Edze Asɛmpa no Robɔ Bra Enyigye Mu
President Dieter F. Uchtdorf ne Kasaa
Ɔpamfo a Otsĩa Ebien wɔ President a Odzi Kan na n’Apamfo mu
Hom ntwer Jesus Christ No tum a Ɔgye nkwa no mu; hom nsie Ne mbra na mbrasɛm no. Anaadɛ—hom mfa asɛmpa no mbɔ bra enyigye mu.
Me nkyerɛbaa adɔfo, m’anyɛnkofo pa na Jesus Christ esuafo a woehyira hom, ɔyɛ me enyimnyamhyɛ dɛ menya kwan yi nye hom ehyia ber a yerubue Jesus Christ n’Asɔr a ɔwɔ hɔ ma Nda a Odzi Ekyir Ahotseweefo ne wiadze mfɛndzanan ehyiadzi kor so ano yi. Dapɛn a ɔreba yi mu no President a Odzi Kan na n’Apamfo na Asomafo Duebien no behyia Wiadze Mfɛndzanan Etumdzifo na wiadze mfɛndzanan ekuwekuw banodzifo no nyina, na hɛn wiadze mfɛndzanan ehyiadzi ne nhyiamu nkaa no bɛba do Memenda na Kwesida a ɔreba no. Ɔyɛ me enyisɔ kɛse dɛ President Thomas S. Monson, Nyame No nkɔnhyɛnyi ma hɛn mber yi, ɔase me dɛ mingyina Presidency a Odzi Kan no ananmu nkasa nkyerɛ Asɔr no mu nkyerɛbaa no.
Ber a morodwendwen dza mubotum akã ho no, m’adwen kɔr ekyir kɛdaa mbaa a wɔaboa adandan m’abrabɔ na wɔaboa me ma medua abrabɔ no nkõdzen mu no hɔn do. Ɔyɛ me enyisɔ dɛ me nanabasia mfe du mfe du a wɔabɛsen kɔ no, ɔbɔɔ adwenpɔw dɛ ɔnye n’ebusua bɔkɔ Mormon sacrament som nhyiamu. M’enyi sɔ Akyerɛbaa Ewig, German ewuraba ɔhokwafo bi a, ne dzin ne Ngyiresi Borɔfo kasa nkyerɛasee nye “Akyerɛbaa Onnyiewiei.” Ɔno na ɔtoo nsa akokodur na nwanwa mu frɛɛ me nanabasia no. Ɔyɛ me enyisɔ so yie dɛ me maame dze mbofra baanan twaa Wiadze Ɔkõ Kɛse II ne begya-begyayɛ ber mu no. Modwen me babaa, nana mbabaa, nye ndaamba mbaa mbasantsen a dabi wɔbɔtoa do no hɔn so ho.
Na, nyew, mowɔ enyisɔ a onnyiewiei ma me yer Harriet, ɔno a me mberantsɛber mu no ɔgyee m’akoma, na ɔsoaa hɛn ebusua kumabaa n’adzesoa ne kɛse dɛ enã, nye me gyina anamɔn dɛ ɔyer, na ɔdɔ hɛn mba, mbanana, nye ananasum na wɔsom no bo. Ɔno na ɔayɛ hɛn fie n’ahoɔdzen wɔ mber pa na nkõdzen ber nyina mu. Ɔdze enyigye ne kan hyerɛn hɔn a wonyim no nyina hɔn abrabɔ mu.
Ewiei, mowɔ enyisɔ mapã ma hom nyina, nkyerɛbaa anokwafo a hom wɔ wiadze nyina mu, mfe a hom edzi biara a, hom ayɛ pii dze akyekyer Nyame aheman no. Mowɔ enyisɔ ma hom wɔ akwan horow pii a hom kenyan, dze hyɛ dzen na wohyira hɔn a woetwa homho ehyia no.
Nyame Ne nkyerɛbaa
Ɔyɛ me enyigye dɛ mowɔ Nyame Ne nkyerɛbaa pii finimfin. Sɛ yɛtow ndwom “Meyɛ Nyame ne Ba” a, ndwom no mu nsɛm no hɛn akoma mu. Yɛrodwendwen nokwar yi ho no—dɛ yɛyɛ ɔsor awofo mba no1—dze bea a yefi, hɛn botae, nye hɛn nkrabea ho ntseasee hyɛ hɛn mã.
