Iakwe ro jet im Mour kōn Oktak ko

Ilo raan ko āliktata in jerbal in kwaļo̧k eo An, Jisōs eaar leļo̧k n̄an ro Rikaļooraņ ta eo Eaar ņa etan “juōn kien kāāl” (Jon 13:34). Āliji jilu kattōn, kien eo ekar jab lamwaan ak ekar pen: “kom̧win Yokwe doon, āinwōt Iar yokwe kom̧” (Jon 15:12; bar lale eoon 17). Katak eo n̄an yokwe doon ekar baj wōt ioļap in katak ko an jerbal in kwaļok eo an Rilo̧mo̧o̧r eo. Kien eo kein karuo im eļap ekar “Kwōn yokwe ri turum̧ im āinwōt kwe” (Matu 22:39). Jisōs ekar bar katakin, “Yokwe ro ri kōjdate kom̧” (Matu 5:44). Bōtaab kien eo n̄an Yokwe ro jet āinwōt An kar yokwe sib ko an ekar n̄an ro rikaloran—im n̄an kōj—juōn mālijjon̄ eo ejenolo̧k. “Ilo m̧ool” Būreejtōn Thomas  S. Monson ekar katakin kōj Eprōl eo ļo̧k, “iakwe ej lukkuun pedped in katak eo an ko̧jpeļ eo, im Jisōs Kraist ej ad Riwaanjon̄ak. Mour eo An ej jenok ko an iakwe.” ¹

Etke elukkuun pen bwe en wōr iakwe eo āinwōt an Kraist n̄an doon? Epen kōnke jej aikuj in mour ilubwilijin ro rejjab bōk tōmak in ad im aorōk ko im bujen ko aikuj in ļoori. Ilo jar in kajjitōk, kar jar in akweļap eo an, kar kōm̧m̧ane m̧okta jen iien debwāāl eo an, Jisōs ekar jar kōn rikaļoor ro an: “Iar leļo̧k n̄an er naan eo Am̧, im laļ ear kōjdate er bwe re jab jān laļ, āinwōt N̄a I jab jān laļ” (Jon 17:14). Innem, n̄an Jemen ekar akweļap, “Ijab jar bwe kwōn bōk er jān laļ, a bwe Kwōn kōjparok er jān eo e nana” (eoon 15).

Jej mour ilo laļ in ak jej jab jen laļ in. Jej aikuij in mour ilo laļin kōnke, āinwōt an Jisōs kar katakin ilo juōn būrabōl, Ej āinwōt “yeast,” eo jerbal eo an ej n̄an kauwe aolep iiōk eo kōn kajoor ko an (laleLuk 13:21; Matu 13:33; bar lale 1  Korint 5:6–8). Rikaļoor ro an rejjab maron̄ kōm̧m̧ane men in eļan̄n̄e wōt renaaj iaieo wōt ippen ro rej bōk ejja tōm̧ak im makūtkūt ko aer. Bōtaab Rilo̧mo̧o̧r eo ekar bar katak eļan̄n̄e jej iakwe E, jenaaj kōjparok kien ko An (lale Jon 14:15).

Gospel eo elōn̄ katak ko ie kōn kōjparok kien ko ilo aer mour ilubwilijin armej ro eoktak tōmak kab m̧akūtkūt ko aer. Katak eo kōn iakwelel ej ioļapān men kein. Ke Kraist eo ekar jerkakpeje ekar lo RiNipai ro rej arto artak kōn wāween peptaij, Ekar leļo̧k juōn kōmelele eo elukkuun in alikkar kōn ewi wāween an kain̄i in aikuij in kōm̧m̧an. Innām eaar kwaļo̧k pedped in katakin in eaorōk:

“Im en ejjeļo̧k iakwāālel ko ilubwiljimi āinwōt eaar wōr m̧oktaļo̧k; im en ejjeļo̧k iakwāālel ko ilubwiljimi kōn unleplep ko an katak ko Aō, āinwōt eaar wōr m̧oktaļo̧k.

“Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj buruōn armej n̄an aitwerōk kōn illu, ippān doon.

“Lo, en̄in ej … katak eo Aō, bwe men rot kein rej aikuij jako” (3 Nipai 11:28–30; kakobaba n̄an katakin).

Rilo̧mo̧o̧r eo ekar jab kwaļo̧k jon̄an kakkōl eo an ņae iakwālel n̄an ro rejjab kōjparok kien eo an kōn peptaij. Ekar kabōjrak iakwālel jen jabdewōt. Bar āinwōt ro rej kōjparok kien ko an rejjab aikuj in pukwoj būruwōn armej n̄an aitwerōk kōn illu. Eo “jemān jum̧ae” ej devil eo; Rilo̧mo̧o̧r eo ej Irooj in Aenōm̧m̧an.

