Mour Ekkar n̄an Naan ko an Rikanaan ro

Jemed Ilan̄ ej iakwe ro Nejin im kōņaan bwe ren jeļā im meļeļe kōn karōk in m̧ōņōņō eo An eļap. Kōn menin, Eaar kūr rikanaan ro, ro raar kālet kōn kajoor im mālim n̄an jerbal ilo etan Anij n̄an lo̧mo̧o̧r an ro Nejin. Er rej riboktok ennaan kōn wānōk, rikam̧ool an Jisōs Kraist im kajoor in An Pinmuur. Rej kabwijer ki ko ki in aelōn̄ in kiin̄ eo an Anij ioon laļ im kōmālim jerbal n̄an jerbali kain̄i ko.

Ilo Kabun̄ eo em̧ool an Irooj, eaar wōr wōt juon armej ioon laļ ilo juon tōre me kar leļo̧k kajoor in im kii ko an priesthood ioon.¹ Jej rejtak e Būreejtōn Thomas  S. Monson āinwōt ad rikanaan, rilolo, im rikwaļo̧k revelesōn. Ej kwaļo̧k naan an Irooj n̄an tōl im kōjeikiik aolepān Kabun̄ eo ad. Āinwōt Būreejtōn J.  Reuben Clark eaar kōmeļeļeiki, E Make ewōr an maron̄ n̄an bōk revelesōn ko n̄an Kabun̄ in  … ak jāniji ilo jabdewōt wāween katak ko rej waļo̧k an Kabun̄ in.”²

Ikijeen rikanaan eo emour, Irooj eaar kean̄ armej ro ilo Kabun̄ eo An:

Eaar kean̄ bwe jej eo̧ron̄ aolep naan ko im kien ko rikanaan eo ej letok n̄an kōj ilo an būki, etetal ilo aolep kwojarjar im̧aan Irooj;

Jej aikuj būki naan ko an rikanaan ro āinwōt n̄e rej jān lo̧n̄iin Irooj make, ilo aolep kijenmej im tōmak.

N̄e jej kōm̧m̧ani men kein, kōjam̧ ko an hell ej jamin jum̧aeik kōj.³

N̄an jokkin wōt juon ippān kōttōpar ko rekwojarjar an lan̄, jej aikuj rejtak e rikanaan eo im kālet n̄an mour ekkar n̄an naan ko an.

Jej bar rejtake rikakpilōklōk ro an Būreejtōn Monson im Doulul eo an Jon̄oulruo Rijilōk ro āinwōt rikanaan ro, rilolo, rikwaļo̧k revelesōn ro. “Ewōr aer maron̄, kajoor im mālim n̄an kwaļo̧k ļōmņak im ankilaan [Irooj] … , ekkatak n̄an  … Būreejtōn eo an Kabun̄ in.”⁴ Rej kōnono ilo etan Jisōs. Rej kanaan ilo etan Jisōs. Rej kōm̧m̧an men otemjeļo̧k ilo etan Jisōs Kraist. Ilo naan ko aer jej en̄jake iakwe an Rilo̧mo̧or. Irooj eaar ba bwe jabdewōt men ro karejeran rej kōnono kaki n̄e em̧m̧akūt kōn Jetōb Kwojarjar … im kajoor an Anij n̄an lo̧mo̧o̧r.⁵ Irooj make eaar kōnono men̄e jān ainikiō make ak ainikien ro rikalora, ejja in āinwōt.⁶

Jej m̧ōņōņō kōn juon kabun̄ eo ej “ekkal ion juon pedped an rijilōk im rikanaan ro, Jisōs Kraist make lukkuun dem̧an jabōn em̧.”⁷ Im̧ōn Irooj ej im̧ōn kōllaajrak, im jejjab aikuj po kōn ia n̄an pukōt uwaak in kajjitōk ko ad im ak jaje ainikein ta n̄an ļoore. Jejjab aikuj ‟jeplōklōk jen im ñan, im m̧akūtkūt kōn jabdewōt kōto in katak”⁸Anij ej kwaļo̧k An naan kōn ro karejeran kāleti. ‟Bwe en koweeppānļo̧k ro rem̧m̧an, kōn jerbal in kwaļo̧k, ñan kalōk ānbwinnen Kraist: m̧ae adwōj tōpare juon wōt tōmak, im jeļā kōn Nejin Anij”⁹ Eļan̄n̄e jej kālet n̄an mour ekkar n̄an naan ko an rikanaan ro, jej pād ilo iaļen bujen me ej tōl ļok n̄an wāppen indeeo.

