2010–2019
Yauxej Xamiv
October 2014

Yauxej Xamiv

Los ntawm Txwj Laug Neil L. Andersen

Ntawm Pawg Kaum Ob tug Thwj Tim

Daim Duab

Yexus Khetos xaiv ib tug neeg dawb huv, ib tug txiv neej ncaj ncees, kom muab Nws txoj moo zoo txum tim rov qab los. Nws tau xaiv Yauxej Xamiv.

Thawj zaus uas tus tim tswv tuaj xyuas tus Yaj Saub Yauxej Xamiv thaum nws muaj 17 xyoo, tus tim tswv hu Yauxej lub npe thiab qhia Yauxej tias nws, yog Maulaunais, yog ib tug tub xa xov los ntawm Vajtswv thiab Vajtswv muaj ib txoj hauj lwm rau Yauxej ua. Cia li xav seb Yauxej tau xav li cas thaum tus tim tswv qhia nws tias neeg yuav hais zoo thiab hais phem txog nws lub npe nyob hauv txhua haiv neeg, xeem neeg, thiab yam lus.1 Tej zaum tus tsim tswv twb pom kev xav tsis thoob nyob hauv Yauxej lub qhov muag uas ua rau Maulaunais thiaj hais dua hais tias, yuav hais zoo thiab hais phem txog nws lub npe nyob hauv txhua cov neeg.2

Twb siv sij hawm ntev kom hais zoo txog Yauxej Xamiv; tiam sis neeg twb pib hais phem tam sim ntawd. Yauxej sau hais tias “Cas yuav txawv ua luaj vim ib tug me nyuam tub uas tsis nto moo … es yuav ua rau tej neeg xav tias yog ib tug uas tseem ceeb txaus rau lawv … tsim txom … kawg nkaus.”3

Txawm muaj neeg coob hlub Yauxej zuj zus, kuj muaj neeg uas ntxub nws thiab. Thaum nws muaj 38 xyoo, 150 tus neeg uas pleev xim rau lawv ntsej muag muab nws tua tuag.4 Txawm tus Yaj Saub lub neej twb tiav sai sai heev, qhov uas neeg hais zoo thiab phem txog Yauxej twb tab tom pib xwb.

Puas tsim nyog uas peb xav tsis thoob tias lawv hais phem txog nws? Lawv hais tias tus Thwj Tim Povlauj vwm.5 Lawv hais tias peb tus Cawm Seej uas peb hlub, Vajtswv Leej Tub, yog ib tug neeg noj loj haus loj thiab raug ib tug dab phem.6

Tus Tswv qhia Yauxej txog yav tom ntej hais tias,

Neeg thoob lub ntiaj teb yuav nug txog nws lub npe, thiab tej neeg ruam yuav thuam nws, thiab ntuj txiag teb tsaus yuav sib zog tawm tsam nws;

Tiam sis cov muaj siab dawb, … cov muaj tswv yim, … thiab cov tsim txiaj, yuav nrhiav … tej koob hmoov tas mus li los ntawm nws txhais tes.7

Vim li cas tus Tswv yuav cia neeg hais lus phem txog cov uas zoo? Qhov uas tib neeg tawm tsam cov uas los ntawm Vajtswv los ua rau cov uas nrhiav qhov tseeb txhos caug thov txais lus teb.8

Yauxej Xamiv yog tus Yaj Saub ntawm Kev Muab txoj Moo Zoo Txum Tim Rov Qab Los. Nws txoj hauj lawm pib thaum Leej Txiv thiab Leej Tub tshwm sim rau nws, es tom qab ntawd muaj cov tim tswv ntau heev. Nws yog lub cuab yeej hauv Vajtswv txhais tes kom muab cov vaj lug kub, cov lus qhuab qhia, thiab lub pov thawj hwj txum tim rov qab los. Peb yuav tsum tsis txhob siv peb txoj kev txawj ntse xav txog Yauxej txoj hauj lwm xwb; peb yuav tsum ua zoo li Yauxej thiab thov Vajtswv.9 Tus uas muaj tej lus nug ntawm sab ntsuj plig yuav tsum txais lus teb ntawm Vajtswv.