Ejja āinwōt, baibōl eo ej katakin bwe “Ri mālōtlōt rej kajeorļo̧k illu” (Jabōn Kōnnaan Ko 29:8). Rijilōk ro jinoin kar katakin bwe jej aikuj “ļoor men in aenōm̧m̧an ko” (Rom 14:19) im “m̧ool ilo yokwe” (Epesōs 4:15), “Bwe illu an armej e jab jerbale kwōjarjar an Anij” (Jemes 1:20). Ilo revelesōn ko raan kein Irooj ej kakien bwe enaan eo em̧m̧an an gospel eo em̧ōj an jepļaaktok ej aikuj in kwaļo̧k jen aolep armej n̄an ro riturin, ilo aenem̧m̧an im lur (D&C 38:41), kōn ettā, ejjab iakwālel ņae riakwāāl (lale D&C 19:30).

Jekdoon n̄e jej pukot n̄an ad aenōm̧m̧an im n̄an joļo̧k iakwāālel, jejjab aikuj in kadikļo̧k ak kam̧ōjņoik ļo̧k kallim̧ur ko ad n̄an m̧ool eo jemeļeļe kake. Jejjab aikuij in keliktak jen ijoko jej pād ie ak aorōk ko ad. Gospel eo an Jisōs Kraist im bujen ko jekar kōm̧m̧ani renaaj kōm̧m̧an bwe jen pād ilo tariņae in kōtaan m̧ool im bōd. Ejjelok ej pād ikōtaan tariņae in.

Rilo̧mo̧o̧r eo ekar kwaļo̧k iaļ eo ke ro raar jum̧ae raar jelm̧ae E kōn kōrā eo rekar “jibwe ilo ļōn̄, ilo an kōm̧anm̧ane wōt” (Jon 8:4). Ke rekar jook kōn riap ko aer make, rijum̧ae ro rekar kōtļo̧k e im etal jen im Jisōs emake iaan ippān kōrā eo. Ekar kōm̧m̧an n̄an e ilo jouj ilo an kar jab kajjeon̄ in kaje ilo tōre eo. Bōtaab ekar lukkuun kapen ilo an kwaļo̧k n̄an e bwe en “jab bar jero̧wiwi” (Jon 8:11). Iakwe im jouj ej menin aikuij, ak rikaloran Kraist—āinwōt m̧aajta eo—naaj pen ilo m̧ool eo.

Āinwōt Rilo̧mo̧o̧r eo, rikaļoor ro An jet iien rej jelm̧ae m̧wil ko rejerawiwi, im rainin rej ņa etaer “pen būruweer” ak “rikōlļapļap” eļan̄n̄e rej bōbrae jim̧we im bōd ilo aer melele kake. Elōn̄ aorōk ko im makūtkūt ko an mour in rej letok melijjon̄ kein n̄an ro rekwojarjar ilo raan kein āliktata. Men eo ealikkar tata iaan men kein rainin ej wallōn̄tak eo ekajoor im ej kōmālim an kōrā n̄an kōrā im em̧m̧an n̄an em̧m̧an mare ilo elōn̄ state ko ilo United States im elōn̄ laļ ko ilo laļin. Jej bar mour ilubwiljin jet ro rejjab tōmak ilo mare n̄an jidik. Jet rej tōmak ilo jab neji. Jet rej jab errā ilo kamo alooj pija ko renana im uno ko rekajoor. Bar juon waanjon̄ak—aolep ritōmak im jeļā kake—ej melijjon̄ eo n̄an jokwe ippān juon pāleen ak uwaan baam̧le eo ejjab tōmak ak iaieo ippān rijerbal ro mōttad im rejjab tōmak ak ro jet.

Ilo ijoko em̧ōj kōjeram̧m̧ani, āinwōt tampel ko, im̧ōn kabun̄ ko, im im̧oko im̧ōd make, jej aikuj in kwaļo̧k kōn m̧ool eo im kakien ko ilo tu jejjet in im tarlep in ilo ad melele kaki jen karōk in lo̧mo̧o̧r eo letok jen gospel eo em̧ōj an jepļaaktok. Jim̧we eo ad kōm̧m̧ane men in ej kōjparok jen kakien ko an anemkwoj in kōnono im kabun̄ jar, im bar āinwōt anemkwoj eo an juon make eo rej kautiej bar āinwōt ilo laļ ko ejjelok aer anemkwoj ej itok ippān kien eo aer.

