2010–2019
Kev Hlub Lwm Tus thiab Ua Neej Nyob Sib Txawv
October 2014


Kev Hlub Lwm Tus thiab Ua Neej Nyob Sib Txawv

Vim peb coj raws li Yexus Khetos peb yuav tsum ua neej kom sib raug zoo nrog cov uas tsis coj li peb los yog tsis lees txais tej kev qhia uas yog lub hauv paus ntawm peb txoj kev ntseeg.

I.

Thaum Yexus xaus nws tej hauj lwm qhuab qhia hauv lub ntiaj teb, Yexus qhia Nws cov thwj tim txog ib qho Nws hu ua “ib txoj kev tshiab” (Yauhas 13:34). Nws hais lo lus txib no peb zaug, ib lo lus txib uas yooj yim hais tiam sis nyuaj ua: “Nej ib leeg yuav tsum hlub ib leeg, ib yam li kuv hlub nej” (Yauhas 15:12; kuj saib nqe 17). Tej lus qhia kom ib leeg hlub ib leeg twb yog lus qhia tseem ceeb dua ntais thaum tus Cawm Seej qhuab qhia. Lo lus txib tseem ceeb thib ob yog “hlub nej tej kwv tij zej zog ib yam li nej hlub nej lub cev” (Mathais 22:39). Yexus twb qhia kom peb “Hlub [peb] tej yeeb ncuab” (Mathais 5:44). Tiam sis lo lus txib kom hlub lwm tus ib yam Yexus hlub Nws pab yaj yog ib qho nyuaj rau Nws cov thwj tim—thiab rau peb—uas tsis tau muaj dua. Thawj Tswj Hwm Thomas S. Monson qhia peb thaum lub Plaub Hlis Ntuj tas los, “kev hlub yog lub hauv paus rau txoj moo zoo, thiab Yexus Khetos yog peb tus Yam Ntxwv. Nws lub neej qhia txog txoj kev hlub tag nrho.”1

Vim li cas yog ib qho nyuaj kom ib leeg hlub ib leeg zoo li Yexus Khetos? Yog ib qho nyuaj vim peb yuav tsum ua neej nrog cov uas tsis ntseeg li peb thiab tsis ua raws li tej kev cai thiab kev khi lus zoo li peb. Nyob hauv Nws zaj lus Thov Vajtswv, ua ntej Nws raug ntsia saum ntoo khaub lig, Yexus thov kom pab cov uas coj raws li Nws: “Kuv twb qhia koj tej lus rau lawv lawm, ntiaj teb thiaj ntxub lawv, rau qhov lawv tsis yog ntiaj teb li ib yam li kuv tsis yog ntiaj teb li” (Yauhas 17:14). Ces, nws thov Leej Txiv hais tias, “Kuv tsis tau thov kom koj coj lawv tawm hauv lub ntiaj teb no mus, tiam sis kuv thov koj tsom kwm lawv kom lawv tsis txhob raug dab Ntxwg Nyoog dag ntxias” (nqe 15).

Peb yuav tsum ua neej nyob hauv lub ntiaj teb tiam sis tsis txhob ua li neeg ntiaj teb. Ib yam li Yexus qhia, peb yuav tsum ua neej nyob hauv lub ntiaj teb vim Nws lub nceeg vaj yog “cov keeb” uas pab txhua tus ua zoo dua (saib Lukas 13:21; Mathais 13:33; kuj saib 1 Kauleethaus 5:6–8). Cov uas coj raws li Yexus ua tsis tau li ntawd yog lawv sib tham nrog cov uas ntseeg thiab ua zoo ib yam li lawv ua xwb. Tiam sis tus Cawm Seej kuj qhia hais tias yog peb hlub Nws, peb yuav ua raws li Nws cov lus txib (saib Yauhas 14:15).

II.