Ntau tus uas hais tias txoj Kev Muab txoj Moo Zoo Txum Tim Rov Qab Los tsis muaj tseeb, lawv tsis ntseeg tias cov tim tswv hais lus rau neeg nyob hauv lub ntiaj teb no. Lawv hais tias, qhov uas ib tug tim tswv muab cov phiaj kub rau Yauxej txhais lus los ntawm Vajtswv lub hwj chim tsis muaj tseeb. Vim lawv tsis ntseeg, lawv xyeej Yauxej zaj lus tim khawv, thiab muaj ob peb tug neeg uas thuam tus Yaj Saub lub neej thiab taug xaiv txog nws tus xeeb ceem.

Ua rau peb tu siab heev thaum ib tug uas qhuas Yauxej Xamiv thaum yav tas los thim nws zaj lus tim khawv ces pib hais phem txog tus Yaj Saub.10

Txwj Laug Neal A. Maxwell hais tias, “Kev kawm lub Koom Txoos … los ntawm cov uas twb tso lub Koom Txoos tseg yeej zoo ib yam li yus nug Yudas kom to taub Yexus. Cov uas twb tso lub Koom Txoos tseg yeej qhia peb txog lawv tus kheej ntau tshaj lawv qhia peb txog qhov uas lawv twb tso tseg lawm.”11

Yexus hais tias, “Foom koob hmoov rau cov neeg uas cem nej, thiab thov Vajtswv pab rau cov neeg uas tsim txom nej.”12 Cia peb ua siab zoo rau cov uas cem Yauxej Xamiv, thiab txais kev nplij siab hais tias Maulaunais twb qhia hais tias yuav muaj li no thiab cia li paub hauv peb lub siab hais tias Yauxej yog Vajtswv ib tug yaj saub.

Peb yuav tsum teb li cas rau ib tug uas xav txog tej yam phem uas nws tau hnov txog los yog nyeem txog tus Yaj Saub Yauxej Xamiv? Peb yeej zoo siab txais tej lus nug ntawm cov uas xav paub tiag tiag.

Kom teb tej lus nug txog Yauxej tus xeeb ceem, tej zaum tsim nyog uas peb qhia txog ntau txhiab neeg uas paub nws zoo thiab txo lawv txoj sia kom ua txoj hauj lwm uas nws pab txhim tsa. John Taylor, tus uas raug tua phom plaub zaug ntawm cov neeg phem uas muab Yauxej tua tuag, tau hais tias: “Kuv ua tim khawv nyob ntawm Vajtswv, tim tswv, thiab tib neeg xub ntiag, hais tias [Yauxej] yog ib tug txiv neej zoo, ntxim qhuas, [thiab] tsim txiaj— … [thiab] nws tus xeeb ceeb los yeej liam tsis tau—thiab nws ua neej thiab tuag li ib tug neeg ntawm Vajtswv.”13

Rau tus uas xav paub tiag tiag mas tej zaum peb yuav tsum qhia nws hais tias tsis muaj ib txoj kev kom paub xov xwm los ntawm Internet puas muaj tseeb. Muaj tej yam xov xwm, txawm neeg txawj ntxias npaum li cas los, tsis muaj tseeb.

Ntau xyoo tas los kuv nyeem ib zaj hauv phau xov xwm Time uas hais txog qhov uas lawv nrhiav tau ib tsab ntawv uas Martin Harris sau, uas hais txawv txog Yauxej Xamiv zaj uas qhia txog thaum nws nrhiav tau cov phiaj ntawm Phau Ntawv Maumoos.14

Ob peb tug mej zeej twb ncaim lub Koom Txoos mus vim los ntawm tsab ntawv ntawd.15

Tu siab uas lawv ncaim sai dhau. Ob peb hlis tom qab ntawd cov kws txawj ntse kawm tias tsab ntawv no yog ib qho kev dag ntxias (thiab tus uas sau tsab ntawv cuav lees txhaum).16 Tsim nyog uas nej xav paub tej yam uas nej hnov ntawm kev tshaj xov puas muaj tseeb, tiam sis nej tsis tas ua xyem xyav txog Vajtswv cov yaj saub tej lus tim khawv.

