2010–2019
“Tus Tswv, Puas Yog Kuv?”
October 2014


“Tus Tswv, Puas Yog Kuv?”

Peb yuav tsum tso peb txoj kev muab hlob tseg, tsis txhob saib peb tus kheej tseem ceeb, thiab txo hwj chim nug hais tias,“Tus Tswv, puas yog kuv?”

Yog hmo kawg ntawm tus Cawm Seej lub neej hauv lub ntiaj teb no, hmo ua ntej Nws yuav muab nws tus kheej los them nqi rau tag nrho tib neeg tej kev txhaum. Thaum nws muab mov mog tais nrog Nws cov thwj tim, Nws hais ib yam uas nyaj ua rau lawv tu siab thiab ntxhov siab txhawj xeeb heev. Nws qhia lawv hais tias, “Muaj ib tug yuav ntxeev siab rau kuv.”

Cov thwj tim tsis tau xav seb qhov uas Nws hais puas muaj tseeb. Lawv tsis tau saib ib ncig, taw tes rau lwm tus thiab nug hais tias, “Puas yog nws?”

Tiam sis, lawv “nyuaj siab heev, lawv nyias taus nyias nug Yexus hais tias, Tus Tswv,puas yog kuv?1

Kuv xav paub seb peb yuav ua li cas yog tias tus Cawm Seej nug peb li ntawd. Peb puas yuav saib ib ncig thiab xav hauv peb lub siab hais tias, “Nyaj nws hais txog Tij Laug Johnson. Kuv ib txwm xav tias nws tsis zoo,” los sis, “Kuv zoo siab Tij Laug Brown nyob no. Nws yeej yuav tsum mloog zaj xov no”? Los yog peb puas yuav ua zoo li cov thwj tim thaum ub thiab xav hauv peb lub siab thiab nug li no hais tias: “Puas yog kuv?”

Los ntawm tej lus yooj yim no, “Tus Tswv, puas yog kuv?” yog qhov pib ntawm lub tswv yim thiab txoj kev hloov siab los ntseeg uas kav ib txhis.

Zaj Lus Piv Txwv txog cov Nroj Tawg Paj Daj

Muaj ib tug txiv neej uas nyiam taug kev hauv nws zej zos thaum yuav tsaus ntuj. Nws yeej nyiam taug kev mus dhau nws tus neeg zej zos lub tsev. Tus neeg zej zos no tu nws cov nyom zoo zoo heev, yeej tawg paj zoo nkauj, cov ntoo yeej zoo thiab muaj ntxoov ntxoo. Nws yeej pom hais tias tus neeg zej zog sib zog tu kom nws cov nyom zoo nkauj heev.

Tiam sis muaj ib hnub thaum tus txiv neej taug kev dhau nws tus neeg zej zog lub tsev mus, nyob hauv nruab nrab ntawm nws cov nyom, nws pom ib tsob nroj tawg paj daj loj heev.

Tsob nroj ntawd tsis phim nws cov nyom uas zoo nkauj. Vim li cas nws tus neeg zej zog tsis muab rho tawm? Nws tsis pom los? Nws tsis paub hais tias nroj tawg paj no yuav tso cov noob tawm uas yuav ua rau cov nroj tuaj ntau heev los?

Tsob nroj uas tawg paj daj no txob nws siab ua rau nws nyob tsis taus, thiab nws xav ua ib yam dab tsi. Puas tsim nyog nws cia li muab rho tawm xwb? Los yog txau tshuaj kom muab tuag? Tej zaum yog nws mus thaum tsaus ntuj lawm nws yuav muaj cib fim rho tawm ntsiag to.

Nws xav txog tej yam no thaum nws taug kev rau nws lub tsev. Nws nkag mus hauv tsev thiab tsis saib nws cov nyom—uas muaj ntau tsob nroj tawg paj daj lawm.

Tog Ntoo thiab Hmoov Ntoo

Zaj dab neeg no puas ua rau peb nco txog tus Cawm Seej tej lus?

