Mo Lewa Deivaki na iLakolako ni Yavamu

Kemuni na taciqu kei na ganequ, au yalo vakacegu niu tucake e matamuni ena mataka nikua. Au kerea na nomuni vakabauta, kei na masu me baleti au ena noqu wasea tiko vei kemuni na noqu itukutuku.

Oi keda kece eda a tekivutaka e dua na ilakolako yaga sara ena noda a biuta mai na vuravura ni yalo ka curuma mai na buturara ni veibolei ka vakatokai na bula vakayago. Na inaki ni noda mai bula e vuravura sa ikoya meda mai taukena e dua na yago e vakalewe ka vakasui me da mai sotava na veika ena rawa walega, ni da sa mai bula vakatikitiki tani mai vua na noda itubutubu, ka na laurai talega se na rawa ni da na talairawarawa kina ivunau. Ena ivola i Eparaama, wase 3, eda na wilika kina: “Io, meda vakatovolei ira mada kina, era na muria na veika sa vakarota vei ira na Turaga na nodra Kalou se sega.”¹

Ni da sa lako mai ki vuravura, eda sa kauta vata mai kei keda na veivakalougatataki levu mai vua na Kalou—me vakatalega na noda galala ni digidigi. E udolu vakaudolu na veika eda rawa ni digitaka ga vakai keda. Eke eda sa na vuli mai vua na qasenivuli dredre se na veika sa sotavi oti. Eda raica matata na vinaka mai na ca. Eda vakaduiduitaka na kamikamica mai na wiwi. Eda vulica mai kina ni vakatulewa ena vakadeitaka na icavacava.

Au vakadeitaka ni o keda kece eda a biubiu mai vei Tamada ka gadreva sara vakalevu meda na lesu tale Vua ka rawata na bula vakalou e a vakatututaka mai o Koya ka da sa gagadre sara kina vakalevu o keda. Dina ga ni da sa na tu ka vaqara na sala ka na kauti keda lesu Vua na Tamada Vakalomalagi e a sega ni vakatalai keda mai ki ke ka sega ni tukuna vei keda na kena sala ni lesu tale Vua. Ia, sa solia ga o Koya vei keda na iyaya ni cakacaka ka da na gadreva me na vukei keda o Koya kevaka meda sasagataka meda na rawa ni gadreva meda vosota me yacova na ivakataotioti ka rawata na bula tawamudu.

Na veika me vukei keda sa tu ena vosa ni Kalou kei na Luvena ka da rawa ni raica ena ivolanikalou. E tiko vei keda na nodra vosa kei na veivakasalataki na parofita ni Kalou. Na ka e bibi duadua ni sa soli mai vei keda na ivakaraitaki vinaka duadua meda vakamuria—na ivakaraitaki ni Turaga ka iVakabula sa i Jisu Karisito—ka da sa vakasalataki meda muria na ivakasala o ya. Tukuna vakaoqo na iVakabula: “Dou Lako Mai ka Muri Au.”² “Na cakacaka o dou sa raica niu sa cakava, mo dou na cakava vakakina.”³ sa qai taroga na taro, “A cava na ivalavala sa kilikili kaya kei kemudou?” Sa qai sauma lesu kaya, “Au sa kaya vakaidina vei kemudou, mo dou vakataki au.”⁴ “O Koya e liutaka na ilakolako.”⁵

Ni da sa rai vei Jisu me noda iVakaraitaki ka vakamuria na mawe ni yavana sa na rawa ni da na lesu tale vua na Tamada Vakalomalagi ka laki bula vata kei Koya me tawamudu. Kaya na parofita o Nifai, “Kevaka ena sega ni vosota na tamata me muria na nona ivunau na Luve ni Kalou Bula ena sega ni vakabulai.”⁶

Dua na yalewa, ena veigauna me vakananuma lesu kina na veika e a sotava ena nona gadi tu kina Vanua Tabu e dau qoroya ni kaya, “Au a taubale ena vanua e a taubale kina o Jisu!”

E a tu voli mai na vanua e a bula kina o Jisu ka veivakavulici kina. De a butuka tu na vatu ka a butuka talega o Koya se a raica na ulunivanua a dau dagava cake talega o Koya. Na veika sara ga e a sotava o koya e a vakamalekata sara ga, ia ni a taubale ena vanua e taubale kina o Jisu e sega soti ni bibi me tautauvata kei na vakamuria na Nona ilakolako. Ni vakamuri na Nona ivakarau kei na talairawarawa kina nona ivakaro e bibi cake sara mai na kena lai vakaraici na vanua e a vakamuria voli ena nona gauna ni bula vakayago.

