Niam Txiv: Thawj cov Xib Hwb uas Qhia txoj Moo Zoo rau Lawv cov Me Nyuam

Ben Carson hais tias, “Kuv yog tus tub kawm ntawv phem tshaj plaws hauv kuv hoob kawm ntawv qib tsib.” Muaj ib hnub Ben xeem ib daim ntawv xeem leb uas muaj 30 lo lus nug. Tus tub kawm ntawv uas zaum tom qab nws kuaj nws daim ntawv thiab rov qab muab rau nws. Tus xib hwb, Niam Williamson, pib hu txhua tus tub kawm ntawv lub npe saib nws tau khab nees li cas. Tsis ntev, nws hais Ben lub npe. Ben txaj txaj muag, es nws teb tsis meej. Niam Williamson, thaum nws xav tias nws teb hais tias “9,” nws teb hais tias qhov uas Ben tau khab nees 9 ntawm 30 yog ib qho zoo heev. Ces tus tub kawm ntawv zaum nws tom qab ntawd txawm qw nrov nrov hais tias, “Tsis yog cuaj! … Nws tsis tau ib qho khab nees … li.” Ben hais tias nws xav ntxaum mus rau hauv av.

Thaum tib lub sij hawm ntawd, Ben niam, Sonya, kuj muaj ntau txoj kev cov nyom thiab. Nws yog ib tug ntawm 24 tus me nyuam, tau kawm ntawv txog qib peb nkaus xwb, thiab nws tsis txawj nyeem ntawv. Nws tau yuav txiv thaum nws muaj hnub nyoog 13 xyoos, thiab tom qab no nws nrauj nws tus txiv. Nws muaj ob tug tub thiab ua neej nyob hauv Detroit tej qhov chaw rau cov neeg pluag. Txawm yog li ntawd, tus niam tsev no vam khom nws tus kheej thiab nws ntseeg hais tias Vajtswv yuav pab nws thiab nws ob tug tub yog tias lawv rau rau siab ua tej yam uas lawv ua tau.

Muaj ib hnub muaj ib yam uas hloov hauv lawv lub neej. Thaum nws tab tom tu ib lub tsev uas yog neeg muaj ua tswv nws xav zoj hais tias cov neeg muaj no muaj ntawv nyeem—cov neeg muaj no txawj nyeem ntawv. Tom qab nws lawb hauj lwm nws rov qab mus tsev thiab muab lub TV uas Ben thiab nws tus kwv tab tom saib tua. Nws hais tias: Neb ob tug tub saib TV ntau dhau. Txij no mus neb tsuas saib tau peb zaj TV tauj ib lim tiam. Dua li ces neb yuav mus tom lub tsev khaws ntawv—cia li nyeem ob phau ntawv tauj ib lim tiam thiab qhia kuv saib neb tau nyeem txog dab tsi.

Ob tug tub xav tsis thoob li. Ben hais tias nws yeej tsis tau nyeem ib phau ntawv hauv nws lub neej tsuas yog thaum lub tsev kawm ntawv yuam kom nws nyeem xwb. Nkawd tsis txaus siab, nkawd yws yws, nkawd cam thawj, tiam sis kov tsis yeej. Ces Ben txawm xav hais tias, “Kuv niam tsim txoj kev cai. Kuv tsis nyiam kuv niam tej kev cai, tiam sis qhov uas nws tuag siab kom peb hloov peb lub neej kom zoo dua tau hloov kuv lub neej txoj hau kev.”