Jān juon jinen eo emake iaan im en̄taan n̄an pukōt mour ilo juon n̄ita, jej katak ta meļeļe n̄an rejtak e juon rikanaan. Irooj eaar jiron̄ rikanaan Ilaija n̄an etal ñan Zarephath, ijo enaaj kar lo juon kōrā ejako pāleen eo Anij eaar jiroñe bwe en pokake. Ke Ilaija ej tōparļo̧k jikin eo, ear lo an ae kane. Eaar kūr n̄an lio im ba, ‟Kwōn bōktok, ij akweļap, jidik dān ilo juon kap bwe in maroñ idaak”¹⁰

‟Im ke ej ilen bōktok, ear kūr n̄an e im ba, ‟kwōn bōktok ñan eō, ij akweļap, jidik m̧ōttan pilawe ilo peim̧.

‟Im lio ear ba, Āinwōt Jeova am̧ Anij e mour, ejjeļo̧k pilawe ippa, a ewōr wōt jidik pilawā amej ilo nien pilawā eo,im jidik oil ilo bato eo. Im lo ij aini ruo aļaļ bwe in deļo̧n̄ im kōmate n̄an kōmro ļadik eo nejū bwe kōmin kan̄e, im mej.”

Ilaija eaar uwaak, ‟Kwōn jab mijak, kwōn ilen kōm̧m̧an āinwōt am̧ ba, a kwōn kōm̧m̧an jān e juon aō kek e edikm̧okta, im bōktok n̄an eō, im tokālik kwōn kōm̧m̧an n̄an kwe im ļadik e nejim̧”¹¹

Ļōmņak jidik kōn ta eo epen rikanaan eo eaar kajjitōkin juon jinen ekwole n̄an kōm̧m̧ane. M̧ool, Anij make emaron̄ letok m̧ōn̄ā n̄an Karejeran ro rej tōmak. Ak jerbal ilo etan Irooj, Ilaija eaar kōm̧m̧an āinwōt kar jiron̄e, eo kar kajjjitōkin juon leddik jitenbōro nejin Anij n̄an wujlepļo̧k ta eo emaron̄ n̄an rejtake rikanaan eo.

Ak Eli barāinwōt eaar kalim̧m̧ur kōn juon kōjeram̧m̧an kōn pokake: ‟Bwe āindein an Jeova, Anij in Israel ba, ‟Pilawā amej eo ejāmin dikļo̧k ilo nien, im ejāmin jako oil jān bato eo, m̧ae raan eo n̄e Jeova ej jilkinļo̧k wōt ioon āneo.”¹² Irooj eaar leļo̧k n̄an kōrā eo emej pāleen iien em̧m̧an n̄an kālet n̄an tōmak im pokake naan ko an rikanaan eo.

Ilo juon laļ epād ilo kautwōtata kōn wānōk im kwoļe ilo jetōb, em̧ōj kar jiron̄ kōj n̄an rejtak e rikanaan eo. Ilo ad ron̄jake im bōbrae, im kapen naan in kanaan, jej kam̧ool bwe ewōr ad tōmak n̄an kōttāik kōj ekkar n̄an ankilaan, mālōtlōt,imiien an Irooj.

Jej ron̄jake naan in kanaan men̄e ejekkar, eabañ, im ekabōnōnō. Ekkar n̄an jon̄ak ko an laļ in, ļoor rikanaan eo emaron̄ jab bun̄bun̄, bōd ilo kien, ak ban kabuñburuwōn ro mōttad. Ak ļoor rikanaan eo iien otemjej ejim̧we. ‟Bwe āinwōt lan̄ ko reuteij jān laļ āindein iaļ ko Aō re uteij jān iaļ ko am̧i, im ļōmņak ko Aō jān ļōmņak ko ami.‟¹³ “Kwōn lōke Jeova kōn aolepen būruom̧, im kwōn jab atartar ioon jeļāļo̧kjeņ eo am̧.”¹⁴

Irooj enaaj kauteij im nōbar ro me renaaj rōnjake kanaan in tōl. N̄an kōrā eo emej pāleen ilo Zarepat, pokake Ilaija eaar lo̧mo̧o̧r e im mour eo an ļaddik eo nejin. Āinwōt an kar rikanaan eo kalim̧m̧ur, ‟Im leo im lio, im rim̧weo im̧ōn, raar m̧ōn̄ā ium̧win elōn̄ raan … ekkar n̄an naan an Jeova, eo ar konono kōn Ilaija.”¹⁵

‟Irooj enaaj naajdik ro rej leke E.”¹⁶ Naan ko an rikanaan ro rej āinwōt m̧ōn̄a n̄an jetōb ko ad. Eļan̄n̄e jej bōk m̧ōttan, jej jeram̧m̧an, kōjparok, im kōjparōk ilo ānbwin im jetōb. N̄e jej naajdik naan ko aer, jej katak wāween in itok n̄an Kraist im mour.

