2010–2019
Ro Jinen im Jemān: Rūkaki in Ko̧jpeļ ro M̧oktata an Ajri ro Nejier
Oktoba 2014


Ro Jinen im Jemān: Rūkaki in Ko̧jpeļ ro M̧oktata an Ajri ro Nejier

N̄e men otemjeļo̧k kar dedeļo̧k, m̧weo̧ ej jikin katak gospel eo an Jisōs Kraist.

Ben Carson eaar ba kōn e make, “Ikar rijikuuļ eo ejaje tata ilo aolepān kūlaj ļalem eo aō.” Juon raan Ben eaar bōk juon teej in bōnōn eo ewōr 30 un ko ie. Rijikuuļ eo itulikin ekar kajim̧we im bar koorolļo̧k. Rikaki eo, Mrs. Williamson, eaar jino kūr etan kajjojo rijikuuļ n̄an jiko̧o̧r. Āliktata, eaar tōpar tok Ben. Kōn an jook, eaar dik ainikien. Mrs.Williamson, kar ļōmņak eaar ba “9,” kwaļo̧k bwe ñan Ben bwe en jikoor 9 jān 30 kar juon wōnm̧aanļo̧k em̧m̧an. Rijikuuļ eo itulikin Ben eaar lam̧ōj, “Ejjab ruatimjuon! … Ejjeļo̧k an jabdewōt … jim̧we.” Ben eaar ba eaar kōņaan ibiruukļo̧k ñan laļ.

Ejja ilo iien eo wōt, jinen Ben, Sonya, ejujelm̧ae kapan̄pan̄ ko an make. Liin eaar juon iaan ajri 24, jeļāļo̧kjeņ eo an eaar bōjrak ilo kilaaj jilu, im kar jab maron̄ riit. Eaar m̧are ke ej jon̄ouljilu an iiō, ekar jepel, ewōr ruo nejin ļaddik, im eaar lale er ijo enana im pen mour ie ilo Detroit. Bōtab, ekar jeļā lale er make iaan im wōr an tōmak ilo Anij bwe enaaj jipan̄ e im ļaddik ro nejin eļan̄ñe renaaj kōm̧m̧ane ijo koņaer.

Juon raan oktak eo eaar itok n̄an mour eo an im ļaddik ro nejin. Eaar ālikkar ñane bwe armej eo ewejepedik me eaar karreoik m̧ōko eaar wōr an ļaiprāre ko—raar riit. Ālkin an jerbal ej ro̧o̧l ñan m̧weo im kune taļpejen eo ke Ben im ļaddik eo jatinrej alooj. Ear ba: Eļap amiro alooj. Jān kiō m̧aanļo̧k kom̧ro maroñ alooj jilu būrookraam̧ ilo juon wiik. Eļañn̄e ewōr ami iien kom̧ro maroñ etal ñan ļaiprāre eo—riiti ruo bok juon wiik im letok n̄an n̄a juon riboot.

Ļaddik ro raar bwilōñ. Ben eaar ba ejjañin kar riiti juon bok ilo aolepān mour eo an ijello̧kiin wōt ñe ej menin aikuj ilo jikuuļ. Raar ba rejjab kōņaan, raar ellootaan, raar akwel, ak ekar jab ukōt lōmņak eo an jineer. Innām Ben eaar ļōmņak, “Liin eaar kwaļo̧k kakien eo. Ijjab kōņaan ruuļ eo, bōtaab kijejeto eo an n̄an lo kōm n̄an em̧m̧anļo̧k eaar ukōt iaļ eo an mour eo aō.”

Im eaar juon oktak em̧m̧an. Ke ej kūlaj jiljilimjuon eaar ilōn̄ tata in kūlaj eo an. Eaar etal wōt ñan pād ilo Yale University kōn jāān in jikuuļ, innām Johns Hopkins medical school eo, ijo ke ej 33 iiō dettan ekar erom juon chief in pediatric neurosurgery im rim̧wijm̧wij ebun̄bun̄ ilo laļ in. Ewi wāween bwe en kar tōprak? Eļaptata kōnke kōn juon jinen eo me, ejjeļo̧k men ko rem̧m̧an an ilo mour, kar kōļapļo̧k kūr eo an āinwōt juon jinen ak jemen, eaar kōlapļo̧k kūr eo an āinwōt juon jinen1

Jeje ko rekwojarjar rej kōnono kōn eddo ko an ro jinen im jemen—bwe aer eddo ñan katakin ajri ro nejier katak eo an ukweļo̧k, tōmak ilo Kraist eo Nejin Anij eo emour, im kōn peptaij im menin letok eo an Jetōb Kwojarjar (lale D&C 68:25).

Āinwōt ro jinen im jemen, kōj eo jej aikuj rūkaki ro an gospel im waanjoñak ko ñan ajri ro nejid—ejjab bisop, Jabōt Jikuuļ eo, Doulul eo an Jiroñ ro ak Doulul eo an Likao ro, bōtaab ro jineer im jemeer. Āinwōt rūkaki ro aer m̧oktata ilo ko̧jpeļ eo, jemaroñ katakin er kōn kajoor eo im m̧ool eo an Pinmuur eo—kōn pikitokier im mejān kajjitōk eo ekwojarjar aer—im ilo ad kōm̧m̧ane jej ejake er ioon pedped eo epen eo me ej ekkal ioon. N̄e men otemjeļo̧k rej dedeļo̧k, m̧weo ej jikin katakin eo em̧m̧an tata an ko̧jpeļ eo an Jisōs Kraist.