“Vim li cas nej pheej pom qhov hmoov ntoo uas nyob hauv nej tus kwv tij lub qhov muag, tiam sis ho tsis xav txog yav niag tog ntoo uas nyob hauv nej tus kheej lub qhov muag? …

“… Nej cia li xub muab yav ntoo hauv nej lub qhov muag tso, nej thiaj yuav pom kev muab qhov nyuag hmoov ntoo hauv nej tus kwv tij lub qhov muag.”2

Qhov uas hais txog tog ntoo thiab hmoov ntoo no yog hais txog qhov uas peb tsis txawj pom peb tus kheej meej heev. Kuv tsis paub vim li cas peb txawj saib lwm tus thiab qhia lawv tias yuav tsum ua li cas kom kho lawv, tiam sis nyuaj rau peb pom peb tus kheej.

Ntau xyoo tas los muaj ib zaj xov xwm txog ib tug txiv neej uas ntseeg tias yog nws pleev kua txiv qaub rau nws lub ntsej muag, ces yuav ua rau cov koob yees duab tsis pom nws. Yog li ntawd nws pleev kua txiv qaub rau tag nrho nws lub ntsej muag, thiab cia li mus nyiag nyiaj ntawm ob lub txhab nyiaj. Tsis ntev tom qab ntawd lawv muab nws ntes thiab tshaj tawm nws daim duab hauv TV. Thaum cov ceev xwm muab video rau tus txiv neej saib nws tus kheej, nws ntseeg tsis tau. Nws qw hais tias, “Tiam sis kuv pleev kua txiv qaub rau kuv lub ntsej muag nev!” 3

Thaum ib tug kws tshawb fawb nyob ntawm Cornell University hnov txog zaj dab neeg no, ua rau nws xav paub vim li cas ib tug neeg yuav tsis paub hlo li hais tias nws tsis muaj peev xwm. Ob tug kws tshawb fawb xav ntsuam xyuas seb qhov no puas yog ib qho teeb meem rau txhua tus, es nkawd caw cov tub ntxhais kawm ntawv ua tej yam sim lawv muaj peev xwm npaum li cas ces thov kom lawv kwv yees lawv tus kheej seb lawv ua zoo npaum li cas. Cov tub ntxhais kawm ntawv uas ua tsis zoo yog cov uas tsis txawj kwv yees lawv tus kheej raws li qhov yog—ib txhia xav tias lawv tej qhab nias twb siab tsib npaug li lawv ua tiag tiag.4

Lwm tus twb ua qhov kev tshawb fawb no ntau lub sij hawm, rov qab kawm zoo ib yam txhua zaus; yog ib qho nyuaj rau peb feem coob ntsuas peb tus kheej raws li qhov yog, tsis hais cov uas muaj peev xwm lawv kuj xav tias lawv tau ua zoo dua li qhov yog thiab xav tias lwm tus tau ua tsis tshua zoo.5

Tej zaum tsis ua li cas yog peb kwv yees tsis yog hais tias peb tsav lub tsheb zoo los yog peb ntaus lub pob deb heev. Tiam sis thaum peb pib ntseeg tias peb ua zoo dua li qhov yog nyob hauv tsev, tom qhov chaw ua hauj lwm, thiab tom lub tsev koom txoos, ua rau peb tsis paub txog cov koob hmoov thiab tej lub cib fim tseem ceeb uas yuav pab peb tus kheej ua zoo dua li qub.

Qhov Chaw uas Tsis Pom Ntawm Sab Ntsuj Plig

Thaum yav tas los ib tug phooj ywg nyob hauv ib pawg ntseeg uas zoo tshaj plaws nyob hauv lub Koom Txoos—neeg coob tuaj koom kev sib ntsib, lawv mus qhia neeg coob tom tsev, cov me nyuam hauv lub Koom Haum Me Nyuam Yaus yeej coj zoo, lawv noj ua ke noj cov zaub mov qab kawg uas cov mej zeej yeej tsis muab nchuav rau hauv av, thiab kuv xav tias thaum lawv ntaus pob hauv lub Koom Txoos lawv yeej tsis sib cav sib ceg.

Ces kuv tus phooj ywg thiab nws tus poj niam tau mus ua tub txib. Thaum nkawd rov qab los tsev peb xyoos tom qab ntawd, ua rau nkawm niam txiv no xav tsis thoob thaum nkawd kawm hais tias thaum nkawd mus ua tub txib, 11 khub niam txiv twb sib nrauj lawm.

