Ola Fiafia i le Talalelei

Ou te fiafia lava i le faatasi ai ma le toatele o afafine o le Atua. A tatou usuina le pese “O Au o se Atalii o le Atua,” e ulufia o tatou loto e ona upu. I le mafaufau loloto ai i lenei upumoni—o i tatou o fanau a ni matua faalelagi¹—e faatumulia ai lava i tatou i se lagona o le tupuaga, faamoemoega, ma le taunuuga.

E lelei ona manatua e avea pea outou ma afafine o le Atua. O lenei malamalama o le a e maua ai le malosi i taimi sili ona faigata o lou olaga ma o le a musuia ai oe ia ausia ni mea ofoofogia. Peitai, e taua foi ona manatua o le avea ai ma se afafine o ni matua faalelagi e le o se tulaga ese e te mauaina po o se mea o le a e maumauina. O le a avea pea oe i taimi uma ma faavavau o se afafine o le Atua. O loo i ai ni faamoemoega maualuluga o lou Tama Faalelagi mo oe, ae o lou tupuaga paia lava ia na o ia e le mautinoa ai sou tofi paia. Na auina mai oe e le Atua iinei e saunia mo se lumanai e sili atu i lo soo se mea e mafai ona e mafaufauina.

O faamanuiaga folafolaina a le Atua i e faamaoni e mamalu ma musuia. O nisi o na faamanuiaga o “nofoalii, malo, itumalo, ma mana, ma puleaga, o mea maualuluga uma ma loloto.”² Ma e sili atu i lo na o se pepa fanau faaleagaga po o se “Pepa o Sui Auai o se Atalii o le Atua” e agavaa ai mo nei faamanuiaga le mafaamatalaina.

Ae faapefea ona tatou mauaina?

Ua tali e le Faaola lenei fesili i o tatou taimi:

“Vagana ua outou ola i la’u tulafono e le mafai ona outou maua lenei mamalu.

“Aua e vaapiapi le faitotoa, ma lauitiiti le ala e tau atu i le faaeaga. …

“… Ia outou talia, la’u tulafono.”³

Mo lenei mafuaaga, tatou te tautatala ai e uiga i le savavali i le ala o le avea ma soo.

Tatou te tautatala e uiga i le usiusitai i poloaiga a le Atua.

Tatou te tautatala e uiga i le ola fiafia i le talalelei, ma o tatou loto atoa, manatu, mafaufau, ma le agaga atoa.

Ae mo nisi o i tatou, o le usiusitai i poloaiga a le Atua e le o taimi uma e lagona ai le fiafia tele. Tatou te ioe i ai: atonu e i ai nisi e foliga mai e faigata atu pe le fiafia tele i ai—o poloaiga tatou te taulimaina i se naunautaiga faatamaitiiti o loo saofai i luma o se ipu o fualaau taumafa mata maloloina ae ita i ai. E ū o tatou nifo ma fosi i tatou lava ia usitai ina ia mafai ai ona tatou see atu i nisi gaoioiga sili atu ona manaomia.

Masalo i ni taimi faapenei atonu tatou te oo ai ina fesiligia i tatou lava, “E manaomia moni ea ona tatou usiusitai i poloaiga uma a le Atua?”

O la’u tali i le fesili lenei e faigofie lava:

Ou te manatu e silafia e le Atua se mea tatou te le iloaina—o mea e sili atu ma lo tatou tomai e malamalama i ai! O lo tatou Tama i le Lagi o se tagata e faavavau o lona silafia, poto, ma le atamai e le mafuatia le maoae i lo tatou.⁴ E le gata i lena, ae e alofa, agalelei, ma taulai atu o Ia e faavavau i le sini faamanuiaina e tasi: ia aumaia lo tatou tino ola pea ma le ola e faavavau.⁵

I se isi faaupuga, e le gata ua Ia silafia le mea silisili mo oe; ae o Lona faanaunautaiga foi e finagalo ia e filifili le mea silisili mo oe.

