2010–2019
Cia Li Muab Siab Rau Ntseeg Ua Ntej Txhua Yam
October 2014

Cia Li Muab Siab Rau Ntseeg Ua Ntej Txhua Yam

Los ntawm Txwj Laug Richard G. Scott

Ntawm Pawg Kaum Ob tug Thwj Tim

Daim Duab

Txawm peb raug kev nyuaj nyob hauv lub neej no los, peb yeej yuav tsum siv sij hawm kom muab siab rau ntseeg.

Thaum Adas thiab Evas nyob hauv lub Vaj Edees, lawv muaj txhua yam uas yuav tsum muaj kom tau noj tau haus. Nkawd tsis tau raug kev txom nyem, kev nyuaj siab, los yog kev mob. Vim nkawd tsis tau muaj kev nyuaj siab, nkawd kuj tsis paub hais tias muaj kev zoo siab. Nkawd ib txwm tsis tau muaj kev ntxhov siab, lawv thiaj li tsis muaj kev kaj siab lug.

Thaum kawg Adas thiab Evas ua txhaum lus txib kom nkawd tsis txhob noj cov txiv ntawm tsob ntoo ntawm kev paub qhov zoo thiab qhov phem. Qhov uas nkawd ua li no ua rau nkawd muaj txim. Nkawd pib muaj qhov fab ntxeev. Nkawd pib raug mob uas ua rau nkawd tsis nyob zoo. Nkawd pib muaj kev tu siab thiab muaj kev xyiv fab.

Dhau los ntawm qhov uas Adas thiab Evas noj cov txiv uas txwv tsis pub noj, ces neeg ntiaj teb thiaj paub qhov zoo thiab qhov phem. Vim nkawd xaiv ua li no peb thiaj muaj cib fim los rau lub ntiaj teb kom sim peb lub siab.1 Peb muaj kev ywj siab xaiv. Kev ywj siab xaiv yog qhov uas peb muaj cai txiav txim siab thiab lav ris tej kev txiav txim ntawd. Txoj Kev Poob ua rau peb muaj kev zoo siab thiab kev tu siab hauv peb lub neej. Peb txawj to taub kev kaj siab lug vim peb muaj kev ntxhov siab.2

Peb Leej Txiv Saum Ntuj Ceeb Tsheej paub tias peb yuav raug tej yam no. Yog ib feem ntawm Nws txoj hau kev zoo tag nrho kom peb zoo siab. Nws tau npaj ib txoj kev rau peb ua neej dhau los ntawm Nws Leej Tub uas mloog lus tag nrho, Yexus Khetos, peb tus Cawm Seej, kom Nws txoj Kev Theej Txhoj yuav kov yeej txhua yam kev txom nyem uas peb raug nyob hauv lub ntiaj teb no.

Peb lub caij nyoog no muaj kev kub ntxhov ntau. Kuv tsis tas hais txog txhua yam kev phem nyob hauv lub ntiaj teb. Kuv tsis tas piav txog tag nrho tej kev sim siab thiab kev nyuaj siab uas muaj hauv lub neej no. Peb txhua tus paub zoo txog peb tej kev sim siab uas ua rau peb raug ntxias, raug mob thiab tu siab.

Nyob hauv lub neej ua ntej lub neej no Vajtswv qhia peb tias peb yuav mus rau lub ntiaj teb kom sim peb lub siab thiab ua neeg zoo dua li qub.3 Peb paub tias peb yuav raug tej kev phem los ntawm tus yeeb ncuab. Tej lub sij hawm zoo li peb paub txog tej yam phem ntawm lub neej no ntau tshaj peb paub txog tej yam zoo. Tus yaj saub Lihais qhia hais tias, “Yuav tsum muaj tias txhua txhia yam nyias yeej muaj nyias qhov fab ntxeev.”4 Txawm peb raug kev nyuaj nyob hauv lub neej no los, peb yeej yuav tsum siv sij hawm kom muab siab rau ntseeg. Qhov uas peb muab siab rau ntseeg ua rau peb txais tau lub hwj chim zoo ntawm Yexus Khetos txoj Kev Theej Txhoj hauv peb lub neej.

