2010–2019
Ola Faatasi ma Alolofa atu i Isi e Eseese o Tatou Talitonuga
Oketopa 2014


Ola Faatasi ma Alolofa atu i Isi e Eseese o Tatou Talitonuga

I le avea ai ma soo o Keriso e tatau ona tatou ola filemu faatasi ma isi e le tutusa o tatou tulaga faatauaina pe talia ia aoaoga ia o loo faavaeina ai.

I.

I aso faaiuiu o Lana galuega i la le tino, na tuu atu ai e Iesu i Ona soo le mea na Ia ta’ua o se “poloaiga fou” (Ioane 13:34). Sa faatolu ona ta’ua, o lena poloaiga sa faatauvaa ae faigata: “Ia outou fealofani, e pei ona ou alofa atu ia te outou” (Ioane 15:12; tagai foi i le fuaiupu 17). O le aoaoga ia fealofani sa avea pea ma se aoaoga autu i le auaunaga a le Faaola. O le poloaiga sili lona lua o le “alofa atu i le lua te tuaoi ia pei o oe lava ia te oe” (Mataio 22:39). Sa aoao mai foi Iesu, “Alofa atu i e ua ita mai ia te outou” (Mataio 5:44). Ae o le poloaiga ia alolofa atu i isi e pei ona Ia alofa i Lana lafu sa tuu atu ai i Ona soo—ma ia i tatou—se lui lea e tulagaese. Sa aoao i tatou e Peresitene Thomas S. Monson ia Aperila talu ai, “O le mea moni, o le alofa o le ute moni lea o le talalelei, ma o Iesu Keriso o lo tatou faataitaiga. O Lona soifuaga o se talatuu o le alofa.”1

Aisea ea e matua faigata ai ona i ai le alofa FaaKeriso o le tasi i le isi? E faigata aua e tatau ona tatou ola faatasi ma i latou e le tutusa o tatou talitonuga ma tulaga faatauaina ma matafaioi mo feagaiga. I Lana tatalo faatoga, sa ofo atu a o lumanai ai Lona Faasatauroga, sa tatalo ai Iesu mo Ona soo: “Ua ou tuu atu lau afioga ia te i latou; ua inoino foi le lalolagi ia te i latou, aua e le ni o le lalolagi i latou, faapei o a’u, ou te le so le lalolagi a’u” (Ioane 17:14). Ona ia aioi atu lea i le Tama, “Ou te le ole atu ina ia e ave ese ia te i latou i le lalolagi, a ia e tausi ia te i latou ina ne’i leaga” (fuaiupu 15).

E ao ona tatou ola i totonu o le lalolagi ae le o ni o o le lalolagi. E tatau ona tatou ola i le lalolagi ona, e pei ona aoao mai Iesu i se faataoto, o Lona malo e “tusa ma le mea faafefete,” o lona faamoemoe ia faafefeteina uma ai i ona aafiaga (tagai Luka 13:21; Mataio 13:33; tagai foi 1 Korinito 5:6–8). E le mafai e Ona soo ona faia lena mea pe a faapea latou te fegalegaleai ma na o i latou lava e tutusa o latou talitonuga ma faatinoga. Ae sa aoao mai foi le Faaola afai tatou te alolofa ia te Ia, o le a tatou tausia Ana poloaiga (tagai Ioane 14:15).

II.

Ua anoanoai aoaoga a le talalelei e uiga i le tausiga o poloaiga a o ola faatasi ai ma tagata e ese talitonuga ma faatinoga. O aoaoga e uiga i finauga e taua tele. Ina ua maua atu e le Keriso Toetu sa Nifae o loo finau i le faiga o le papatisoga, sa Ia tuuina atu ni faatonuga manino i le auala e tatau ona faatino ai lenei sauniga. Ona Ia aoao atu lea o le mataupu faavae sili lenei:

“Ia aua nei i ai ni finauga i totonu ia te outou, e pei ona sa i ai e oo mai i le taimi nei; pe i ai foi ni finauga i totonu ia te outou e uiga i matautu o lau mataupu, e pei ona sa i ai e oo mai i le taimi nei.

“Aua e moni, e moni ou te fai atu ia te outou, o le e i ai le agaga o le finauga ua le mai ia te au o ia, ae ua mai le tiapolo ia, o lē o le tamā o le finauga, ma ua faaoso e ia loto o tagata ia fefinauai ma le ita, o le tasi i le isi.