Tej zaum peb yuav tsum qhia tus uas xav paub tiag tiag hais tias tej yam xov xwm txog Yauxej, txawm muaj tseeb los, tej zaum peb tsis paub tag nrho txog nws lub caij nyoog thiab tej xwm txheej.

Txwj Laug Russell M. Nelson hais txog qhov no. Nws hais tias: “Kuv yog ib tug kws pab tawm tswv yim rau lub Teb Chaws Amelikas lub tseem fwv nyob ntawm Qhov Chaw Tswj Kab Mob nyob hauv Atlanta, Georgia. Muaj ib zaug thaum kuv tseem tos ib lub tsheb kom thauj kuv mus rau tom tshav nyab hoom tom qab kev sib ntsib tiav lawm, kuv twb pw saum cov nyom kom cia lub hnub ua tshav ntuj rau kuv ua ntej kuv yuav rov qab mus rau lub caij no no nyob hauv Utah. … Tom qab ntawd lawv xa ib daim duab rau kuv uas ib tug kws thaij duab siv tsom iav kom peb deb thaij, nws thiaj pom lub sij hawm uas kuv so ntawm cov nyom. Nram qab ntawm daim duab nws sau hais tias, ‘Tus pab tseem fwv tawm tswv yim nyob ntawm Qhov Chaw Tswj Kab Mob.’ Daim duab no muaj tseeb, tej lus uas nws sau muaj tseeb, tiam sis nws twb siv qhov tseeb kom tib neeg xav tsis yog.”17 Peb tsis muab ib qho uas peb paub muaj tseeb tseg vim muaj ib yam uas peb tseem tsis to taub.

Tej zaum peb yuav tsum qhia tus uas xav paub tiag tiag hais tias tsis yog Yauxej tib leeg uas pom cov tim tswv xwb.

Cov tim khawv ntawm Phau Ntawv Maumoos sau hais tias, “Peb siv tej lus tiag tiag tshaj tawm hais tias, Vajtswv ib tug tim tswv tau nqis saum ntuj los, thiab … peb saib thiab pom cov phiaj.”18 Peb kuj paub txog lwm tus thiab.19

Ib tug uas xav paub tiag tiag yuav tsum saib qhov uas txoj moo zoo tseem nchav mus thoob lub ntiaj teb yog los ntawm tus Tswv txoj hauj lwm uas tus Yaj Saub ua.

Nim no muaj 29,000 pawg ntseeg thiab 88,000 tus tub txib uas qhia txoj moo zoo nyob thoob plaws lub ntiaj teb. Ntau plhom tus Neeg Ntseeg hauv Hnub Nyoog Kawg xav ua raws li Yexus Khetos ua, ua neej zoo, saib xyuas cov pluag, thiab siv lawv lub sij hawm thiab txuj ci kom pab lwm tus.

Yexus hais tias:

“Tsob ntoo zoo yeej tsis txi cov txiv phem, thiab tsob ntoo phem yeej tsis txi cov txiv zoo. …

“… Nej yuav paub [lawv] los ntawm tej hauj lwm uas lawv ua.”20

Tej yam no zoo thiab, tiam sis tus uas xav paub tiag tiag yuav tsum tsis txhob siv tej no xwb kom nws paub qhov tseeb.

Txhua tus ntseeg yuav tsum txais kev pom zoo ntawm sab ntsuj plig txog qhov uas tus Yaj Saub Yauxej Xamiv ua Vajtswv txoj hauj lwm. Qhov no muaj tseeb rau txhua tiam neeg. Tus uas muaj tej lus nug ntawm sab ntsuj plig yuav tsum txais lus teb ntawm Vajtswv.