Peb Leej Txiv Saum Ntuj Ceeb Tsheej tau muab tej yam rau peb kom pab peb los cuag Khetos thiab muab siab rau ntseeg Nws txoj Kev Theej Txhoj. Thaum peb coj cwj pwm ua tej yam no, tej yam no pab peb nrhiav tau kev kaj siab lug thaum peb raug kev sim siab hauv lub neej no. Hnub no kuv tau txiav txim siab hais txog plaub yam no. Thaum kuv hais lus, cia li xav txog qhov uas nej siv plaub yam no npaum li cas; ces cia li thov tus Tswv coj nej kev seb nej yuav ua li cas kom siv tau tej yam no zoo dua li qub.

Thov Vajtswv

Yam thib ib yog kev thov Vajtswv. Cia li nrog nej Leej Txiv Saum Ntuj Ceeb Tsheej tham ntau lub sij hawm. Siv sij hawm txhua hnub qhia nej tej kev xav rau Nws. Qhia Nws txog txhua yam uas nej txhawj txog. Nws xav paub txog txhua yam ntawm nej lub neej tsis hais tej yam tseem ceeb los yog tej yam tsis tseem ceeb los yog. Qhia Nws txog tag nrho nej tej kev xav thiab tej yam uas muaj los rau nej.

Vim Nws saib nej txoj kev ywj siab xaiv rau nqi, Leej Txiv Saum Ntuj Ceeb Tsheej yeej yuav tsis yuam nej thov Nws. Tiam sis thaum nej siv nej txoj kev ywj siab xaiv thiab hais rau Nws txog txhua yam ntawm nej lub neej, nej lub siab yuav pib muaj kev kaj siab lug. Qhov kev kaj siab lug ntawd yuav ci ntsa iab mus ib txhis thaum nej muaj tej kev nyuaj. Qhov no yuav pab nej nyiaj tau tej kev sim siab ntawd thaum nej xav txog nej lub neej uas nyob mus ib txhis.

Cov niam tsev txiv tsev, pab pov hwm nej cov me nyuam thaum nej muab hwj chim rau lawv txhua hnub txhua hmo uas los ntawm tsev neeg kev thov Vajtswv ua ke. Txhua hnub cov me nyuam raug kev phem xws li kev ntshaw, kev cuaj khaum, kev muab hlob, thiab lwm yam kev phem. Pov hwm nej cov me nyuam kom txhob mloog neeg ntiaj teb lus niaj hnub thaum nej txhawb nqa lawv nrog tej koob hmoov zoo uas los ntawm tsev neeg kev thov Vajtswv. Nyob hauv nej lub neej nej yuav tsum saib tsev neeg kev thov Vajtswv ua ke yog ib qho uas nej yeej tsis kam tso tseg.

Kev Kawm Vaj Lug Kub

Yam thib ob yog kev kawm Vajtswv txoj lus nyob hauv vaj lug kub thiab tej lus ntawm cov yaj saub uas muaj txoj sia nyob. Peb nrog Vajtswv tham thaum peb thov Vajtswv. Feem ntau nws hais lus rau peb dhau los ntawm Nws tej lus uas tau muab sau cia. Yog nej xav paub tias Vajtswv lub suab zoo li cas, cia li nyeem Nws tej lus, kawm cov vaj lug kub, thiab xav txog tej lus ntawd.5 Cia li saib tej lus ntawd yog ib qho tseem ceeb ntawm nej lub neej txhua hnub. Yog tias nej xav kom nej cov me nyuam paub, to taub thiab ua raws li tus Ntsuj Plig tej kev tshoov siab, nej yuav tsum kawm vaj lug kub nrog lawv.

Tsis txhob ywj rau Dab Ntxwg Nyoog tej lus dag hais tias nej tsis muaj sij hawm kawm cov vaj lug kub. Cia li xaiv siv sij hawm kawm. Qhov uas nej rau siab kawm Vajtswv txoj lus txhua hnub yeej tseem ceeb tshaj qhov uas nej yuav tsaug zog, kawm ntawv, ua hauj lwm, saib TV, ua si video game los yog siv social media. Tej zaum nej yuav tsum rov qab saib tias tej yam twg tseem ceeb tshaj kom muaj sij hawm kawm Vajtswv txoj lus. Yog tias yuav tsum ua li no, ces cia li ua kiag!