Oye dɛ ebɛkaa dɛ eyɛ Nyame Ne ba daa nyina. Nyimdzee yi bepegya wo edua abrabɔ mu ber a ndzɛmba ayɛ dzen kɛse papaapa no, na oekenyan wo ma etum ayɛ ndzɛmba a ɔyɛ nwanwa. Naaso, ohia tsitsir dɛ ekaa dɛ eyɛ onnyiewiei awofo hɔn babaa no nnyɛ abɔdzin a ebrɛɛ ho nyae anaa ebɔhwer no dabiarada. Daa na daapem nyina no ebɔkɔdo ayɛ Nyame Ne babaa. Wo Ɔsor Egya wɔ enyidar kɛse ma wo, mbom dɛ w’ahyɛase fi sor no nko nnkyerɛ dɛ ɔsor egyapadze da hɔ rotweɔn wo. Nyankopɔn somaa wo baa ha dɛ edze besiesie woho ama ndaamba a ɔbor biribiara ibotum esusu ho.
Nhyira ho anohoba a Nyankopɔn dze abɔ anokwafo no yɛ enyimnyam na ɔma nkenyan. Binom nye “ahengua, ahenman, mpanyindzi, na tumdzi, ahendzi, mbea a ɔkrɔn na bun mu nyina.”2 Na ohia dza ɔbor sunsum mu awoo ho dasedzi krataa anaa “Nyame Ne Ba Kuw Krataasin” do ana yɛafata nhyira yinom a ɔtra hɛn ntseasee yi.
Naaso yebesi dɛn na hɛn nsa bɛkã iyinom?
Agyenkwa no ama asɛmbisa yi ho mbuae wɔ hɛn mber yi mu:
“Gyedɛ hom dzi me mbra do, annyɛ dɛm a, hom nnkotum enya enyimnyam yi.
“Osiandɛ abow no yɛ tsẽabaa na nkekãkekã, na kwan no yɛ ketseabaa dze kɔ nkwagye ntowdo. …
“… Dɛm ntsi, hom ngye me mbra.”3
Siantsir yi ntsi, na yɛkasa fa yɛbɛnantsew osũanyiyɛ anamɔn mu.
Yekasa fa setsie ma Nyame Ne mbrasɛm ho.
Yɛkasa fa yɛdze hɛn akoma nyina, hɛn ahoɔdzen, adwen, na hɛn kra nyina dze asɛmpa no bɔbɔ bra enyigye mu ara no ho.
Nyankopɔn Nyim Biribi a Hɛn Yennyim
Naaso, setsie ma Nyame Ne mbrasɛm no nntaa nnyɛ enyigyedze kɛse mma hɛn mu binom no. Hom mma yɛngye nto mu: binom wɔ hɔ a ɔyɛ dɛ ma ɔyɛ dzen anaa ɔnnyɛ akɔndɔ papa—dɛm mbrasɛm no a yɛdze enyimpi dɛ abofra a ɔtsena prɛtse a edziban pa gu mu enyim a, eso ɔmmpɛ no. Yɛtwer hɛn sẽ na yɛhyɛ hɛnho dzi do ama yeetum akɔ akɛyɛ dwumadzi binom a yɛpɛ no yie.
Bi a na mber a ɔtsetse dɛm mu no, yebotum ebisa hɛnho dɛ, “Ana ohia ampara dɛ yebedzi Nyame Ne mbrasɛm ne nyinara do a?”
Mo mbuae wɔ asɛmbisa yi ho no da famu koraa:
Megye midzi dɛ Nyankopɔn nyim biribi a hɛn yennyim—ndzɛmba a ɔbor hɛn adwen do dɛ yɛbɛtse ase! Hɛn Ɔsor Egya yɛ onnyiewiei abɔdze a No sũahu, nyansa, na adwen bɔ hɛn dze do korakoraa.4 Nnyɛ dɛm nko, mbom Ɔwɔ onnyiewiei dɔ na ayamuhyehye, na otsim wɔ adom tsirmpɔw kor do: dɛ [ɔ]dze nyimpa ne bɛkyebo na onnyiewiei nkwa bɔbɔ adze.5
Anaadɛ, nnyɛ dɛ Onyim dza ɔkrɔn ma wo no nko; mbom Ɔdɔ pɛ dɛ ibɛsan mu eyi dza ɔkrɔn ama woho.
