Iosefa Samita

I lana uluai asiasiga i le Perofeta o Iosefa Samita i le 17 o ona tausaga, sa tau atu e se agelu le igoa o Iosefa ma fai atu ia te ia o ia, o Moronae, o se avefeau na auina mai mai le afioaga o le Atua ma e i ai se galuega a le Atua mo ia e fai. Mafaufau i lagona na oo ia Iosefa ina ua tau atu e le agelu ia te ia o lona igoa o le a “tauleleia ma tauleagaina i totonu o atunuu uma, ituaiga, ma gagana.”¹ Masalo o le faateia i mata o Iosefa na mafua ai ona toe fai atu Moronae, o le a tauleleia ma tauleagaina o ia i atunuu uma.²

O le tauleleia lea o Iosefa Samita na faasolosolo lemu mai; ae o le tauleagaina na amata lava i lena taimi. Sa tusia e Iosefa, “I le uiga ese moni lava, o le avea o se tama le lauiloa … sa mafaufauina ua lava lona taua e amanaia ai … sauaga sili ona malosi.”³

E ui sa tuputupu ae le alofa mo Iosefa, ae sa faapena foi ma le le fiafia. I le 38 o ona tausaga, sa fasiotia ai o ia e tagata leaga e 150 na vali uma o latou foliga.⁴ E ui na faafuasei ona iu le soifua o le Perofeta, ae o le tauleleia ma le tauleagaina o Iosefa faatoa amata.

E tatau ea ona faateia i tatou i le tauleagaina o ia? Sa ta’ua le Aposetolo o Paulo o se vale.⁵ O lo tatou Faaola Pele, le Alo o le Atua, sa faailogaina o se tagata faaloloto, inu uaina, ma ua i ai le temoni.⁶

Sa tau atu e le Alii ia Iosefa lona taunuuga:

“O le a fesilisili tuluiga o le lalolagi i lou igoa, ma o le a fai oe ma tauemuga a tagata valelea, ma o le a ‘atigu seoli e faasaga ia te oe;

“Ao e loto mama, … e atamamai, … ma e amiomama, o le a saili … faamanuiaga mai lou lima e le aunoa.”⁷

Aisea e faataga ai e le Alii le tauleagaina e tutupu faatasi ma le lelei? O le tasi mafuaaga o le tetee i mea a le Atua e auina atu ai ē saili i le upumoni i o latou tulivae mo ni tali.⁸

O Iosefa Samita o le perofeta o le Toefuataiga. Na amata lana galuega faaleagaga i le faaali atu o le Tama ma le Alo, sosoo ai ma le tele o asiasiga faalelagi. Sa avea o ia ma meafaigaluega i aao o le Atua i le aumaia o tusitusiga paia, aoaoga faavae na leiloloa, ma le toefuataiga o le perisitua. O le taua o le galuega a Iosefa na manaomia ai le sili atu nai lo o ni mafaufauga atamai; e manaomia ai lo tatou, faapei o Iosefa, “ole atu i le Atua.”⁹ O fesili faaleagaga e talafeagai ma tali faaleagaga mai le Atua.

O le toatele o i latou o e le amanaiaina le galuega o le Toefuataiga e le talitonu faapea o loo talanoa mai tagata faalelagi i tagata i le fogaeleele. Ua latou fai mai e le mafai ona auina mai e se agelu ni papatusi auro, ma faaliliuina i le mana o le Atua. Mai lena le talitonu, sa vave ai lava ona latou teenaina le molimau a Iosefa, ma o le mea e leaga ai, o nisi sa latou tautino ai e faamaasiasi le Perofeta ma tauleagaina lona tagata.