Muaj ntau tus yaj saub uas qhia txog cov koob hmoov ntawm kev kawm vaj lug kub txhua hnub.6

Kuv koom cov yaj saub cog lus li no hais tias: thaum nej siv sij hawm txhua hnub kawm Vajtswv txoj lus, nej tus kheej thiab nrog nej tsev neeg, nej yuav muaj kev kaj siab lug hauv nej lub neej. Kev kaj siab lug yuav tsis los ntawm neeg ntiaj teb nyob sab nraud. Kev kaj siab lug yuav los ntawm nej tsev, los ntawm nej tsev neeg, thiab los ntawm nej lub siab. Kev kaj siab lug ntawd yog ib lub txiaj ntsim ntawm tus Ntsuj Plig. Yuav ua rau nej txawj pab lwm tus nyob ib ncig nej kom lawv ua zoo. Nej yuav ua ib qho tseem ceeb heev kom thiaj muaj kev thaj yeeb nyob hauv lub ntiaj teb no.

Kuv tsis hais tias nej lub neej yuav tsis muaj kev sim siab ntxiv. Cia li nco ntsoov tias thaum Adas thiab Evas nyob hauv lub vaj, nkawd tsis muaj kev sim siab, tiam sis nkawd tsis muaj kev zoo siab, kev xyiv fab, thiab kev kaj siab lug.7 Tej kev sim siab yog ib qho tseem ceeb ntawm peb lub neej no. Dhau los ntawm kev kawm vaj lug kub txhua hnub, nej yuav nrhiav tau kev kaj siab lug txawm muaj kev kub ntxhov nyob ib puag ncig thiab nej yuav muaj zog nyiaj tau kev ntxias. Nej txoj kev ntseeg Vajtswv txoj kev tshav ntuj yuav muaj zog thiab nej yuav paub tias dhau los ntawm Yexus Khetos txoj Kev Theej Txhoj txhua yam yuav zoo thaum lub sij hawm uas Vajtswv pom zoo.

Tsev Neeg Hmo Ua Ke

Thaum nej ua hauj lwm kom nej tsev neeg muaj zog thiab nyob kaj siab lug, cia li nco txog yam thib peb no: tsev neeg hmo ua ke txhua lub lim tiam. Ceev faj kom tsis txhob lam muaj tsev neeg hmo ua ke tom qab hnub uas nej tsis khoom hlo li. Cia li txiav txim siab tias thaum hmo Monday nej tsev neeg yuav nyob hauv tsev ua ke. Tsis txhob saib nej tej hauj lwm, cov sports, tej yam ntxim saib ntxim ua, ntaub ntawv rau kev kawm ntawv, los yog lwm yam tseem ceeb dua lub sij hawm uas nej siv nrog nej tsev neeg ua ke.

Nej ua li cas thaum nej muaj tsev neeg hmo ua ke tsis tseem ceeb npaum li qhov uas nej siv sij hawm xwb. Yuav tsum qhia txog txoj moo zoo thaum tau teem sij hawm ua thiab thaum tsis tau teem sij hawm. Ua kom txhua tus hauv nej tsev neeg kawm tau zoo. Tsev neeg hmo ua ke yog ib lub sij hawm tseem ceeb kom ua tim khawv thaum tsis muaj xwm txheej; kawm txog kev qhia, kev npaj thiab kev paub kho zoo; kom tsev neeg sib haum; kom tsev neeg muaj kab lig kev cai; sib tham ua ke; thiab qhov tseem ceeb, muaj kev lom zem ua ke!

Thaum lub Plaub Hlis Ntuj tas los nyob hauv lub rooj sab laj, Muam Linda S. Reeves hais tias: “Kuv yuav tsum ua tim khawv txog tej koob hmoov uas los ntawm kev kawm vaj lug kub, kev thov Vajtswv txhua hnub, thiab tsev neeg hmo ua ke. Tej yam no yuav pab kom peb tsis txhob txhawj, pab coj peb lub neej, thiab pov hwm peb tsev neeg.”8 Muam Reeves yog ib tug poj niam uas muaj tswv yim heev. Kuv yaum kom nej txais tau ib zaj lus tim khawv dhau los ntawm peb yam tseem ceeb no.