Sɛ egye iyi dzi wɔ w’akoma mu a—sɛ egye dzi nokwar ara dɛ hɛn Ɔsor Egya No dwuma kɛse nye dɛ Ne mba benya nkwagye ntowdo na enyimnyam na Onyim kwan a ɔkrɔn a Ɔdze bɛyɛ a—ana ɔnnyɛ nyansadze dɛ yebofua na yeedzi Ne mbrasɛm do a, dza ɔyɛ dɛ mbrɛ ɔyɛ dzen no mpo a? Ana onnyi dɛ kan akwankyerɛdze a Ɔdze ama hɛn dɛ ɔma hɛn kwankyerɛ ma yedua ɔnnkyebo abrabɔ no sum nsɔhwɛ mu no som hɛn bo a? Iyinom na wɔkyerɛ kwan no a yɛdze san kɔ hɛn ɔsor fie no! Sɛ isan mu yi Ɔsor Egya N’anamɔn kwan no a, etow fapem krɔnkrɔn ma wankasa wo kankɔ dɛ Nyame Ne babaa a, ɔbɛyɛ nhyira ama wo wɔ w’abrabɔ nyina mu.
Modwen hu dɛ, dza hɛn taferbanyin-mbɔmu ne fã bi fir dɛ, yesusu dɛ Nyame dze daagow ato Ne nhyira mu wɔ sor mununkum kɛse bi mu, na ɔmmpen dɛ Ɔdze bɛma hɛn gyedɛ yɛayɛ setsie ama mbra ketsee bi a Ɔahyehyɛ ama hɛn no do. Mbom mbrasɛm no nntse dɛm koraa. Nokwar, Ɔsor Egya tɔ nhyira gu hɛn do daa daa. Ɔyɛ hɛn suro, ekyingye, nye bɔn a, wɔayɛ tse dɛ ekyim na osiw nhyira yinom kwan mma wonndu hɛn nkyɛn.
Ne mbrasɛm no yɛ ɔdɔ mu nkyerɛkyerɛ krɔnkrɔn no a wɔboa hɛn ma yemua ekyim no, ama yeetum eenya ɔsor nhyira a ɔtɔ no.
Yehia dɛ yɛgye to mu dɛ Nyame Ne mbrasɛm no nnyɛ adwenkyerɛ pa ara a wɔakyerɛw no tsentsenntsen. Wɔnnyɛ “abrabɔ mu ndaadaasɛm” a ofi Internet do anaa nkenyan ɔserɛkã a ofi Pinterest asoɛe. Wɔyɛ afotu krɔnkrɔn a, ne fapem yɛ onnyiewiei nokwar a, wɔdze ama ma ɔdze “asomdwee ... wɔ wiadze yi mu, nye onnyiewiei nkwa wɔ wiadze a ɔreba no mu”6 brɛɛ hɛn.
Ntsi yɛwɔ nsanmu yi. Ɔfã kor, yɛ wiadze adwenkyerɛ a daa-wɔsesã hɔn adwen nye tsirmpɔw a ekyingye wɔ ho. Ɔfã no ho no, yɛ Nyame N’asɛm a Ɔdze ma Ne mba—Ne nyansaa a onnyiewiei, N’anohoba a otsim, nye Ne nkyerɛkyerɛ ɔdɔ mu a yɛdze bɛsan akɔ Ne nkyɛn wɔ enyimnyam, ɔdɔ na mpanyindzi mu.
Ɔwora san mu yi!
Epo, anhwea, nye nworaba horow a wonnyi ewiei no Bɔfo no Retsen aba wo nkyɛn ndɛ dua yi! Ɔrema wo enyigye, asomdwee, na nkwa a onnyiewiei ho kwankyerɛ kokroko no!
Ama aafata enyimnyam nhyira yinom no, otwar dɛ ebrɛ woho adze, edze gyedzi dzi dwuma, efa Jesus Christ Ne dzin to wo do, ehwehwɛ No wɔ kasa na ndzeyɛɛ mu, na biribiara mu no “[i]gyina dɛ Nyankopɔn [ne] dasefo aber nyina wɔ adze nyina mu, na gyinabew biara mu.”7
Setsie ho Siantsir no
Hom atse Nyankopɔn no nokwar su na Ne mbrasɛm ase no, hom bɛtse hom ankasa homho ase yie nye hom asetsena no krɔnkrɔn botae no. Iyi mu no, wo nkuranhyɛ a edze dzi mbrasɛm no do sesã, na ɔba bɛyɛ mberɛw koraa dɛ edze asɛmpa no bɔ bra enyigye mu ara.
Mfatoho, hɔn a wohu dɛ Asɔr nhyiamu nkɔree no yɛ kwan a hɔn ankasa wɔdze nya ɔdɔ mbordo ama Nyame no, nya asomdwee, wopegya binom, hwehwɛ Sunsum no, na wɔyɛ hɔn pisi fofor dɛ wobedzi Jesus Christ ekyir no, benya sũahu a ɔkrɔn yie a ɔkyɛn hɔn a wɔba bɛtsena Asɔr egua do ara dze hwer mber. Nkyerɛbaa, ohia tsitsir dɛ yɛkɔ Kwesida nhyiamu horow no, mbom megye dzi dɛ hɛn gyedzi na nnuhu fa hɛn Ɔsor Egya ho mpo kyɛn yɛaba ara ma wɔakan hɛn.