Enan̄in juon iiō emootļo̧k ikar etal ilo juon ijjitōn̄ ilo Beirut, Lebanon. Ke ij pād ijōņ, iaar katak kōn juon leddik 12 iiō-dettan, Sarah. Ro jinen im jemen im ruo jein raar oktaktok ñan Kabuñ in ilo Romania bōtaab kar menin aikuj n̄an ro̧o̧l ñan kapijuknen eo aer ke Sarah eaar 7 iiō dettan. Ilo kapijuknen eo aer eaar ejjeļo̧k Kabun̄ in ie, ejjeļo̧k im̧ōn jar ko raar jutak, ejjeļo̧k Jabōt Jikuuļ ak būroorkaam̧ ko an Doulul eo an Jiron̄ ro. Ālkin ļalem iiō ko baam̧le in ekar roñ kōn juon branch ilo Beirut im, m̧oktak wōt jān aō tōkeākļo̧k, raar jilkinļo̧k leddik eo nejier 12 iiō dettan, Sarah, etal ippānļo̧k ro jein, bwe ren kar peptaij. Ke rej pād ijo, iaar kōm̧m̧an juon nokon ikkijen karōk in lo̧mo̧o̧r. Ekar ikutkut an Sarah kotak pein im uwaak kajjitōk ko.

Ālkin kweilo̧k eo, im ke ij jelā ke enañin ejjeļo̧k ñan jidik an jelā kōn Kabuñ in, iaar jibadōkļo̧k im kajjiōk, “Sarah, ewi wāween am̧ jeļā uwaak ko n̄an kajjitōk ko?” Ekar m̧ōkaj an uwaak, “Jino ekar katakin eō.” Eaar ejjeļo̧k Kabun̄ in ilo jukjukinpād eo aer, Bōtaab eaar wōr ko̧jpeļ eo ilo m̧weo im̧wer. Jinen eaar rūkaki in gospel eo m̧oktata an.

Eaar Enos eo eaar ba, “Im naan ko ekkutkut aō kar roñ an jema konono kōn mour indeeo, im kōn lañlōñ an ro doon, raar deloñ ilo mwilal in buruō” (Enos 1:3) Ejjeļo̧k kajjitōk wōn eo kar an Enos rūkaki in ko̧jpeļ eo m̧oktata.

Ij kememej an jema kar Kankan ilo turin jikin kijeek eo, riiti jeje ko rekwojarjar im bar bok ko jet rem̧m̧an, im ibar kijon̄ kankan iturin. Ij kememej kaat ko ekōn doori ilo bōjo̧ in jōōt eo an ippān kout ko jān jeje ko rekwojarjar im Shakespeare im naan ko rekāāl me ekōn kakilōklōki im katak. Ij kememej kajjitōk ko kōn gospel eo im ekōnono ko ilo tebōļ in ko̧jota eo. Ij kememej iien ko rellōñ baba ej eñin eō ļo̧k ñan loļo̧k rūtto ro—am bōjrak im kabbok ice cream kijen juon ak bao ñan kōjota ñan bar juon armej im an idik pein armej im leļo̧k jāān bwe ejjeļā rej aikuj. Ij kememej eñjake eo em̧m̧an im kōņaan āinwōt e.

Ij kememej jino, 90 iiō dettan ak rūttoļo̧k, kōmat ilo jikin kōmat eo an ilo m̧weo im̧ōn innām diwōjļo̧k kōn tōre in m̧ōn̄ā. Iaar kajjitōk eaar etal ñan ia. Uwaak eo an, “Oh, ij naajidikļo̧k jet rūtto. Iaar make ļōmņak ippa make, “jinō, kwe leļļap.” Ijjab maroñ kwaļo̧k joñan kam̧m̧oolol eo ñan jinō im jema, ro rekar rikaki ro raar rikaki in gospel eo aō m̧oktata.

Juon iaan men ko eļaptata meļeļeier jemaroñ kōm̧m̧ane āinwōt jinen im jemen ajri ej katakin ajri ro nejid kajoor in jar, ejjab baj wāween aer jar iien otemjej. Ke eaar 17 iiō detta, ikar pukelōlō iturin jikin kiki eo aō im kōm̧m̧an jar in jota ko aō. Ilo aō jab jeļā, jinō eaar jutak mejān kōjam eo. Ke ej mōj aō jar, eaar ba, “Tad, kwoj kajjitōk ippān Irooj n̄an jipan̄ eo pukōt pāleem̧ kōrā em̧m̧an ke?”

