2010–2019
Ia Avea le Faaaogaina o le Faatuatua ma Mea E te Faamuamuaina
Oketopa 2014

Ia Avea le Faaaogaina o le Faatuatua ma Mea E te Faamuamuaina

Saunia e Elder Richard G. Scott

O Le Korama a Aposetolo e Toasefululua

Ata
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.

E ui i le tele o luitau le lelei tatou te oo i ai i le olaga, ae e tatau lava ona tatou faaavanoaina se taimi e matua faaaoga ai lo tatou faatuatua.

A o i ai Atamu ma Eva i le Faatoaga i Etena, o mea uma sa la manaomia e tausi ai o laua manaoga i aso taitasi sa foai tele atu ia i laua. Sa leai ni o laua faafitauli, luitau, po o tiga. Talu ai la te lei oo i ni taimi faigata, sa leiloa e i laua e mafai ona la maua le fiafia. La te lei lagonaina lava le fesouaiga, o lea sa le lagona ai le filemu.

Sa mulimuli ane solia e Atamu ma Eva le poloaiga e aua ne’i ‘aia le fua o le laau e iloa ai le lelei ma le leaga. O le faia o lea mea sa lei toe tumau ai i laua i le tulaga o le ta’umamaina. Sa amata ona la tofo i mataupu faavae o le faafeagai o mea. Sa amata ona laua fetaiai ma ma’i ia sa vaivai ai lo la soifua maloloina. Sa amata ona la lagonaina le faanoanoa faapea foi ma le olioli.

O le ‘aiina e Atamu ma Eva o le fua faasaina, na oo mai ai le malamalama o le lelei ma le leaga i le lalolagi. O le la filifiliga ua mafai ai e i tatou taitoatasi ona o mai i lenei lalolagi ina ia faaosoosoina ma tofotofoina.1 Ua faamanuiaina i tatou i le faitalia, o lo tatou tomai lea e faia ai faaiuga ma tali atu mo na faaiuga. O le Pa’ū na mafai ai ona tatou lagona i o tatou olaga le fiafia ma le faanoanoa. Ua mafai ona tatou malamalama i le filemu ona ua tatou lagonaina le fesouaiga.2

Na silafia e lo tatou Tama o i le Lagi o le a tupu lenei mea ia i tatou. O se vaega uma lava o Lana fuafuaga atoatoa o le fiafia. Sa Ia saunia se ala i le soifuaga o Lona Alo usiusitai atoatoa, o Iesu Keriso, lo tatou Faaola, mo Lana Togiola ina ia manumalo i faafitauli uma tatou te ono oo i ai i le olaga faaletino.

Ua tatou ola i taimi faigata. E le manaomia lo’u lisiina atu o faapogai uma o le leaga i le lalolagi. E le manaomia le faamatalaina uma o luitau ma lototiga ia e avea ma se vaega o le olaga faaletino. Tatou te taufai iloa lelei uma ō tatou lava tauiviga ma faaosoosoga, tiga ma faanoanoaga.

Sa aoaoina i tatou i le muai olaga e faapea o lo tatou faamoemoega i le o mai iinei o le faaosoosoina, tofotofoina, ma faalauteleina.3 Sa tatou iloa o le a tatou fetaiai ma mea leaga a le fili. Atonu o nisi taimi tatou te lagona ai lo tatou iloaina o le tele o mea lē lelei nai lo mea lelei. Sa aoao mai le perofeta o Liae, “Ona e ao lava ina i ai se faafeagai o mea uma.”4 E ui i le tele o luitau le lelei tatou te oo i ai i le olaga, ae e tatau lava ona tatou faaavanoaina se taimi e matua faaaoga ai lo tatou faatuatua. O se faatinoga faapena e valaaulia ai le mana mautinoa ua tumu i le faatuatua o le Togiola a Iesu Keriso i o tatou olaga.

Ua tuuina mai e lo tatou Tama o i le Lagi ia i tatou ni meafaigaluega e fesoasoani ia i tatou ina ia o mai ia Keriso ma faaaoga le faatuatua i Lana Togiola. Afai ae avea ia meafaigaluega ma ni mausa autu, o le a latou saunia se auala sili ona faigofie e saili ai le filemu i taimi o luitau o le olaga faaletino. O le asō ua ou filifili ai e talanoa atu i meafaigaluega nei e fa. A ou talanoa atu, mafaufau e iloilo lou faaaogaina patino o meafaigaluega taitasi, ona saili lea o le taitaiga a le Alii e fuafua ai pe mafai faapefea ona e faaaogaina lelei atu ia meafaigaluega taitasi.