Txoj moo zoo muaj tej lus qhia ntau uas hais tias yus yuav tsum ua raws li cov lus txib thaum yus ua neej nrog tib neeg uas ntseeg thiab coj txawv li yus. Nws tej lus qhia txog kev sib cav sib ceg yeej tseem ceeb. Thaum Yexus Khetos sawv rov los lawm, Nws hnov hais tias cov Neeg Nifais sib cav txog tus txheej txheem muab neeg ua kev cai raus dej, Nws piav meej hais tias yuav tsum ua txoj kab ke no li cas. Ces Nws qhia qhov ntsiab cai tseem ceeb no:

“Yuav tsum tsis txhob muaj kev sib cav nyob hauv nej, ib yam li tau muaj tas los lawm; thiab tsis txhob muaj tej kev sib cav nyob hauv nej txog kuv tej lus qhuab qhia, ib yam li tau muaj los lawm.”

“Vim kuv hais tseeb tseeb rau nej, tus uas muaj tus ntsuj plig ntawm txoj kev sib cav tsis yog kuv li, tiam sis yog los ntawm tus dab, tus uas yog leej txiv ntawm txoj kev sib cav sib ceg, thiab nws txhib neeg tej siab kom ib leeg sib cav npau taws rau ib leeg.

“Saib seb, qhov no … yog kuv tej lus qhuab qhia, kom tsis txhob ua tej yam zoo li ntawd lawm” (3 Nifais 11:28–30; ntxiv qhov uas ntawv qaij).

Tus Cawm Seej tsis tau hais lus ceeb toom no txog kev sib cav sib ceg rau cov uas ua tsis raws kev cai raus dej xwb. Nws tsis pub leej twg sib cav sib ceg. Cov uas ua raws li tej lus txib kuj yuav tsum tsis txhob txhib neeg tej siab kom lawv sib cav sib ceg yam npau taws. “Leej txiv ntawm kev sib cav sib ceg” yog tus dab phem; tus Cawm Seej yog tus Tub Vaj Ntxwv ntawm Kev Thaj Yeeb

Zoo ib yam li ntawd, phau Npainpaum qhia hais tias cov neeg ntse ua rau neeg nyob sib haum xeeb (Paj Lug 29:8). Cov Thwj Tim thaum ub qhia hais tias peb yuav tsum “muab siab rau ua tej uas yuav ua rau sawv daws nyob sib haum xeeb” (Loos 14:19) thiab “muaj txoj kev hlub thiab hais lus tseeb” (Efexus 4:15) “rau qhov peb tej kev chim yeej pab tsis tau kom peb ua tau neeg ncaj ncees raws li Vajtswv lub siab nyiam” (Yakaunpaus 1:20). Nyob hauv kev tshwm sim hauv lub caij nyoog no tus Tswv txib kom neeg tshaj tawm tej kev zoo siab los ntawm txoj moo zoo txhua tus mus rau nws tus neeg zej zog, los ntawm kev ua siab dav thiab ua siab mos siab muag (saib Q&K 38:41) nrog kev txo hwj chim … thiab tsis txhob thuam tej neeg thuam taus (saib Q&K 19:30).

III.

Txawm peb muaj siab mos siab muag thiab tsis xav sib cav sib ceg los, peb yuav tsum ua siab loj coj raws li qhov tseeb uas peb to taub. Peb yuav tsum tsis txhob tso peb txoj kev ntseeg los yog peb tej kev cai tseg. Yexus Khetos txoj moo zoo thiab tej kev khi lus uas peb tau khi lawm twb ua rau peb rais los ua tub rog nyob hauv kev ua rog ntawm qhov tseeb thiab qhov txhaum. Tsis muaj qhov chaw nruab nrab hauv kev ua rog ntawd.

Tus Cawm Seej qhia kev thaum Nws cov yeeb ncuab tawm tsam Nws muab tus poj niam uas raug “ntes … thaum nws tab tom deev hluas nraug” (Yauhas 8:4). Thaum lawv txaj muag vim lawv ua siab dag, cov uas rau txim rau tus poj niam mus zuj zus thiab tshuav tus poj niam thiab Yexus xwb. Nws ua siab zoo rau tus poj niam vim nws tsis tau rau txim rau tus poj niam thaum ntawd. Tiam sis Nws kuj qhia kom tus poj niam “tsis txhob ua txhaum ntxiv” (Yauhas 8:11). Yuav tsum ua siab zoo hlub lwm tus, tiam sis ib tug uas coj raws li Yexus Khetos yuav ua raws nraim li qhov tseeb—ib yam li tus Xib Hwb.

