2010–2019
Kōjerbal Tōmak eo Am̧ En Aorōk tata Eo Am̧
Oktoba 2014

Kōjerbal Tōmak eo Am̧ En Aorōk tata Eo Am̧

Jān Elder Richard G. Scott

Jān Doulul eo an Joñoulruo Rijilōk ro

Pija

Jōkdo̧o̧n aolep mallejjoñ nana ko jej iioni ilo mour in; jej aikuj bōk iien ñan lukkuun kōjerbal tōmak eo ad.

Āliktata Adam im Eve raar jerawiwi ņae kakien eo ñan jab m̧ōn̄ā jān leen wōjke in jelā em̧m̧an im nana. Kōn aer kōm̧m̧an āindein eaar jako aer pād ilo jekjek eo ilo an ejjeļo̧k jerawiwi. Im raar jino jeļā pedped ko an jum̧ae. raar jino ioon nan̄inmej me eaar kōm̧o̧jņoikļo̧k ājmour eo aer. Raar jino en̄jake būrom̧ōj barāinwōt lan̄lōn̄.

Jān an kar Adam im Eve m̧ōñā jān leen wōjke eo em̧ōj kōmoik, jelā kōn em̧m̧an im nana ekar jino itok ñan laļ in. Kālet eo aer eaar kōm̧m̧an bwe en pidodo n̄an itok n̄an laļ in n̄an kar kajjieon̄ jelmae mallejjoñ im idajon̄jon̄ kein. 1Jej jeram̧m̧an kōn anemkwōj in kālet in ej kōmaroñ kōj ñan kōm̧m̧an kālet im naaj bōk eddo in jokālet ko. Wōtļo̧k eo eaar kapidodoik ilo mour ko ad bwe ren eñjake jim̧or m̧ōņōņō im būromōj. Jej maroñ meļeļe kōn aenōm̧m̧an kōnke jej eñjake jorrāān.2

Jemed ilo Lan̄ eaar jeļā menin enaaj kar waļo̧k n̄an kōj. Ej m̧ōttan wōt karōk in m̧ōņōņō eo An eweppān. Eaar kōpooj juon iaļ kōn mour eo An Nejin eo elukkuun pokake, Jisōs Kraist, ad Rilo̧mo̧o̧r, kōn Pinmuur eo An n̄an anjo̧ ioon aolep apan̄ me jemaron̄ kar en̄jake ilo mour in wabanban in.

Jej mour ilo iien ko reppen, Ijjab aikuj kōllajarak aolep unjen nana ko ilo laļ in. Ejjab menin aikuj ñan kōllajarak aolep mālijjon̄ ko im rup in bōro ko me rej m̧ōttan wōt mour in wabanban. Kajjojo iaad jej lukkuun ekkōl kōn kakkōt ko ad make ippān kapo, metak, im būrom̧ōj.

Kar katakin kōj ilo laļ eo m̧okta bwej jibadbad eo ad n̄an itok ñan ijin ej ñan idajon̄jon̄, kajieon̄, im eddōkļo̧k.3 Jaar jelā bwe jenaaj kar baj jelm̧ae wōt nana ko an rikapo eo. Jet iien emaron̄ lapļo̧k ad eñjake men ko renana ilo mour in jān ko ko rem̧m̧an. Rikanaan Liai eaar katakin, “Bwe emenin aikuuj, ñan an wōr jumae ilo men otemjej.”4 Mekerta aolep māllijon̄ kein renana jej loi ilo mour, jej aikuj lukkuun kōjerbal tōmak eo ad. Kain kōjerbale in ej karuwaineneik tok em̧m̧an, tōmak eo eobrak kōn kajoor in Pinmuur eo an Jisos Kraist ñan mour ko ad.