Mfatoho kor so nyi:
Ɔbaa hokwafo bi a okita mba nkakramba beenu nyaa chicken pox ndaansa yi. Nokwar, ɔannkyɛr na ne mba no so wɔyaree. Nna edwuma a ɔyɛ dze hwɛ ɔnoara noho na ne mba nkakramba no adɔɔsõ dodow ama enã kumabaa yi. Na, dɛm ntsi, nkyɛ fie a no mu tsew wansann no mu bɛyɛɛ basabasa. Mprɛtse a wɔayɛ fĩ buu do wɔ gyaadze sink no mu, na ntarfĩ ebudo petse beebiara.
Ber a ɔreberɛ ahwɛ ne mba a worusũ no—na ɔnoara so pɛ dɛ osũ no—wɔbɔɔ abow no mu. Nna ɔyɛ ne visiting teacherfo. Nna wotum hu enã kumaa n’ahohiahia no. Nna wotum hu ne fie, ne gyaadze hɔ. Nna wotum tse mbofra no hɔn sũ no.
Afei, sɛ nkyerɛbaa yinom dza ɔfa hɔn ho ara nye dɛ wɔbɛyɛ nsera dwuma a wɔdze ama hɔn bosoom bosoom noara a, nkyɛ wɔbɛma enã no biscuit prɛtse kor, na wɔabɔ do dɛ dapɛn a ɔabɛsen no woennhu no wɔ Relief Society, na wɔakã biribi dɛ, “Sɛ biribi wɔ hɔ a yebotum ayɛ a, ma yɛntse!” Nkyii nkyɛ wɔdze enyigye bɔkɔ hɔn kwan, na wɔada ase dɛ bosoom kor so mu no, woenya 100 ne nkyɛmu ɔha.
Oye ara dɛ, nkyerɛbaa yinom yɛ Christ esuafo anokwafo. Wohun hɔn akyerɛbaa no n’ehiadze no na wɔdze hɔn talent horow na sũahu dzii dwuma. Wosiesiee bea a ayɛ basabasa no, dze kan nye nsiesie baa fie no mu, na wɔfrɛɛ nyɛnko bi dɛ ondzi gua a wohia kɛse no mbra. Ber a wɔdze edwuma no baa ewiei no na wɔkraa no no, wogyaa enã kumabaa no a nna enyisuwa egura no ekyir—enyisɔ nye ɔdɔ enyisuwa a.
Fitsi dɛm ber no dze rokɔ no, enã kumabaa no n’adwen wɔ visiting teaching ho no bɛsesãe. Ɔkãa dɛ, “Mehu dɛ wɔmmba ambasera me dɛ wɔahyɛ hɔn no ara ntsi a.”
Nyew, visiting teacherfo hia dɛ wodzi nokwar kɔ hɔn bosoom bosoom aserasera no a, wɔnnkɛyew siantsir a ohia tsitsir a ɔtae mbrasɛm yi ekyir no: dɛ yɛbɔdɔ Nyankopɔn na hɛn mfɛfo.
Sɛ yebu Nyame Ne mbrasɛm na hɛn kyɛfa dɛ yɛbɛkyekyer N’ahenman no dɛ ndzɛmba ɔsɛ dɛ-yɛyɛ a wɔakyerɛw no tsentsen a yewie kor yɛ a, nna yɛakyerɛw ho a, yɛyew osũanyiyɛ no botae tsitsir no. Yɛyew mpontu a ɔba dɛ yɛdze hɛn Egya a ɔwɔ Sor Ne mbrasɛm no bɔbɔ bra enyigye mu ara no.
Yɛrenantsew osũanyiyɛ ananmɔn mu no nnhia dɛ ɔbɛyɛ sũahu wenwen. Ɔyɛ “dɛw kyɛn eduaba nyina.”8 Ɔnnyɛ adzesoa a ɔhyɛ hɛn do. Osũanyiyɛ pegya hɛn esunsum na ɔkã hɛn akoma to hɛn yamu. Okenyan hɛn gyedzi, enyidado, na ayamuyie. Sum mber mu no ɔdze kan hyɛrɛn hɛn akoma mu mã, na ɔma hɛn asomdwee mapã awerɛhow mber mu.
Ɔma hɛn tum a ofi sor nye enyigye a ɔkyɛr .