“Faauta … o lau mataupu lenei, ia aveesea mea faapena” (3 Nifae 11:28–30; faaopoopo le faamamafa).

Sa lei faatapulaaina e le Faaola Lana lapataiga i finauga ia i latou sa lei tausiaina le poloaiga e uiga i le papatisoga. Sa ia faasaina soo se tasi ona finau. E oo lava ia i latou o loo tausia poloaiga e le tatau lava ona faaosoina loto o tagata ia finau ma le ita. O le “tamā o le finauga” o le tiapolo lea; a o le Faaola o le Alii o le Filemu.

E faapena foi, o loo aoao mai le Tusi Paia e faapea “o ē popoto latou te faaliliueseina le ita” (Faataoto 29:8). Sa aoao mai uluai Aposetolo e tatau ona tatou “tausisi i mea e tupu ai le filemu” (Roma 14:19) ma ia “[tautala] faamaoni i le alofa” (Efeso 4:15), “aua e le tupu le amiotonu mai le Atua i le ita o tagata” (Iakopo 1:20). I faaaliga o aso nei na poloai mai ai le Alii e faapea o le tala fiafia o le talalelei toefuataiina e tatau ona folafola atu e “tagata taitoatasi i lona tuaoi, i le mālū ma i le agamalu” (MF&F 38:41), “ma le lotomaualalo atoa, … ma lē faifai atu i ē e faifai mai” (MF&F 19:30).

III.

E tusa lava pe tatou te saili atu ia agamalu ma aloese mai finauga, e le tatau lava ona tatou fetuunaia pe faavaivaia lo tatou tuuto i upumoni ua tatou malamalama i ai. E le tatau ona tatou lafoaia o tatou tulaga po o tulaga faatauaina. O le talalelei a Iesu Keriso ma feagaiga ua tatou osia e le faapea o le a lē avea ai i tatou ma ni tagata e fetaiai ma luitau e faavavau o le va o le upumoni ma le mea sese. E leai se avanoa e fetōtōa’i ai i lena tauiviga.

Sa faaali mai e le Faaola le ala ina ua tofotofoina o Ia e Ona fili i le fafine na “maua … o mulilua, ua mautinoa lava” (Ioane 8:4). Ina ua maasiasi i lo latou lava faafia-amiotonu, sa o ese ai ē na molia atua le fafine ma tuua ai na o Iesu ma le fafine. Sa Ia taulimaina o Ia i le agalelei e ala i le le ta’usalaina o ia i lena taimi. Ae sa Ia faatonuina foi o ia ma le maumaututu ia “aua ne’i toe agasala” (Ioane 8:11). E manaomia le agalelei alofa, ae o se soo o Keriso—e pei lava o le Matai—o le a mausali i le upumoni.

IV.

E pei foi o le Faaola, o nisi taimi sa fetaiai ai Ona soo ma ni amioga agasala, ma o aso nei pe a latou puipuia le mea sao ma le mea sese e pei ona latou malamalama i ai, ua ta’ua i latou i nisi taimi o ni “tagata e ita lava i isi tagata” po o “tagata e malosi ona talitonuga faalelotu”. E anoanoai tulaga faatauaina ma faiga faalelalolagi e oo ai ia luitau i le Au Paia o Aso e Gata Ai. O se mea ua taatele i nei ona aso o le malosi o le galu lea ua faatulafonoina ai le faaipoipoga o le itupa e tasi i le tele o setete ma itumalo i le Iunaite Setete ma Kanata ma isi atunuu i le lalolagi. O loo tatou ola foi faatasi ma nisi e le talitonu lava i le faaipoipoga. O nisi e le talitonu i le faia o fanau. O nisi e tetee i soo se faasaāga o ponokalafi po o fualaau faasaina. O se isi fataitaiga—e masani i ai le toatele o e talitonu—o le luitau lea o le nonofo faatasi ma se toalua po o se tagata o le aiga e le talitonu po o le fegalegaleai foi ma tagata faigaluega e le talitonu.

I nofoaga faapaiaina, e pei o malumalu, fale tapuai, ma o tatou lava fale, e tatau ona tatou aoao atu ai le upumoni ma poloaiga i le manino ma le atoatoa e pei ona tatou malamalama i ai mai le ata o le faaolataga lea o loo faaalia i le talalelei toefuataiina. O lo tatou aia e faia ai lea mea o loo puipuia e faavae faaletulafono o le saolotoga o manatu ma tapuaiga, faapea ai foi ma aia o le tagata lava ia lea o loo faamamaluina e oo lava i atunuu e aunoa ma ni puipuiga aloaia faaletulafono.