Txawm zoo li pawg ntseeg ntawd rau siab ntseeg thiab muaj zog ntawm sab nraud, muaj ib yam tsis zoo uas nyob hauv cov mej zeej lub siab. Thiab qhov uas ua rau peb nyuaj siab yog qhov uas muaj lwm cov uas zoo li no. Thaum cov mej zeej ntawm lub Koom Txoos tsis rau siab ua raws li tej ntsiab cai ntawm txoj moo zoo ces lawv raug tej yam tsis zoo thiab feem ntau raug tej yam uas lawv tsis tas raug. Tej zaum nyob sab nraud lawv zoo li Yexus Khetos cov thwj tim, tiam sis nyob hauv lawv lub siab lawv twb cais tawm ntawm tus Cawm Seej thiab Nws tej lus qhia. Lawv twb tig ntawm tus Ntsuj Plig zuj zus thiab mus tso siab rau tej yam los ntawm lub ntiaj teb no.

Cov uas tsim nyog tuav lub pov thawj hwj thaum yav tas los pib ntseeg hais tias lub Koom Txoos yog ib qho zoo rau cov poj niam thiab cov me nyuam tiam sis tsis zoo rau lawv tus kheej. Los sis ib txhia xav tias lawv muaj hauj lwm ntau dhau los yog lawv tsis zoo li lwm tus es lawv thiaj tsis tas ua tej yam txhua hnub uas yuav ua rau lawv nyob ze tus Ntsuj Plig. Nyob hauv lub caij nyoog no uas muaj neeg daws lawv tus kheej thiab qhuas lawv tus kheej, ces yooj yim rau neeg daws lawv tus kheej kom lawv tsis tas thov Vajtswv, tsis kawm vaj lug kub, tsis mus koom lub Koom Txoos kev sib ntsib thiab tsev neeg hmo ua ke, los yog tsis them ib feem kaum thiab nyiaj pab tag nrho.

Cov kwv tij, thov kom nej saib nej lub siab thiab nug lo lus yooj yim no: “Tus Tswv, puas yog kuv?”

Nej puas tau mus deb—tsis hais ib qho me me xwb—ntawm “txoj moo zoo uas Vajtswv tus uas muaj hwj chim tau muab rau [nej] qhia”?6 Nej puas tau cia “tus vaj tswv ntawm lub ntiaj teb no” ua rau nej lub siab tsaus ntuj nti kom tsis pom “qhov kaj ntawm Khetos txoj moo zoo uas muaj hwj chim”?7

Kuv cov phooj ywg, kuv cov kwv tij, nug nej tus kheej, “Qhov uas muaj nqi rau kuv nyob qhov twg?”

Nej puas tso siab rau tej yam uas ua rau nej txaus siab ntawm lub ntiaj teb, los yog nej puas tsom ntsoov rau Yexus Khetos? “Vim tej uas muaj nqi rau nej nyob qhov twg, nej lub siab yuav nyob qhov ntawd ib yam thiab.”8

Vajtswv tus Ntsuj Plig puas nyob hauv nej lub siab? Nej txoj kev hlub Vajtswv thiab nej cov neeg puas “ntsia cag ruaj” Nej puas siv sij hawm txaus kom nej tus khub thiab tsev neeg zoo siab? Nej puas rau siab ua raws li lub hom phiaj kom to taub thiab ua neej raws li qhov dav, qhov ntev, qhov tob, thiab qhov siab9 ntawm Yexus Khetos txoj moo zoo?