Jemedwōj ilo Lañ eaar letok ad kein jerbal ñan jipañ kōj itok ñan Kraist im kōjerbal tōmak eo ilo Pinmuur eo An. N̄e kein jerbal kein rej erom iminene ko im̧aan tata, rej letok iaļ eo epidodo tata ñan pukōt aenōm̧m̧an ilo apañ ko an mour wabanban in. Rainin iaar kālet bwe in kōnono kōn emān kein jerbal ko. Ilo aō kōnono, ļōmņak in etale am make kōjerbal kein jerbal kein kajjojo, innām pukōt tōl an Irooj ñan jokālet ekōjkan ami maron̄ kōkm̧anm̧anļo̧k kōjerbal kajjojo iaer.

Jar

Kein jerbal eo m̧oktata ej jar. Kālet n̄an kōmakijkjij ami ekōnono ippān Jemāmi ilo Lan̄. Kōm̧m̧an iien aolep raan n̄an kwaļo̧k ļōmņak ko im en̄jake ko ami Ippān. Jiron̄ E aolep men me rej kainepataik kom̧. E ej itok limo in ilo men eo eaorōk tata barāinwōt men ko rejjab aorōk tata an mour eo ami. Kwaļo̧k Ippān aolepān en̄jake ko im imminene ko.

Kōnke Ej kautej anemkwōj in kālet eo am̧, Jemed ilo Lan̄ eban kiel eok bwe kwon jar n̄an E. Ak ilo am̧ kōjerbal anemkwōj in kālet eo im kobaik E ilo men otemjej ilo mour eo am̧, būruwōm̧ enaaj jino obrak kōn aenōm̧m̧an eo ejjelok uwaan. Aenōm̧m̧an eo enaaj kajujelļo̧k juon meram indeeo ioon apañ ko am̧. Enaaj jipañ eok anjo̧ ioon apan̄ kein kōn juon ļōmņak eo ej kalimjōkļo̧k indeeo.

Ro jinen im jemen, rej tōlarōke ajri ro nejier kōn jar in jibboñ im jota kōn kajoor in jar an baam̧le. Ajri ro rej luko̧rko̧re er aolep raan kōn nana ko an ļōn̄, arōk, uteej boro, im ebar lōñ m̧wil ko jet an jerawiwi. Kōjparok ajri ro nejimi jān kareel ko raan otemjej an laļ in kōn kōkāāl er kōn kōjeram̧m̧an ko rekajoor me rej waļo̧k jān jar an baam̧le. Jar an baam̧ļe ej aikuj in erom juon men eaorōk tata eo komij jab aikuj kajitikini ilo mour ko ami aolep raan.

Ekkatak Jeje ko Rekwojarjar

Kein jerbal eo kein karuo ej ekkatak naan ko an Anij ilo jeje ko rekwojarjar im naan an rikanaan ro remour. Jej kōnono n̄an Anij ilo jar. E ekkā an kōnono tok ñan kōj ilo jeje ko An. Ñan jelā ta ainikien eo Ekwojarjar im ewi wāween eñjake, riiti jeje ko An, ekkatak jeje ko rekwōjarjar, im kōļmenļo̧kjeņ kaki.5 Kōm̧m̧an bwe en m̧ōttan eo eaorōkļo̧k ilo mour aolep raan. Eļañn̄e kokōnaan bwe ajri ro nejūm ren kile, meļeļe, im ļoor tōl eo an Jetōb, kwōj aikuj katak jeje ko rekwojarjar ippāer.

Jab ron̄jake m̧o̧ņ eo an Satan bwe ejjeļo̧k am̧ iien n̄an ekkatak jeje ko rekwojarjar. Kālet n̄an bōk iien n̄an ekkatak kaki. Kwōjkwōj iion naan an Anij kajjojo raan elapļo̧k an aorōk jen kiki, jikuuļ, jerbal, alwōj pija ko, ikkure video game ko, ak iaio ilo media. Komaron̄ aikuj n̄an kile aorōktata ko am̧ n̄an kōm̧m̧an iien n̄an ekkatak naan an Anij. Eļan̄n̄e āindein, kōm̧m̧ane!