I nofoaga faitele, o mea e saunoa ma faia e tagata faalelotu e aafia ai lava manatu o isi. O le saolotoga o tapuaiga ua aofia ai le tele o faatinoga a tagata lautele, ae ua noatia i agavaa ua talafeagai e faamalie ai talitonuga ma faiga masani a isi. E mafai e tulafono ona faasaina amioga ia e iloa e le lautele e sese pe le taliaina, e pei o feusuaiga faatautala, misa, po o amioga faatupu faalavelave, e tusa lava pe faia e tagata fouvale ona o le igoa o le lotu. O amioga e le matuia tele, e ui lava e le taliaina e nisi tagata talitonu, ae atonu e manaomia ona onosaia pe afai ua faatagaina e le mea ua ta’ua e se perofeta o le Tusi a Mamona “o le leo o le nuu” (Mosaea 29:26).

I le mataupu o lauga faalauaitele, e tatau ona tatou mulimuli uma i aoaoga o le talalelei ia alolofa i tuaoi ma aloese mai finauga. O soo o Keriso e tatau ona avea ma faataitaiga o le amiosolia. E tatau ona tatou alolofa i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui atonu tatou te le ioe [i nisi manatu], ae e le tatau ona tatou le fiafia. O o tatou tulaga ma talanoaga e uiga i ni autu feteenai e le tatau ona tupu ai ni finauga. E tatau ona tatou atamamai i le faamalamalamaina ma le tuliloaina o o tatou tulaga ma le faatosinaina mai o isi tagata. O le faia o lea mea, tatou te talosaga ai ia le tiga isi ona o o tatou talitonuga faamaoni faalelotu ma le faatinoga saoloto o la tatou tapuaiga. Matou te uunaia i tatou uma ia faatino le Tulafono Faaauro a le Faaola: “O mea uma foi tou te loto i ai ia faia e tagata ia te outou ia faapea lava ona outou faia ia te i latou” (Mataio 7:12).

Pe a faasagatau mai le lalolagi i o tatou tulaga, e tatau ona tatou taliaina ni taunuuga le lelei ma le faaaloalo, ma faatino pea le amiosolia i o tatou fili. I soo se tulaga e tupu mai, e tatau ona avea i tatou ma tagata amio lelei i tagata uma, i le teenaina o sauaga o soo se ituaiga, e aofia ai sauaga ona o ituaiga, gagana, talitonuga faalelotu pe le faalelotu, ma eseesega i manatu tau feusuaiga.

V.

Ua ou talanoa atu e uiga i mataupu faavae lautele. O lea la o le a ou talanoa atu e uiga i le auala e tatau ona faaaoga ai na mataupu faavae i le tele o tulaga masani eseese lea e tatau ona mulimulitaia atili ai ma le faamaoni ia aoaoga a le Faaola.

Ou te amata atu i mea e aoao e a tatou fanau talavou i a latou gaoioiga faataaloga. Ua tele ina tiga tagata e le o ni Mamona iinei i Iuta ma faiesea e nisi o o tatou tagata o e o le a le faatagaina a latou fanau e avea ma uo a fanau o isi faatuatuaga. E mautinoa lava e mafai ona tatou aoao a tatou fanau i tulaga faatauaina ma tulaga faatonuina o le amio e aunoa ma le tavavaeeseina o i latou lava pe faaalia foi se le faaaloalo i soo se tasi e ese ai.

E toatele faiaoga i ekalesia ma aoga e faanoanoa i le auala o loo taulimaina ai e nisi talavou, e aofia ai ma le autalavou o le Ekalesia, le tasi ma le isi. O le poloaiga ia outou fealofani ua mautinoa lava o loo aofia ai le alofa ma le faaaloalo i va o lotu eseese faapea ai ma soo se tulaga faale-ituaiga, faaleaganuu ma faaletamaoaiga. Matou te luiina le autalavou uma ia aloese mai le faamaasiasi tagata, faatiga, po o gagana ma faiga ia ua faamoemoe e faatiga ai i isi. O nei mea uma e solia ai le poloaiga a le Faaola o le fealofani.