Tsis ntev tas los nyob ntawm Sab Hnub Tuaj ntawm lub Teb Chaws Amelikas, ib tug tub txib uas twb rov qab los tsev qhia kuv txog ib tug phooj ywg uas poob siab thaum nws hnov xov txog tus Yaj Saub Yauxej Xamiv. Nkawd twb sib tham ob peb zaug, thiab zoo li tus tub txib uas rov qab los tsev ua xyem xyav nws tus kheej vim nkawd sib tham txog qhov no.

Txawm kuv xav kom nws txhawb nqa nws tus phooj ywg los, kuv txhawj txog nws zaj lus tim khawv. Cov kwv tij thiab cov muam, cia kuv ceeb toom nej hais tias: nej pab tsis tau lwm tus yog tias nej txoj kev ntseeg tsis ruaj khov.

Ob peb lim tiam tas los kuv nce nyab hoom mus rau Amelikas Sab Qab Teb. Tus neeg saib xyuas hais kom peb saib ib daim video kom paub ua li cas thaum muaj xwm txheej. Lawv ceeb toom hais tias, “Nyaj yuav tsis muaj li no, tiam sis yog tias cov cua hloov, qhov chaw nyob saum lub rooj zaum yuav qhib, ua rau nej pom tej looj ntsej muag ua pa. Yog muaj li no, cia li ncav tes thiab rub ib lub looj ntsej muag rau nej. Tso lub looj ntsej muag kom npog nej qhov ntswg thiab qhov ncauj. Muab txoj yas khuam lub taub hau thiab kho lub looj ntsej muag yog yuav tsum ua.” Ces lawv ceeb toom li no hais tias: “Ua tib zoo kho nej lub looj ntsej muag ua ntej nej pab lwm tus.”

Thaum txog lub sij hawm uas tus Cawm Seej Los Zaum Ob neeg yuav hais phem ntxiv txog tus Yaj Saub Yauxej Xamiv. Tej lus uas tsis tshua tseeb thiab tej kev haub kev ntxias yeej yuav tsis ploj mus. Yuav muaj tsev neeg thiab phooj ywg uas xav tau nej txoj kev pab. Nim no yog lub sij hawm kho nej looj ntsej muag ua pa ntawm sab ntsuj plig kom nej thiaj pab lwm tus uas nrhiav qhov tseeb.21

Nyias yuav muaj nyias ib zaj lus tim khawv txog tus Yaj Saub Yauxej Xamiv uas los sib txawv. Tej zaum yuav los thaum nej txhos caug thov Vajtswv kom Nws qhia tseeb tias Yauxej yog ib tug yaj saub tiag. Tej zaum yuav los rau nej thaum nej nyeem tus Yaj Saub Thawj Zaj Ua Yog Toog Pom. Tej zaum nej yuav pib muaj ib zaj lus tim khawv los zuj zus thaum nej rov qab nyeem Phau Ntawv Maumoos. Tej zaum yuav los thaum nej ua tim khawv txog tus Yaj Saub los sis nej sawv hauv lub tuam tsev thiab paub tias dhau los ntawm Yauxej Xamiv lub hwj chim khi neeg ua ke twb txum tim rov qab los rau hauv lub ntiaj teb.22 Thaum nej muaj kev ntseeg thiab xav paub tiag tiag, nej zaj lus tim khawv txog tus Yaj Saub Yauxej Xamiv yuav muaj zog. Tej zaum cov uas txawb tej zais roj hmab uas puv dej ntawm txhua sab yuav ua rau nej ntub, tiam sis qhov ntawd yuav tua tsis tau qhov hluav taws ntawm nej txoj kev ntseeg.