Ekanooj lōn̄ kalim̧m̧ur ko kanaan kaki kōn kōjeram̧m̧an ko kōn ekkatak jeje ko rekwojarjar raan otemjej.6

Ij eddeik ainikiō ippān kallim̧ur in: ilo am̧ kōjeno̧lo̧k iien aolep raan, am̧ make im ippān baam̧le eo am̧, n̄an ekkatak naan ko an Anij, aenōm̧m̧an enaaj waļo̧k ilo mour eo am̧. Aenōm̧m̧an eo eban itok jān laļ eo ilikin. Enaaj itok jān ilowaan m̧weo im̧ōm̧, jān lowaan baam̧ļ eo am̧, jān ilowaan būruwōm̧ make. Kwonaaj kōm̧m̧ane juon men ekanooj aorōk n̄an kobaik n̄an kōļapļo̧k aenōm̧m̧an eo ilo laļ in.

Ijjab kean̄ bwe mour eo am̧ enaaj bōjrak an wōr apan̄ ko ie. Kememej ke Adam im Eve raar pād ilo jikin kallib eo, raar deeor jān apan̄ ko, aaet raar jab maron̄ en̄jake m̧ōņōņō, lan̄lōn̄, im aenōm̧m̧an. 7 Apan̄ ko raar juon m̧ōttan aorōk an mour in. Kōn ekkatak jeje ko rekwojarjar raan otemjej, ejjab bōjrak, kwonaaj lo aenōm̧m̧an ilo jorrāān eo ipeļaakūm im kajoor n̄an jum̧ae kapo ko. Kwonaaj kōļapļo̧k tōmak ekajoor ilo jouj an Anij im jeļā bwe kōn Pinmuur eo an Jisōs Kraist aolep men renaaj jim̧we ekkar n̄an tōre eo an Anij.

Nokōn in Jota an Baam̧le

Ilo am̧ jerbal ñan kōkajoorļo̧k baam̧le eo am̧ im rie aenōm̧m̧an, kememej kein jerbal in kein kajilu: nokōn in jota an baam̧le ilo wiik otemjej. Mejmejkaruo bwe kwon jab kōm̧m̧ane nokon in jotan an baam̧le eo am̧ en juon rem̧oļo̧k in juon raan epoub. Kālet bwe ilo joten M̧ande baam̧le eo am enaaj koba ilo m̧weo n̄an joten eo. Jab kōtļo̧k bwe jerbal, ikkure, m̧akūtkūt ko jet, jerbal in jikuuļ ilo m̧weo, ak jabdewōt en erom aorōkļo̧k jān iien eo kwoj ippāndoon ilo m̧weo ippān baam̧le eo am̧.

Karōkan joteen eo ejjab aorōk in wōt iien eo jej kōjeno̧lo̧ke. Gospel eo ej aikuj katakin jim̧or ilo pojak im jab pojak. Kōm̧m̧an bwe en wōr meļeļen eñjake eo an kajjojo ro uwaan baamle eo. Nokōn in jota an baam̧le ej iien eo eaorōk ñan kwaļo̧k naan in kam̧ool ilo juon mejatoto eo aenōm̧m̧an; ñan katak kapeel ko an katakin, kōm̧m̧an karōk, im karōk; n̄an kōkajoorļo̧k iakwe ko an baam̧ļe; n̄an kōļapļo̧k imminene ko an baam̧ļe; n̄an kōnono ippān doon; im aorōkļo̧k, n̄an an wōr juon iien ippān doon em̧m̧an!

Ilo kweiļo̧k eo elap ilo Eprōļ in iiō eo ļo̧k, Sister Linda S. Reeves eaar lukkuun kalikkar: Ij aikuj kam̧ool kōn kōjeram̧m̧an ko jān ekkatak jeje ko rekwojarjar im jar im nokon in jota an baam̧le kajjojo wiik. Errein rej lukkuun iminene ko me rejipan̄ bōkļo̧k inepata, letok tōl n̄an mour ko am, im kobaik tok kōjparok eo n̄an m̧ōko im̧ōm̧.”8 Sister Reeves ej juon kōrā ekanooj māletlet. Ij lukkuun lipjerjere kom̧ n̄an bōk naan in kam̧o̧ol eo am̧ make kōn iminene kein raorōk jilu.