Tatou te matua faanoanoa lava pe afai e aluese mai se tasi sa faaaloalo ia Iosefa mai i ona talitonuga maumautu sa i ai ae faitio i le Perofeta.¹⁰

“O le suesue i le Ekalesia … e ala atu i mata a ona tagata pepelo,” sa saunoa mai ai Elder Neal A. Maxwell, e pei lava o le “faatalanoaina o Iuta ina ia malamalama ia Iesu. O tagata pepelo e masani lava ona latou tau mai ia i tatou nisi mea e uiga ia i latou nai lo le mea lea ua latou o ese mai ai.”¹¹

Na fetalai mai Iesu, “Ia outou faamanuia atu i e ua fetuu mai ia te outou, … ma tatalo mo e ua tuuai fua mai ma faasaua mai ia te outou.”¹² Sei o tatou agalelei atu ia i latou o loo faitioina Iosefa Samita, ma iloa i o tatou lava loto o ia o se perofeta a le Atua ma maua le mafanafana e faapea o nei mea uma ua leva ona muai tau mai e Moronae.

E tatau faapefea ona tatou tali atu i se tagata sailiili faamaoni o le e popole i manatu le lelei sa ia faalogo pe faitau i ai e uiga i le Perofeta o Iosefa Samita? O le mea moni, tatou te talisapaia pea e le aunoa fesili faamaoni ma taua.

O fesili e uiga i le tulaga faaletagata o Iosefa, lea ou te fia faasoa atu ai ni upu a le faitau afe o e sa iloa patino o ia ma o e sa tuuina atu o latou ola mo le galuega lea sa ia fesoasoani e faatulaga. O Ioane Teila, lea e faafa ona fanaina e tagata leaga ia na fasiotia Iosefa, sa tautino mulimuli mai: “Ou te tautino atu i luma o le Atua, agelu, ma tagata, o [Iosefa] o se tagata lelei, mamalu, ma le amioatua— … [ma] o ona uiga patino na faaalia i tagata lautele e mama atoatoa—ma sa soifua ma ola o se tagata o le Atua.”¹³

Atonu tatou te faamanatu atu i le tagata suesue faamaoni o faamatalaga o loo i le Initoneti e le o faamamaeseina ai ia faamatalaga le “sa’o”. O nisi faamatalaga, e tusa lava po o le a le faatalitonuina, e le moni lava.

I tausaga ua mavae sa ou faitau ai i se tusiga i le mekasini o le Time lea sa lipotia mai ai le mauaina o se tusi, masalo sa tusia e Matini Harisi, lea na feteenai ma le tala a Iosefa Samita e uiga i le mauaina o papatusi o le Tusi a Mamona.¹⁴

Sa tuua e nisi tagata le Ekalesia ona o lenei tusiga.¹⁵

O le mea e faanoanoa ai, sa vave tele ona latou o ese. I nai masina mulimuli ane na maua ai e tagata atamamai (ma sa tautino mai lava le tagata taufaasese) e matua pepelo lava le tusi.¹⁶ Atonu e mafai ona e fesiligia ma le iloa mea e te faalogo i ai i luga o talafou, ae e le tatau lava ona e masalosalo i le molimau a perofeta a le Atua.

Atonu e mafai ona tatou faamanatu atu i le tagata suesue faamaoni e faapea o nisi o faamatalaga e uiga ia Iosefa, e ui e moni, ae atonu o loo ono matua ese lava le talaaga i lena taimi ma le tulaga.

Sa faailoa mai e Elder Russell M. Nelson le manatu lenei. Sa ia saunoa mai: “Sa ou galue o se faufautua i le malo o le Iunaite Setete i lona Nofoaga Autu o le Malo mo le Faaitiitia o Faamai i Atlanta, Georgia. I se tasi taimi a o faatalitali se taavale laupasese ou te alu ai i le malae vaalele ina ua uma le matou fonotaga, sa ou fālōlō i luga o le mutia ina ia mitiīa sina sulu o le la a o lei toe foi atu i le tau malulu o Iuta. … Sa ou mauaina mulimuli ane se ata mai le meli na pueina e se tagata pueata e faaaoga ai se meapueata pue mamao, lea na maua ai le taimi o ou malolo ai i luga o le mutia. I lalo ifo sa i ai le faaupuga, ‘Faufautua a le Malo i le Nofoaga Autu o le Malo.’ Na sa’o le ata, na sa’o le faaupuga, ae sa faaaoga le mea moni ina ia aumaia ai se lagona sese.”¹⁷ Tatou te le lafoaia se mea ua tatou iloa e moni ona o se mea tatou te le o malamalama i ai.

