Kev Txhawb Pab Lwm Tus

Nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb muaj cib fim pab lwm tus. Txij thaum kuv yog ib tug mej zeej los, kuv tau ua ntau yam hauj lwm. Ib yam li Tij Laug Udine Falabella, leej txiv ntawm Txwj Laug Enrique R. Falabella hais tias, “Tus uas ua hauj lwm dab tsi yeej pab tau dab tsi; tus uas tsis ua hauj lwm dab tsi yeej pab tsis tau dab tsi.” Nov yog tej lus uas peb yuav tsum nco ntsoov hauv peb lub siab lub ntsws.

Thaum kuv nrhiav kev coj kuv txoj hauj lwm pab lwm tus, qhov uas nplij kuv lub siab yog qhov uas kuv nco qab tias tus Cawm Seej tsom ntsoov rau ib tug neeg thiab ib tsev neeg. Nws txoj kev hlub thiab kev tsom ntsoov rau ib tug neeg tau qhia kuv tias Nws saib txhua tus ntawm Leej Txiv Saum Ntuj Ceeb Tsheej cov me nyuam rau nqi thiab peb yuav tsum ua tib zoo kom txhawb pab thiab txhawb nqa txhua tus neeg dhau los ntawm Yexus Khetos txoj moo zoo.

Phau vaj lug kub qhia kom peb:

Nco ntsoov tias neeg tej ntsuj plig muaj nqis heev rau Vajtswv. ...

Thiab txawm hais tias peb yuav khwv tag nrho peb lub neej … thiab coj tau ib tug ntsuj plig los cuag tus Tswv xwb los, peb yuav muaj txoj kev xyiv fab loj nrog tus ntawd nyob hauv Vajtswv lub nceeg vaj!¹

Txhua tus muaj nqis heev rau Vajtswv, vim peb yog Nws cov me nyuam thiab peb muaj peev xwm rais los ua zoo li Nws.²

Yexus Khetos txoj kev hlub yuav tsum coj peb kev yog tias peb yuav paub txog tej kev xav tau ntawm cov uas peb pab tau. Peb tus Tswv, Yexus Khetos, tej lus qhia peb paub ua li cas. Thiab peb txoj kev txhawb pab lwm tus pib zoo li no: nrhiav tej yam uas neeg xav tau, ces cia li pab lawv. Ib yam li Muam Linda K. Burton, Koom Haum Niam Tsev tus tuam thawj tswj hwm, hais tias, “Xub xam saib ces mam li pab.”³

Thawj Tswj Hwm Thomas S. Monson coj yam ntxwv zoo txog lub ntsiab cai no. Thaum lub Ib Hlis Ntuj xyoo 2005, nws tswj hwm ib lub rooj sab laj rau cov thawj coj pov thawj hwj nyob hauv Puerto Rico thaum nws qhia txog tus Cawm Seej thiab nws cov tub qhe txoj kev txhawb pab lwm tus. Thaum lawv xaus kev sib ntsib zoo kawg ntawd, Thawj Tswj Hwm Monson pib tuav tes nrog tag nrho cov thawj coj pov thawj hwj uas tuaj. Ces ua ciav, nws pom tias muaj ib tug uas nyob deb nyob nws tus kheej saib txhua yam.

Thawj Tswj Hwm Monson twb ncaim pawg thawj coj mus, rau tus txiv neej ntawd, thiab hais lus rau nws. José R. Zayas los kua muag thiab qhia tias yog ib qho txuj ci tseem ceeb uas Thawj Tswj Hwm Monson tuaj cuag nws thiab teb nws thiab nws tus poj niam, Yolanda, txoj kev thov Vajtswv ua ntej muaj kev sib ntsib. Nws qhia Thawj Tswj Hwm Monson hais tias nws tus ntxhais mob heev thiab nws muaj ib tsab ntawv los ntawm nws tus poj niam uas nws xav muab rau Thawj Tswj Hwm Monson. Tij Laug Zayas qhia nws tus poj niam tias xa tsis tau vim Thawj Tswj Hwm Monson muaj hauj lwm ntau dhau. Thawj Tswj Hwm Monson mloog nws hais zaj no ces thov kom muab tsab ntawv rau nws, uas nws nyeem twj ywm. Ces nws tso tsab ntawv rau hauv nws hnab xuv thiab qhia Tij Laug Zayas hais tias nws yuav ua raws li nkawd thov.