Etal ñan Tampeļ

Kein jerbal eo kein kemen ej etal ñan tampeļ eo. Kōjwōj aolep jeļā ejjeļo̧k jikin eaenōm̧m̧anļo̧k ion lal in jān tampeļ ko an Anij. Eļan̄n̄e ejjeļo̧k am̧ peba in mālim an tampeļ, karbōb n̄an bōk juon. N̄e ewōr am̧ peba in mālim, kakutkut am̧ kōjerbale.9 Jikejuuļ juon iien n̄an pād ilo tampeļ eo. Jab kōtļo̧k jabdewōt ak jabdewōt men en kabōjrak eok jān am̧ pād ijeņ.

Ilo am̧ pād ilo tampeļ eo, ron̄jake naan ko ilo kaiñi ko, kōļmenļo̧kjeņ kaki, jar kaki, im pukōt ñan am̧ jeļā meļeļeier. Tampeļ eo ej juon iaan jikin ko em̧m̧an tata ñan meļeļe kōn kajoor in Pinmuur eo an Jisos Kraist. Pukōt E ijeņ. Kememej bwe elōn̄ļo̧k kōjeram̧m̧an ko rej itok jān leļok āt ko etan baam̧le eo am̧ make ilo tampeļ eo.

Kein jerbal kein emen rej iminene ko raorōk n̄an kōjeramman mour eo am̧ ilo kajoor eo an Pinmuur eo an Jisōs Kraist. Kemememj ad Rilo̧mo̧o̧r ej Irooj in Aenōm̧m̧an. Aenōm̧m̧an ilo mour in ej itok jān en̄taan eo An. N̄e jejjab jokod in jar in jibbon̄ im jota, ekkatak jeje ko rekwojarjar raan otemjeļo̧k, kōm̧m̧an nokon in jotan an baam̧ļe wiik otemjeļo̧k, im etal n̄an tampeļ aolep iien, jej niknik ilo uwaake kūr eo An n̄an “itok n̄an E.” An ļapļo̧k ad kōļapļo̧k imminene kein, eļapļo̧k an Satan laudin̄din̄ n̄an kakkure kōj bōtaab edikļo̧k maron̄ eo an n̄an kōm̧m̧ane āindein. Jān kōjerbal kein jerbal kein, jej kōjerbal anemkwoj eo ad n̄an bōk aolep menin letok ko an en̄taan eo An.

Ijjab ba bwe aolep apañ ko an mour renaaj makunļo̧k ilo am̧ kōm̧m̧ane men kein. Jaar itok n̄an mour in lukkuun m̧ool n̄an eddōkļo̧k jān mālijjon̄ ko m idajon̄jon.10 Ij kam̧ool bwe ilo ad niknik itok n̄an E, jemaron̄ anjo ion aolep kapo, aolep rup bōro ko, aolep apan̄ jej jelm̧ae, ilo etan Jisōs Kraist, amen.

Kakeememej ko

  1. Lale Moses 5:11.

  2. Lale Moses 4–5.

  3. Lale Abraham 3:25.

  4. 2 Nipai 2:11.