Rau cov tub hluas ntxhais hluas uas mloog los yog yuav nyeem tej lus no, kuv twv nej: Cia li txais tau ib zaj lus tim khawv txog tus Yaj Saub Yauxej Xamiv. Cia nej lub suab pab kom muaj raws li Maulaunais tej lus qhia txog yav tom ntej hais tias neeg yuav hais zoo txog tus Yaj Saub. Muaj ob lub tswv yim: Qhov thib ib, nrhiav cov vaj lug kub nyob hauv Phau Ntawv Maumoos uas nej paub tias muaj tseeb tiag. Ces qhia nej tsev neeg thiab phooj ywg thaum muaj tsev neeg hmo ua ke, nej kawm seminary, nyob hauv Koom Haum Tub Hluas thiab Koom Haum Ntxhais Hluas tej chav kawm, es lees hais tias Yauxej yog ib lub cuab yeej hauv Vajtswv txhais tes. Ces tom qab ntawd, cia li nyeem tus Yaj Saub Yauxej Xamiv zaj lus tim khawv nyob hauv phau Hlaws uas Muaj Nqi los yog nyob hauv phau no, uas peb twb txhais lus rau 158 yam lus. Nej nrhiav tau nyob online ntawm LDS.org los yog los ntawm cov tub txib. Nov yog Yauxej zaj lus tim khawv txog tej yam uas tshwm sim tiag. Nyeem qhov no ntau zaus. Xav seb nej puas xav kaw nej lub suab thaum nej nyeem Yauxej Xamiv zaj lus tim khawv, thiab rov qab mloog thiab muab rau nej cov phooj ywg. Qhov uas nej mloog nej lub suab thaum nej hais tus Yaj Saub zaj lus tim khawv yuav pab nej nrhiav tau ib qho tim khawv.

Yuav muaj tej lub caij zoo thaum yav tom ntej. Thawj Tswj Hwm Thomas S. Monson hais tias: “Txoj hauj lwm zoo kawg nkaus no … yuav mus tom ntej, kom hloov thiab foom koob hmoov rau tib neeg. … Tsis muaj ib yam dab tsi hauv ntiaj teb no uas thaiv tau Vajtswv txoj hauj lwm. Txawm muaj li cas los xij, txoj hauj lwm no yuav mus tom ntej.”23

Kuv ua tim khawv hais tias Yexus yog tus Khetos, peb tus Cawm Seej thiab tus Txhiv Dim. Nws xaiv ib tug neeg dawb huv, ib tug txiv neej ncaj ncees, kom muab Nws txoj moo zoo txum tim rov qab los. Nws tau xaiv Yauxej Xamiv.

Kuv ua tim khawv hais tias Yauxej Xamiv yog ib tug neeg ncaj thiab siab zoo, ib tug thwj tim ntawm tus Tswv Yexus Khetos. Vajtswv Leej Txiv thiab Nws Leej Tub, Yexus Khetos twb tshwm sim rau nws. Nws twb muab Phau Ntawv Maumoos txhais los ntawm Vajtswv lub txiaj ntsim thiab lub hwj chim.

Tom qab peb tso lub ntiaj teb no tseg, peb yuav to taub meej txog tus Yaj Saub Yauxej Xamiv txoj hauj lwm dawb huv. Tsis ntev ntawm no, “Yauxej lub npe yuav mus thoob plaws ntiaj teb no.”24 Los ntawm Yexus Khetos lub npe, amees.

