Jerbal in Kwaļo̧k ko Ad Make

Kabun̄ eo an Jisōs Kraist im Armej ro Rekwojarjar ilo Raan-ko Āliktata, em̧ōj letok n̄an kōj juon iien em̧m̧an im kōjeram̧m̧an ko ad make n̄an jerbal. Toon wōt aō membōr, Ikar jerbal ilo elōn̄ wāween ko. Āinwōt būratōr Udine Falabella, jemen Elder Enrique R. Falabella, ekkōn ba, “Eļan̄n̄e juōn ej jerbal in jipan̄, ewōr tokjeer; eļan̄n̄e juon armej ejjab jerbal in jipan̄ ejjeļo̧k tokjen.” Naan ko kein jej aikuij in likūt ilo kōlmenļo̧kijen ko ad im ilo būruwōd.

Ilo aō pukōt tōl ko n̄an jerbal, ij lo kaenōm̧m̧an ilo keememej bwe Rilo̧mo̧o̧r eo ej wujlepļo̧k n̄an kajjojo im baam̧le eo. Iakwe eo an im mije eo an n̄an kajjojo ekar katakin eō bwe E ej kile jon̄an aorōk eo an kajjojo iaan ajri ro nejin Jemedwōj Ilan̄ im bwe eaorōk n̄an kōj n̄an lukkuun lale bwe kajjojo rej kwaļok n̄an er im kōkajoorļo̧k jen gospel eo an Jisōs Kraist.

Ilo jeje ko rekwojarjar jej riit:

Keememej bwe jetōb ko raorōk im̧aan mejen Anij.

Eļan̄n̄e kwonaaj jerbale aolep raan ko am̧ im bōktok juon jetōb n̄an Anij, ewi jon̄an ļap in lan̄lōn̄ eo ippam̧ ilo aelōn̄ eo an Jema.¹

Kajjojo jetōb raorōk ippān Anij, bwe jej ro Nejin im ewōr ippād kōttōpar n̄an erom̧ āinwōt E. ²

Iakwe eo an Jisōs Kraist eaikuj in ad likōbejn̄ak eļan̄n̄e jej kajieon̄ in kile aikuj ko an ro jemaron̄ jipan̄ ilo elōn̄ wāween. Katak ko an ad Irooj, Jisōs Kraist, ej kwaļok n̄an kōj ial eo. Im en̄in wāween an jerbal in kwaļo̧k ko ad ijjino: loi aikuij ko, innām madm̧ōdi. Āinwōt an Sister Linda  K. Burton, būreejtōn eo eutiej an Doulul eo an Kōrā ro, eaar ba, “Mo̧kta etale, innām jerbale.”³

Būreejtōn Thomas  S. Monson ej juōn waanjon̄ak kōn pedped in katak in. Ilo Jānwōde in 2005 eo, ekar tōl ilo juōn kweilo̧k eļap an ritōl ro an priesthood ilo Puerto Rico ke ekar kwaļok wāween an Rilo̧mo̧o̧r eo im ro Rikarejeran leļok jerbal in jipan̄ ilo jerbal in kwaļok ko aer make. Ilo jem̧ļokin iien kweilok eo em̧m̧an, Būreejtōn Monson ekar jino idik pein aolep ritōl ro an priesthood ro rekar pād ijo. Innām, ekar kile ke juōn iaer ekar kalimjōk men otemejej jen ettoļo̧k, e make iaan.

Būreejtōn Monson ekar etal jen jarlepju eo, ļo̧k n̄an ippān būratōr eo, im kōnono ippān. Kōn en̄jake ko, José R. Zayas ekar jiron̄ e ekar juon kabwilōn̄lōn̄ bwe ekar etal n̄an ippān im ej uwaak n̄an jar ko bwe E kab lieo ippān, Yolanda, kar kōm̧m̧ani m̧okta jen kweilok eo. Ekar ba n̄an Būreejtōn Monson bwe; leddik eo nejin ekar pād ilo juōn wāween eo ekauwōtata im ippān epād juōn leta jen kōrā eo ippān bwe ekar kōņaan bwe en boktok n̄an Būreejtōn Monson. Brother Zayas ekar ba n̄an kōrā eo ippān bwe epan tōprak bwe Būreejtōn Monson enaaj kar boub. Būreejtōn Monson ekar ron̄jake bwebwenato eo im kajjitōk leta eo, eo ekar riiti ilo ejjeļo̧k ainikien. Innām ekar likūti ilo bōjo eo an im ba n̄an Būratōr Zayas bwe enaaj bōk eddo in kajjitōk eo aer.