E mafai ona tatou faamanatu atu i le tagata suesue faamaoni sa le na o Iosefa na i ai i le taimi o le asiasiga a agelu.

Sa tusia e molimau o le Tusi a Mamona: “Matou te tautino atu i upu faamaoni, sa afio mai se agelu a le Atua mai le lagi, sa … matou vaai ma iloa ai papatusi.”¹⁸ E mafai foi ona tatou sii atu le tele o isi mau.¹⁹

E tatau ona vaai le tagata suesue faamaoni i le faasalalau atu o le talalelei toefuataiina o se fua o le galuega a le Alii e ala mai le Perofeta.

Ua silia nei ma le 29,000 faalapotopotoga ma le 88,000 faifeautalai o loo aoao atua le talalelei i le salafa o le lalolagi. E faitau miliona le Au Paia o Aso e Gata Ai o loo saili ia mulimuli ia Iesu Keriso, ola i ni olaga faamamaluina, tausia e matitiva, ma tuu atu o latou taimi ma taleni e fesoasoani ai i isi.

Sa fetalai mai Iesu:

“E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. …

“ … O lea foi tou te iloa ai i latou i o latou fua.”²⁰

O nei faamatalaga e faatalitonuina [le tagata], ae e le tatau i le tagata suesue faamaoni ona faalagolago atoatoa i ai e faamalie ai lana sailiiliga mo le mea moni.

E manaomia e tagata talitonu taitasi se faamaoniga faaleagaga e uiga i le misiona paia ma le ituaiga tagata e i ai le Perofeta o Iosefa Samita. E moni lenei mea mo augatupulaga uma. O fesili faaleagaga e talafeagai i ai tali faaleagaga mai le Atua.

Talu ai nei a o ou i ai i le Talafatai i Sasae o le Iunaite Setete, sa talanoa mai ai se faifeautalai ua maea lana misiona e uiga i se uo ua amata ona le mautonu i faamatalaga sa ia mauaina e uiga i le Perofeta o Iosefa Samita. Sa la talanoa i le tele o taimi, ma sa foliga mai ua i ai foi ni masalosaloga o le faifeautalai foi ia e mafua mai i a la talanoaga.

E ui sa ou faamoemoe ina ia mafai ona ia faamalosia lana uo, ae sa ou lagona le popole mo lana lava ia molimau. Uso e ma tuafafine, ou te fia tuuina atu ia te outou se lapataiga: e leai sou aoga i isi pe afai e le o mautu lou foi faatuatua.

O nai vaiaso ua tea sa ou lele ai i se vaalele mo Amerika i Saute. Sa faataulai atu e le teine o le vaalele lo matou gauai i se vitio mo le saogalemu. “E ono le tupu,” sa lapataia ai i matou, “ae afai e suia le malosi o le ea i totonu o le vaalele, o le a matala mai puipui i luga ae o lou nofoa, e faailoa mai ai le mea manava okesene. Afai e tupu lenei mea, aapa atu i luga ma toso mai le mea manava ia te oe. Tuu le mea manava i lou isu ma lou fofoga. Faamaulu le manoa memei i luga o lou ulu ma fetuunai le mea manava pe a manaomia.” Ona sau lea o le lapataiga lenei: “Ia faamautinoa e faamaulu muamua lau oe lava mea manava ae e te lei fesoasoani atu i se isi.”