Lus Cim

  1. Yauxej Xamiv—Keeb Kwm 1:33.

  2. Saib Yauxej Xamiv—Keeb Kwm 1:29–46.

  3. Yauxej Xamiv—Keeb Kwm 1:23.

  4. Saib Lus Qhuab Qhia thiab Kev Khi Lus 135:1.

  5. Saib Tes Hauj Lwm 26:24.

  6. Saib Mathais 11:19; Yauhas 10:20.

  7. Lus Qhuab Qhia thiab Kev Khi Lus 122:1–2.

  8. Thawj Tswj Hwm Dieter F. Uchtdorf hais tias: “Ua xyem xyav txog tej yam nej tsis paub tseeb ua ntej nej ua xyem xyav txog nej txoj kev ntseeg. Peb yeej yuav tsum tsis txhob cia peb tej kev ua xyem xyav ntes peb thiab cia peb tsis txais kev hlub, kev kaj siab lug, thiab tej txiaj ntsim uas los ntawm kev ntseeg tus Tswv Yexus Khetos” (“Come, Join with Us,” Ensign los sis Liahona, Kaum Ib Hlis Ntuj 2013, 23). Txwj Laug Jeffrey R. Holland hais tias: “Nov yog Vajtswv txoj hauj lwm uas muaj tej kev tshwm sim thiab cov koob hmoov ntau nplua mias, yog li ntawd tsis txhob txhawj dhau yog tias tej lub sij hawm muaj teeb meem uas yuav tsum xyuas, to taub thiab kho. Yeej muaj tej teeb meem zoo li ntawd thiab peb yeej kho tau tej ntawd. Nyob hauv lub Koom Txoos no tej yam uas peb paub yeej muaj zog tshaj tej yam uas peb tsis paub” (“Lord, I Believe,” Ensign los sis Liahona, Tsib Hlis Ntuj 2013, 94).

  9. Yakaunpaus 1:5; kuj saib Yauxej Xamiv—Keeb Kwm 1:11–13.

  10. Daniel Tyler nco qab hais tias: “Tij Laug Isaac Behuni thiab kuv mus xyuas [tus Yaj Saub] tom nws tsev. Peb tau sib tham txog tej kev txom nyem uas nws raug lawm. Nws rov qab qhia txog tej lus dag, tej lus tsis tseeb thiab tej lus tsis zoo uas cov neeg uas tau tso qhov tseeb tseg tau hais. … Nws qhia hais tias cov nom tswv feem coob uas xav muab nws tua pov tseg, twb pauv siab thiab nyiam nws tom qab lawv ntsib nws thaum lawv muab nws ntes. …“… Tij Laug Behunin hais tias: ‘Yog kuv ncaim ntawm lub Koom Txoos no mus kuv yeej yuav tsis ua li cov txiv neej no tau ua: kuv ces yuav mus nyob hauv ib qho chaw uas tib neeg tsis tau hnov txog cov neeg Maumoos, yuav ua tsev nyob, thiab yuav tsis muaj leej twg paub tias kuv paub txog lawv txoj kev ntseeg hlo li.’“[Yauxej] tau teb tam sim ntawd hais tias: ‘Tij Laug Behunin, koj tsis paub hais tias koj yuav ua li cas. Tej zaum thaum i cov txiv neej no kuj xav li ko thiab. Ua ntej koj los zwm rau hauv lub Koom Txoos no koj tsis tuaj leej twg tog li koj nyob qhov chaw nruab nrab xwb. … Thaum koj los zwm rau hauv lub Koom Txoos no koj tau hais tias koj yuav ua hauj lwm pab Vajtswv. Thaum koj ua li ntawd koj tsis nyob hauv qhov chaw nruab nrab lawm, thiab tsam no koj tsis muaj cuab kav rov qab mus nyob hauv qhov chaw nruab nrab. Yog tias koj yuav tso tus Xib Hwb uas koj xaiv ntawd tseg, yuav yog vim tus dab phem twb ntxias tau koj lawm, thiab koj yuav mus ua raws li nws hais thiab yuav ua nws ib tug tub qhe thiab’” (nyob hauv Teachings of Presidents of the Church: Joseph Smith [2007], 324).

  11. Neal A. Maxwell, “All Hell Is Moved” (Brigham Young University kev hawm Vajtswv, Kaum Ib Hlis Ntuj 8, 1977), 3; speeches.byu.edu.

