Ua Neej Raws Li txoj Moo Zoo uas Coj Kev Zoo Siab Los
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Tso siab rau Yexus Khetos lub hwj chim; ceev Nws tej kev cai thiab tej lus txib. Hais ua lwm yam lus—ua neej raws li txoj moo zoo uas coj kev zoo siab los.
Kuv cov muam, kuv cov phooj ywg thiab cov thwj tim ntawm Yexus Khetos, kuv zoo siab uas muaj lub cim fim no nrog nej koom dua ib lub tuam rooj sab laj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Lub lim tiam tom ntej no Thawj Pawg Thawj Tswj Hwm thiab Pawg Kaum Ob tug Thwj Tim yuav nrog tag nrho cov Tuam Thawj Coj thiab cov thawj coj ntawm cov tuam koom haum pab sib ntsib ua ke, thiab peb yuav tshaj tawm cov tuas uas tseem tshuav ntawm peb lub tuam rooj sab laj no thaum lwm hnub Saturday thiab hnub Sunday. Kuv ris peb tus yaj saub, Thawj Tswj Hwm Thomas S. Monson, txiaj uas nws thov kom kuv sawv cev tam Thawj Pawg Thawj Tswj Hwm hais lus rau cov poj niam hauv lub Koom Txoos.
Thaum kuv xav txog tej yam uas kuv yuav hais, kuv txawm xav txog cov poj niam uas tau pab kho kuv lub neej thiab pab kuv kov yeej tej kev cov nyom hauv lub neej no. Kuv ris kuv pog txiaj uas yav thaud nws txiav txim siab coj nws tsev neeg mus koom cov neeg Maumoos ib txoj kev sib ntsib noj lub cim nco txog. Kuv ris Muam Ewig txiaj. Nws yog ib tug poj niam Yelemes uas laus thiab nws lub npe txhais tau hais tias “Muam Nyob Mus Ib Txhis.” Nws yog tus uas caw kuv pog mus koom txoj kev sib ntsib ntawd. Kuv kuj ris kuv niam txiaj heev, uas coj plaub tug me nyuam ntxeem kom dhau Tsov Rog Ntiaj Teb thib Ob. Kuv kuj xav txog kuv tus ntxhais, kuv cov ntxhais xeeb ntxwv, thiab lwm tiam poj niam uas yuav yug los tom qab no thiab coj ncaj ncees.
Thiab, ham tsis, kuv ris kuv poj niam, Harriet, txiaj uas kuv hlub txij thaum kuv tseem hluas, thiab uas ris nra hnyav heev ua niam tsev rau peb tsev neeg, thiab uas txhawb nqa kuv, thiab ua tib zoo saib xyuas wb cov me nyuam thiab cov me nyuam xeeb ntxwv. Nws yog lub dag zog rau peb tsev neeg txawm yog lub sij hawm zoo los sis phem. Nws coj kev tshav ntuj nrig rau txhua tus neeg uas paub nws.
Nim no, kuv ris nej txhua tus txiaj thiab, nej ib txhiab ib txhis tus muam nyob txhua qhov txhia chaw thoob plaws lub ntiaj teb no uas ua ntau yam pab txheem tsa Vajtswv lub nceeg vaj. Kuv ris nej txiaj vim nej tau ua ntau yam suav tsis txheeb uas pab foom koob hmoov rau cov neeg nyob ib ncig ntawm nej.
Vajtswv cov Ntxhais
Kuv zoo siab nrog nej cov uas yog Vajtswv cov Ntxhais koom ua ke. Thaum peb hu zaj nkauj “Kuv Yog Vajtswv cov Me Nyuam,” cov ntsiab nkauj nkag mus rau hauv peb tej siab tej ntsws. Thaum peb xav txog qhov tseeb no—hais tias peb yog peb niam txiv saum ntuj ceeb tsheej cov me nyuam1—ua rau peb paub tias peb los qhov twg los, peb muaj lub luag hauj lwm li cas yuav tsum ua kom tiav, thiab saib peb txoj hmoov thaum kawg yuav zoo li cas.
