Ua Neej Raws Li cov Yaj Saub tej Lus

Peb Leej Txiv Saum Ntuj Ceeb Tsheej hlub tag nrho Nws cov me nyuam thiab xav kom lawv paub thiab to taub Nws txoj hau kev zoo siab. Yog li ntawd, Nws hu cov yaj saub, cov uas Nws muab hwj chim thiab txoj cai rau kom pab cawm Nws cov me nyuam los ntawm Vajtswv lub npe. Lawv yog cov tub xa xov ntawm kev ncaj ncees, cov tim khawv txog Yexus Khetos thiab lub hwj chim los ntawm Nws txoj Kev Theej Txhoj. Lawv muaj cov yuam sij ntawm Vajtswv lub nceeg vaj nyob hauv lub ntiaj teb thiab tso cai ua cov kab ke cawm seej.

Nyob hauv tus Tswv lub Koom Txoos, “Hauv ib lub sij hawm twg tsuas muaj ib tug neeg hauv ntiaj teb no uas tau txais lub hwj chim thiab cov yuam sij rau lub pov thawj hwj.”¹ Peb txhawb nqa Thawj Tswj Hwm Thomas S. Monson ua peb tus yaj saub, tus pom tau, thiab tus txais kev tshwm sim. Nws tshwm sim tus Tswv txoj lus rau peb thiab coj peb lub Koom Txoos tag nrho. Thawj Tswj Hwm J. Reuben Clark Jr. piav hais tias, “Thawj Tswj Hwm ntawm lub Koom Txoos … tib leeg muaj cai txais kev tshwm sim rau lub Koom Txoos.”²

Hais txog tus yaj saub, tus Tswv txib cov neeg ntawm Nws lub Koom Txoos hais tias:

Peb yuav tsum ua raws li tag nrho nws tej lus thiab lus txib uas nws yuav muab rau peb thaum peb txais tau tej ntawd, ua neej kom dawb huv tag nrho rau ntawm tus Tswv qhov muag;

Vim peb yuav tau txais nws txoj lus, zoo ib yam li los kiag ntawm tus Tswv lub qhov ncauj los, nrog tag nrho txoj kev ua siab ntev thiab kev ntseeg.

Vim los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej peb.³

Yog peb xav ua neej raws li Vajtswv tej hom phiaj, peb yuav tsum txhawb nqa tus yaj saub thiab xaiv ua neej raws li nws tej lus.

Peb kuj txhawb nqa Thawj Tswj Hwm Monson ob tug pab cuam thiab Pawg Kaum Ob tug Thwj Tim ua cov yaj saub, cov pom tau, thiab cov qhia kev tshwm sim. Lawv muaj hwj chim thiab txoj cai tshaj tawm [tus Tswv] lub siab nyiam … , raws li … Thawj Tswj Hwm ntawm lub Koom Txoos pom zoo.⁴ Lawv tuav Yexus Khetos lub npe hais lus. Lawv tuav Yexus Khetos lub npe qhia tej yuav muaj los yav tom ntej. Lawv tuav Yexus Khetos lub npe ua txhua yam. Los ntawm lawv tej lus peb hnov tus Tswv lub suab thiab paub txog tus Cawm Seej txoj kev hlub. “Thiab txhua yam uas lawv hais thaum tus Vaj Ntsuj Plig Dawb Huv tshoov lawv lub siab yog vaj lug kub … thiab Vajtswv lub hwj chim rau kev cawm seej.”⁵ Tus Tswv tau hais tias, Txawm yog los ntawm Nws lub suab los yog los ntawm Nws cov tub qhe lub suab, yeej zoo ib yam.⁶

Peb zoo siab uas peb muaj ib lub koom txoos uas “ua rau saum lub qua tsev uas [yog cov thwj tim thiab cov yaj saub]. Tus ncej tas ntawd yog Yexus Khetos ntag.”⁷ Tus Tswv lub tsev yog ib lub tsev uas muaj chaw txawb chaw rau, thiab peb yeej paub tias peb yuav tsum mus qhov twg kom txais lus teb rau peb tej lus nug thiab peb yeej paub peb yuav tsum mloog lub suab twg. Peb tsis tas “raws luag qab rau ub rau no.”⁸ Vajtswv muab Nws txoj lus tshwm sim los ntawm Nws cov tub qhe, “kom cov ntseeg paub ua Vajtswv tes hauj lwm; cov ntseeg uas yog Yexus Khetos lub cev thiaj li yuav txawj loj hlob zuj zus: mus txog thaum peb sawv daws ua tau ib lub siab, ntseeg ib yam nkaus, paub tseeb Vajtswv tus Tub.”⁹ Thaum peb xaiv ua raws li cov yaj saub tej lus, peb taug kev uas mus rau txoj sia nyob mus ib txhis raws li peb tau khi lus.