Thiab tau hloov ntau. Thaum Ben kawm qib xya ces nws yog tus thib ib hauv nws hoob kawm ntawv. Tom qab no nws txais nyiaj pub scholarship mus kawm ntawv qib siab ntawm Yale University, ces nws kawm ua ib tug kws kho mob rau ntawm Johns Hopkins, es nyob ntawd thaum nws muaj 33 xyoos nws rais los mus ua tus thawj kws phais me nyuam yaus lub paj hlwb thiab nws lub moo ua ib tug phais neeg nrov thoob plaws lub ntiaj teb. Es qhov no yog tim li cas? Twb yog vim muaj ib leej niam uas, txawm tias nws tsis muaj, tau ua nws tej hauj lwm ua ib tug niam tsev zoo.¹

Cov vaj lug kub hais txog niam txiv lub luag hauj lwm—hais tias yog lawv lub luag hauj lwm kom qhia lawv cov me nyuam “txoj lus qhuab qhia ntawm kev hloov siab lees txim, kev ntseeg rau ntawm Khetos Leej Tub ntawm Vajtswv uas muaj txoj sia nyob, thiab hais txog kev cai raus dej thiab lub txiaj ntsim ntawm tus Vaj Ntsuj Plig Dawb Huv,” (Q&K 68:25).

Ua niam txiv peb yuav tsum yog thawj cov xib hwb thiab yam ntxwv uas qhia txoj moo zoo rau peb cov me nyuam—tsis yog tus npisov, Hnub Caiv Kev Kawm Vaj Lus Kub, pawg Ntxhais Hluas los yog pawg Tub Hluas, tiam sis yog cov niam txiv. Ua lawv thawj cov xib hwb qhia txoj moo zoo rau lawv, peb qhia tau lawv txog lub hwj chim thiab qhov tseeb ntawm txoj Kev Theej Txhoj—txog saib lawv yog leej twg tiag thiab yuav muaj txoj hmoov li cas—thiab ua li no peb yuav pab lawv pua ib lub hauv paus khov kho rau lawv lub neej. Thaum kawg ces, yus lub tsev yog qhov chaw zoo tshaj plaws rau txoj kev qhia Yexus Khetos txoj moo zoo.

Tsaib no kuv ua hauj lwm nyob tim Beirut, Lebanon. Thaum nyob ntawd, kuv kawm txog ib tug ntxhais hluas muaj 12 xyoos hu ua Sarah. Nws niam txiv thiab nws ob tug nus muag hlob tau ua kev cai raus dej koom lub Koom Txoos hauv teb chaws Romania tiam sis txawm raug yuam kom rov qab mus tim lawv lub teb chaws thaum Sarah muaj 7 xyoo xwb. Hauv lawv lub teb chaws tsis muaj lub Koom Txoos, tsis muaj pawg ntseeg, tsis muaj Hnub Caiv Kev Kawm Vaj Lug Kub los yog pawg Ntxhais Hluas. Tom qab tsib xyoos tsev neeg no txawm kawm txog ib ceg ntseeg hauv Beirut thiab, ua ntej kuv tuaj xyuas kiag, tau xa lawv tus ntxhais, Sarah, uas muaj 12 xyoos thaum ntawd, mus ua kev cai raus dej. Thaum kuv nyob ntawd, kuv hais txog txoj kev cawm seej. Sarah pheej tsa tes thiab teb kuv cov lus nug.

Tom qab txoj kev sib ntsib tiav tas, thiab vim kuv paub tias Sarah tsis tau mus tshawj dua, kuv mus ntsib nws thiab nug hais tias, “Sarah, koj ua li cas paub teb kuv cov lus nug ntawd?” Nws teb zoj hais tias, “Kuv niam qhia kuv.” Lawv tsis muaj lub Koom Txoos hauv lawv koog zej zog, tiam sis lawv muaj txoj moo zoo hauv lawv tsev neeg. Sarah niam yog Sarah thawj tug xib hwb qhia txoj moo zoo rau nws.

Twb yog Enos uas hais tias, “Tej lus uas kuv nquag nquag tau hnov kuv txiv hais txog txoj sia nyob mus ib txhis, thiab txoj kev xyiv fab ntawm cov ntseeg, tau tog mus tob rau hauv kuv lub siab” (Enos 1:3). Peb yeej paub hais tias tus twg yog Enos tus xib hwb qhia txoj moo zoo.