Tatalo

O le meafaigaluega muamua o le tatalo. Filifili e talanoa soo ma lou Tama o i le Lagi. Fai se taimi i aso uma e faasoa atu ai ou manatu ma lagona ia te Ia. Tau atu ia te Ia mea uma o loo e atugalu ai. E naunau o Ia i mea e sili ona taua faapea foi ma vaega masani o lou olaga. Faasoa atu ia te Ia ou lagona uma ma aafiaga.

Talu ai Na te faamamaluina lou faitalia, o le a le faamalosia ai lava oe e le Tama o i le Lagi e te tatalo atu ia te Ia. Ae a e faaaogaina lena faitalia ma faaaofia o Ia i vaega uma o lou olaga i aso taitasi, o le a amata ona tumu lou loto i le filemu, filemu faafiafiaina. O lena filemu o le a e taulai atu ai i au tauiviga mai se vaaiga e faavavau. O le a fesoasoani ia te oe e pulea ai na luitau mai se vaaiga e faavavau.

Matua, fesoasoani e puipui malu a outou fanau e ala i le faaauupegaina o i latou i le taeao ma le po i le mana o le tatalo faaleaiga. O loo osofaia pea le fanau i aso uma i mea leaga o le tuinanau, manaolasi, faamaualuga, ma le anoanoai o isi amioga ua tumu i le agasala. Puipui a outou fanau mai faatosinaga o aso uma a le lalolagi e ala i le faamalolosia o i latou i faamanuiaga mamana ia e maua mai i tatalo faaleaiga. O tatalo faaleaiga e tatau ona avea o se faamuamua e le fetuunaia i o outou olaga i aso uma.

Suesue i Tusitusiga Paia

O le meafaigaluega lona lua o le suesue i afioga a le Atua i tusitusiga paia ma upu a perofeta soifua. Tatou te talanoa atu i le Atua e ala i le tatalo. E masani lava ona Ia toe fesootai mai ia i tatou e ala i Ana afioga tusitusia. Ina ia iloaina pe faape’i le faalogoina ma le lagonaina o le siufofoga o le Lagi, faitau i Ana afioga, suesue i tusitusiga paia, ma mafaufau loloto i ai.5 Fai ia avea i latou ma se vaega taua o lou olaga i aso uma. Afai e te manao i lau fanau ia iloa, malamalama, ma faatino ai uunaiga a le Agaga, e tatau ona e suesue i tusitusiga paia faatasi ma i latou.

Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina au mea e faamuamua ia maua ai se taimi mo le suesueina o le afioga a le atua. Afai o le tulaga lea, ia fai loa!

E anoanoai folafolaga faaperofeta i faamanuiaga o le suesue i tusitusiga paia i aso uma.6

Ou te faaopoopo atu lau molimau i lenei folafolaga: afai e te tuuto atu lou lava taimi faapea ma lou aiga i aso uma, e suesue ai le afioga a le Atua, o le a i ai le filemu i lou olaga. O lena filemu e le sau mai le lalolagi i fafo. O le a sau mai totonu o lou fale, mai totonu o lou aiga, mai totonu o lou lava loto. O le a avea o se meaalofa a le Agaga. O le a susulu atu mai ia te oe e faatosina ai isi i le lalolagi o siomiaina oe. O le a e faia se mea matua taua lava e faaopoopo atu i le filemu faateleina i le lalolagi.

Ou te le folafola atu o le a muta le i ai o luitau i lou olaga. Manatua a o i ai Atamu ma Eva i le faatoaga, sa la saoloto mai luitau, ae sa le mafai ona tofo i le fiafia, olioli, ma le filemu.7 O luitau o se vaega taua o le olaga faaletino. O le suesue soo i tusitusiga paia i aso uma, o le a e maua ai le filemu i fesouaiga o siomiaina oe ma le malosi e tetee atu ai i faaosoosoga. O le a e atiaeina le faatuatua malosi i le alofatunoa o le Atua ma iloa e ala atu i le Togiola a Iesu Keriso o le a lelei ai mea uma e tusa ai ma le taimi a le Atua.