Cov kwv tij, yog nej xav muaj cwj pwm zoo li Yexus Khetos kom muaj kev ntseeg, kev tsim txiaj, kev txawj ntse, kev xyuam xim, kev siab ntev, kev siab zoo li kwv tij ua rau kwv tij, kev coj ncaj li Vajtswv, kev siab hlub, kev txo hwj chim, thiab kev pab lwm tus,10 ces Leej Txiv Saum Ntuj Ceeb Tsheej yuav hloov nej los ua ib lub cuab yeej hauv nws txhais tes kom cawm neeg coob.11

Lub Neej uas Tau Tshuaj Xyuas

Cov kwv tij, peb tsis nyiam lees hais tias thaum peb ua yuam kev. Feem ntau peb tsis xav saib peb tus kheej thiab pom peb tej kev qaug zog, tej kev tsis txawj, thiab tej kev ntshai. Yog li ntawd, thaum peb tshuaj xyuas peb lub neej, peb saib dhau tej kev daws peb tus kheej, thiab ntxias peb tus kheej, thiab tej dab neeg peb qhia kom peb xav tias tsim nyog uas peb xav thiab ua tej yam tsis zoo.

Tiam sis qhov uas peb pom peb tus kheej meej yeej yog ib qho tseem ceeb kom peb loj hlob ntawm sab ntsuj plig thiab nyob zoo. Yog tias peb cia peb tej kev qaug zog thiab tej kev ua yuam kev nyob hauv duab ntxoov ntxoo, ces tus Cawm Seej lub hwj chim txhiv dim kho tsis tau tej ntawd kom muaj zog.12 Yog li ntawd, qhov uas peb dig muag tsis pom peb tus kheej tej kev qaug zog kuj ua rau peb dig muag tsis pom qhov uas Vajtswv xav kom peb rais los ua neeg zoo li Nws.

Yog li ntawd peb yuav ua li cas kom muaj Vajtswv qhov tseeb ci ntsa iab hauv peb sab ntsuj plig thiab saib peb tus kheej ib yam li Nws saib peb?

Kuv qhia hais tias cov vaj lug kub thiab tej zaj lus hais hauv lub tuam rooj sab laj yog tej tsom iav uas peb siv tau kom tshuaj xyuas peb tus kheej.

Thaum nej nyeem los yog mloog tej lus ntawm cov yaj saub thaum ub thiab niaj hnub no, tsis txhob xav tias tej lus ntawd nruab rau lwm tus thiab cia li nug qhov no: “Tus Tswv, puas yog kuv?”

Peb yuav tsum mus cuag peb Leej Txiv Nyob Mus Ib Txhis nrog tej siab puas tas thiab tej siab uas xav kawm. Peb yuav tsum kam kawm thiab hloov. Thiab peb yeej txais tau ntau npluas mias thaum peb cog lus tias peb yuav ua neej raws li Leej Txiv Saum Ntuj Ceeb Tsheej xav kom peb ua.

Cov uas tsis xav kawm thiab tsis xav hloov ntshe lawv tsis xav tias lub Koom Txoos muaj tej yam uas pab tau lawv.

Tiam sis cov uas xav ua neeg zoo dua, cov uas kawm txog tus Cawm Seej thiab xav ua neeg zoo li Nws, cov uas txo hwj chim zoo li me nyuam yaus thiab xav ua kom lawv tej kev xav thiab tej yam lawv ua kom sib haum nrog peb Leej Txiv Saum Ntuj Ceeb Tsheej—lawv yuav paub txog qhov txuj ci tseem ceeb ntawm tus Cawm Seej txoj Kev Theej Txhoj. Lawv yeej yuav mloog Vajtswv tus Ntsuj Plig zoo kawg nkaus. Lawv yuav muaj kev xyiv fab uas yog cov txiv ntoo ntawm ib lub siab mos muag uas txo hwj chim. Lawv yuav tau koob hmoov ua rau lawv xav thiab rau siab ua Yexus Khetos cov thwj tim tiag tiag.

Lub Hwj Chim ntawm Kev Ua Zoo

Nyob hauv kuv lub neej, kuv tau muaj cib fim sib tham nrog cov txiv neej thiab poj niam uas txawj ntse tshaj plaws nyob hauv lub ntiaj teb. Thaum kuv tseem hluas, ua rau kuv saib lawv rau nqi heev, cov uas tau kawm ntawv, cov uas muaj peev xwm, cov uas vam meej thiab muaj neeg ntiaj teb qhuas lawv. Tiam sis txij thaum ntawd los, kuv tau kawm hais tias kuv saib lwm tus rau nqi tshaj, cov neeg uas yog neeg zoo tiag thiab cov uas tsis muaj siab xav ntxias.