IV.

Ib yam li tus Cawm Seej, tej lub sij hawm cov uas coj raws li Nws pom neeg ua txhaum, thiab niaj hnub nim no luag hais tias cov ntseeg ntxub lwm tus los sis lawv yog neeg twm xeeb thaum lawv tiv thaiv qhov yog raws li lawv to taub. Muaj ntau yam uas neeg ntiaj teb ntseeg thiab ua, uas nyuaj rau Haiv Neeg Ntseeg hauv Hnub Nyoog Kawg nyob nrog. Niaj hnub nim no muaj neeg coob uas xav hloov kev cai kom txiv neej yuav taus txiv neej thiab poj niam yuav taus poj niam nyob hauv tej xeev feem ntau nyob hauv lub teb chaws Amelikas thiab lwm lub teb chaws ntau nyob thoob plaws lub ntiaj teb. Peb kuj nyob nrog ib txhia uas tsis ntseeg tias yuav tsum sib yuav hlo li. Ib txhia tsis ntseeg tias yuav tsum muaj me nyuam. Ib txhia tsis xav muaj kev cai uas txwv tsis pub neeg saib duab liab qab los yog haus tshuaj phem. Ib qho piv txwv ntxiv—uas neeg ntseeg feem coob paub txog—yog qhov nyuaj thaum muaj ib tug khub los yog tsev neeg uas tsis ntseeg los sis thaum yus koom ua hauj lwm nrog cov uas tsis ntseeg.

Nyob hauv tej qhov chaw xws li tej lub tuam tsev, tej tsev teev ntuj, thiab peb tej tsev, peb yuav tsum hais ncaj qhia txog cov lus txib raws li peb to taub los ntawm txoj kev cawm seej nyob hauv txoj moo zoo uas tau muab txum tim rov qab los. Peb muaj cai ua li ntawd los ntawm tus txhooj lij choj uas hais tias muaj kev ywj siab hais thiab ntseeg li peb xav, thiab txawm tej lub teb chaws txawm tsis muaj tus txhooj lij choj no los lawv tseem cia neeg ua li ntawd thiab.

Cov neeg ntseeg yuav tsum xav txog tej uas lawv hais thiab ua uas cov pej xeem sawv daws pom tau. Qhov uas peb muaj kev ywj siab ua raws li peb ntseeg tso cai rau tej yam uas cov pej xeem ua feem ntau, tiam sis yuav tsum ua raws li kev cai uas tau tsa kom sib haum nrog lwm tus txoj kev ntseeg thiab tej yam lawv ua. Tej kev cai txwv tsis pub coj yam ntxwv uas neeg coob pom tias yog kev phem los yog kev txhaum, xws li kev yuam neeg thiab kev ua lim hiam los yog kev phem, txawm yog tib neeg ua tej yam no raws li lawv txoj kev ntseeg. Tej yam uas tsis phem npaum li ntawd, txawm yog ib txhia neeg ntseeg tsis nyiam, tej zaum yuav tsum nyiaj tej ntawd yog tias “cov neeg lub suab” pom zoo tso cai ua tej ntawd, li ib tug yaj saub hauv Phau Ntawv Maumoos hais (Mauxiyas 29:26).

Hais txog tej yam uas peb hais rau cov pej xeem sawv daws, peb yuav tau coj raws li txoj moo zoo tej lus qhia thiab hlub peb cov neeg zej zog thiab tsis txhob sib cav sib ceg. Cov uas ua raws li Yexus Khetos yuav tsum coj yam ntxwv zoo. Peb yuav tsum hlub txhua tus neeg, mloog zoo, thiab saib lawv tej yam uas lawv ntseeg tiag tiag rau nqi. Txawm yog peb tsis sib yeem los, peb yuav tsum tsis txhob hais lus cem. Yuav tsum tsis txhob sib cav sib ceg txog tej yam uas peb ntseeg thiab hais txog tej kev sib haum xeeb. Peb yuav tsum muaj tswv yim zoo thaum peb piav txog tej yam uas peb ntseeg thiab thaum peb siv peb lub hwj chim. Thaum peb ua li no, peb thov kom lwm tus tsis txhob tu siab txog tej yam uas peb ntseeg tiag tiag thiab qhov uas peb ua raws li peb txoj kev ywj siab teev ntuj. Peb yaum kom peb txhua tus ua raws li tus Cawm Seej txoj Kev Cai Zoo: “Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus” (Mathais 7:12).