Kev Mus Rau Hauv lub Tuam Tsev

Yam thib plaub yog kev mus rau hauv lub tuam tsev. Peb txhua tus paub tias tsis muaj ib qhov chaw uas muaj kev kaj siab lug ntau tshaj Vajtswv lub tuam tsev. Yog tias nej tsis muaj ib daim ntawv tso cai nkag tuam tsev, cia li ua neeg tsim nyog kom txais tau ib daim. Thaum nej muaj ib daim ntawv tso cai nkag tuam tsev, cia li siv daim ntawv ntawd ntau.9 Teem sij hawm mus rau lub tuam tsev. Tsis txhob cia leej twg los yog lwm yam thaiv nej kev mus.

Thaum nej nyob hauv lub tuam tsev, cia li mloog zoo rau tej lus ntawm cov kab ke, xav txog tej lus ntawd, thov Vajtswv, thiab thov kom to taub tej lus ntawd muaj lub ntsiab dab tsi. Lub tuam tsev yog ib qho chaw zoo tshaj plaws uas pab peb to taub tias Yexus Khetos txoj Kev Theej Txhoj muaj hwj chim npaum li cas. Nrhiav Nws nyob ntawd. Cia li nco ntsoov tias muaj cov koob hmoov ntau heev uas los ntawm kev muab npe los ntawm nej poj koob yawm txwv nyob hauv lub tuam tsev.

Plaub yam no yog tej lub ntsiab cai tseem ceeb uas ua rau nej lub neej muaj hwj chim los ntawm Yexus Khetos txoj Kev Theej Txhoj. Cia li nco ntsoov tias peb tus Cawm Seej yog tus Tub Vaj Ntxwv ntawm Kev Kaj Siab Lug. Kev kaj siab lug hauv lub neej no los muaj dhau los ntawm Nws txoj Kev Theej Txhoj. Thaum peb thov Vajtswv txhua hnub txhua hmo, kawm vaj lug kub txhua hnub, muaj tsev neeg hmo ua ke txhua lub lim tiam, thiab mus rau lub tuam tsev ntau, ces peb ua raws li Nws txoj kev caw peb kom “los cuag Nws.” Thaum peb haj yam ua tej yam no, Dab Ntxwg Nyoog haj yam xav ua kom peb mob, tiam sis nws haj yam tsis muaj hwj chim ua li ntawd. Dhau los ntawm tej yam no, peb siv peb txoj kev ywj siab xaiv kom txais tej txiaj ntsim tag nrho los ntawm Nws txoj Kev Theej Txhoj.

Kuv tsis hais tias nej tej kev nyuaj siab hauv nej lub neej yuav ploj mus yog tias nej ua tej yam no. Peb twb los rau hauv lub ntiaj teb no kom raug tej kev sim siab. Tej kev sim siab pab peb ua neeg zoo li peb Leej Txiv Saum Ntuj Ceeb Tsheej, thiab Yexus Khetos txoj Kev Theej Txhoj ua rau peb nyiaj tau tej kev sim siab ntawd.10 Kuv ua tim khawv tias thaum peb rau siab los cuag Nws, peb nyiaj tau txhua yam kev ntxias, txhua yam kev nyuaj siab, txhua yam kev sim siab, los ntawm Yexus Khetos lub npe, amees.

Lus Cim

  1. Saib Mauxes 5:11.

  2. Saib Mauxes 4–5.

  3. Saib Anplaham 3:25.

  4. 2 Nifais 2:11.