Afiafi Faaleaiga

A o e galue ai e faamalosia lou aiga ma atiae le filemu, ia manatua le meafaigaluega lona tolu lenei: afiafi faaleaiga i vaiaso uma. Ia faaeteete e aua ne’i faia a outou afiafi faaleaiga o se mea e faatoa fai pe a le pisi le aso. Fuafua lelei o le po o le Aso Gafua o le a i ai faatasi lou aiga i le fale mo le afiafi. Aua nei faatagaina manaoga o galuega, taaloga, gaoioiga faaopoopo, meaaoga, po o soo se isi lava mea ia sili atu le taua nai lo le taimi e te faaaluina e faatasi ai i le fale ma lou aiga.

O le faatulagaga o lou afiafi e le taua tele e pei o le taimi e faaaluina ai. E tatau ona aoao atu le talalelei i le tulaga aloaia ma le faasamasamanoa. Fai ia avea o se aafiaga anoa mo tagata taitasi o le aiga. O le afiafi faaleaiga o se taimi taua lea e molimau atu ai i se siosiomaga saogalemu; e aoao ai tomai faafaiaoga, fuafuaina ma le faatulagaga o mea; e faamalolosia ai sootaga faaleaiga; e atiae ai tu masani faaleaiga; e talanoa ai le tasi i le isi; ma le mea sili ona taua, ia maua ai se taimi matagofie e faatasitasi ai!

I le konafesi ia Aperila ua tea, sa tautino malosi mai ai Sister Linda S. Reeves faapea: “E tatau ona ou molimau atu i faamanuiaga o le suesue i tusitusiga paia i aso uma, ma tatalo, ma afiafi faaleaiga faalevaiaso. O faatinoga tonu ia e fesoasoani i le aveesea o le popole, ma tuu mai ai le taitaiga i o tatou olaga, ma faaopoopo atu se puipuiga i o tatou aiga.”8 O Sister Reeves o se tamaitai atamai tele. Ou te uunaia malosi outou ina ia maua sa oe lava molimau e uiga i nei mausa taua e tolu.

Auai i le Malumalu

O le meafaigaluega lona fa, o le o i le malumalu. Ua tatou iloa uma lava e leai se isi nofoaga sili ona filemu i lenei lalolagi nai lo totonu o malumalu o le Atua. Afai e leai sau pepa faataga o le malumalu, ia agavaa nei e mauaina. Afai e maua sau pepa faataga, ia faaaoga soo.9 Faatulaga se taimi masani e te alu ai i le malumalu. Aua ne’i faatagaina se tasi po o soo se mea e taofia oe mai lou i ai iina.

A o e i ai i le malumalu, faalogo i upu o sauniga, mafaufau loloto i ai, tatalo e uiga i ai, ma saili ia malamalama i o latou uiga. O le malumalu o se tasi o nofoaga silisili e malamalama ai i le mana o le Togiola a Iesu Keriso. Saili mo Ia iina. Manatua e anoanoai isi faamanuiaga e oo mai i le tuuina atu o igoa o lou lava aiga i le malumalu.

O nei meafaigaluega e fa o ni mausa taua ia mo le faamalosia o lou olaga i le mana o le Togiola a Iesu Keriso. Manatua o lo tatou Faaola o le Alii o le Filemu. O le filemu i lenei olaga faaletino e sau mai Lana taulaga togiola. Pe a tatou tatalo e le aunoa i le taeao ma le po, suesue a tatou tusitusiga paia i aso uma, fai afiafi faaleaiga faalevaiaso, ma auai soo i le malumalu, o loo tatou tali atu ma le naunautai i Lana valaaulia ia “o mai ia te Ia.” O le tele lava o lo tatou atiaeina o nei mausa, o le faatele foi lea ona naunau Satani e faatiga i tatou, ae o le faaitiitia lena o lona tomai e faia ai. E ala i le faaaogaina o nei meafaigaluega, tatou te faaaoga ai lo tatou faitalia e talia ai meaalofa atoatoa o Lana taulaga togiola.