Peb tus Tswv, Yexus Khetos, twb hlub tsev neeg no los ntawm Nws tus tub qhe. Kuv ntseeg tias tus Cawm Seej tej lus nyob hauv zaj lus piv txwv txog tus Neeg Xamalis zoo yog hais rau peb hais tias: “Cia li mus ua ib yam li ntawd.”⁴

Thaum lub Cuaj Hlis Ntuj hnub tim 21, xyoo 1998, Cua Daj Cua Dub Georges raug Puerto Rico, ua ntau yam puas tsuaj tas. Muam Martinez, wb tsib tug me nyuam, thiab kuv twb nyob hauv peb lub tsev tiv dhau cua daj cua dub ntawd thiab cua hlob heev. Tiam sis, ob lub lim tiam dhau mus es tsis muaj dej thiab tsis muaj hluav taws xob.

Thaum tsis muaj dej lawm, ces nyuaj rau peb yuav dej ntxiv. Kuv yeej yuav nco ntsoov cov kwv tij uas tuaj txhawb pab peb thaum lawv nqa dej uas muaj nqis heev rau peb, thiab kuv yeej yuav nco ntsoov cov muam uas muaj siab hlub muab dej rau peb haus.

Germán Colón tuaj rau peb lub tsev nrog ib lub thoob yas loj loj nyob hauv ib lub tsheb thauj khoom. Nws qhia peb hais tias nws ua li no vim, raws li nws hais, “Kuv paub tias neb muaj me nyuam yaus uas yuav tsum haus dej.” Ob peb hnub tom qab ntawd, Tij Laug Noel Muñoz thiab Herminio Gómez tso peb lub thawv dej loj loj rau ntawm ib lub tsheb ntev. Nkawd tuaj txog peb lub tsev thiab tso dej rau hauv txhua lub hub, thiab caw cov neeg zej zog tso dej rau hauv lawv tej hub kom puv lawm.

Lawv txoj kev los txhawb pab twb teb peb tej lus thov rau Vajtswv lawm. Twb pom Yexus Khetos txoj kev hlub rau peb nyob ntawm peb tug kwv tij no lub ntsej muag, thiab lawv txoj hauj lwm pab—los sis lawv txoj kev los txhawb pab peb—twb ua rau peb lub neej muaj ntau tshaj cov dej haus xwb. Vajtswv txhua tus tub thiab ntxhais yuav tsum paub tias muaj neeg xav pab lawv thiab saib xyuas lawv.

Kuv ua tim khawv rau nej tias Leej Txiv Saum Ntuj Ceeb Tsheej thiab peb tus Tswv, Yexus Khetos, paub peb txhua leej txhua tus. Yog li ntawd, Nkawd muab tej yam uas peb xav tau rau peb kom peb thiaj muaj cib fim ua neeg zoo li Nkawd. Thaum peb taug kev, Nkawd tso neeg ntawm kev kom pab peb. Ces, thaum peb ua cuab yeej hauv Nkawd txhais tes, peb pab tau cov uas Nkawd qhia rau peb los ntawm kev tshwm sim.

Ua li no ces tus Tswv Yexus Khetos yuav ncav tes pab txhua tus ntawm Leej Txiv Saum Ntuj Ceeb Tsheej cov me nyuam. Tus Tswv Yug Yaj Zoo yuav muab tag nrho Nws cov yaj sib sau ua ke. Nws yuav ua li no ib tug dhau ib tug thaum lawv siv lawv txoj kev ywj siab coj ncaj ncees—tom qab lawv mloog Nws cov tub qhe lus thiab txais lawv tej lus qhuab qhia. Lawv yuav paub tias yog Nws lub suab, thiab lawv yuav nrog Nws mus. Yuav tsum ua hauj lwm txhawb pab lwm tus li no kom ua raws li peb tej kev khi lus thaum peb ua kev cai raus dej.