Yeej zoo heev uas nej nco ntsoov tias nej yog Vajtswv cov me nyuam mus ib txhis li. Qhov uas nej paub li no yuav coj nej ntxeem kom dhau tej sij hawm hauv nej lub neej uas muaj kev cov nyom heev thiab yuav tshoov nej lub siab kom ncav tau hom phiaj zoo kawg nkaus. Txawm yog li ntawd los, kuj tseem ceeb kom nco qab ntsoov hais tias qhov uas nej yog niam txiv saum ntuj ceeb tsheej cov ntxhais tsis yog ib yam uas nej ua dab tsi kom thiaj muaj li ntawd thiab tsis yog ib yam uas nej yuav ua poob tau thiab. Nej yuav yog Vajtswv ib tug ntxhais tam sim no thiab mus ib txhiab ib txhis li. Nej Leej Txiv Saum Ntuj Ceeb Tsheej cia siab rau nej ntau heev, tiam sis qhov uas nej los saum ntuj los xwb tsis lav hais tias nej yeej yuav tau ib tug nqi zog los saum ntuj los thaum kawg. Vajtswv txib kom nej los nyob hauv lub neej no kom npaj rau ib lub sij hawm yav tom ntej uas yuav zoo tshaj plaws.
Cov lus uas Vajtswv cog rau cov ntseeg yeej muaj yeeb koob thiab yeej tshoov tau peb lub siab tiag. Vajtswv twb cog lus tias yuav txais tau “theej kiab, nceeg vaj, tej nom tswv, thiab tej hwj chim, tej kev tswj hwm, txawm yog siab los yog qis huv tib si.”2 Peb yeej yuav tsum muaj ntau tshaj ib daim ntawv pov thawj hais tias peb yog neeg los saum ntuj los los yog ib daim “npav qhia tias peb yog Vajtswv ib tug Me Nyuam” kom thiaj tau tej no.
Peb yuav ua li cas txais tau tej koob hmoov no?
Tus Cawm Seej tau teb lo lus nug no hauv peb lub caij nyoog no:
“Tsuas yog nej ua raws li kuv txoj kev cai nej yuav txais tsis tau qhov yeeb koob no.
“Vim lub qhov rooj nqaim, thiab txoj kev me uas mus nyuaj yuav coj mus tau txoj sia. …
“… Cia li txais, yog li ntawd, kuv txoj kev cai.”3
Yog vim li ntawd, peb thiaj hais txog txoj kev ua tus Khetos ib tug thwj tim.
Peb thiaj hais txog txoj kev mloog thiab ua li raws Vajtswv cov lus txib.
Peb thiaj hais txog txoj kev ua neej raws li txoj moo zoo kawg siab kawg ntsws kawg plab kawg plawv kom thiaj tau qhov kev zoo siab.
Vajtswv Paub Ib Yam uas Peb Tsis Paub
Txawm yog li ntawd los, peb ib txhia saib qhov uas yuav ua raw li Vajtswv txoj lus txib tsis yog ib yam uas ua rau peb zoo siab. Hais ncaj ncaj: yeej muaj Vajtswv tej lus txib ib txhia uas nyuaj dua los yog tsis lom zem ua raws li—tej lus txib uas peb zoo siab ua raws li npaum li ib tug me nyuam uas yuav tsum noj tej zaub ntsuab uas nws tsis xis. Peb zom hniav thiab yuam peb tus kheej ua raws li tej lus txib no kom peb thiaj ntxeem kom dhau mus ua raws li lwm cov lus txib uas peb nyiam zoo dua.
Tej zaum thaum muaj li no, peb nug peb tus kheej hais tias, “Peb puas yuav tsum ua raws li tag nrho Vajtswv cov lus txib tiag?”
Kuv lo lus teb rau lo lus nug no yeej yooj yim heev:
Kuv xav hais tias Vajtswv paub ib yam uas peb tsis paub—tej yam uas peb tsis muaj peev xwm to taub tam sim no! Peb Leej Txiv Saum Ntuj Ceeb Tsheej yog ib tug neeg nyob mus ib txhis uas nws qhov kev kawm dhau los, qhov thoob tsib, thiab kev txawj ntse yeej loj thiab ntau dua peb cov.4 Tsis tas li ntawd xwb, Nws kuj muaj siab hlub, kev khuv leej mus ib txhis li, thiab Nws tsom ntsoov qhov uas ncav kom tau tib lub hom phiaj: kom coj txoj kev tsis txawj tuag thiab txoj kev nyob mus ib txhis los rau peb txhua tus.5
Hais ua lwm cov lus, tsis yog Nws paub tej yam uas zoo tshaj plaws rau nej xwb; Nws kuj mob siab xav kom nej xaiv qhov uas zoo tshaj plaws rau nej.