  5. Lale Doctrine and Covenants 18:36; lale barāinwōt eoon 34–35.

  6. Jet waanjoñaak āinwōt:Būreejtōn Thomas  S. Monson eaar ba:” Ilo ad riit kōlmenļo̧kjeņkōn jeje ko rekwōjarjar, jenaaj kile unojidikdik eo em̧m̧an an Jetōb ilo buruwōd. Jemaroñ lo uwaak in kajjitok ko ad. Jej jelā kōn kōjeram̧m̧an eo ej itok jen kōjparok kien ko an Anij. Ej eddōkļo̧k naan in kam̧ool eo ad kōn Jemedwōj Ilañ im ad Rilo̧mo̧o̧r, Jisos Kraist, im kōn iakwe eo Aer ñan kōj. Ilo ad kobaik jeje ko rekwōjarjar ilo jar ko ad, jenaaj maroñ jelā bwe gospel eo an Jisōs Kraist em̧ool. Ilo ad kememej jar im bōk iien ñan lale jeje ko rekwōjarjar, mour ko ad renaaj lukkuun lapļo̧k aer lo kōjeram̧m̧an im eddo ko ad renaaj meraļo̧k” (“We Never Walk Alone,” Ensign ak Liahona, Nov. 2013, 122).Būreejtōn Gordon  B. Hinckley: “Ilo ejjeļo̧k pere, Ij kalimuuri kom bwe elan̄n̄e kajjojo iami enaj kalimjek būrokaam in epidodo, jekdoon jete alen ami kar moktaļo̧k maroñ kar riiti bok in Mormon, enaaj bar koba tok ñan mour ne am im m̧weo im̧ōm juon joñak in Jetōb in Irooj, juon wāween kajoor ñan etetal ilo pokake kien ko An, im juon kajoorļo̧k ilo naan in kam̧ool eo kake eo Nejin Anij eo emool ej mour” (“A Testimony Vibrant and True,” Ensign ak Liahona, Aug. 2005, 6).Būreejtōn Howard W. Hunter eaar ba: “Baam̧le ko ej lapļo̧k aer jeram̧m̧an eļān̄n̄e jemen im jinen ro remaletlet rej bōktok ajri ro ñan riiti jeje ko rekwōjarjar ippān doon, innām kōnono kake em̧m̧an eo an bwebwenato ko im lale joñan aer aolep meļeļe. Ekka an jodikdik im ajri ro bwilōñ im m̧ōnōnō kake jeje ko rejjejet an kabuñ in” (“Reading the Scriptures,” Ensign, Nov. 1979, 64).Būreejtōn Ezra Taft Benson ear ba: Ekkā ad kate kōj kajjeoñ kōlapļo̧k m̧akutkut ko ilo stake ko ad. Jej tiljek ilo ad jerbal ñan lōñaj joñan bōjjāān in ro rej etal ñan jar in kwōjkwōj ko. Jej jerbal ñan ad bōk eļapļo̧k oran likao ro ilo mijen ko. Jej kate kōj kōkōm̧anm̧anļo̧k oran ko an ro rej m̧are ilo tampel. Aolep men kein rej kijejeto ko im raorōk ñan eddokļo̧k eo an aelōñ in kiiñ eo. Ak elañn̄e kajjojo membor im baamle ko rej lelok aer ñan jeje ko rekwōjarjar jen iien ñan iien, kain makutkut ko jet renaaj make walok tok. Naan in kamool enaaj lapļo̧k. Kijejeto enaaj kajoorļo̧k. Baamle ko renaaj make bojak in lo madenļo̧k ko aer rej make waļo̧ktok” (“The Power of the Word,” Ensign, May 1986, 81).Būreejtōn Spencer W. Kimball eaar ba: “Ij loe eļan̄n̄e ij jerwane jōmdoon eo aō ippān jetōb im eļan̄ñe āinwōt ejjeļo̧k lojilñin jetōb ej roñjake im ejjeļo̧k ainikien jetōb ej konono, bwe ittoļo̧k, lukkuun ettoļok. Eļan̄n̄e ij leļok aō ñan jeje ko rekwōjarjar kōtaan eo ej dikļok im bwe jetōb eo bar jeplaaktok. Ij lo elapļok iakwe ilo ña ñan ro ij aikuj iakwe er kōn aolepān buruō im aō ļōmņak im aō kajoor, im iakwe kōļapļo̧k aō iakwe er. Ij lo an pidodoļo̧k mour kōn kōkkapilōklōk ko aer. (Teachings of Presidents of the Church: Spencer W. Kimball [2006], 67).Būreejtōn Marion  G. Romney eaar ba: Ij tōmak bwe eļan̄n̄e, ilo m̧oko im̧ōd, jined im jemed renaaj riit jen Bok in Mormon im jar aolep iien, jen er make im ippān ajri ro, jetōb eo ilo bok in em̧m̧an enaaj itok kejparok m̧oko im aolep ro rej jokwe ie. Jetōb em̧m̧an enaaj lapļo̧k; ļōmnak in kauteej don enaj eddokļo̧k. Jetōb in jumae enaaj ilok. Mama im baba renaaj kapiļo̧k ajri ro nejier ilo iakwe im maletlet. Ajri ro enaaj lapļo̧k aer epaaklok im pokake kapilok ko an jineer im jemāer. Wānōk enaaj lapļo̧k. Tomak, kōjatdikdik, im iakwe eo em̧ool an Kraist—enaaj depdep ilo m̧oko im̧ōd im mour ko ad, bōktok aenōm̧m̧an eo aer elap, lañlōñ, im m̧ōnōnō” (“The Book of Mormon,” Ensign, May 1980, 67).Būreejtōn Boyd K. Packer eaar ba: “Katak eo em̧ool, emeļeļe, ej ukōt imminene im m̧anit. Katak kake katak ko ilo gospel in enaaj mōkaj an kōkōm̧anm̧anļo̧k m̧wil jen ekkatak kōn mwil enaaj kōkōm̧anm̧anļo̧k iminene” (“Do Not Fear,”Ensign ak Liahona, May 2004, 79).Elder David  A. Bednar: “Kajjojo jar an baamle, kajjojo pijan an baamle ekkatak jeje ko rekwōjarjar, im kajjojo nokōn in jota an baam̧le ej juon weween kepaaktok buruwōd. Ejjeļo̧k juon emaroñ alikar an lūkkun bwilōñ ak ememlokjen. Ak āinwōt ilo an ialo im gold im būro̧un annañin uno ko kaibojooj doon im kwaļo̧k juon jerbal elikio eaibojooj, im jej wōnm̧aanļo̧k wōt kōm̧m̧an men eo edik emaroñ tōl ļo̧k ñan juon jetōb em̧m̧an eliktata” (“More Diligent and Concerned at Home,Ensign ak Liahona, Nov. 2009, 19–20).