  5. Saib Lus Qhuab Qhia thiab Kev Khi Lus 18:36; kuj saib nqes 34–35.

  6. Piv txwv yog:Thawj Tswj Hwm Thomas S. Monson hais tias: “Thaum peb nyeem thiab xav txog cov vaj lug kub, tus Ntsuj Plig yuav ntxhi lus zoo rau peb sab ntsuj plig. Peb nrhiav tau lus teb rau peb tej lus nug. Peb kawm txog cov koob hmoov uas los ntawm kev ua raws li Vajtswv tej lus txib. Peb yuav muaj ib zaj lus tim khawv txog peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, thiab txog Nkawd txoj kev hlub peb. Thaum peb thov Vajtswv thiab nyeem cov vaj lug kub, peb yuav paub tseeb tias Yexus Khetos txoj moo zoo muaj tseeb. … Thaum peb nco ntsoov thov Vajtswv thiab siv sij hawm kawm vaj lug kub, peb yuav txais cov koob hmoov thiab peb tej nra yuav tsis hnyav” (“We Never Walk Alone,” Ensign los sis Liahona, Kaum Ib Hlis Ntuj 2013, 122)Thawj Tswj Hwm Gordon B. Hinckley hais tias: “Kuv cog lus rau nej hais tias yog nej txhua tus yuav ua li no, tsis hais nej tau nyeem Phau Ntawv Maumoos ntau zaus los, nyob hauv nej lub neej thiab nej tsev neeg yuav muaj tus Tswv tus Ntsuj Plig nrog nej nyob, yuav muaj siab xav coj raws li Nws tej lus txib, thiab muaj ib zaj lus tim khawv uas haj yam muaj zog txog qhov uas Yexus yog Vajtswv Leej Tub tiag tiag” (“A Testimony Vibrant and True,” Ensign los sis Liahona, Yim Hli Ntuj 2005, 6).Thawj Tswj Hwm Howard W. Hunter hais tias: “Tej tsev neeg tau koob hmoov ntau heev thaum cov txiv tsev thiab niam tsev coj lawv cov me nyuam nyob ua ke kom nyeem los ntawm cov vaj lug kub, ces sib tham txog tej dab neeg thiab tej kev xav raws li lawv to taub. Cov tub hluas ntxhais hluas thiab cov me nyuam muaj tswv yim heev thiab paub zoo txog cov ntaub ntawv ntawm peb txoj kev teev ntuj” (“Reading the Scriptures,” Ensign, Kaum Ib Hlis Ntuj 1979, 64).Thawj Tswj Hwm Ezra Taft Benson hais tias: “Ntau lub sij hawm peb siv zog pab cov ntseeg kom lawv rau siab ua hauj lwm hauv peb ceg txheem ntseeg. Peb rau siab ua hauj lwm kom muaj neeg ntxiv tuaj koom kev sib ntsib txais lub cim nco txog. Peb ua hauj lwm kom peb cov tub hluas ntxiv mus ua tub txib. Peb siv zog ua hauj lwm kom muaj neeg sib yuav hauv lub tuam tsev ntxiv. Tej hauj lwm yeej tseem ceeb thiab zoo kom lub nceeg vaj loj tuaj. Tiam sis thaum tib neeg thiab lawv tsev neeg rau siab nyeem vaj lug kub txhua lub sij hawm, ces tej yam no yeej yuav muaj los. Tib neeg tej zaj lus tim khawv yuav muaj zog. Lawv yuav haj yam xav rau siab ntseeg. Tsev neeg yuav muaj zog. Yuav muaj tej kev tshwm sim los” (“The Power of the Word,” Ensign, Tsib Hlis Ntuj 1986, 81).Thawj Tswj Hwm Spencer W. Kimball hais tias: “Kuv paub hais tias thaum kuv lam thov Vajtswv thiab zoo li Vajtswv tsis mloog kuv thov thiab Nws tsis hais lus rau kuv, ces zoo li kuv nyob deb deb ntawm nws. Yog kuv rau siab nyeem cov vaj lug kub ces ua rau kuv nyob tsis deb thiab kuv rov qab muaj tus ntsuj plig. Kuv pom hais tias kuv haj yam hlub cov uas kuv yuav tsum hlub kawg siab kawg ntsws, thiab vim kuv haj yam hlub lawv, ua yooj yim rau kuv ua raws li lawv hais” (Teachings of Presidents of the Church: Spencer W. Kimball [2006], 67).Thawj Tswj Hwm Marion G. Romney hais tias: “Kuv paub tseeb hais tias yog cov niam tsev txiv tsev yuav nyeem Phau Ntawv Maumoos thiab thov Vajtswv, nyias nyeem nyias thiab nyeem nrog lawv cov me nyuam, ces tus ntsuj plig los ntawm phau ntawv ntawd yuav los nyob hauv peb tsev thiab nrog txhua tus uas nyob haud. Lawv yuav tswm seeb ntxiv; ib leeg yuav saib taus ib leeg. Yuav tsis muaj kev sib cav sib ceg. Cov niam tsev txiv tsev yuav muaj kev hlub thiab muaj tswv yim ntuas lawv cov me nyuam. Cov me nyuam yuav mloog lawv niam lawv txiv lus. Yuav muaj kev ncaj ncees ntxiv. Yuav muaj kev ntseeg, kev cia siab thiab siab hlub—uas yog Khetos txoj kev hlub dawb huv—nyob rau hauv peb tsev thiab hauv peb lub neej, ua rau peb muaj kev thaj yeeb, kev xyiv fab thiab kev zoo siab” (“The Book of Mormon,” Ensign, Tsib Hlis Ntuj 1980, 67).Thawj Tswj Hwm Boyd K. Packer hais tias: “Cov lus qhuab qhia tseeb, thaum neeg to taub, ua rau lawv tej cwj pwm thiab xeeb ceem hloov. Kev kawm cov lus qhuab qhia ntawm txoj moo zoo yuav ua rau tib neeg coj cwj pwm zoo dua li kev kawm txog kev coj cwj pwm yuav ua rau lawv hloov” (“Do Not Fear,”Ensign los sisLiahona, Tsib Hlis Ntuj 2004, 79).Txwj Laug David A. Bednar hais tias: “Txhua zaus tsev neeg thov Vajtswv, kawm vaj lug kub, thiab txhua zaus nej muaj tsev neeg hmo ua ke zoo li tej xim uas txhuam ntawd nyob rau hauv peb lub siab. Tsis muaj ib qho xwb uas yuav zoo thiab tseem ceeb. Tiam sis ib yam li xim daj, xim kub thiab xim kafes los ua ke ua tau ib daim duab zoo nkauj kawg, yog li ntawd, thaum peb ua txhua yam me me tsis tu tsis tseg ces yuav pab peb sab ntsuj plig muaj zog heev” (“More Diligent and Concerned at Home,”Ensign los sis Liahona, Kaum Ib Hlis Ntuj 2009, 19–20).