Ilo imaan mejān armej, ta ko armej in kabun̄ rej ba im kōm̧m̧ani ejelōt lōmņak ko an ro jet. Anemkwoj eo n̄an kabun̄ jar ekūtbuuj enan̄in aolep makūtkūt ko im̧aan mejen armej, ak ej ekkeijōl wōt ippen men ko aikuij in kōm̧m̧ani im rej menin aorōk n̄an rejtak tōmak im makūtkūt ko an ro jet. Kien ko remaron̄ kamo kabōjrak mwil ko im jej kile ke rōbōd im rejjab em̧m̧an, āinwōt men ko rej kwalok ijoko retino ippen armej, m̧anm̧an ko ak makūtkūt an rikōm̧m̧an jorrāān ro, jekdoon n̄e ej kōm̧m̧an jen ro rōtijemļo̧k ilo etan kabun̄. Mwil ko edik aer kabūrom̧ōjm̧ōj, jekdoon n̄e ejjab em̧m̧an ippen jet ro rej tōmak, maron̄ aikuij in niknik kake ium̧win jidrik iien jān ta eo rikanaan eo ilo Bok in Mormon ej ņa etan “ainikien armej ro” (Mosaia 29:26).

Ilo jōkjōk eo n̄an katak ko lo̧bwilej, jej kōņaan eļapļo̧k mije ko n̄an katak ko ilo kojpel in n̄an iakwe ro riturid im joļo̧k iakwāālel. Rikaloor ro an Kraist rej aikuij in waanjon̄ak in makūtkūt im̧aan mejen armej. Jej aikuij in iakwe aolep armej, ro em̧m̧an aer ron̄jake, im kwaļo̧k ad lōmņak kōn tōmak ko aer. Jekdoon n̄e jemaron̄ jab errā, Jejjab aikuij in kwaļo̧k ad jab errā. Pen eo ad ilo kōnono ko ad ilo unin kōnono ko rejelet mour an armej rejjab aikuij in iakwāālel. Jej aikuij in meletlet ilo ad kōmleleik im kōttōpar ijo jej jutak ie im ilo ad kōjerbal kajoor in kareel ko ipped. Ilo ad kōm̧m̧ane men in, jej kajjitōk bwe ro jet rejjab maron̄ in inepata jen mwilaļ in tōmak ko ad im anemkwoj in kōjerbal tōmak ko ad. Jej kōkketak aoleped wōj n̄an kamineneik kien eo eaorōk tata an Rilo̧mo̧o̧r eo: “Innām men otemjej jabdewōt komij kōnan bwe armej ren kōm̧anm̧an n̄an kom, en āindein ami kōm̧anm̧an n̄an er” (Matu 7:12)

Eļan̄n̄e ta ko jej meļeļe kaki rejjab jipan̄, jej aikuij in bōk tōprak ko rejjab jokkin wōt juon n̄an kōj, im mour ippen men ko rej jum̧ae kōj. Ilo jabdewōt wāween, jej aikuij in armej ro rem̧m̧an n̄an aolep, jab kobaļo̧k ilo kakkure ko ilo jabdewōt wāween, ekoba kaljōkļo̧k ko n̄an kōlar in kilin armej, ia ko rej itok jene, tōmak ko aer ak ro ejjelok aer tōmak, im oktak ilo wāween mour in pālele ko aer.

Ikar kōnono kōn pedped in tōmak ko rōdepakpak. Kiiō inaaj kōnono kōn ewi wāween an pedped in tōmak kein jerbal ilo elōn̄ jōkjōk ko ralikkar im katak ko an Rilo̧mo̧o̧r eo aikuij ļapļo̧k ad tōmak im ļoori.

Ij jino kōn ta ko ajri ro nejid rej ekkatak ilo aer ikkure ippen doon. Enan̄in aolep ien ro rejjab Mormon ilo Utah rej jook im lel jen jet iaan membōr ro ad ro rejjab kōņaan kōtļo̧k ajri ro nejier n̄an m̧ōttāik ajri ro jen tōmak ko jet. Ilo m̧ool jemaron̄ katakin ajri ro nejid aorōk ko im jon̄ak ko ilo ad jab kōm̧m̧an bwe ren kōttoļok er make ak jab kautiej jabdewōt ro rejeno̧ļo̧k.

Elōn̄ rikaki in kabun̄ im jikuul ko rej būrom̧ōj ilo wāween an jodikdik ro, ekoba jodikdik ro an LDS, kōm̧m̧an n̄an doon. Kien eo n̄an iakwe doon ej lukkuun kakobaik iakwe im kautiej jekdo̧o̧n kabun̄ rot, im barāinwōt m̧anit, im mour rot. Kōm̧ij melijjon̄ e aolep jodikdik ro n̄an jolo̧k kakkure doon, m̧an doon, ak ilo naan im iminene ko me rekemetak ro jet. Aolep rej jum̧ae kien eo an Rilo̧mo̧o̧r n̄an iakwe doon.