Zoo ib yam li ntawd, qhov uas peb coj yam ntxwv li ib tug thwj tim ntawm Yexus Khetos yog qhov zoo tshaj plaws kom pab cov uas peb qhia tau txog Nws txoj moo zoo. Thaum peb qhib peb qhov ncauj thiab tshaj tawm Yexus Khetos txoj moo zoo, peb rais los ua, “Nws tswv yug yaj, uas Nws txib kom tu cov yaj ntawm Nws tiaj zaub thiab cov yaj ntawm Nws pab”⁵; peb rais los ua cov neeg qaug zog thiab dog dig⁶ “cov uas nrhiav neeg.”⁷

Tsis yog peb ua hauj lwm pab thiab txhawb pab cov uas muaj txoj sia nyob hauv lub ntiaj teb no xwb. Peb kuj ua tau hauj lwm pab cov tuag—cov uas nyob hauv lub ntuj ntsuj plig, thiab cov uas thaum lawv ua neej nyob, tsis tau muaj cib fim txais tau cov kab ke cawm seej ntawm Yexus Khetos txoj moo zoo. Peb kuj sau ib phau ceev xwm txheej thiab sau txog peb tsev neeg zaj keeb kwm kom muab tej siab ntawm cov ciaj tig mus rau cov uas tseem muaj txoj sia nyob—tsis hais tej siab ntawm cov ciaj tig mus rau lawv poj koob yawm txwv. Ua li no yeej pab peb tsev neeg sib txuas, ib tiam dhau ib tiam, kom nyob ua ke mus ib txhis. Thaum peb ua li no, peb rais los ua “neeg cawm seej … saum lub roob Xi-oos.”⁸

Peb muaj cib fim ua cuab yeej hauv Nws txhais tes. Peb ua tau li no nyob hauv peb tsev neeg, rau peb tus khub, peb cov phooj ywg, thiab cov neeg zej zog. Qhov uas peb ua li ntawd yog peb txoj kev txhawb pab lwm tus vim peb yog Yexus Khetos cov thwj tim.

“Txhua haiv neeg hauv qab ntuj yuav tuaj sib sau ua ke rau ntawm nws xub ntiag, thiab nws yuav muab sawv daws cais ua ob pab, ib yam li tus tswv yug yaj muab pab yaj cais tawm ntawm pab tshis mus.

“Nws yuav kom cov yaj los nyob ntawm nws sab xis, thiab kom cov tshis los nyob ntawm nws sab laug.

“Thaum ntawd Vaj Ntxwv yuav hais rau cov neeg uas nyob ntawm nws sab xis hais tias, Nej cov uas tau kuv Txiv txoj koob hmoov, nej cia li los kav lub teb chaws uas twb npaj rau nej thaum tsim lub ntiaj teb los lawm:

“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev:

“Thaum kuv tsis muaj ris tsho hnav; nej muab rau kuv hnav. Thaum kuv muaj mob, nej tuaj tu kuv. Thaum kuv raug kaw rau hauv tsev loj cuj, nej tuaj saib kuv.

“Thaum cov neeg ncaj ncees hnov li ntawd lawv yuav teb hais tias, Tus Tswv, thaum twg ais peb pom koj tshaib plab peb tau muab mov rau koj noj? los sis pom koj nqhis dej thiab muab dej rau koj haus no?

“Thaum twg ais koj tuaj ua qhua peb tau hu koj los so hauv peb tsev? los sis pom koj tsis muaj tsoos tsho hnav, thiab peb muab rau koj hnav no?

“Thaum twg ais peb pom koj muaj mob los sis pom koj raug kaw hauv tsev loj cuj peb tau tuaj xyuas koj no?

“Vaj ntxwv yuav teb hais tias, Kuv qhia tseeb rau nej hais tias, thaum nej pab kuv cov kwv tij no ib tug, txawm yog tus ntawd tsis muaj hwj chim dab tsi li los yog, nej tseem pab nws thiab, qhov uas nej pab li ntawd twb yog nej pab kuv ntag.”8⁹

Kuv thov Vajtswv hais tias peb yuav ua li no, los ntawm Yexus Khetos lub npe, amees.