  7. Lale 2 Nipai 2:13.

  8. Linda S. Reeves, “Protection from Pornography—a Christ-Focused Home,” Ensign ak Liahona, May 2014, 16–17.

  9. Būreejtōn Howard  W. Hunter eaar ba: “Ilo jetōb in ij karuwaineneik ro rikwojarjar ñan lale tampel eo an Irooj āinwōt juon kakōļļe eo em̧m̧an ilo am̧ juon uwaan Kabuñ in. Ej kōnaan eo an buruō eļaptata in bwe aolep membōr ren maroñ wānōk n̄an etal ñan tampeļ. Enaj kam̧ōņōņōik Irooj eļan̄n̄e kajojo membōr rūtto ro renaaj wānōk ñan juon peba in mālim an tampeļ. Men ko kein jej aikuj kōm̧m̧ani im jab naaj kōm̧m̧ani bwe jen wānōk ñan juon peba in mālim an tampeļ bwe jenaaj m̧ōņōņō āinwōt armej im baam̧le ko. Jen kōm̧m̧an bwe jen armej ro rej etal ñan tampeļ. En ikutkut etal ñan tampeļ eļan̄n̄e jemaroñ. Kwaļo̧k juon pija in tampeļ ilo mōko bwe ajri ro nejid ren loe. Katakin er kake aorōk eo an m̧weo imōn Irooj. Kōm̧m̧an bwe ren kōpojak jen iiō ko im̧aan tata bwe ren maroñ etal im bwe ren wānōk ñan bōk kōjeram̧m̧an ko” (“Exceeding Great and Precious Promises,” Ensign, Nov. 1994, 8).

  10. Lale 2 Nipai 2:2.