Afai e talitonu o outou loto i le mea lenei—afai tou te talitonu moni lava i le misiona sili a lo tatou Tama Faalelagi ia faaeaina ma faamamaluina Ana fanau ma ua Ia silafia le auala silisili e faia ai—pe le talafeagai ea la le taliaina ma le mulimuli i Ana poloaiga, e oo lava i poloaiga ia e foliga mai e faigata? Pe le tatau ea ona tatou faatauaina molī faailoilo ua Ia tuuina mai e taiala ai i tatou i le pogisa ma tofotofoga o le olaga faaletino? Ua latou faailogaina le ala e toe foi atu ai i lo tatou aiga faalelagi! E ala i le filifilia o le ala a le Tama Faalelagi, ua e faataatia ai se faavae paia mo lou alualu i luma faaletagata lava ia o se afafine o le Atua lea o le a faamanuiaina ai oe i lou olaga atoa.

Ou te manatu, o se vaega o lo tatou luitau o lo tatou mafaufau lea o loo lokaina e le Atua Ana faamanuiaga uma i se ao tele i luga i le lagi, ma e musu e aumai ia i tatou sei vagana ai ua tatou tausisia nisi o tulafono mamafa e leai se tuusaoloto ua Ia faatulagaina. Ae e leai ma se tulaga faapena o i ai i poloaiga. O le mea moni, o loo liligi mai e le aunoa e le Tama Faalelagi faamanuiaga i o tatou luga. O lo tatou fefefe, masalosalo, ma le agasala, ua pei ai o se faamalu le polokaina o nei faamanuiaga mai le oo mai ia i tatou.

O Ana poloaiga o ni faatonuga agaalofa ma o se fesoasoaniga faalelagi e faamoe ai le faamalu, ina ia mafai ai ona tatou taeele e le aunoa i faamanuiaga faalelagi.

E manaomia ona tatou taliaina o poloaiga a le Atua ua le na o se lisi umi o ni manatu lelei. [O poloaiga] e le o ni “māūnu faatogafiti o le olaga” mai se poloka i le Initoneti po o ni upusii faatupu lagona mai se itulau o le Pinterest. [O poloaiga] o ni fautuaga faalelagi, ua faavae i luga o upumoni e faavavau, ua tuuina mai e maua ai le “filemu i le lalolagi lenei ma le ola e faavavau i le lalolagi a sau.”⁶

O loo i ai la se tatou filifiliga. I le isi itu, o loo i ai manatu o le lalolagi faatasi ma ana filosofia fesuisuiai i taimi uma atoa ai ma ona faamoemoega le mautonu. Ae o le isi itu, o loo i ai le afioga a le Atua i Lana fanau—Lona poto e faavavau, Ana folafolaga mautinoa, ma Ana faatonuga agaalofa mo le toefoi atu i Lona afioaga i le viiga, alofa, ma le mamalu.

E pule la oe i lau filifiliga!

O Le Foafoa o vasa, oneone, ma fetu le mafaitaulia o loo aapa atu ia te oe i lenei lava aso! O loo Ia ofoina atu le fua faatatau silisili e maua ai le fiafia, filemu, ma le ola e faavavau!

Ina ia agavaa mo nei faamanuiaga mamalu, e tatau ona e faalotomaualaloina oe lava ia, faaaoga le faatuatua, ma tauave i ou luga le suafa o Keriso, saili atu ia te Ia i upu ma galuega, ma ia naunau e “tutu o ni molimau a le Atua i taimi uma ma i mea uma, ma i nofoaga uma.”⁷

O le taimi lava tou te malamalama ai i le natura moni o le Atua ma Ana poloaiga, o le a outou malamalama atili ai foi ia te outou lava atoa ai ma le faamoemoega paia o o outou olaga. Faatasi ai ma lenei mea, o le a suia ai le faaosofia o oe e mulimuli i poloaiga, ma avea ai ma manaoga o lou loto le ola fiafia ai i le talalelei.