Ilo wāween in, baam̧le in kar im̧we jen ad Irooj, Jisōs Kraist, jen rijerbal eo An. Ij tōmak naan ko an Rilo̧mo̧o̧r ilo būrabōl eo an RiSamria eo em̧m̧an ej jerbal n̄an kōj: “Kwōn ilo̧k im kōm̧anm̧an āinwōt.” ⁴

Ilo Jeptōmba 21, 1998, Hurricane Georges ekar dibōjļo̧k Puerto Rico, kōm̧m̧an jorrān ko reļļap. Jejtōr Martinez, im ajri ro nejim lalem, im n̄a kar maron̄ ellā jen lan̄ eo eļap im kōto ko an rekajoor ilo aere eo ilo am kar pād wōt ilo m̧weo. Bōtaab, kōm kar pād ium̧win ruo wiik ko ilo an ejjeļo̧k dān im ejjeļo̧k jarom.

Ke eaar maat nim̧ōm dān, ekar pen n̄an ebbōk. Iban meļo̧kļo̧k em̧m̧aan ro rekar jipan̄ letok nim̧ōm̧ dān, barāinwōt iban meļo̧kļo̧k iakwe eo an jejtōr ro raar barāinwōt jipan̄ kōm̧.

Germán Colón ekar itok n̄an m̧weo im̧ōm kōn juon nien dān eļap ilo juon peikaab. Ekar jiron̄ kōm ekar kōm̧m̧ane kōnke, ilo naan ko an, “Ijeļā ewōr nejūm̧ ajri ro reddik im raikuij dān.” Jet raan tok ālik, Būratōr Noel Muñoz im Herminio Gómez kar kanne jilu nien dān ko reļļap n̄an ioon juon wa eļap. Rekar jadetok n̄an m̧weo im̧ōm ilo am jab jeļā kake im kanne aolep nien dān ko kōn dānin daak, bar āinwōt karwaineneik ro iturum n̄an tein̄i ko aer.

Jar ko am rekar uwaak kōn jerbal in jipan̄ ko aer. Turin mejān em̧m̧aan ro jilu rekar kwaļo̧k iakwe eo me epād ippān Jisōs Kraist n̄an kōj, im jerbal in jipan̄ ko aer—ilo bar jet naan, jerbal in kwaļo̧k ko aer make—rekar boktok eļapļo̧k jen dānnin daak n̄an mour ko am. N̄an aolep laddik ro kab leddik ro nejin Anij, jeļā ke armej rej ikdeelel ilo aer lale jōkne eo aer make elukkuun in aorōk.

Ij kwaļo̧k n̄an kom̧ bwe Jemedwōj Ilan̄ im ad Irooj, Jisōs Kraist, rejeļā kajjed kajojo im kōj make. Kōn wūn in, Rej kakke ta ko jej aikuj bwe en wōr ad iien em̧m̧an n̄an tōpar jon̄an eo ekwojarjar jemaron̄ tōpare. Ilo ial eo im, Rej likūt armej ro renaaj jipan̄ kōj. Innām, ilo ad erom kein jerbal ilo peier, jej maron̄ jerbal im jipan̄ ro rej kwaļok n̄an kōj kōn revelesōn.

Ilo wāween in, Irooj Jisōs Kraist enaaj tōpar aolep ajri ro nejin Jemedwōj Ilan̄. Jabōt eo em̧m̧an enaaj kobaik aolep jiip ko An. Enaaj kōm̧m̧ane juon ilo̧k juon ilo aer kōjerbal anemkwoj in kālet eo aer ilo mour ilo jim̧we—ālkin ron̄ ainikien rikarejeran im bōk jerbal ko aer. Innām renaaj kile ainikien, innām renaaj ļoor E. Jerbal in kwaļo̧k in jokkin wōt juōn ippān kōjparok bujen ko jaar kōm̧m̧ani ke jekar peptaij.