Yog tias nej ntseeg qhov no hauv nej tej siab tej ntsws—yog tias nej ntseeg tiag hais tias peb Leej Txiv Saum Ntuj Ceeb Tsheej lub hom phiaj yog kom tsa Nws cov me nyuam nto kom tau yeeb koob thiab Nws paub ua li cas kom thiaj ncav tau lub hom phiaj ntawd tiag—puas yog ib qho zoo uas peb lees txais thiab ua raws li Nws cov lus txib, twb yog cov uas nyuaj dua ua li raws thiab? Puas yog peb yuav tsum cia tej teeb qhia kev no uas Vajtswv tau muab pub rau peb coj peb mus ntxeem kom dhau tej kev tsaus ntuj nti thiab tej kev sim siab ntawm lub neej no? Tej lus txib no ua teeb qhia kev rau peb rov qab mus cuag Vajtswv! Thaum nej xaiv peb Leej Txiv Saum Ntuj Ceeb Tsheej txoj kev, nej pua ib lub hauv paus los saum ntuj los rau nej txoj kev loj hlob tuaj mus ua Vajtswv ib tug ntxhais uas yuav foom koob hmoov rau nej lub neej tag nrho.
Raws li kuv xav, peb xav tias Vajtswv muab Nws cov koob hmoov xauv rau hauv ib tauv huab saum ntuj ceeb tsheej, es Nws tsis kam muab pub rau peb tsuas yog peb ua raws li tej lus txib nyaum nyaum uas Nws txib kom peb ua raws li. Tej lus txib tsis zoo li ntawd hlo li. Tiag tiag, peb Leej Txiv Saum Ntuj Ceeb Tsheej yeej los tso koob hmoov los rau peb ib yam dej nag. Tiam sis yog peb tej kev ntshai, tej kev tsis ntseeg, thiab tej kev txhaum uas, ib yam li ib lub kaus, tiv tej koob hmoov no kom tsis raug rau peb.
Nws cov lus txib yog lus qhuab lus qhia thiab kev pab los saum ntuj los uas pab peb qhaws tau peb lub kaus, kom thiaj txais tau tej koob hmoov uas los ib yam li dej nag.
Peb yuav tsum lees txais hais tias Vajtswv tej lus txib tsis yog ib co tswv yim zoo xwb. Vajtswv tej lus txib tsis yog tej “lus txhawb nqa yus lub neej” los ntawm ib qho blog hauv Internet los yog lus tswv yim los ntawm ib daim phiaj Pinterest. Vajtswv tej lus txib yog lus qhuab lus qhia los saum ntuj los uas muaj qhov tseeb nyob mus ib txhis ua lub hauv paus, thiab yog muab rau peb kom coj tau “kev kaj siab lug rau lub ntiaj teb no, thiab lub neej nyob mus ib txhis rau lub ntuj tom qab lub neej no.”6
Ces peb muaj kev ywj siab xaiv. Nyob rau ib qho, muaj lub ntiaj teb no lub tswv yim uas hloov ntau thiab tsis tsim nyog tso siab rau. Ho nyob rau lwm qhov, muaj Vajtswv cov lus rau Nws cov me nyuam—Nws lub tswv yim nyob mus ib txhis, Nws cov lus cog tseg khov kho, thiab Nws cov lus qhuab qhia uas pab peb rov qab mus nyob hauv Nws lub xub ntiag yam muaj yeeb koob ntau heev li.
Nej yog cov xaiv!
Tus Tsim Ntuj Tsim Teb tab tom cev tes mus rau nej hnub no kiag! Nws muab lub tswv yim kom tau kev zoo siab, kev kaj siab lug, thiab lub neej nyob mus ib txhis pub rau nej!
Kom thiaj tsim nyog txais tej koob hmoov zoo kawg no, nej yuav tsum txo hwj chim, muaj siab ntseeg, ris Khetos lub npe, nrhiav kom tau Nws, thiab mob siab “sawv ua Vajtswv tej tim khawv rau txhua lub caij nyoog thiab rau tag nrho txhua txhia yam.”7
Yog Vim Li Cas Peb Thiaj Yuav Tsum Mloog Lus
Thaum nej to taub Vajtswv tus xeeb ceem thiab Nws cov lus txib zoo, nej kuj yuav to taub nej tus kheej zoo dua thiab saib lub ntsiab los saum ntuj los ntawm nej txoj kev ua neej yog zoo li cas tiag. Yog tias xav li no, ces qhov uas txhib nej ua raws li tej lus txib hais hloov, thiab ua neej raws li txoj moo zoo yam zoo siab li haj yam yooj yim dua tuaj.