Los ntawm ib tug poj ntsuam uas khwv nrhiav noj nrhiav haus thaum muaj kev tshaib kev nqhis, peb kawm hais tias kev txhawb nqa ib tug yaj saub txhais li cas. Tus Tswv qhia tus yaj saub Eliyas mus rau Xalefas, es nyob ntawd nws yuav nrhiav tau ib tug poj ntsuam uas Vajtswv txib kom txhawb nqa nws. Thaum Eliyas los txog lub nroog ntawd, nws pom tus poj ntsuam khaws taws. Nws hais rau tus poj ntsuam hais tias, “Thov koj nqa me ntsis dej tuaj pub rau kuv haus.”¹⁰

“Thaum tus poj ntsuam tab tom rov mus nqa dej, Eliyas txawm hu hais tias, Thov nqa mentsis mov tuaj pub kuv noj thiab.

“Nws teb hais tias, Kuv thov cog lus rau tus Tswv, … hais tias, kuv tsis muaj mov lawm. Kuv tsuas tshuav ib nyuag taus hmoov nplej nyob hauv tais thiab ib qho nyuag roj txiv ntoo nyob hauv qab hub lawm xwb. Kuv tuaj khaws taws coj mus rauv ua qhov nyuag hmoov nplej ntawd rau kuv thiab kuv tus tub noj. Pluas mov no yog pluas mov kawg, ces wb tos tuag lawm xwb.”

Eliyas teb hais tias, “Koj tsis txhob txhawj, cia li mus ua koj pluas hmo. Tiam sis xub ua ib qho me me nqa tuaj rau kuv noj tso, koj mam li rov mus muab qhov seem ua rau koj thiab koj tus tub noj.”¹¹

Cia li xav seb qhov uas tus yaj saub hais kom ib tug niam tsev uas tuag tshaib ua, nyuaj npaum li cas. Muaj tseeb tiag, Vajtswv muaj hwj chim muab zaub mov rau Nws tus tub qhe uas rau siab ntseeg. Tiam sis, Eliyas ua raws li tus Tswv hais, thiab thov kom Vajtswv ib tug ntxhais muab txhua yam tso tseg kom txhawb nqa tus yaj saub.

Tiam sis Eliyas kuj cog lus tias yuav txais tau koob hmoov vim nws mloog lus: “Vim tus Tswv uas yog Ixayees tus Vajtswv hais li no: Cov hmoov nplej hauv lub tais yuav tsis paub tas thiab cov roj hauv lub hub yuav tsis paub qhuav.”¹² Tus Tswv muab cib fim rau tus poj ntsuam ntseeg thiab mloog tus yaj saub lus.

Nyob hauv ib lub ntiaj teb uas raug kev tshaib kev nqhis ntawm kev ncaj ncees thiab sab ntsuj plig, Vajtswv txib peb kom peb txhawb nqa tus yaj saub. Thaum peb ua raws li thiab pom zoo rau cov yaj saub tej lus, peb ua tim khawv hais tias peb muaj kev ntseeg txaus kom txo hwj chim ua raws li tus Tswv lub siab nyiam, lub tswv yim, raws li lub sij hawm uas tus Tswv teem tseg.

Peb ua raws li cov yaj saub hais txawm yog qhov ntawd txawv heev, tsis yog zoo caij ua, thiab nyuaj rau peb ua. Raws li neeg ntiaj teb xav, tej zaum kev mloog tus yaj saub lus yog ib qho uas neeg tsis nyiam, los yog tsis pom zoo rau. Tiam sis kev mloog tus yaj saub lus yeej yog qhov yog. “Lub ntuj nyob siab lub ntiaj teb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd.”¹³ “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.”¹⁴

Tus Tswv pom zoo rau cov uas yuav ua raws li tus yaj saub hais. Qhov uas tus poj ntsuam nyob hauv Xalefas mloog Eliyas lus cawm nws lub neej thiab nws tus tub lub neej. Raws li tus yaj saub tau cog lus hais tias, “[nws, thiab nws tus tub, thiab nws tsev neeg] thiaj muaj mov txaus noj ntau hnub … raws li tus Tswv [tau hais].”¹⁵

Tus Tswv yuav “pub mov rau cov uas ntseeg Nws.”¹⁶ Cov yaj saub tej lus zoo li manas rau peb sab ntsuj plig. Thaum peb mloog, Vajtswv foom koob hmoov, pov hwm, thiab saib xyuas peb ntawm sab cev nqaij daim tawv thiab sab ntsuj plig. Thaum peb mloog ntsoov lawv tej lus, peb paub yuav ua li cas kom los cuag Khetos thiab ua neej.