Rilo̧mo̧o̧r eaar kwaļo̧k bwe jum̧ae ej juon kein jerbal an devil. Men in ej lukkun katakin ņae jet iaan kōnono im kōm̧m̧an ko ilo arto artak ko kōn kien. Jerbal ippen armej im kien ko rejjab ļoor ta ko kwoj lōmnak rejim̧we rej menin aōrok n̄an arto artak ko an kien, ak men kein rejjab aikuij in iookļo̧k mour ko an juon make im kōnanaik wāween ko an kien im kakkure armej eo ej bōk koņaan. Aoleped wōj aikuj in joļo̧k dike ilo wāween kōnono im kōmmālmel mour ilubwiljin armej n̄an oktak in lomņak ko an armej.

Men eo eaorōktata n̄an ellā jen iakwāālel im kōjerbal kautiej n̄an oktak ko ilo m̧oko im kōtaan ko an baam̧le. Oktak ko elōn̄ wāweer—jet reddik im jet reļļap. N̄an oktak ko reļļap, lōmņak ke juon uwaan baam̧le eo ej pālele waan. Men in ej boktok ruo men ko raorōk bwe ren idaabtōk—iakwe eo ad n̄an eo uwaan baam̧le eo im kallim̧ur ko ad n̄an kien ko. Ļoor waanjon̄ak ko an Rilo̧mo̧o̧r eo, jemaron̄ kwaļo̧k iakwe im jouj im maron̄ wōt pen ilo m̧ool eo ilo ad kōm̧m̧ane men eo jejļā ke ejjjab ebōd.

Ij kilōke kōn bar juon waanjon̄ak kōn kōtaan ko ilo bar juon baam̧le. Ilo juon kweilo̧k eļap an stake ilo tuion̄ tuioļap in Amedka emaron̄ 10 iiō ko remootļo̧k, ikar ioone juon kōrā eo ekar ba n̄an n̄a ke ļeo ippān ejjab membōr ej itok ippān tok n̄an jar ium̧win 12 iiō ko ak ejjan̄in kobatok ilo kabun̄ in. Ta eo liin emaron̄ kar kōm̧m̧ane, ekar kajjitōk. Ikar kapilōk e n̄an wōnm̧aanļo̧k im kōm̧m̧ane aolep men ko rejim̧we im n̄an kijenmej im jouj n̄an ļeo ippān.

Juon allōn̄ tokālik ekar jeje tok n̄an n̄a āinwōt in: “Ekwe, ikar lōmņak 12 iiō ekar kwaļo̧k jon̄an aō kijenmej, ak ijjab jeļā eļan̄n̄e ekar lukkuun jouj n̄an E. Kōn menin, ikar kate eō eļapļo̧k ium̧win juon allōn̄, im ekar baptaij.”

Jouj ej kajoor, eļaptata ilo juōn baam̧le. Leta eo an ekar wōnm̧aanļo̧k, “Ij kajjeon̄ bwe en ļapļo̧k aō jouj kiō kōnke kōmij kōttōpare liāp ilo tampeļ iiō in!”

Jiljino iiō ko tokālik ekar jeje tok n̄an n̄a bar juon leta: “Ļeo ippa ej [kab] bōk juon kūr im kapit āinwōt bisop [n̄an ward eo am].” ²

Ilo elōn̄ kōtaan ko im jōkjōk ko ilo mour in, jej aikuij mour kōn oktak ko. Ilo ijoko raorōk, jait eo ad ilo oktak kein rej aikuij kajej tokjeer ak jerwaane, ak rikaļoor ro an Kraist rej aikuij in katak n̄an mour aenōm̧m̧an ippān ro jet rejjab mour kōn aorōk ko aer ak bōk katak ko rej pedped kaki. Karōk in lo̧mo̧o̧r eo an Jemed, eo jejļā kōn revelesōn ko kanaan kaki, rej likūt kōj ilo jōkjōk ko an mour in ijoko jej aikuij kōjparok kien ko An. Menin ekoba iakwe ro riturid im rej jen manit im tōmak ko roktak āinwōt An kar iakwe kōj. Āinwōt an kar rikanaan eo ilo Bok in Mormon katakin, jej aikuij in bun̄ m̧aanļo̧k, im kōn “juon iakwe n̄an Anij im armej ” (2 Nipai 31:20).

Jon̄an wōt an pen n̄an mour kake ilo men ko reppen ipeļaakid, Rilo̧mo̧o̧r eo ad ej kean̄ n̄an iakwe doon āinwōt An iakwe kōj ej bōlen melijjon̄ eo ad eļaptata. Ij jar bwe jen maron̄ meļeļe menin im pukot n̄an mour kake ilo aolep kotaan ko jej pād ie im m̧akūtkūt ko, ilo etan Jisōs Kraist, amen.