Ou te le o fautua atu o le a mouese atu ia faigata uma o le olaga pe a outou faia nei mea. Na tatou o mai tonu lava i le olaga faaletino ina ia tuputupu ae mai tofotofoga ma faaosoosoga. E fesoasoani luitau ia i tatou ia avea ai e faapei o lo tatou Tama o i le Lagi, ma o le Togiola a Iesu Keriso ua mafai ai ona tatou onosaia nei luitau.10 Ou te molimau atu pe a tatou o mai ma le naunautai ia te Ia, o le a mafai ona tatou onosaia faaosoosoga uma, lototiga uma, luitau uma e fetaiai ma i tatou, i le suafa o Iesu Keriso, amene.

Faamatalaga

  1. Tagai Mose 5:11.

  2. Tagai Mose 4–5.

  3. Tagai Aperaamo 3:25.

  4. 2 Nifae 2:11.

  5. Tagai Mataupu Faavae ma Feagaiga 18:36; tagai foi fuaiupu 34–35.

  6. O nisi faataitaiga e aofia ai:Sa saunoa mai Peresitene Thomas S. Monson: “A o tatou faitau ma mafaufau loloto i tusitusiga paia, o le a tatou lagonaina ia musumusuga malu o le Agaga i o tatou agaga. E mafai ona tatou maua ai ni tali i a tatou fesili. Tatou te iloa ai faamanuiaga e oo mai e ala i le tausiaina o poloaiga a le Atua. Tatou te maua ai se molimau maumaututu e uiga i lo tatou Tama Faalelagi ma lo tatou Faaola, o Iesu Keriso, faapea ai ma lo La alolofa mo i tatou. Pe a tuufaatasia ia suesuega i tusitusiga paia ma a tatou tatalo, o le a mafai ai ona tatou iloa ma le mautinoa e moni le talalelei a Iesu Keriso. … A tatou manatuaina le tatalo ma faaalu se taimi e faitau ai tusitusiga paia, o le a matua faamanuiaina atili o tatou olaga ma o le a faamamaina a tatou avega” (“E Le Tuua Lava Na O i Tatou,” Liahona, Nov. 2013, 122).Sa saunoa Peresitene Gordon B. Hinckley: “Ou te folafola atu ia te outou e aunoa ma le faatuai, afai o le a tausia e outou taitoatasi lenei polokalama faigofie, e tusa lava pe ua faafia ona e faitauina le Tusi a Mamona, ae o le a oo mai i totonu o outou olaga ma totonu o o outou aiga se fuafaatatau faaopoopo o le Agaga o le Alii, o se folafolaga mausali ina ia savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua” (“O Se Molimau Moni ma Faamaoni,” Liahona, Aok. 2005, 6).Sa saunoa Peresitene Howard W. Hunter: “E matua faamanuiaina aiga pe a aumai e tama ma tina atamamai a latou fanau ma faitau faatasi ma i latou mai itulau o potutusi o tusitusiga paia, ona talanoaina saoloto lea o tala ma manatu matagofie e tusa ma le malamalama o tagata uma. O talavou ma tamaiti laiti e tele lava ina i ai ni malamalamaaga ofoofogia ma e fiafia i tusi faalelotu” (“Reading the Scriptures,” Ensign, Nov. 1979, 64).Na saunoa Peresitene Ezra Taft Benson: “Ua masani ona tatou faaalu le tele o le malosi e taumafai ia faateleina le faia o gaoioiga i a tatou siteki. Ua tatou galulue maelega ia alu i luga le pasene o i latou e auai i sauniga faamanatuga. Ua tatou galulue ia maua se pasene maualuga o o tatou alii talavou e o i ni misiona. Ua tatou taumafai ia toatele le numera o i latou e faaipoipo i le malumalu. O ni taumafaiga lelei uma lava ia taumafaiga ma taua i le tuputupu ae o le malo o le Atua. Peitai, afai e faatofuina e le aunoa e tagata taitoatasi i latou ma o latou lava aiga i tusitusiga paia, ma faia soo, o le a tupu fua lava ona oo mai isi mea. O le a faateleina molimau. O le a faamalosia tautinoga. O le a faamalosiauina aiga. O le a maua faaaliga patino” (“O Le Mana o le Afioga,” Liahona, Iulai 1986, 71).Sa tautino mai e Peresitene Spencer W. Kimball: “Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga. E faateleina ai lo’u alofa ia i latou e tatau ona ou alofa i ai ma lo’u loto atoa ma le mafaufau atoa ma le malosi atoa, ma o le faateleina o lo’u alofa ia i latou, e faigofie ai ona ou tumau i a latou apoapoaiga” (Aoaoga a Peresitene o le Ekalesia: Spencer W. Kimball [2006], 77–78).Sa saunoa Peresitene Marion G. Romney: “Ou te lagona afai, e faitauina e matua i totonu o tatou aiga le Tusi a Mamona ma le agaga tatalo ma ia faia soo, pe na o i laua pe faatasi ma le fanau, o le a oo mai le agaga o lena tusi sili e amata faatumulia ai o tatou fale ma i latou uma o e o nonofo ai i totonu. O le a faateleina le agaga o le migao, o le a tuputupu ae le fefaaaloaloai ma le popole o le tasi i le isi. O le a aluese le agaga o le finau. O le a fautuaina e matua a latou fanau i le alofa ma le poto sili. O le a sili ona tali atu ma gauai atu le fanau i fautuaga a o latou matua. O le a faateleina le amiotonu. O le a faateleina le faatuatua, faamoemoe, ma le alofa—le alofa mama o Keriso—i o tatou aiga ma olaga, ma aumaia ai filemu, olioli, ma le fiafia” (“The Book of Mormon,” Ensign, May 1980, 67).Na saunoa Peresitene Boyd K. Packer: “O mataupu autu moni, ua malamalama i ai, e suia ai uiga ma amioga. O le suesueina o mataupu autu o le talalelei o le a vave ona faaleleia ai le amio nai lo se suesuega o le amio lea o le a faaleleia ai le amio” (“Aua le Fefe,” Liahona, Me 2004, 79).Sa saunoa Elder David A. Bednar: “O tatalo faaleaiga taitasi, o mataupu taitasi o suesuega o tusitusiga paia, ma afiafi faaleaiga taitasi e tofu ma se tosi po o se aafiaga i o tatou agaga. E le mafai ona foliga faatosinaloto tele pe manatua pea se tasi mea i le isi. Ae pei lava ona paleni ia tosi lanu samasama ma le lanu auro ma maua mai ai se faiva alofilima matagafoie naua, o le mea la lea, o lo tatou faia pea e le aunoa o nai mea iti faigofie, e mafai ona tulai mai ai taunuuga faaleagaga maoae” (“Ia Matua Maelega ma Mataufau i le Aiga,” Liahona, Nov. 2009, 19–20).