Mo se faataitaiga, o i latou e vaai atu i le auai i sauniga a le Ekalesia o se auala patino e faateleina ai lo latou alolofa i le Atua, maua ai le filemu, siitia ai isi, saili atu ai i le Agaga, ma toe faafou ai lo latou tautinoga e mulimuli ia Iesu Keriso, o le a mauaina se aafiaga sili ona loloto nai lo i latou e na ona faapasi taimi lava i luga o nofoa. Tuafafine, e matua taua tele lo tatou auai i a tatou sauniga o le Aso Sa, ae ou te mautinoa lava e sili atu ona popole lo tatou Tama Faalelagi i lo tatou faatuatua ma le salamo nai lo faamaumauga o le auai.

O le isi faataitaiga lenei:

O se tina nofotoatasi e toalua sana fanau laiti sa taia talu ai nei i le misela. Ioe, sa lei pine ae faama’ia ai foi lana fanau. O le galuega o le tausia o ia ma lana fanau laiti e na o ia lava sa toetoe lava a le gafataulimaina mo lea tina talavou. Ma, o se taunuuga, o le fale sa masani ona mamā na avea ma se fale palapalā ma gasu. Sa faaputuputu ipu palapalā i le fata ipu, ma fau solo le tagamea i soo se mea.

A o tauivi ai o ia ma lana fanau fetagisi—ma sa manao foi o ia e tagi—sa tuitui mai le faitotoa. O ana faiaoga asiasi. Sa mafai ona la vaaia le mafatia o le tina talavou. Sa mafai ona la vaai atu i lona fale, ma lana umukuka. Sa mafai ona la faalogo atu i le fetagisi mai o le fanau.

Ia, ana faapea sa pau le mea na popole i ai nei tuafafine na o le faamaeaina o le la asiasiga atofaina faalemasina, semanu na o lo la tauaao atu lava i le tina o se ipu kuki, ma fai atu ua misia lava o ia i le Aualofa i le vaiaso ua tea, ma fai atu se tala faapea, “Faailoa mai ia i maua pe a i ai se isi mea e mafai ona ma faia!” Ona la o ese atu loa lea ma le fiafia, ma le faafetai ua 100 pasene foi le la asiasiga o lea masina.

O le mea e lelei ai, o nei tuafafine o ni soo moni o Keriso. Sa la matauina manaoga o lo la uso ma faaaoga loa i ai le tele o a la taleni ma o la poto masani. Sa la faamamaina le gasu, faasusulu atu le malamalama ma le manino i le fale, ma valaau atu i se uo e fai mai se faatauga o mea sa sili ona manaomia. Ina ua faamaeaina le la galuega ma faatofa atu, sa la tuua lena tina talavou i loimata—o loimata o le agaga faafetai ma le alofa.

Na amata mai lena taimi, o manatu o le tina talavou e uiga i faiaoga asiasi sa suia. Sa ia fai mai, “Ua ou iloa nei e le o au o se tasi o mea e tau na ona faailoga i se lisi o mea e fai a se tagata.”

Ioe, e manaomia ona faamaoni faiaoga asiasi i le faataunuuina o a latou asiasiga faalemasina, ia faia uma e aunoa ma le misia o le mafuaaga sili ona taua o loo i tua atu o lenei poloaiga: ia alofa atu i le Atua ma uso a tagata.

A tatou taulimaina poloaiga a le Atua ma la tatou vaega i le fausiaina o Lona malo e pei o se mea e tau na ona fai o loo i luga o se lisi o mea e fai, ua tatou misia le uiga moni o le avea ma soo. Tatou te misia le tuputupu ae lea e sau mai le ola fiafia i poloaiga a lo tatou Tama i le Lagi.

O le savali ai i le ala o le avea ma soo e le manaomia ona avea ma se aafiaga oona. E “sili ona suamalie i luga o mea uma ua suamalie.”⁸ E le o se avega e lafotuina ai i tatou i lalo. O le avea ma soo e siitia ai o tatou agaga ma faamalieina ai o tatou loto. E musuia ai i tatou i le faatuatua, faamoemoe, ma le alofa mama. E faatumulia ai o tatou agaga i le malamalama i taimi o le pogisa ma le filemu i taimi o le faanoanoa.

Na te aumaia ia i tatou le mana faalelagi ma le olioli tumau.

