2010–2019
Sim Xav Seb Nej Taug Txoj Kev Twg
October 2014


Sim Xav Seb Nej Taug Txoj Kev Twg

Thaum peb tso Yexus ua peb tus Yam Ntxwv thiab peb raws Nws cov hneev taw qab, peb yuav muaj kev nyab xeeb thaum rov qab mus nrog peb Leej Txiv Saum Ntuj Ceeb Tsheej nyob.

Kuv cov kwv tij thiab cov muam, kuv txo hwj chim los sawv ntawm nej tag kis no. Kuv thov kom tau nej txoj kev ntseeg thiab kev thov Vajtswv pab kuv thaum kuv hais kuv zaj lus qhia no.

Peb sawv daws tau pib ib txoj kev taug kev zoo kawg nkaus thaum peb ncaim ntawm lub ntuj ntsuj plig thiab los rau hauv qhov chaw nyuaj nyuaj no uas peb hu kev ua neej nyob. Lub ntsiab tseem ceeb tshaj plaws hauv ntiaj teb no yog kom txais ib lub cev nqaij daim tawv, kawm ua ub ua no uas peb tsuas kawm tau thaum peb ncaim ntawm peb niam txiv saum ntuj ceeb tsheej, thiab kawm seb peb puas yuav ceev cov lus txib. Nyob hauv phau Anplaham, tshooj peb 3 peb nyeem hais tias: “Thiab peb yuav sim lawv seb, lawv puas kam ua txhua yam uas tus Tswv lawv tus Vajtswv txib lawv ua.”1

Thaum peb los nyob hauv ntiaj teb no, peb coj ib qho txiaj ntsim zoo uas los ntawm Vajtswv los—twb yog peb txoj kev ywj siab xaiv. Peb muaj ntau txoj koob hmoov vim peb muaj cai xaiv seb peb xav tau dab tsi. Nyob no peb kawm los ntawm tej yam uas peb ua yuam kev. Peb paub tau qhov zoo thiab qhov phem sib txawv li cas. Peb paub saj yam iab thiab yam qab. Peb kawm tias tej yam uas peb xaiv yuav hloov peb lub neej tom ntej.

Kuv paub tseeb hais tias peb tau ncaim peb Leej Txiv es tseem muaj lub siab xav rov qab los nrog Nws nyob dua, xwv kom peb yuav tau txoj kev tsa nto uas Nws tau npaj tseg rau peb thiab yog qhov uas peb xav tau thiab. Tab txawm peb raug tseg cia kom yuav tsum nrhiav thiab taug txoj hau kev uas yuav coj peb rov qab mus cuag peb Leej Txiv Saum Ntuj Ceeb Tsheej, Nws tsis tau xa peb los nyob peb ib leeg tsis muaj kev coj qhia thiab kev coj kav. Tab sis mas, Nws tau muab tej cuab yeej rau peb uas peb yuav xav tau, thiab Nws yuav los pab thaum peb nrhiav Nws txoj kev pab thiab sim ua txhua yam tsav uas peb muaj cuab kav ua kom nyiaj mus txog thaum hnub kawg thiab txais txoj sia nyob mus ib txhis.

Kom pab coj peb kev peb muaj Vajtswv thiab Nws tus Tub txoj lus uas nrhiav tau hauv peb cov vaj lug kub dawb ceev. Peb muaj Vajtswv cov yaj saub tej lus qhuab ntuas thiab lus qhia. Ib qho tseem ceeb heev, yog qhov uas peb muaj ib tug yam ntxwv zoo tag nrho uas peb yoog tau—uas yog peb tus Tswv thiab tus Cawm Seej, Yexus Khetos tus yam ntxwv—thiab peb twb txais lus qhuab qhia kom ua raws nraim li tus yam ntxwv ntawd. Tus Cawm Seej Kiag tau hais tias: “Los nrog kuv mus.”2 “Rau tej hauj lwm uas nej tau pom kuv ua tej ntawd nej kuj yuav tsum ua thiab.”3 Nws nug hais tias, “ nej yuav tsum ua neeg zoo li cas?” Ces Nws teb hais tias, “Kuv hais tseeb rau nej tias, zoo tib yam li kuv.”4 “Nws tau qhia txoj kev thiab tau coj peb kev.”5