  7. Tagai 2 Nifae 2:13.

  8. Linda S. Reeves, “Puipuiga mai Ponokalafi—o se Aiga e Taulai Atu ia Keriso,” Liahona, Me 2014, 16–17.

  9. Na saunoa Peresitene Howard W. Hunter: “I le agaga lena, ou te valaau atu ai i le Au Paia o Aso e Gata Ai ia tepa taulai i le malumalu o le Alii o se faatusa tele lea o lo outou auai i lana Ekalesia. O le moomooga sili lava o lo’u loto, ia agavaa tagata uma o le Ekalesia e ulu atu i le malumalu. O le a fiafia le Alii pe a agavaa tagata matutua uma o le Ekalesia—ma tauaveina—se pepa faataga o le malumalu. O mea e ao ina tatou faia tatou te agavaa ai mo se pepa faataga o le malumalu, o mea moni lava ia e mautinoa ai le fiafia o le tagata lava ia ma aiga. Ia avea i tatou ma tagata-auai i le malumalu. Ulu soo atu i le malumalu e tusa ma avanoa e te maua. Ia tautau se ata o le malumalu i o outou fale e mafai ona vaai i ai a outou fanau. A’oa’o atu ia i latou faamoemoega o le maota o le Alii. Faatonu i latou e fuafua mai lo latou laiti e ulu atu i ai ma ia agavaa tumau mo lena faamanuiaga” (“O Mea Silisili Ese Lava ma le Aoga,” Liahona, Nov. 1994, 9).

  10. Tagai 2 Nifae 2:2.