.¹ Ating sapraes long ae blong Josef i mekem Moronae i ripitim samting ia bakegen, se bae oli talem gud samting mo nogud samting abaot hem long medel blong ol pipol.²

Ol gud samting we oli talem abaot Josef Smit i kam sloslo; nogud samting i stat semtaem nomo. Josef i raetem se, olsem wanem nao, wan smol boe, bae hem i wan man we i impoten inaf blong pulum konkon filing insaed long olgeta blong tokbaot nogud mi.³

Long semtaem we lav we man i gat long Josef i stap gro, i semmak wetem agens. Taem hem i kasem 38 yia, wan grup blong 150 man we oli pentem fes blong olgeta oli kilim hem i ded.⁴ Nomata laef blong Profet i stop wantaem, ol gud mo nogud toktok abaot Josef oli jes stat.

?Bae yumi sapraes long ol nogud samting we oli talem agensem hem?⁵ Aposol Pol, oli talem se hem i krangke mo tingting blong hem i no stret. Sevya blong yumi we yumi lavem Hem, Pikinini blong God, oli talem se Hem i griri, man blong drong, mo devel i stap long hem.⁶

Lod i talem Josef long saed blong fiuja blong hem, se

evri en blong wol bae i askem abaot nem blong yu, mo ol krangke man bae oli talem nogud yu, mo hel bae i kam strong agensem;

be olgeta we hat blong olgeta i klin gud, we oli waes, mo oli gat klin fasin, bae oli lukaotem ol blesing anda long han blong yu.⁷

?From wanem Lod i letem nogud toktok i kam wetem gud toktok? Wan risen i fasin ia blong agensem ol samting blong God i sendem ol man we oli lukaotem trutok blong nildaon blong faenem ansa.⁸

Josef Smit i Profet blong Restoresen. Wok blong hem long saed blong spirit i stat taem Papa mo Pikinini, Tufala i kamaot long hem, folem wetem plante visit we i kam long heven. Hem i bin tul long han blong God blong karem tabu skripja we i lus, doktrin we i lus mo prishud i kambak. Bigfala wok blong Josef i nidim moa bitim waes lukluk; i nidim blong yumi, semmak olsem Josef, i askem God.⁹ Ol kwestin long saed blong spirit, i nid blong gat ansa we i kam long God.

Plante long olgeta we oli sakemaot wok blong Restoresen, oli no biliv nomo se ol man blong heven oli toktok long man long wol. Oli se, i no posibol, se wan enjel i givim ol buk we oli wokem long gol mo oli transletem tru long paoa blong God. From oli no biliv, oli sakemaot kwiktaem testemoni blong Josef, mo sam, sore tumas, oli mekem nogud samting ia blong tokbaot spolem laef blong Profet, mo giaman long saed blong fasin blong hem.

Yumi harem nogud taem wan we i bin tokbaot gud Josef, i aot long tru tingting blong hem, mo afta i tokbaot nogud Profet.¹⁰

Elda Nil A. Makswel i talem long wan taem: “Blong stadi long Jos tru long ae blong olgeta we oli livim Jos, i olsem blong intaviu long Judas blong save andastanem Jisas. Olgeta we oli aot long Jos, fulap taem oli tokbaot moa olgetawan bitim we oli tokbaot wanem oli livim biaen.”¹¹

Jisas i talem: “Lavem ol enemi blong yufala, mo … prea from olgeta we oli stap mekem i nogud tumas long yufala.”¹² Bae yumi soem kaen fasin long olgeta we oli tokbaot nogud Josef Smit, mo save long hat blong yumi se hem i wan profet blong God, mo stap glad se, evri samting ia, Moronae i bin talem finis.

?Olsem wanem nao yumi ansa long wan we i wantem save stret long saed blong ol nogud toktok we hem i bin harem o ridim long saed blong Profet Josef Smit? Yes, yumi welkamem oltaem, ol kwestin we oli askem long ones mo tru fasin.

Long saed blong ol kwestin long saed blong fasin blong Josef, yumi save serem ol toktok blong ol taosen man we oli bin savegud hem, mo oli givim laef blong olgeta from wok ia we hem i stanemap. Jon Teila, we rabis grup i sutum hem fo taem, bae i talem afta: “Mi testifae long fes blong God, ol enjel mo ol man, se Josef i wan gudfala, mo tru man we i gat klin fasin—mo praevet mo pablik fasin blong hem i klin gud—mo hem i bin laef mo ded olsem wan man blong God.”¹³

Yumi save talem long hem we i askem kwestin se Intanet infomesen i no gat wan “trutok” filta. Sam infomesen, nomata i save winim tingting blong man, oli jes no tru nating.