Thaum tib neeg tsa kev cai kom tsis ua raws li peb ntseeg, peb yuav tsum ua siab zoo lees hais tias tsis tau muaj li peb xav thiab coj yam ntxwv zoo rau peb cov yeeb ncuab. Txawm li cas los, peb yuav tsum ua zoo rau txhua tus, tsis txhob tsim txom lwm tus hlo li, tsis hais kev tsim txom lwm haiv neeg, yam neeg, kev ntseeg los yog kev tsis ntseeg, thiab cov txiv neej uas nyiam txiv neej los sis cov poj niam uas nyiam poj niam.

V.

Kuv twb hais txog tej ntsiab cai lawm. Tam sim no kuv yuav hais txog tej yam peb yuav tsum ua kom muaj raws li tej ntsiab cai no thaum peb ua neej es peb yuav tsum haj yam rau siab ua raws li tus Cawm Seej tej lus qhia.

Kuv pib hais txog tej uas peb cov me nyuam yaus kawm thaum lawv ua si. Ib txhia neeg uas tsis yog Neeg Maumoos tu siab thaum ib co mej zeej nyob hauv Utah tsis pub lawv cov me nyuam ua phooj ywg nrog cov me nyuam uas ntseeg yam txawv. Peb yeej qhia tau peb cov me nyuam kom coj zoo es tsis tas lawv ua siab deb los yog saib cov uas txawv tsis rau nqi.

Ntau tus xib hwb nyob hauv lub koom txoos thiab lub tsev kawm ntawv tu siab vim ib txhia cov tub hluas ntxhais hluas ib leeg ua tsis zoo rau ib leeg, cov mej zeej los kuj muaj ua li no. Lus txib kom peb ib leeg hlub ib leeg yeej hais txog kev hlub thiab kev saib lwm tus rau nqi tsis hais lawv ntseeg li cas, thiab tsis hais lawv yog neeg dab tsi, muaj kab lig kev cai dab tsi, los yog muaj nyiaj los tsis muaj. Peb hais rau cov tub hluas ntxhais hluas tag nrho kom lawv tsis txhob tsim txom, thuam, los sis hais thiab ua tej yam uas ua rau lwm tus mob. Tag nrho tej no yog tsis raws li tus Cawm Seej cov lus txib kom ib leeg hlub ib leeg.

Tus Cawm Seej qhia hais tias tus dab phem siv kev sib cav sib ceg. Qhov no yeej rau txim rau ib txhia uas kav teb kav chaw tej kev hais lus thiab kev coj yam ntxwv. Yeej muaj tej kev cai tsis raws li peb ntseeg hauv tej lub tseem fwv, tiam sis thaum muaj tej kev cai tsis raws li peb ntseeg peb tsis tas hais lus saib tsis taus neeg vim tej ntawd tab kaum peb lub tseem fwv thiab rau txim rau cov neeg kav teb kav chaw. Peb txhua tus yuav tsum tso tej lus ntxub ntxaug tseg thiab coj yam ntxwv zoo thaum tsis sib haum.

Qhov chaw tseem ceeb tshaj plaws kom tso kev sib cav sib ceg tseg thiab coj yam ntxwv saib taus lwm tus uas ntseeg txawv yog nyob hauv peb tsev neeg. Yeej yuav muaj kev sib txawv—tsis hais hom me los yog hom loj los yog. Hais txog tej kev sib txawv loj heev, cia li xav seb yuav ua li cas yog tias ib tug hauv nej tsev neeg nrog nws tus hluas nkauj los yog hluas nraug nyob. Qhov no ua rau ob lub ntsiab cai tseem ceeb tsis sib haum—peb txoj kev hlub tus ntawd los ntawm peb tsev neeg thiab peb txoj kev ua raws li cov lus txib. Yog peb ua raws li tus Cawm Seej tus yam ntxwv, peb yuav muaj siab hlub thiab tseem yuav nyob ruaj khov raws li qhov tseeb thaum peb tsis ua tej yam kom lwm tus xav tias peb pom zoo rau kev txhaum ntawd.