Edze Asɛmpa no Robɔ Bra Enyigye Mu
Me nkyerɛbaa adɔfo wɔ asɛmpa no mu, mfe a hom edzi biara no, m’enyidado nye dɛ adze kor a hom bɛtse ase na hom ehu no yie nye dɛ:
Wɔdɔ wo.
Eyɛ wo sor awofo hɔn dɔfo.
Kan nye nkwa Bɔadze a ɔmmbɔadze na onnyiewiei no nyim wo! Eda N’adwen do.
Nyew, Nyankopɔn dɔ wo ndɛ yi ara.
Ɔronntweɔn wo ma ndzi wo mbrɛwyɛ na suban bɔn do konyin ana Ɔadɔ wo. Ɔdɔ wo ndɛ a Ɔtse w’aperdzi nyinara ase yie. Onyim dɛ isũ hwehwɛ No wɔ akoma mu na enyidado mpaabɔ mu. Onyim mber a esuo wo gyedzi a ɔrepa mu dzen—ber a sum mpo remen wo no. Onyim w’amandzehu horow. Onyim wo mfehoekyir wɔ mber nna atɔ sin anaa edzi nkõgu ho. Na Ɔdaho dɔ wo.
Na Nyame nyim wo nkonyimdzi; kansa ɔbɛyɛ wo adze ketseaba mpo a, Ɔda ne nyina edzi na Odzi kor biara ho dɛw. Ɔdɔ wo dɛ etsen woho dze boa binom Ɔdɔ wo dɛ etsen woho na eboa binom ma wɔsoa hɔn adzesoadze a ɔyɛ dur—ber mpo a iridzi aper wɔ wankasa wodze ho.
Onyim biribiara a ɔfa woho. Ohu wo hann—Onyim wo dɛ mbrɛ etse. Na Ɔdɔ wo—ndɛ nye daa!
Ana isusu dɛ w’enyim nsiesie, efuradze, tsinhwi, na awerɛba n’emudziyɛ haw wo Sor Egya a? Ana edwen dɛ wo bo a Ɔsom No no sesã ɔnam w’akãdofo hɔn dodow a wɔwɔ Instagram anaa Pinterest do a? Ana edwen dɛ Ɔpɛ dɛ ehaw wo ho anaa awerɛhow kitsa wo ɔnam dɛ nkorɔfo binom gyaa wo nyɛnkoyɛ anaa wɔannkã wo do bio wɔ Facebook anaa Twitter do a? Ana edwen dɛ wo hwɛbea n’ahoɔfɛw, w’atar ne kɛse anaa w’atsenkãyɛ nya nsonsonee ketseabaa mpo wɔ wo bo a ɔsom Onyia Ɔbɔɔ wiadze nyinara no a?
Nnyɛ wo nyimpa ban a eyɛ no ndɛ yiara nko ntsi na Ɔdɔ wo no, mbom so dɛ enyimnyam na kan nyimpa a ewɔ akwanya na pɛ dɛ ebɛyɛ no ndaamba no.
Ɔpɛ dɛ wo nsa bɛkã wo nkrabea—dɛ ebɛsan akɔ wo sor fie wɔ enyimnyam mu, kyɛn dza w’adwen botum esusu ho da.
Megye dase dɛ kwan a yebotum ayɛ iyi nye dɛ yɛdze hɛn pɛsɛankonya ahwehwɛdze nye botae a ɔmmfata no bogu nkyɛn na yedua etuhoakyɛ do dze som nkaafo. Nkyerɛbaa, hom ntwer Jesus Christ No tum a Ɔgye nkwa no mu; hom nsie Ne mbra na mbrasɛm no. Anaadɛ—hom mfa asɛmpa no mbɔ bra enyigye mu.
Ɔyɛ me mpaabɔ dɛ ibenya sũahu fofor nye Nyankopɔn No dɔ fɛfɛw a no nsusui trɛw no wɔ w’abrabɔ mu; dɛ ibenya gyedzi, tsirmpɔw, na enyimpi dɛ ibosũa Nyame Ne mbrasɛm no, akora do wɔ w’akoma mu, na edze asɛmpa no abɔ bra enyigye mu.
Mobɔ wo anohoba dɛ erokɔ do ireyɛ dɛm no, ibohu bɔbew a ɔkrɔn no—wankasa wo nokwar bɔbew no. Ibɛba ebohu no nokwar mu, dɛ eyɛ daapem Nyankopɔn, tsenenee nyina Ewuradze no Ne babaa no ne nkyerɛasee. Iyi ho na megye dase na megya hom nhyira dɛ Ewuradze No Somafo, wɔ Jesus Christ Ne dzin mu, amen.