Thaum peb tso Yexus ua peb tus Yam Ntxwv thiab peb raws Nws cov hneev taw qab, peb yuav muaj kev nyab xeeb thaum rov qab mus nrog peb Leej Txiv Saum Ntuj Ceeb Tsheej nyob ua ke tas mus li. Tus yaj saub Nifais hais tias, “Tsuas yog ib tug neeg yuav tsum ntseeg kom mus txog thaum kawg, ua raws li Vajtswv tus uas tseem muaj txoj sia nyob Leej Tub tus yam ntxwv xwb, nws yuav tsis raug cawm dim.”6

Ib tug poj niam, txhua zaus nws piav dab neeg txog thaum nws mus xyuas Thaj Av Dawb Huv, yuav qw hais tias, “Kuv tau taug tej kev uas Yexus twb taug lawm!”

Nws tau nyob ze qhov chaw uas Yexus nyob thiab qhuab qhia neeg. Tej zaum nws tau sawv ntawm ib lub pob zeb uas Nws tau sawv saum puag thaum ub los sis ntsia ib lub roob uas Nws twb ntsia dua thiab. Tej zaj ntawd, yeej zoo, es ua rau nws zoo siab heev; tiam sis txoj kev taug kev hauv tej chaw uas Yexus tau taug kev dua tsis tseem ceeb npaum li txoj kev taug kev ib yam li Nws taug kev. Txoj kev yoog Nws tus yam ntxwv thiab ua raws li Nws qhia yeej tseem ceeb dua txoj kev sim taug tej kev uas Nws tau taug thaum Nws tseem ua neej nyob.

Thaum Yexus caw kom ib tug neeg nplua nuj yuav, “Los, nrog kuv mus,”7 Nws tsis yog caw kom tus neeg nplua nuj ntawd yuav raws Nws qab nce roob nqi hav hauv teb chaws xwb.

Peb tsis tas yuav taug tej kev tom ntug dej ze Kalilais los sis hauv tej roob ze Yeluxalees kom thiaj taug tau kev hauv qhov chaw uas Yexus tau taug. Peb sawv daws taug tau Nws txoj hau kev thaum, mloog Nws cov lus, muaj Nws tus ntsuj plig hauv peb siab, thiab Nws tej lus qhia coj peb kev, peb thiaj xaiv los raws Nws qab thaum peb taug kev hauv lub neej no. Nws tus yam ntxwv taw teeb rau peb pom kev. Nws hais tias, “Kuv yog txoj kev, qhov tseeb thiab yog txoj sia.”8

Thaum peb tshawb nrhiav txog tej kev uas Yexus tau taug, peb yuav pom hais tias Nws tau ntsib ntau yam teeb meem uas peb yeej yuav muaj hauv peb lub neej thiab.

Piv xam hais tias, Yexus taug kev muaj kev poob siab. Tab txawm Nws muaj ntau txoj kev poob siab los, ib qho kev poob siab loj heev uas Nws muaj yog thaum nws yws yws txog Yeluxalees thaum Nws tab tom yuav xaus Nws txoj kev qhuab qhia neeg. Haiv neeg Ixayees tau xyeej Nws pov tseg tab txawm nws tau ncav tes mus pab lawv. Thaum Nws ntsia lub nroog uas tab tom yuav raug puas tsuaj, Nws cia li muaj kev tu siab nrho. Thaum Nws nyuaj siab ntawd nws qw hais tias, “Yeluxalees, Yeluxalees! Koj muab cov uas cev Vajtswv lus tua pov tseg, koj muab pob zeb ntaus cov tub txib uas Vajtswv txib los qhia koj! Muaj ntau zaus kuv twb yuav muab koj cov pej xeem los puag, ib yam li tus poj qaib cuab nws cov me nyuam los puag rau hauv nws ob phab tis, tiam sis koj tsis cia kuv ua li ntawd!”9

Yexus tau taug kev raug tej kev haub ntxias. Luxifaws, tus dab phem, tau sib sib zog, siv tag nrho nws tej tswv yim, es tau ntxias nws tom qab Nws tau yoo mov 40 hnub thiab 40 hmo. Yexus tsis tau nyoos; tab sis mas, Nws tiv taus mus dhau txhua yam kev ntxias. Thaum ncaim mus Nws hais tias: “Dab Ntxwg Nyoog, koj cia li khiav ntawm kuv mus.”10