Thaum kuv xaus lus kuv yuav qhia txog ib tsev neeg ntxiv. Nyob hauv ceg txheem ntseeg lub rooj sab laj nyob hauv Amelikas qhov Nruab Nrab yuav luag 10 xyoo tas los, kuv tau ntsib ib tug muam uas qhia kuv tias nws tus txiv twb nrog nws mus koom lub koom txoos tau 12 xyoos lawm tiam sis nws tsis yog ib tug mej zeej. Nws nug seb nws yuav tsum ua li cas. Kuv ntuas kom nws ua tej yam uas yog mus ntxiv thiab ua siab ntev thiab siab zoo rau nws tus txiv.

Ib hlis tom qab ntawd nws sau ntawv rau kuv hais tias: “Es, kuv twb xav tias qhov uas kuv nyob nrog nws tau 12 xyoos qhia hais tias kuv ua siab ntev, tiam sis ua rau kuv xav tias tej zaum kuv tsis ua siab zoo txaus. Yog li ntawd, kuv siv zog ua siab zoo tau ib lub hlis ntxiv, thiab nws ua kev cai raus dej.”

Kev ua siab zoo yeej muaj hwj chim, qhov tseem ceeb yog nyob hauv ib tsev neeg. Nws sau ntxiv hais tias, “Kuv haj yam sib zog ua siab zoo tam sim no vim wb xav ua kev sib khi hauv lub tuam tsev xyoo no!”

Rau xyoo tom qab ntawd nws sau ib tsab ntawv ntxiv rau kuv hais tias: “Lawv [nyuam qhuav] hu thiab tsa kuv tus txiv ua tus npisov [ntawm peb pawg ntseeg].”2

VI.

Nrog lwm tus thiab nyob hauv peb lub neej, peb yuav tsum ua neej nrog tej kev sib txawv. Peb yuav tsum tsis txhob tso tej kev sib txawv no tseg, tiam sis cov uas coj raws li Yexus Khetos mus yuav tsum kawm ua neej kom sib raug zoo nrog cov uas tsis coj li lawv los yog tsis lees txais tej kev qhia uas yog lub hauv paus ntawm peb txoj kev ntseeg. Vajtswv txoj kev cawm seej, uas cov yaj saub tau tshwm sim rau peb, ua rau peb muaj ib lub neej hauv lub ntiaj teb es peb yuav tsum ua raws li Nws tej lus txib. Xwv kom ua li ntawd peb yuav tsum hlub peb cov neeg zej zog uas ua raws li tej kab lig kev cai txawv thiab ntseeg txawv ntawm peb ib yam li Nws hlub peb. Raws li ib tug yaj saub hauv Phau Ntawv Maumoos qhia, peb yuav tsum thawb mus tom ntej, nrog “kev hlub Vajtswv thiab txhua tus neeg” (2 Nifais 31:20).

Txawm nyuaj rau peb ua neej thaum muaj kev kub ntxhov nyob ib puag ncig, peb tus Cawm Seej lo lus txib kom peb ib leeg hlub ib leeg ib yam li Nws hlub peb yog qhov uas nyuaj tshaj rau peb ua. Kuv thov kom peb yuav to taub qhov no thiab nrhiav kev kom ua neej li no rau cov uas peb paub thiab thaum peb ua txhua yam, los ntawm Yexus Khetos lub npe, amees.

Lus Cim

  1. Thomas S. Monson, “Love—the Essence of the Gospel,” Ensign los sis Liahona, Tsib Hlis Ntuj 2014, 91.

  2. Tej tsab ntawv rau Dallin H. Oaks, Ib Hlis Ntuj 23, 2006, thiab Kaum Hli Ntuj 30, 2012.