Ou tuafafine pele i le talalelei, pe ua 8 pe 108 ou tausaga, o loo i ai se mea se tasi ou te faamoemoe ua e malamalama moni i ai ma iloa:

E alofagia oe.

E pele oe i ou matua faalelagi.

E silafia oe e le Foafoa e faavavau ma lemafuatia o le malamalama ma le ola! E manatu mai o Ia ia te oe.

Ioe, e alofa le Atua ia te oe i lenei lava aso ma aso uma.

E le o faatalitali o Ia seiloga e te faatoilaloina ou vaivaiga ma mausa leaga ona faatoa alofa atu lea ia te oe. O loo alofa o Ia ia te oe i le taimi nei faatasi ma se malamalamaaga atoa i au tauiviga. Ua Ia silafia o loo e aapa atu ia te Ia i le tatalo faamaoni ma le faamoemoe. Ua Ia silafia taimi na e pipiimau ai pea i se faatuatua ua tau mou atu ma talitonu pea—e oo lava i le lotolotoi o le pogisa faateteleina. Na te silafia ou mafatiaga. Na te silafia lou salamo mo taimi na e sasi ai pe toilalo ai. Ma o loo alofa mai pea o Ia ia te oe.

Ma o loo silafia e le Atua ou tulaga manuia; e ui atonu e faatauvaa ia te oe, ae Na te faamamaluina ma faatauaina ia mea taitasi o na mea. E alofa o Ia ia te oe mo lou fesoasoani atu i isi. E alofa o Ia ia te oe mo lou aapa atu ma fesoasoani i isi e tauave a latou avega mamafa—e ui lava o loo e tauivi foi oe ma ou foi luitau.

E silafia e Ia mea uma e uiga ia te oe. E manino Lana silafaga ia te oe—Na te silafia oe i lou tagata moni lava. Ma e alofa o Ia ia te oe—nei ma aso uma!

E te manatu ea e afaina i lo tatou Tama Faalelagi pe mananaia au vali, lavalava, lauulu, ma atigilima? E te manatu ea e suia lou taua ia te Ia e fua i le toatele o tagata e taumulimuli ia te oe i luga o le Instagram po o le Pinterest? E te manatu e finagalo o Ia e te popole pe faanoanoa pe a le toe uo mai pe le toe mulimuli mai nisi ia te oe i le Facebook po o le Twitter? E te manatu o le aulelei mai fafo, le telē o lou ofu, po o le lauiloa e faia ai sina eseesega teisi i lou taua i Le na foafoaina le atulaulau?

E alofa o Ia e le gata mo le tagata ua i ai oe i lenei lava aso, ae faapena foi mo le tagata o le mamalu ma le malamalama lea e te maua ai le gafatia ma le manao e avea ai.

E sili atu i lo mea e mafai ona e mafaufauina, e finagalo o Ia ia e ausiaina lou taunuuga—ia toe foi atu i lou aiga faalelagi i le mamalu.

Ou te molimau atu o le ala e ausia ai lenei mea o le tuu ese lea o manaoga faaloloto ma faanaunautaiga le aoga ae ia ositaulaga ma auauna atu i isi. Tuafafine, ia faalagolago atu i le mana faaola o Iesu Keriso; tausi i Ana tulafono ma poloaiga. I se isi faaupuga—ola fiafia i le talalelei.

O lau tatalo ia outou lagonaina se fuataga faafouina ma faalauteleina o le alofa matagofie o le Atua i o outou olaga; ia outou mauaina le faatuatua, naunautaiga, ma le tuuto atu ia aoao i poloaiga a le Atua, faatauaina i o outou loto, ma ola fiafia ai i le talalelei.

Ou te folafola atu a e faia lea mea, o le a e iloaina lou lava tagata silisili—lou lava tagata moni. O le a e iloaina le uiga moni o le avea ma se afafine o le Atua e faavavau, le Alii o le amiotonu uma. Ou te molimau atu ai i lenei mea ma tuu atu lau faamanuiaga i le avea ai ma se Aposetolo a le Alii, i le suafa o Iesu Keriso, amene.