Piv txwv hais tias, lawv cov uas saib txoj kev koom lub Koom Txoos tej kev sib ntsib ua ib yam uas pab lawv hlub Vajtswv, nrhiav tau kev nyob kaj siab lug, txhawb nqa lwm tus neeg, nrhiav kom tau tus Ntsuj Plig, thiab rov qab cog lus tias lawv yuav coj raws li Khetos hais yuav tau koob hmoov ntau dua cov uas cia li lam tau lam zaum hauv tshawj. Kuv cov muam, yeej tseem ceeb heev uas peb koom peb tej kev sib ntsib thaum hnub Sunday, tiam sis kuv paub tseeb hais tias peb Leej Txiv Saum Ntuj Ceeb Tsheej tsis txhawj txog saib peb puas mus tshawj txhua lub lim tiam npaum li Nws xav kom peb muaj siab ntseeg thiab hloov siab lees txim.
Muaj dua ib qho piv txwv:
Muaj ib tug niam tsev uas muaj ob tug me nyuam me, es tus niam tsev ntawd txawm ua qhua taum. Tsis ntev ces nws ob tug me nyuam txawm mob ib yam thiab. Txoj hauj lwm tu nws tus kheej thiab nws ob tug me nyuam nyuaj zuj zus rau tus niam tsev no. Thaum kawg ces nws lub tsev uas feem ntau nws tu du dais txawm sw sw me ntsis. Muaj tais diav hauv lub xeej, thiab tej khaub ncaws tsis huv nyob pawg lug txhua qhov txhia chaw.
Thaum nws tseem tab tom saib xyuas nws ob tug me nyuam uas quaj—thiab nws xav quaj nws tus kheej—txawm muaj leej twg khob qhov rooj. Twb yog nws ob tug mus saib xyuas tom tsev. Nkawd pom tau tias tus niam tsev no nyuaj siab heev. Nkawd pom tau saib nws lub tsev thiab nws hoob ua mov zoo li cas. Nkawd hnov tau nws ob tug me nyuam quaj.
Nim no, yog tias ob tug muam no txhawj txog txoj kev ua tiav nkawd lub luag hauj lwm xwb, tej zaum nkawd yuav muab ib phaj khob noom rau tus niam tsev no, qhia nws tias nkawd tsis pom nws tom Koom Haum Niam Tsev thiab nco nws, thiab tej zaum hais li no hais tias, “Cia wb paub saib wb yuav pab tau koj li cas!” Ces nkawd nyias mam li rov qab mus nyias tsev es zoo siab heev uas nkawd tau mus xyuas tom tsev 100 feem pua dua ib lub hli.
Qhov zoo yog ob tug muam no yog Khetos ob tug thwj tim tiag. Nkawd pom tias nkawd tus viv ncaus xav tau kev pab thiab nkawd cia li ua hauj lwm pab nws. Nkawd tu tej yam sw sw, coj qhov kaj nrig rau lub tsev, thiab hu nkawd ib tug phooj ywg kom mus yuav khoom noj thiab nqa tuaj rau tus niam tsev no. Thaum ob tug mus xyuas tom tsev no ua tiav nkawd tej hauj lwm thiab mus tsev, tus niam tsev los kua muag ntau—nws los kua muag vim nws zoo siab heev.
Txij thaum ntawd los, tus niam tsev xav tias txoj kev mus xyuas tom tsev yog ib yam tseem ceeb heev. Nws hais tias, “Kuv paub hais tias kuv yog ib tug neeg tseem ceeb rau kuv ob tug mus xyuas tom tsev.”
Muaj tseeb tiag, cov mus xyuas tom tsev yuav tsum mob siab mus xyuas tom tsev, tiam sis kuj yuav tsum nco qab ntsoov yog vim li cas lawv thiaj mus ua li ntawd: kom hlub Vajtswv thiab lawv cov neeg zej zog.
Thaum peb saib Vajtswv tej lus txib thiab peb lub luag hauj lwm txhim tsa Nws lub nceeg vaj ua ib yam uas peb yuam peb tus kheej ua, peb tsis coj raws li txoj kev ua thwj tim tiag. Peb tsis loj hlob tuaj npaum li yog peb yuav zoo siab ua raws li peb Leej Txiv Saum Ntuj cov lus txib.
Txoj kev ua thwj tim tsis tas yog ib qho kev iab kev khwv. Nws yog ib qho uas “qab tshaj txhua tsav txhia yam.”8 Tsis yog ib lub nra uas tsuam peb. Txoj kev ua thwj tim txhawb nqa peb sab ntsuj plig thiab ua rau peb tej siab tej ntsws sib zog. Nws tshoov peb lub siab kom muaj siab ntseeg, kev cia siab, thiab kev siab hlub. Nws ua rau peb sab ntsuj plig nyob kaj siab lug txawm tias ib ncig ntawm peb yog tsaus ntuj nti.
Nws muab hwj chim los saum ntuj los thiab kev zoo siab uas kav mus ib txhis li rau peb.