Txwj Laug Bruce R. McConkie sau hais tias dhau ntawm cov yaj saub “tus Tswv muab qhov tseeb ntawm txoj kev cawm seej tshwm sim; … txoj kev Cawm Seej los ntawm Khetos; thiab nws qhia kev … mus rau txoj sia nyob mus ib txhis. … Hauv txhua lub caij nyoog, tus Tswv coj lawv kev thaum twg muaj xwm txheej thiab teeb meem. Thiab thaum yav tom ntej yuav muaj tej lub sij hawm thaum tsuas muaj Vajtswv lub tswv yim, uas los saum ntuj los thiab tawm hauv cov yaj saub lub qhov ncauj los, uas yuav cawm tau nws cov neeg.”¹⁷

Rau kuv, cov yaj saub tej lus uas kuv tus xib hwb Laurel qhia kuv tau pab kuv paub tias kev sib yuav los ntawm kev khi lus yuav zoo li cas. Cov yaj saub tej lus ua rau kuv muaj kev ntseeg thiab kev cia siab hais tias kuv yuav tsum npaj kom thiaj li muaj ib tsev neeg zoo siab. Qhov uas kuv kawm cov yaj saub tej lus qhia, tsis hais thaum ub thiab niaj hnub no, tau txhawb nqa kuv tau ntau xyoo thaum kuv tu, qhia, thiab saib xyuas xya tus me nyuam. Cov yaj saub tej lus nyob hauv cov vaj lug kub thiab cov lus uas lawv hais los ntawm lub sam thiaj no yog tej lus ntawm kev nplij siab, kev hlub, kev txhawb zog, thiab kev zoo siab uas pab peb txhua tus.

Thaum peb ua raws li cov yaj saub tej lus, peb txhim tsa peb lub tsev thiab peb lub neej rau saum ib lub hauv paus uas ruaj khov mus ib txhis, “lub pob zeb uas yog peb tus Txhiv Dim, tus uas yog Khetos, Vajtswv Leej Tub, …; xwv kom thaum tus dab yuav xa nws tej cua muaj zog, muaj tseeb tiag, nws tej xub nyob hauv tej cua moj lwg kaw, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom luag tau neb nqis mus rau … txoj kev nyuaj siab thiab txom nyem uas tsis muaj qhov kawg.”¹⁸

Peb muaj kev ywj siab xaiv. Peb muaj kev ywj siab xaiv kom tsis quav ntsej, muab tso tseg, muab thuam, los yog ntxeev siab rau tej lus uas Yexus Khetos hais dhau los ntawm Nws cov tub qhe. Tiam sis tus Cawm Seej qhia hais tias yuav muab cov uas ua li no txiav tawm ntawm Nws cov neeg khi lus.¹⁹

Thaum peb thov Vajtswv thiab nyeem cov yaj saub tej lus nrog kev ntseeg Yexus Khetos, thiab thov tiag tiag, tus Vaj Ntsuj Plig Dawb Huv yuav qhia qhov tseeb rau peb lub siab lub ntsws. Thov kom peb yuav qhib pob ntseg mloog, thiab qhib peb lub siab kom to taub, thiab kom yuav muab Vajtswv tej txuj ci uas neeg tsis paub txog nthuav tawm rau peb saib.²⁰

Kuv ua tim khawv hais tias Yauxej Xamiv yog tus yaj saub uas Vajtswv hu kom muab Yexus Khetos txoj moo zoo thiab lub pov thawj hwj txum tim rov qab los rau hauv lub ntiaj teb. Thiab kuv ua tim khawv tias Thawj Tswj Hwm Monson yog Vajtswv tus yaj saub niaj hnub no uas coj peb txoj hau kev. Thov kom peb yuav xaiv sawv nrog cov yaj saub thiab ua raws li lawv tej lus mus txog thaum peb koom siab muaj kev ntseeg, rais los ua neeg huv dhau ntawm Yexus Khetos, thiab paub zoo txog Vajtswv Leej Tub. Los ntawm Yexus Khetos lub npe dawb ceev, amees.