Na aoao mai le Faaola o le fefinauai o se meafaigaluega a le tiapolo. O loo aoao moni mai ai le tetee atu i nisi o gagana o aso nei ma faiga faaupufai. O le ola ai faatasi ma aiaiga eseese e taua lea i faiga faaupufai, ae o eseesega o aiaiga e le manaomia ona aafia ai ni osofaiga faaletagata lea e faaleagaina ai le faagasologa o faiga malo ma faasalaina ai i latou e auai ai. E tatau ia i tatou uma ona tafiesea ia fesootaiga maitaita ae faaaoga le amiosolia mo le eseesega o manatu.

O le nofoaga sili ona taua e aveesea ai fefinauaiga ae faaaoga ai le faaaloalo mo eseesega, o totonu o o tatou lava aiga ma mafutaga faaleaiga. O le a i ai pea eseesega—o nisi e laiti ae o nisi e tetele. E tusa ai ma eseesega tetele, manatu i se tagata o le aiga o loo nonofo faapouliuli ma se isi. E lua ni tulaga faatauaina o loo feteenai iina—o lo tatou alolofa mo le tagata o le aiga ma lo tatou tuuto i poloaiga. O le mulimuli ai i le faataitaiga a le Faaola, e mafai ai ona tatou faaali atu le alofa agalelei ae tumau mausali ai pea i le upumoni e ala i le lafoaia o amioga ia e faafaigofie ai pe foliga mai ua le amanaiaina le mea ua tatou iloa e sese.

Ou te faamaea atu i se isi faataitaiga o se mafutaga faaleaiga. I se konafesi faalesiteki i Sisifotutotonu pe tusa ma le 10 tausaga talu ai, sa ma feiloai ai ma se tuafafine na tau mai ia te au o loo la ō i le lotu ma lona toalua e le auai i le ekalesia mo le 12 tausaga ae lei auai lava o ia i le Ekalesia. Sa ia fesili mai, po o le a se mea na te faia? Sa ou fautua atu i ai ia faaauau pea ona faia mea uma e sa’o ma ia onosai ma agalelei i lona toalua.

Pe a ma se masina mulimuli ane sa ia tusi mai ia te au: “Ia, sa ou manatu o le 12 tausaga sa o se faaaliga lelei o le onosai, ae sa ou leiloaina pe sa ou agalelei tele i ai. O lea, sa ou faataitai malosi moni ai mo le silia ma se masina, ma sa papatisoina ai o ia.”

E mamana le agalelei, aemaise lava i se tulaga faaleaiga. Sa faaauau ai lana tusi, “O loo ou taumafai foi ia agalelei atili i le taimi nei ona o loo matou galulue ia faamau i le malumalu i lenei tausaga!”

I le ono tausaga mulimuli ane sa ia tusi mai se isi tusi: “O lea ua [faatoa] valaauina lou toalua ma vaetofiaina o se epikopo [o le matou uarota].”2

VI.

I le tele o mafutaga ma tulaga i le olaga, e tatau lava ona tatou ola faatasi ma nei eseesega. I tulaga e taua ai, o lo tatou itu o nei eseesega e le tatau ona teenaina pe lafoaia, ae i le avea ai ma soo o Keriso e tatau ona tatou ola filemu faatasi ma isi e le tutusa o tatou tulaga faatauaina pe talia ia aoaoga ia o loo faavaeina ai. O le ata o le faaolataga a le Tama, lea ua tatou iloaina i faaaliga faaperofeta, ua tuu ai i tatou i se tulaga faaletino lea e ao ai ona tatou tausia Ana poloaiga. E aofia ai i lena mea le alofa i o tatou tuaoi e eseese aganuu ma talitonuga e pei ona Ia alofa mai ia i tatou. E pei ona aoao mai se perofeta o le Tusi a Mamona, e tatau ona tatou fetaomi atu i luma, ma “se alofa i le Atua ma tagata uma” (2 Nifae 31:20).

E pei ona faigata ona ola ai i faafitauli o loo siomia ai i tatou, o le poloaiga a le Faaola ia alofa le tasi i le isi e pei ona Ia alofa mai ia i tatou e masalo o lo tatou luitau silisili lea. Ou te tatalo ia tatou malamalama i lenei mea ma saili atu ia ola ai i a tatou mafutaga uma ma gaoioiga, i le suafa o Iesu Keriso, amene.

Faamatalaga

  1. Thomas S. Monson, “O Le Alofa—o le Ute lea o le Talalelei,” Liahona, Me 2014, 91.

  2. Tusi ia Dallin H. Oaks, Ian. 23, 2006, ma Oke. 30, 2012.