O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio Mai Faalua o le Faaola. O faamatalaga taufaasese ma tala pepelo maaleale o le a le faaitiitia. O le a i ai tagata o le aiga ma uo o le a manaomiaina lau fesoasoani. O le taimi lenei e fetuunai ai lau oe lava mea manava okesene faaleagaga ina ia e saunia e fesoasoani atu i isi o e o sailia le mea moni.²¹

E mafai ona eseese tulaga e oo mai ai ia i tatou taitoatasi se molimau i le Perofeta o Iosefa Samita. Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta e uiga i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. E mafai ona oo mai a o e tuuina atu lau lava molimau e uiga i le Perofeta pe a o e tu i le malumalu ma iloaina ua toefuatai mai i le lalolagi le mana o faamauga e ala mai ia Iosefa Samita.²² O le faatuatua ma le loto faamaoni, o le a faamalosia ai lau molimau i le Perofeta o Iosefa Samita. O le faifai pea o le taaalo i paluni vai i mea o loo e fiafia e fai atonu e te susu ai i nisi taimi, ae e matua le manaomia lava ona tapeina ai le musaesae o lou faatuatua.

Mo le autalavou o loo faalogologo mai i lenei aso pe o faitauina nei upu i aso o i luma, ou te tuuina atu se lui faapitoa: Ia maua sau oe lava molimau e uiga i le Perofeta o Iosefa Samita. Tuu atu lou leo e fesoasoani i le faataunuuina o upu faavaloaga a Moronae ina ia tautala i upu lelei e uiga i le Perofeta. O manatu nei e lua: Muamua, saili ni mau i le Tusi a Mamona e te lagona ma iloa e matuai moni lava. Ona faasoa atu lea i le aiga ma uo i le afiafi faaleaiga, seminare, ma a outou vasega o Alii ma Tamaitai Talavou, faailoa atu o Iosefa sa avea ma se meafaigaluega i aao o le Atua. Ma le isi, faitau le molimau a le Perofeta o Iosefa Samita i le Penina Tau Tele po o i totonu o lenei tusitaulima, lea ua maua i le 158 gagana. E mafai ona e mauaina i luga o le initoneti i le LDS.org po o faifeautalai. O le molimau lenei a Iosefa e uiga i le mea tonu lava na tupu. Faitau soo i ai. Mafaufau e pue le molimau a Iosefa Samita i lou lava leo, faalogologo soo i ai, ma faasoa atu ma au uo. O le faalogologo i le molimau a le Perofeta i lou lava leo o le a fesoasoani e aumaia le molimau o e sailia.

Ata

Photos of Joseph Smith pamphlet for Elder Andersen's talk in Nov. 2014

O loo i ai ni aso sili ma matagofie o i luma atu. Sa saunoa mai Peresitene Thomas S. Monson: “O lenei galuega sili … o le a faaauau pea ona agai i luma, e suia ma faamanuiaina ai olaga. … E leai se malosiaga i le lalolagi atoa e mafai ona taofia le galuega a le Atua. Po o le a lava le mea e oo mai, o le a agai pea i luma lenei galuega tele.”²³

Ou te tuu atu lau molimau o Iesu o le Keriso, lo tatou Faaola ma le Togiola. Sa Ia filifilia se tamalii paia, se tamalii amiotonu, e taitaiina le Toefuataiga o le atoaga o Lana talalelei. Sa Ia filifilia Iosefa Samita.

Ou te molimau atu o Iosefa Samita sa avea o se tamalii faamaoni ma amiomama, o se soo o le Alii o Iesu Keriso. Na faaali le Atua le Tama ma Lona Alo, o Iesu Keriso ia te ia. Sa ia faaliliuina le Tusi a Mamona e ala i le meaalofa ma le mana o le Atua.

A tatou feoti, o le a manino lo tatou malamalama i le valaauga paia ma le misiona paia a le Perofeta o Iosefa Samita. I lena aso e le o toe mamao, o oe ma au ma le “tele e toe vaai ia ‘Uso Iosefa’.”²⁴ I le suafa o Iesu Keriso, amene.