  12. Mathais 5:44.

  13. Teachings of Presidents of the Church: John Taylor (2001), 83; kuj saib Lus Qhuab Qhia thiab Kev Khi Lus 135:3.

  14. Saib Richard N. Ostling, “Challenging Mormonism’s Roots,” Time, Tsib Hlis Ntuj 20, 1985, 44.

  15. Saib Ostling, “Challenging Mormonism’s Roots,” 44; kuj saib Gordon B. Hinckley, “Lord, Increase Our Faith,” Ensign, Kaum Ib Hlis Ntuj 1987, 52; Neil L. Andersen, “Trial of Your Faith,” Ensign los sis Liahona, Kaum Ib Hlis Ntuj 2012, 41.

  16. Saib Richard E. Turley Jr., Victims: The LDS Church and the Mark Hofmann Case (1992).

  17. Russell M. Nelson, “Truth—and More,” Ensign, Ib Hlis Ntuj 1986, 71.

  18. “Zaj Lus Tim Khawv ntawm Peb tug Tim Khawv,” Phau Ntawv Maumoos.

  19. Saib Yauxej Xamiv—Keeb Kwm 1:71, cim ntawv; kuj saib Lus Qhuab Qhia thiab Kev Khi Lus 76:23.

  20. Mathais 7:18, 20.

  21. Thawj Tswj Hwm Henry B. Eyring hais txog cov uas ua xyem xyav li no, hais tias: “Vim nej hlub lawv tej zaum nej yuav txiav txim siab ua raws li lawv xav. Tej zaum nej yuav raug ntxias kom hais txog lawv tej kev ua xyem xyav, vim nej xav nrhiav qhov puav pheej los yog kev txawj ntse uas yuav ua rau lawv tej kev ua xyem xyav ploj mus. Tib neeg uas ua xyem xyav pheej xav hais txog tej yam uas lawv xav tias yog qhov tseeb los yog tej kev sib cav uas ua rau lawv xyem xyav, thiab qhov uas lawv mob siab npaum li cas. …“Peb yuav ua zoo dua yog peb tsis tham ntev txog tej yam uas peb cov tub ntxhais kawm ntawv ua xyem xyav txog. … Lawv qhov teeb meem tsis nyob ntawm tej uas lawv xav tias lawv pom; qhov teeb meem nyob ntawm tej uas lawv tseem tsis pom. … Peb yuav ua zoo dua yog peb sib tham txog tej yam nyob hauv lub siab, tej kev hloov siab uas yuav qhib lawv qhov muag ntawm sab ntsuj plig” (“‘And Thus We See’: Helping a Student in a Moment of Doubt” [zaj lus hais rau cov xib hwb hauv Church Educational System, Ob Hlis Ntuj 5, 1993], 3, 4; si.lds.org).

  22. Thawj Tswj Hwm Gordon B. Hinckley hais tias: “Ntau xyoo tas los thaum kuv muaj kaum ob xyoos lawv tsa kuv ua ib tug dikas, kuv txiv, uas yog tus thawj tswj hwm ntawm peb ceg txheem ntseeg, coj kuv mus rau ceg txheem ntseeg kev sib ntsib pov thawj hwj. … [Zaj nkauj qhib yog “Qhuas tus Txiv Neej.”] Lawv hu nkauj txog tus Yaj Saub Yauxej Xamiv, thiab thaum lawv ua li ntawd ua rau kuv lub siab hlub thiab ntseeg tus Yaj Saub zoo ntawm lub caij nyoog no. … Thaum ntawd kuv paub lawm, los ntawm tus Vaj Ntsuj Plig Dawb Huv lub hwj chim, hais tias Yauxej Xamiv yog Vajtswv ib tug yaj saub tiag” (“Praise to the Man,” Ensign, Yim Hli Ntuj 1983, 2; Tambuli, Ib Hlis Ntuj 1984, 1, 2).

  23. Thomas S. Monson, “As We Gather Once Again,” Ensign los sis Liahona, Tsib Hlis Ntuj 2012, 4.

  24. “Praise to the Man,” Hymns, no. 27.