Kuv nco txog thaum kuv txiv nyeem vaj lug kub thiab lwm cov ntawv zoo, thiab kuv yuav nrog nws zaum mloog nws nyeem thiab. Kuv nco txog cov ntawv uas kuv txiv yuav muab ntim rau hauv nws hnab tsho uas muaj cov lus los ntawm cov vaj lug kub los yog Shakespeare, los yog cov lus tshiab uas kuv txiv yuav kawm thiab cim ntsoov. Kuv nco txog tej lub sij hawm uas peb tsev neeg sib tham txog txoj moo zoo rau ntawm lub rooj noj mov. Kuv nco txog tej sij hawm uas kuv txiv coj kuv mus ntsib cov neeg laus—thaum wb yuav mus yuav kias lias rau ib tug los yog ib pluag mov nqaij qaib rau lwm tus, los yog thaum kuv txiv muab nyiaj pub rau dua ib tug neeg laus. Kuv nco txog saib kuv zoo siab npaum li cas thiab hais tias kuv xav ua zoo ib yam li kuv txiv.

Kuv nco txog kuv niam, uas thaum ntawd twb nto 90 xyoo lawm, ua ib pluag mov hauv nws chav ua mov me thiab nqa pluas mov ntawd yuav tawm mus qhov twg. Kuv nug nws saib nws yuav mus qhov twg. Nws teb tias, “Auj, kuv nqa ib pluag mov mus rau cov neeg laus.” Kuv xav zoj rau kuv tus kheej hais tias, “Niam, koj twb yog tus neeg laus lawm.” Kuv yeej los ris kuv niam thiab txiv nkawd txiaj tiag. Nkawd yog kuv ob tug xib hwb qhia txoj moo zoo tiag.

Ib yam tseem ceeb heev uas peb ua tau ua niam tsev txiv tsev yog kom qhia peb cov me nyuam lub hwj chim ntawm txoj kev thov Vajtswv, tsis yog txoj kev thov Vajtswv xwb. Thaum kuv muaj hnub nyoog 17 xyoo, kuv txhos caug ntawm kuv lub txaj thiab thov Vajtswv. Kuv tsis paub tiam sis kuv niam sawv ntawm kuv lub qhov rooj mloog kuv thov. Thaum kuv thov tag, nws hais tias, “Tad, koj puas thov tus Tswv kom pab nrhiav ib tug poj niam zoo rau koj?”

Nws lo lus nug ua rau kuv xav tsis thoob. Kuv twb tsis xav txog qhov ntawd hlo li. Kuv xav txog txoj kev ntaus basketball thiab kev kawm ntawv. Ces, kuv txawm teb nws hais tias, “Tsis thov,” ces kuv niam hais tias, “Tsim nyog thov kom tau qhov ntawd, kuv tus me tub os; qhov kev txiav txim siab saib koj yuav yuav tus poj niam twg yeej tseem ceeb heev tiag.” Cov lus ntawd tob kiag rau hauv kuv lub siab, ces kuv txawm thov txog Vajtswv kam rau xyoo tag nrho kom Nws pab kuv nrhiav kom tau ib tug poj niam zoo. Thiab Nws yeej los teb kuv cov lus thov ntawd zoo kawg nkaus tiag.

Ua niam tsev txiv tsev, peb qhia tau peb cov me nyuam kom thov Vajtswv txog tej yam uas muaj feem tiag tiag mus ib txhis li—thov Vajtswv kom muaj zog coj kev cai dawb huv, mloog lus, thiab muaj lub siab loj txaus tiv thaiv qhov yog.