Ejja āinwōt, juon waanjon̄ak em̧m̧an an juon rikaļooran Jisōs Kraist ej leta eo ad em̧m̧an tata n̄an kwaļok kadkad in n̄an ro im jej kwaļo̧k gospel eo an n̄an er. Ilo ad kōpeļļok lon̄iid im kwaļo̧k gospel eo em̧ōj an jeplaaktok an Jisōs Kraist, jej erom “Rilale Jiip ko an, rej bōk eddo in naajdik jiip ko ilo melan eo an im laam eo ilo wōrwōr eo an” ⁵; jej erom m̧o̧jņo im lōmwaan⁶ “ri eo̧ņōd armej.” ⁷

Jerbal in jipan̄ eo ad im jerbal in kwaļo̧k eo ad make. Jemaron̄ bar kōm̧m̧an jerbal n̄an ro remej—n̄an ro rej jokwe ilo laļ eo an Jetōb im ro, ilo mour ko aer, ekar jab wōr aer iien em̧m̧an n̄an bōk kain̄i in lo̧mo̧o̧r eo an gospel eo an Jisōs Kraist. Jemaron̄ kōm̧m̧ane juon jōnōļ im je bwebwenato ko an baam̧le ko ad n̄an ukōt tok būruwōn ro rej mour n̄an ro rej mour—bar āinwōt buruwōn ro rej mour n̄an rūtto ro aer. Ej pedped wōt ioon kobaik baam̧le kein ad, epepen n̄an epepen, im kōtaan ko n̄an indeeo. Ilo ad kōm̧m̧ane menin, jej erom “ri lo̧mo̧o̧r ... ilo tol zion.” ⁸

Ewōr ad iien em̧m̧an n̄an kein jerbal ilo pein. Jemaron̄ in ilo marre ko ad, ilo bam̧le ko ad, ippen ro mōttad, im ippen armej ro ad. En̄in ej jerbal in kwaļo̧k eo ad āinwōt ro rem̧ool rikaloran Jisōs Kraist.

“Im naaj kokweiloktok ri aelo̧n̄ otemjej im̧aan mejān, im Enaaj kōjepel er jān doon, āinwōt seperd ej kōjepel sip jen got ko:

“Im enaaj kajutak sip ko I anmooņōn, a got ko I anmiin̄in.

“Innām kiin̄ eo enaaj ba n̄an ro I anmooņōn, “Kom̧win itok kom ri m̧ōņōņō an Jema, kom̧win jolōt aelōn̄ eo ear pojak n̄an kom̧ jān jinoin laļ.

“Bwe I ar kwole im kom̧ ar naajdik Eō; I ar maro, im kom ar kaidaak Eō; I ar ruwamāejet, im kom̧ ar kadeļo̧n̄ Eō:

“Ejjeļo̧k Aō nuknuk, im kom̧ ar kanuknuk Eō; I ar nan̄in mej, im kom̧ ar itōmlale Eō; I ar pād ilo kalbuuj, im kom̧ ar itok n̄an Ippa.

“Innām ro rem̧m̧an renaaj uwaak E im ba, “Irooj, n̄āāt ko̧m ar lo Am̧ kwōle, im im naajdik Eok? Ak maro im kaidaak Eok?

“N̄āāt kōm ar lo Am̧ ruwamāejet, im kadeļo̧n̄tok Eok? Ak ejjelok Am̧ nuknuk, im kanuknuk Eok?

“Ak n̄āāt kōm ar lo Am̧ nan̄inmej, ak ilowaan Kalbuuj im ar iwōj n̄an Ippam̧?

“Im kiin̄ eo enaaj uwaak im ba n̄an er, “Em̧ool Ij ba n̄an kom̧, ilo ami kōm̧anm̧an jabdewōt n̄an juon rein ro jatū ediktata, kom̧ ar kōm̧anm̧ane n̄an Eō.” ⁹

Bwe jen maron̄ kōm̧m̧ane men in ej aō jar ilo etan Jisōs Kraist, amen.