  7. Saib 2 Nifais 2:13.

  8. Linda S. Reeves, “Kev Tiv Thaiv ntawm Duab Liab Qab—Ib Tsev Neeg uas Tsom Ntsoov rau Khetos,” Ensign los sis Liahona, Tsib Hlis Ntuj 2014, 16–17.

  9. Thawj Tswj Hwm Howard W. Hunter hais tias: “Kuv caw Haiv Neeg Ntseeg hauv Hnub Nyoog Kawg kom lawv saib tus Tswv lub tuam tsev yog ib lub cim tseem ceeb txog nej txoj kev ua mej zeej.” Yog qhov uas kuv lub siab xav tau tshaj txhua yam kom txhua tus mej zeej ntawm lub Koom Txoos tsim nyog nkag mus rau hauv lub tuam tsev. Tus Tswv yuav zoo siab yog tias txhua tus mej zeej laus yuav tsim nyog---thiab nqa---ib daim ntawv tso cai nkag tuam tsev. Tej yam uas peb yuav tsum ua thiab yuav tsum tsis txhob ua kom ua neeg tsim nyog muaj daim ntawv tso cai nkag tuam tsev yog tej yam tseem ceeb uas kom peb zoo siab, tsis hais txhua tus thiab tej tsev neeg los yog. Cia kom peb ua ib haiv neeg uas mus rau tus Tswv lub tuam tsev. Mus rau lub tuam tsev ntau npaum li nej mus tau. Muab daim duab txog lub tuam tsev dai nyob rau hauv nej lub tsev kom nej cov me nyuam pom. Qhia lawv txog qhov uas vim li cas peb muaj tus Tswv lub tuam tsev. Txij thaum lawv tseem yog me nyuam yaus, pab lawv npaj mus rau hauv thiab ua neeg tsim nyog kom txais tau txoj koob hmoov ntawd” (“Exceeding Great and Precious Promises,” Ensign, Kaum Ib Hlis Ntuj 1994, 8).

  10. Saib 2 Nifais 2:2.