Sam yia i pas, mi ridimTime magasin we i talem se oli faenem wan leta, we oli talem se Martin Haris i raetem, mo i no go nating wetem stori blong Josef Smit long wei we oli faenem Buk blong Momon.¹⁴

Sam memba oli aot long Jos from pepa ia. ¹⁵

Sore tumas, oli aot kwiktaem tumas. Sam manis afta, ol speselis oli faenem (mo giaman man i konfes) se leta ia i wan giamanwan.¹⁶ Yu save kwestinim wanem yu harem long nius, be yu no nid blong gat tu tingting long testemoni blong ol profet blong God.

Yumi save talem bakegen long man we i askem se, samfala infomesen long saed blong Josef, nomata oli tru, oli save presentem olgeta aotsaed long wanem we i bin stap long taem mo situesen blong hem.

Elda Rasel M. Nelson i givim eksampol long hemia. Hem i talem: Mi bin stap wok olsem wan konsalten blong gavman blong Amerika long Nasonal Senta blong Sik Kontrol long Atlanta, Jojia. Wan taem, mi stap wet long taksi blong i tekem mi go long eapot afta we miting blong mifala i finis, nao mi ledaon long gras blong san i bonem mi bifo mi gobak long kolkol ples long Yuta. … Afta, mi kasem wan foto long leta, we wan fotografa i tekem wetem strong kamera, i tekem gud mi we mi rilaks long gras. Andanit, toktok i go olsem: “Gavman konsalten long Nasonal Senta.”¹⁷ Pikja i tru, toktok i tru, be trutok ia oli yusum blong givim wan rabis pikja. Yumi no sakemaot wan samting we yumi save se i tru from wan samting we yumi no andastanem yet.

Yumi save talem bakegen long man we i askem se Josef i no bin stap hemwan taem ol enjel oli visitim hem.

Ol witnes blong Buk blong Momon oli raetem: “Mo mifala i talemaot wetem tru toktok, se wan enjel blong God i bin kamdaon long heven, mo … mifala i bin luk ol buk.”¹⁸ Yumi save talem toktok blong plante narawan tu.¹⁹

Wan we i askem kwestin wetem tru tingting i sapos blong luk gospel we i kambak i go aot long wol olsem frut blong wok blong Lod tru long Profet.

Naoia, i gat moa long 29, 000 kongregesen mo 88, 000 misinari we oli stap tijim gospel raon long wol. Ol milian Lata-dei Sent oli stap lukaotem blong folem Jisas Kraes, blong gat gud laef, kea long ol puaman, mo givim taem mo talen blong olgeta blong helpem ol narawan.

Jisas i talem se:

“Be gudfala tri i no save karem rabis frut, mo rabis tri i no save karem gudfala frut.

“Bambae yufala i save makem ol man ya long frut blong laef blong olgeta.”²⁰

Ol eksplenesen ia oli winim tingting, be hem we i askem tru, i no save dipen long olgeta nomo blong stretem tingting blong hem taem i lukaotem trutok.

Wanwan we i biliv, i nidim wan konfemesen long saed blong spirit abaot tabu misin mo fasin blong Profet Josef Smit. Hemia i tru blong evri jeneresen. Ol kwestin long saed blong spirit oli nidim ol ansa we i kam long God.

I no longtaem i pas, mi bin stap long Is Kos blong Yunaeted Stet, wan riten misinari i storian long mi abaot wan fren we i kam konfius wetem infomesen we hem i bin kasem abaot Profet Josef Smit. Oli bin storian plante taem, mo riten misinari ia i gat tu tingting long risal blong ol storian ia.

Nomata we mi hop se mi save mekem fren blong hem i kam strong moa, mi filim wari long testemoni blong hem. Ol brata mo sista. Bae mi givim wan woning: Bae yu no save helpem ol nara man sapos fet blong yuwan i no hang strong.