Txoj moo zoo pab peb ua li no puas yog? Txoj moo zoo pab peb ua neeg zoo.

Tus Thwj Tim Yakaunpaus tej lus hais txog peb niaj hnub nim no:

“Vajtswv yuav tawm tsam tus uas khav theeb, tiam sis Vajtswv yuav foom koob hmoov rau tus uas txo hwj chim. …

“Nej cia li txo nej lub hwj chim tab meeg Vajtswv, Vajtswv thiaj yuav tsa nej lub hwj chim.13

Cov kwv tij, peb yuav tsum tso peb txoj kev muab hlob tseg, tsis txhob saib peb tus kheej tseem ceeb, thiab txo hwj chim nug hais tias,“Tus Tswv, puas yog kuv?”

Yog tias tus Tswv teb hais tias, “Yog mas, kuv tus tub, muaj tej yam uas koj yuav tsum ua zoo dua, tej yam uas kuv pab tau kom koj kov yeej,” ces kuv thov kom peb yuav lees txais tej lus teb no, txo hwj chim lees txhaum thiab peb tej kev ua yuam kev, thiab hloov siab rais los ua txiv tsev thiab cov tub zoo dua. Thov kom txij no mus peb yuav sib zog nrhiav kev kom peb ua raws nraim li tus Cawm Seej txoj kev—vim qhov uas peb pom peb tus kheej meej yog qhov pib ntawm kev muaj tswv yim.

Thaum peb ua li no, peb tus Vajtswv yuav tuav peb tes coj peb mus; Vajtswv yuav ua rau peb muaj zog thiab foom koob hmoov rau peb.14

Kuv cov phooj ywg zoo, qhov thib ib peb yuav tsum ua kom ua ib tug thwj tim zoo li no yog nug lo lus nug no hais tias:

“Tus Tswv,puas yog kuv?”

Kuv ua tim khawv txog qhov no thiab thov Vajtswv foom koob hmoov rau nej los ntawm Yexus Khetos lub npe amees.

Lus Cim

  1. Mathais 26:21–22; ntxiv qhov uas ntawv qaij.

  2. Mathais 7:3, 5.

  3. Saib Errol Morris, “The Anosognosic’s Dilemma: Something’s Wrong but You’ll Never Know What It Is,” New York Times, Rau Hli Ntuj 20, 2010; opinionator.blogs.nytimes.com/2010/06/20/the-anosognosics-dilemma-1.

  4. Saib Justin Kruger and David Dunning, “Unskilled and Unaware of It: How Difficulties in Recognizing One’s Own Incompetence Lead to Inflated Self-Assessments,” Journal of Personality and Social Psychology, Kaum Ob Hlis Ntuj 1999, 1121–34. “Nyob hauv 4 qhov kev tshawb fawb, wb nrhiav tau hais tias cov neeg koom tes uas muaj qhab nias ntawm qhov ib feem plaub qis tshaj thaum wb sim seb lawv tso lus ua ke, tso luag, thiab tawm tswv yim li cas, lawv cuab siab zog hais tias lawv ua zoo thiab txawj ua. Txawm lawv xeem ntawv ua rau lawv nyob ntawm 12 feem pua, lawv xav tias lawv nyob ntawm 62 feem pua (los ntawm abstract at psycnet.apa.org/?&fa=main.doiLanding&doi=10.1037/0022–3514.77.6.1121).

  5. Saib Marshall Goldsmith, What Got You Here Won’t Get You There (2007), tshooj 3. Tus kws tshawb fawb nug peb tug kom lawv ntsuas seb lawv pab lawv lub koom haum vam meej npaum li cas. Thaum suav qhov uas lawv ntsuas lawv tus kheej ua ke mas yog 150 feem pua.

  6. 1 Timautes 1:11.

  7. 2 Kauleethaus 4:4.

  8. Lukas 12:34.

  9. Efexus 3:18.

  10. Lus Qhuab Qhia thiab Kev Khi Lus 4:6.

  11. Saib Amas 17:11.

  12. Saib Ethaws 12:27.

  13. Yakaunpaus 4:6, 10.

  14. Lus Qhuab Qhia thiab Kev Khi Lus 1:28.