Ena nona a sureta e dua na cauravou vutuniyau o Jisu, “Lako mai mo muri au,”⁷ e sega ni kena ibalebale me lako mai ka mai muri koya voli ena nona cabeta ka sirova na veidelana kei na qakilo ni vanua.

E sega ni gadrevi meda laki taubale ena baravi mai Kalili se na veidelana mai Jutia me da laki muri Jisu kina. O keda kece ena rawa ni da lakova na vanua e lakova, ni watatagi tu e daligada na vosa o ya, ka vakasinaita na yaloda na Yalona, ka liutaki keda yani na Nona veivakavulici, eda sa digitaka me da muri Koya ena bula oqo. Sa vakararamataka na noda sala na Nona ivakaraitaki. E a kaya, “Oi au na sala, na dina, kei na bula.”⁸

Ni da vakadikeva na sala e muria o Jisu ni taubale, eda na raica ni a lako curuma e levu sara na bolebole eda sa sotava sara tikoga ena bula oqo.

Kena ivakaraitaki, o Jisu e a lakova na sala ni lomaleqa. E dina ga ni a sotava e levu na lomaleqa, e dua vei ira na Nona a lomaleqataki Jerusalemi ni sa mai cava na Nona veiqaravi. Era sa cata na luvei Isireli na liga ni veitaqomaki ka a dodoka yani. Ena Nona a rai yani ka raica na koro levu ka sa vakarau vakarusai, e a luvuci na yalona ena rarawa levu. Sa qai tagiyaso ka vaka, “Isa Jerusalemi, isa Jerusalemi, ko iko ko a vakamatei ira na parofita, ka vakaviriki ira ena vatu, era sa talai yani vei iko e vuqa na siga kau via vakasoqoni ira vata na luvemu me vaka sa vakasoqona na luvena na toa yalewa e ruku ni tabana ia dou sa sega ni vinakata!”⁹

E a lakova na sala ni veitemaki o Jisu. O Lusefa, na dauniveitemaki ena nona kaukauwa taucoko, na kena ka tiko duadua e cake, ni mai temaki Koya ena nona a lolo siga 40 ka bogi 40. E a sega ni rawai kina o Jisu ia e a valuta na veitemaki. Ka qai kaya vakaoqo: “Lako tani ki dakuqu Setani.”¹⁰

E a lakova o Jisu na sala ni mosi. Vakasamataki Kecisemani, na vanua e sotava kina o Koya “na yaluma … ia na Nona buno sa vaka na titiri ni dra ni sa lutu kina qele.”¹¹ ka sega ni dua ena guilecava na rarawa e sotava ena kauveilatai.

O keda kece eda na lakova na sala ni lomaleqa, baleta beka e dua na madigi e a sa mai yali, dua na kaukauwa e a vakayagataki cala, nona digidigi e dua na noda daulomani, se dua beka noda digidigi o keda. Na sala ni veitemaki ena noda sala kece o keda. Eda wilika ena Vunau kei na Veiyalayalati wase 29: “Sa kilikili sara me temaki ira na luve ni tamata na tevoro mera lewa kina na ka mera kitaka.”¹²

Vakatalega na kena lakovi na sala ni mosi. O keda ni da italai, e dodonu meda namaka na veika e a sotava na iVakavuvuli, ka a biuta na bula oqo ni sa lako curuma oti na mosi kei na rarawa.

Me vaka ni da sotava na rarawa ena noda sala, ia eda na sotava talega na marau.

Eda, na rawa ni lakova na sala ni talairawarawa kei Jisu. Ena sega beka ni na rawarawa, ia ena vakarawarawataka na vosa e kune ena ivola i Samuela: “Raica sa vinaka na talairawarawa ka ca na isoro sa vinaka na vakarorogo ka ca na uro ni sipi tagane.”¹³ Meda nanuma tiko ni itinitini ni talaidredre na tiko vakavesu kei na mate, ka isau ni talairawarawa na bula galala kei na bula tawamudu.

O keda, me vakataki Jisu, e rawa ni da lakova na sala ni veiqaravi. Ni dua na ivakaraitaki totoka sara ni bula nei Jisu, e a veivakabulai vei ira na tamata kecega. E kauta mai na kaukauwa kina isema ni yago ni tamata lokiloki, me rai na tamata mataboko, ka tadola na daligadra na didivara.