Ua Neej Raws Li txoj Moo Zoo uas Coj Kev Zoo Siab Los
Kuv cov muam hauv txoj moo zoo, txawm tias nej muaj 8 xyoo los yog 108, muaj ib yam uas kuv cia siab tias nej to taub zoo thiab paub tseeb hais tias:
Peb hlub nej heev.
Nej niam txiv saum ntuj hlub nej heev.
Tus Tsim qhov Kaj Nyob Mus Ib Txhis paub nej! Nws xam tias muaj nej tiag.
Yog los mas, Vajtswv hlub nej hnub no thiab mus ib txhis li.
Nws tsis tos ntsoov hlub nej mus txog thaum nej tau kov yeej nej tej qhov tsis muaj zog thiab nej tej kev txhaum. Nws hlub nej hnub no thiab Nws to taub saib nej muaj tej kev cov nyom zoo li cas. Nws paub hais tias nej ncav tes mus cuag Nws thaum nej thov txog Nws muaj kev cia siab. Nws paub txog tej lub sij hawm uas nej tuav rawv qhov kaj uas tab tom yau zuj zus mus es tseem muaj siab ntseeg—txawm tias nyob hauv qhov tsaus ntuj nti. Nws paub txog nej tej kev nyuaj siab. Nws paub hais tias nej tu siab vim tej lub sij hawm uas nej poob yuam kev ua txhaum. Txawm yog li ntawd Nws tseem hlub nej.
Thiab Vajtswv paub txog tej yam uas tau muaj los raws li nej lub siab xav; txawm tias tej ntawd me me rau nej, los Vajtswv twb pom thiab saib rau nqi lawm. Nws hlub nej vim nej cev tes mus pab lwm tus neeg. Nws hlub nej thaum nej pab lwm tus neeg ris lawv tej nra—txawm tias nej tseem ris nej tej nra thiab.
Nws paub txhua yam txog nej. Nws pom nej tseeb—Nws paub nej yog leej twg tiag tiag. Thiab Nws hlub nej—hnub no thiab mus ib txhis li!
Puas tseem ceeb rau peb Leej Txiv Saum Ntuj Ceeb Tsheej saib nej puas tu nej tus kheej, tha khob peeb, ntsis plaub hau, zoo tag nrho? Koj puas xav hais tias Nws saib nej rau nqi ntau dua yog tias nej muaj neeg coob heev soj nej qab hauv Instagram los sis Pinterest? Koj puas xav hais tias Nws xav kom nej txhawj xeeb los sis poob siab yog tias muaj leej twg tsis soj nej qab ntxiv hauv Facebook los sis Twitter? Koj puas xav hais tias tus Neeg uas tsim ntuj tsim teb saib nej rau nqi tsawg dua yog tias nej lub cev sab nraud tsis raws li nej lub siab xav los yog tias nej tsis nrov?
Nws hlub nej tsis yog rau cov neeg uas nej yog niaj hnub nim no, tiam sis kuj rau cov neeg muaj yeeb koob thiab qhov kaj uas nej muaj peev xwm rais los mus ua.
Ntau tshaj uas nej xav tau, Nws xav kom nej ncav kom tau nej txoj hmoov—kom rov qab mus saum ntuj ceeb tsheej muaj yeeb koob ntau.
Kuv ua tim khawv hais tias nej yuav ua tau li no thaum nej muab tej kev xav thiab tej kev ntshaw uas tsis tsim nyog txi rau saum lub thaj dhau los ntawm txoj kev mus pab lwm tus neeg. Kuv cov muam, tso siab rau Yexus Khetos lub hwj chim; ceev Nws tej kev cai thiab tej lus txib. Hais ua lwm yam lus—ua neej raws li txoj moo zoo uas coj kev zoo siab los.
Kuv thov Vajtswv kom nej yuav ntsib tau Vajtswv txoj kev hlub hauv nej lub neej; kom nej yuav muaj siab ntseeg txaus kawm txog Vajtswv tej lus txib, ua raws li tej lus txib ntawd, thiab ua neej raws li txoj moo zoo uas coj kev zoo siab los.
Kuv cog lus tias thaum nej ua li ntawd, nej yuav nrhiav tau nej tus kheej—nej tus kheej uas tseeb tiag. Nej yuav paub tias nws txhais tau li cas kom ua Vajtswv uas kav ib txhis ib tug ntxhais, tus Tswv uas ncaj ncees tag nrho. Kuv ua tim khawv li no thiab foom koob hmoov rau nej ua tus Tswv ib tug Thwj Tim, los ntawm Yexus Khetos lub npe zoo, amees.