Tej zaum peb cov tub hluas ntxhais hluas thov Vajtswv ua ntej yuav pw, tiam sis tej zaum lawv feem coob tsis tshua thov Vajtswv thaum yav sawv ntxov. Ua niam tsev txiv tsev, ua lawv cov xib hwb qhia txoj moo zoo, peb kho tau qhov no. Tus niam txiv twg hauv lub caij Phau Ntawv Maumoos yuav cia lawv cov tub mus ntaus rog es tsis muaj ib daim thaiv lub hauv siab thiab ib daim thaiv ntaj riam thiab ib rab ntaj kom thiaj tiv thaiv lawv tus kheej ntawm tus yeeb ncuab? Tiam sis peb puas cia peb cov me nyuam tawm peb lub qhov rooj txhua yav sawv ntxov mus ntsib Ntxwg Nyoog thiab nws cov kev haub kev ntxias es tsis muaj tej khoom ntaus rog ntawm sab ntsuj plig uas lawv txais tau los ntawm kev thov Vajtswv pab tiv thaiv lawv? Tus Tswv hais tias, “Thov Vajtswv txhua lub sij hawm, … kom nej thiaj kov yeej tau Ntxwg Nyoog” (D&C 10:5). Ua niam tsev txiv tsev peb pab peb cov me nyuam xyaum thov Vajtswv thaum yav sawv ntxov.

Peb kuj qhia tau peb cov me nyuam kom tsis txhob nkim sij hawm. Qee zaum, ib yam li Sonya Carson, tej zaum peb yuav tsum ua tib zoo tswj peb cov me nyuam lub sij hawm saib TV los sis siv tej khoom fais fab xws li koos pis tawj uas feem ntau tswj kav lawv lub neej. Tej zaum peb yuav tsum coj lawv los mus siv sij hawm kawm ntxiv txog txoj moo zoo los yog ua lwm yam zoo. Tej zaum thaum xub thawj lawv yuav tsis kam, yuav yws yws, tiam sis ib yam li Sonya Carson, peb yuav tsum pom tau qhov tom ntej thiab tuag siab ua raws li peb hais tseg ntawd. Muaj ib hnub twg peb cov me nyuam yuav to taub thiab ris peb txiaj rau qhov uas peb tau ua. Yog tias peb tsis ua li no, leej twg yuav ua?

Tej zaum peb yuav tsum nug peb tus kheej: peb cov me nyuam puas txais tej yam zoo tshaj ntawm peb rau ntawm sab ntsuj plig, sab kev txawj ntse, thiab sab kev xeem pheev xeem tawm, los yog lawv puas txais qhov seem tshuav ntawm peb lub dag zog thiab tej txuj ci, tom qab uas peb tau muab tag nrho rau peb txoj hauj lwm hauv lub Koom Txoos los sis txoj hauj lwm niaj hnub? Hauv lub neej tom ntej, kuv tsis paub xyov puas yuav muaj lub npe npisov los yog Koom Haum Niam Tsev tus thawj tswj hwm, tiam sis kuv paub tias yuav muaj niam muaj txiv, thiab peb tseem yuav hawm ob lub npe ntawd mus ib txhiab ib txhis li. Yog vim li ntawd thiaj tseem ceeb kom lav ris peb tej hauj lwm ua niam tsev txiv tsev hauv lub ntiaj teb no kom thiaj npaj rau tej hauj lwm uas yuav muaj hauv lub neej tom ntej.

Ua niam tsev txiv tsev, peb tso siab tau hais tias Vajtswv yeej yuav tsis tso peb tseg. Vajtswv yeej tsis muab ib txoj hauj lwm dab tsi rau peb es tsis cev tes los pab peb—kuv ua tim khawv tias qhov ntawd muaj tseeb. Thov kom peb ua peb lub luag hauj lwm zoo ua niam tsev txiv tsev thiab ua ke nrog Vajtswv rais los mus ua thawj cov xib hwb qhia txoj moo zoo rau peb cov me nyuam. Kuv thov li no los ntawm Yexus Khetos lub npe zoo, amees.