E a lakova o Jisu na sala ni masumasu. E a vakavulici keda ena masu ena nona a cabora na masu totoka ka da sa kila tu nikua me masu ni Turaga. Vaka kina na kena na sega ni guilecavi na masu mai Kecisemani: “Me kakua ni yaco na lomaqu, ia, me yaco ga na nomuni lewa”?¹⁴

E so tale na idusidusi e solia vei keda na iVakabula sa tiko sara ga e ligada ka rawa ni laurai ena ivolanikalou. Ena Nona iVunau mai na Ulunivanua, e a kaya vei keda meda dau loloma, meda yalomalua, meda yalododonu, meda yalosavasava, meda dautataro. E vakavulici keda meda na taqomaka na noda vakabauta kevaka sara ga eda vakalewai ka vakacacani. E kerei keda meda vakacilava na noda rarama me rawa ni ra raica na tamata ka vakalagilagia kina na Tamada mai Lomalagi. E vakavulici keda meda bula savasava ena noda vakasama kei na veimaliwai. E kaya ni bibi cake meda vakaiyau mai lomalagi ka sega e vuravura.¹⁵

E veivakavulici na nona vosa vakatautauvata ena kaukuawa kei na dodonu. Ena italanoa ni kai Samaria dauloloma e a vakavulica kina meda lomani ira na wekada ka qaravi ira.¹⁶ Ena Nona vosa vakatautauvata ni taledi, e vakavulici keda meda vakatorocake taki keda ka sasaga me da vinaka sara.¹⁷ Na vosa vakatautauvata ni sipi sa yali e vakavulici keda meda lako yani ka veivueti vei ira era sa mai biuta na sala ka ra sa mai yali ena ilakolako.¹⁸

Ni da sasaga me da biuti Karisito me iusutu ni noda bula ena noda vulica na nona vosa ka muria na Nona ivakavuvuli, ka lakova na nona sala, sa yalataka oti tu o Koya ni na noda na bula tawamudu ka a mate kina me rawa ni rawati. E sega tale ni dua na vanua e cecere cake me vaka oqo, meda na digitaka meda sa na vakamuria na lomana ka meda sa Nona tisaipeli ka cakava na Nona cakacaka ena noda bula taucoko. Ena sega tale ni dua, sega ni dua na ka meda na digitaka me na vakavuna vei keda meda na veiucui vata kei Koya.

Niu dauvakananumi ira era sasagataka mera vakamuria na ivakaraitaki ni iVakabula, ka ra muria na Nona sala e basika ena noqu vakasama o Gustav kei Margarete Wacker—e rua erau sa saga sara ga me rau bula va-Karisito. Erau kai Jamani ka rau sa mai lewenivanua tu e Kenada, kau a sotavi rau ena noqu a peresitedi tu ni kaulotu mai ke ya. Baraca Wacker e cakacaka vaka dauveikoti. Dina ga ni lailai sara na veika erau taukena, ia, erau dau yalo solisoli sara vakalevu. Sega tu na luvedrau, ia erau dau vakamareqeti ira kece ga era curuma yani na nodrau vale. O ira kece na tagane kei na yalewa vuli vinaka sara era dau saga mera veitaratara kei rau na veiwatini dau qarava vakadodonu na Kalou oqo me rawa mada ga ni ra veiwasei me rauta e dua na aua.

Sega ni dua na ka me rau kilai tani kina, sega ni matata na nodrau vosa vakavalagi ka rawarawa tu ga na nodrau loma ni vale. Sega ni rau vakamotoka, se vaka retioyaloyalo, se me rau cakava e dua na ka mena kilai tani kina nodrau bula. Ia era sinai ga yani ena nodrau vale na tamata vakabauta mera laki tovolea mera sotava na yalo e tiko ena nodrau loma ni vale. E vakataki lomalagi tu e vuravura na nodrau itikotiko ka rau sa ivakaraitaki sara ga ni yalo vakacegu kei na yalovinaka.

O keda talega e rawa ni da wasea na yalo vaka oya ka rawa sara ga ni da wasea yani ki vuravura, ni da sa taubaletaka na sala ni iVakabula ka muria na Nona ivakaraitaki vinaka.

Eda wilika mai na Vosa Vakaibalebale na ivakasala, “Mo lewa deivaki na ilakolako ni yavamu.”¹⁹ Ni da sa cakava, ena tiko vei keda na vakabauta, na gagadre, meda na lakova na sala e a muria o Jisu. Ena sega tale na lomaloma rua ni da sa na kila nida sa lakova tiko na sala ena gadreva na Tamada meda na lakova. Na ivakaraitaki ni iVakabula e vakarautaka na veika sara ga eda sa cakava tiko nikua ka na uqeti keda tiko na Nona vosa. Na Nona sala ena kauti keda lesu tale ki Vua. Me na noda na veivakalougatataki oqo, sa noqu masu ena yaca iJisu Karisito kau sa lomana, ka qaravi koya, kau vakadinadinataka, emeni.