Sam wik i pas, mi stap long plen i go long Saot Amerika. Ea hostes i pulum tingting blong mifala long sefti vidio. Oli wonem se, “maet i no save hapen, be sapos presa blong plen i jenis, ol smol bokis antap long hed blong yufala bae oli open, ol oksijen mask oli foldaon. Sapos i hapen, holem mo pulum mask i kam long yu. Putum mask ova long nus mo maot blong yu. Slakem lastik ova long hed blong yu mo pulum fas long fes sapos i nid.” Afta woning ia i kam: “Mekemsua se yu stretem mask blong yuwan fastaem bifo yu helpem ol nara man.”

Ol nogud toktok abaot Profet Josef Smit bae oli kam antap taem yumi stap muv i go from Seken Kaming blong Sevya. Ol haf trutok mo ol kaen giaman bae oli no slodaon. Bae i gat ol memba blong famle mo ol fren we bae oli nidim help blong yu. Naoia i taem blong stretem oksijen mask blong yu long saed blong spirit blong mekem se yu rere blong helpem ol narawan we oli stap lukaotem trutok.²¹

Wan testemoni long saed blong Profet Josef Smit i save kam long defren wei long wanwan long yumi. I save kam taem yu nildaon long prea, mo askem God blong konfemem se hem i bin wan tru profet. I save kam taem yu ridim stori blong Profet long saed blong Fas Visen. Wan testemoni i save kam sloslo long sol blong yu taem yu stap ridim Buk blong Momon bakegen mo bakegen. I save kam long yu taem yu talem testemoni blong yu nomo abaot Profet, o taem yu stanap long tempol mo luksave se tru long Josef Smit, tabu siling paoa i bin kambak long wol.²² Wetem fet mo tru tingting, testemoni blong yu long saed blong Profet Josef Smit bae i kam strong moa. Ol wota balun we olgeta long saedsaed oli sakem i kam oltaem, bae oli save mekem yu wetwet wanwan taem, be neva, neva, bae i kilimdaon faea blong fet blong yu we i stap laet gud.

Long ol yut we oli stap lisin tedei, o stap ridim ol toktok ia long ol dei we oli stap kam, mi givim yufala wan spesel jalenj: Kasem wan witnes blong yuwan long saed blong Profet Josef Smit. Letem voes blong yu i help blong mekem ol toktok blong Profet Moronae oli kamtru, blong talem gud abaot Profet. Hemia tu tingting: faswan, faenem ol skripja long Buk blong Momon we yu filim mo save se oli tru. Afta, serem wetem famle, fren long famle haos naet, seminari, ol yang Man, mo Yang woman klas, mo talem se Josef i bin wan tul long han blong God. Nekis wan, ridim testemoni blong Profet Josef Smit long Perel we I Gat Bigfala Praes, o long pamflet ia we i stap long 158 lanwis. Yu save faenem tu long Intanet long LDS.org, o wetem ol misinari. Hemia testemoni blong Josef long wanem stret i bin hapen. Ridim plante taem. Tingting blong rekodem testemoni blong Josef Smit long voes blong yu, mo lisin long hem plante taem, mo serem wetem ol fren. Taem yu lisin long testemoni blong Profet tru voes blong yuwan bae i help blong kasem witnes ia we yu stap lukaotem.

I gat ol bigfala mo gudfala dei i stap kam. Presiden Tomas S. Monson i talem: “Bigfala stamba wok ia bae i gohed i go, i jenisim mo blesem ol laef. I no gat fos long ful wol ia we i save stopem wok blong God. Nomata wanem i kam, bigfala stamba wok ia bae i go fored i go.”²³

Mi talem witnes blong mi se Jisas i Kraes, Sevya mo Ridima blong yumi. Hem i jusum wan tabu man, wan stret mo gud man, blong lidim wok blong Putumbak ful gospel blong Hem. Hem i bin jusum Josef Smit.

Mi testifae se Josef Smit i wan ones mo klin man, wan disaepol blong Lod Jisas Kraes. God Papa mo Pikinini blong Hem, Jisas Kraes, Tufala i kamaot long hem. Hem i transletem Buk blong Momon tru long presen mo paoa blong God.

Long sosaeti blong yumi long narasaed long vel, bae yumi andastanem klia tabu koling mo tabu misin blong Profet Josef Smit. Long taem ia we bae i kam kolosap, yu mo mi, mo ol milian moa bae oli save bakegen huia Brata Josef.²⁴ Long nem blong Jisas Kraes, amen.