Elder Bruce R. McConkie eaar jeje bwe kōn rikanaan ro ‟Irooj ej kwaļo̧k m̧ool eo ilo lo̧mo̧o̧r … lo̧mo̧o̧r eo me epād ilo Kraist; im ej kwaļo̧k … iaļ eo ej tōl n̄an mour indeeo. …. Ilo aolep epepen. Irooj ej leļok n̄an armej ro an tōl eo raikuji ilo iien apan̄ im kauwōtata. Im m̧ool ilju im jekļaj enaaj wōr iien ko m̧e ejjeļo̧k jabdewōt ak mālōtlōt an Anij, wanlaļtak jān lan̄ im kōnono kake jān rikanaan ro, naaj maron̄ lomo̧o̧re armej ro an.”¹⁷

N̄an ña, naan ko an rikanaan kar katakin jān rūkaki eo aō ilo Laurel kar letok n̄an eō juon ettōņak kōn ta bujen m̧are aikuj āinwōt. Naan ko an rikanaan ro kar letok n̄an eō tōmak im kōjatdikdik bwe In maron̄ manjappopo n̄an ejaake juon kapijuknen elem̧ōņōņō. An emakijkij in ekkatak kōn katak ko an rikanaan ro, jim̧or etto im raan kein, ekar jipañ eō ium̧win iiō in karūttoļo̧k, katakin, im kōkaajririik jiljilimjuon ajri ro. Naan ko an rikanaan ro ilo jeje ko rekwojarjar im katakin jān lokatok in rej naan in kaenōm̧m̧an, iakwe, kōkajoor, im lem̧ōņōņō me ekitbuuj kōj aolep.

Eļan̄n̄e jej ron̄jake naan ko an rikanaan ro, jej kalek m̧ōko m̧ōd im mour ko ad ioon pedped in m̧ool indeeo, ‟Ejm̧aan in ad Ripinmuur, eo ej Kraist, eo nejin Anij, … bwe kom̧ij aikuj kalek pedped ko ami; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļļok eok n̄an ron̄ in būrom̧ōj im wo ejjeļo̧k jem̧ļokin.”¹⁸

Ewōr ad kālet. Jemaron̄ kālet n̄an kaarmejete, kajejtokjen, jujuri, ak jum̧ae naan ko an Kraist kōnono kaki jān ro karejeran kar kapit er. Ak Rilomo̧o̧r eaar katakin ro me renaaj kōm̧m̧an āindein naaj jolo̧k er jān armej in bujen ro An.¹⁹

Ilo ad lukkuun riit im katak naan in kanaan eo ekwojarjar kōn tōmak ilo Kraist, kōn lukkuun kōņaan, Jetōb Kwojarjar enaaj kōnono m̧ool n̄an kōļmenļo̧kjeņ ko ad im būruōd. Jen maron̄ kōppeļļo̧k ļo̧jiln̄id n̄an ron̄jake, būruōd n̄an meļeļe, im ļōmņak ko ad bwe kabwilōn̄lōn̄ an Anij emaron̄ alikkar n̄an ad lale.²⁰

Ij kwaļo̧k aō kam̧ool bwe Joseph Smith ekar im ej juon rikaan kar kūr jān Anij n̄an kōjepļaaktok gospel eo an Jisōs Kraist im priesthood eo An n̄an laļ in. Im Ij kam̧ool bwe kōn Būreejtōn Monson jej tōl kōn juon rikanaan em̧ool an Anij rainin. Jen maron̄ kālet n̄an jutak ippān rikanaan ro im mour ekkar n̄an naan ko aer m̧ae iien jej koba ippān doon ilo tōmak, erreo ilo Kraist, im obrak kōn jeļāļo̧kjeņ eo an Nejin Anij. Ilo etan Jisōs Kraist, amen.