Kajjitōk eo an elukkuun kabwilōñ eō. Ak elukkuun ettoļo̧k menin jān ļōmnak e aō. Iaar ļōmnak wōt kōn basketball im jikuuļ. Im kōn menin, iaar uwaak, “Jaab,” im eaar ba tok, “Ekwe, kwōj aikuj; enaaj kālet eo eaorōk tata kwonaaj kōm̧m̧ane.” Naan ko raar dāil ijo em̧wilaļ lo būruwō, im kōn menin ium̧win iiō ko jiljino, iaar jab bwe Anij en kar jipan̄ eō pukōt juon pālele em̧m̧an. Im, o, ekōjkan An kar uwaake kajjitōk eo.

Āinwōt ro jinen im jemen, jemaroñ katakin ajri nejid n̄an jar kōn men ko raorōk an indeeo—ñan jar kōn kajoor bwe ren erreo ilo juon laļ eo ekanooj pen, ñan pokake, bwe en wōr aer ellowetak ñan jutak ilo men ko rejim̧we.

Ejjeļo̧k pere bwe enañin aolep rūm̧m̧an ded ro ad rej jar in jota, ak bōlen elōn̄ iaer rej kakkōt kōn iminene eo an jar in jibbon̄ an juon make. Āinwōt ro jinen im jemen, āinwōt rikakiin gospel ro aer m̧oktata, jemaron̄ kajim̧we menin. Ewi wōt jinen im jemen ilo tōre in Bok in Mormon eo naaj kar kōtļo̧k ļaddik ro nejier ren im̧aajaj ļo̧k n̄an im̧aan tariņae kōn ejjeļo̧k pinjen ob im kein kattōrak im jāje n̄an kōjparok er ņae rijumae ro naaj kar kakkure er. Ak jete iaad jej kōtļo̧k an ro nejid diwōjļo̧k jān kōjām ko ilo jibbon̄ ñan jikin tarinae ko rōkauwōtata tata, n̄an jelm̧ae Satan im kabo ko an reļļap, ilo an ejjeļo̧k aer benjen ob im kein kattōrak im jeje ko rej itok jen kōjbarok eo ilo kajoor in jar? Irooj ej ba, Jar iien otemjej, … bwe komin maroñ bobrae Satan (lale D&C 10:5). Āinwōt ro jinen im jemen jemaroñ dābij wōt ippān ajri ro nejid iminene eo im kajoor eo an jar in jibbon̄.

Jemaroñ barāinwōt katakin ajri ro n̄an kōjerbal iien eo aer ilo jejjet. Juon iien, āinwōt Sonya Carson, jenaaj aikuj kwaļo̧k ad iakwe ilo ad kapen kien ko ñan ajri ro ikkijen alwōj pija im kōjerbal men ko jet rej kōjerbal jarom im m̧ad kaki im kakkure aer iien kaki. Ijjelo̧kin jemaron̄ kōjbwebweik iien eo aer n̄an kijeje tok ko eļapļo̧k tokjāer an ko̧jpeļ eo. Ilo jino in remaroñ jum̧ae, jidik ellootan, ak āinwōt Sonya Carson, jej ej aikuj wōr ad visiōn im kōņaan eo n̄an dāpdep wōt ie. Juon raan ajri ro nejid renaaj meļeļe im m̧ōnōnō bwe jaar kōm̧m̧ane. Eļañn̄e jejab kōm̧m̧ane menin, wōn enaaj?

Jej maron̄ aolep kajjitōk ippād make, ajri ro nejid raar ke bōk jetōb, jeļāļokjeņ, im loļo̧kjeņ eo ad em̧m̧antata jaar kate kōj kake, ak raar ke bōk m̧ōttan iien im kapeeļ ko ad, ālkin ad kōmaat ad maron̄ ilo kūr ko ad ilo Kabun̄ im jibadbad ko ad jet? Ilo mour eo ej itok, ijaje eļan̄n̄e taitōļ in bisop im būreejtōn eo an Doulul eo an Kōrā renaaj pād, ak ijjeļā bwe taitōļ in ļeo pālele im lio pālele, jemen im jinen, renaaj wōnm̧aanļo̧k wōt im pād, laļ eo ejjeļo̧k jem̧ļo̧kin. Eñin juon un eo eaorōk ñan kautiej eddo ko ad āinwōt ro jinen im jemen ijin ioon laļ in bwe jān pojak ñan men ko reļļapļo̧k, ak āinwōt, eddo ko ilo mour eo ej itok.

Āinwōt ro jinen im jemen, jemaroñ wōnm̧aanļo̧k ilo kōjatdikdik bwe Anij eban kōmakeikļo̧k kōj. Anij eban letok ad eddo eļan̄ñe ejjeļo̧k jipañ ko rekwojarjar—jān menin imaron̄ kam̧ool. Kōm̧m̧an bwe jān ilo jerbal eo ad ekwojarjra āinwōt ro jinen im jemen, im ilo m̧ōttā ippān Anij, erom rūkaki in ko̧jpeļ eo im̧aantata im waanjon̄ak ko n̄an ajri ro nejid, āindein ij jar ilo etan Jisōs Kraist, amen.

Kakeememej ko

  1. Lale Ben Carson, Gifted Hands: The Ben Carson Story (1990).