Yexus tau taug kev raug mob. Sim xav txog lub Vaj Khexemanes, nyob ntawd Nws tab tom “nyuaj siab kawg … nws tawm hws zoo li ntshav nrog rau hauv av.”11 Thiab tsis muaj leej twg uas hnov qab tau qhov uas Nws raug txom nyem npaud thaum lawv muab Nws ntsia saum tus ntoo khaub lig.

Peb txhua leej txhia tus yuav taug txoj kev muaj kev poob siab, tej zaum yog vim peb xiam ib lub cib fim lawm, siv ib lub hwj chim yuam kev, ib tug neeg uas peb hlub xaiv yuam kev, los sis ib yam uas peb xaiv ua los tau. Peb txhua tus kuj yuav taug txoj kev raug kev haub ntxias thiab. Peb nyeem hauv tshooj 29 hauv phau Lus Qhuab Qhia thiab Kev Khi Lus hais tias tus dab phem yuav ntxias noob neej sawv daws, los sis lawv yuav tsis muaj kev ywj siab xaiv rau lawv tus kheej.12

Ib yam li ntawd peb yuav taug txoj kev raug mob thiab. Peb, cov uas yog cov tub qhev, yuav tsum paub tias peb yuav raug ib yam li tus Xib Hwb, uas tau tawm ntawm lub neej no tom qab raug mob thiab kev txom nyem ntau kawg lawm.

Peb yuav pom hais tias txoj kev uas peb taug yeej muaj kev tu siab kawg, peb tseem nrhiav tau kev zoo siab heev thiab.

Peb, nrog Yexus, taug tau txoj kev mloog lus. Txhua zaus yeej yuav tsis yooj yim, tiam sis cia peb hais lus ib yam li Xamuyees tshaj tawm hais tias: “Saib seb, kev mloog tus Tswv lus zoo dua qhov uas muab tej yaj zoo nkauj tua fij rau nws.”13 Cia peb nco qab hais tias thaum kawg txoj kev tsis mloog lus yuav ua rau peb mag thiab tuag mus xwb, tab sis mas thaum mloog lus ces peb thiaj yuav tau kev ywj pheej thiab txoj sia nyob mus ib txhis.

Peb, zoo li Yexus, taug tau txoj kev ua hauj lwm pab lwm tus neeg. Yexus lub neej thaum Nws mus qhuab qhia tib neeg yeej zoo li ib lub teeb uas ci tau kev ua siab zoo. Nws ua rau cov neeg ceg tawv txhais ceg muaj zog, ua rau cov neeg dig muag pom kev, cov lag ntseg txawj hnov lus.

Yexus taug txoj kev thov Vajtswv. Nws qhia peb tias peb yuav thov Vajtswv li cas thaum nws muab zaj lus thov zoo nkauj heev uas peb hu ua tus Tswv zaj lus thov Vajtswv. Thiab sawv daws yeej nco txog Nws zaj lus thov Vajtswv hauv lub Vaj Khexemanes hais tias: “Tsis ua raws li kuv lub siab nyiam, ua raws li koj lub siab nyiam xwb.”14

Tus Cawm Seej lwm cov lus qhia yeej nyob rau ntawm peb txhais tes, yus nrhiav tau nyob hauv cov vaj lug kub dawb huv. Hauv nws cov Lus Qhia Pem Roob, Nws hais kom peb zam txim, txo hwj chim, ua ncaj ncees, ua siab dawb siab zoo, ua kom muaj kev thaj yeeb nyab xeeb. Nws qhia kom peb ua siab loj tiv thaiv peb tej kev ntseeg, tab txawm luag tej tsim txom thiab luag thuam peb los xij. Nws thov kom peb cia peb lub teeb ci rau lwm tus neeg pom kev thiab kom lawv yuav xav muab yeeb koob rau peb Leej Txiv Saum Ntuj Ceeb Tsheej. Nws qhia peb kom ua neeg dawb huv tsis hais txog peb tej kev xav thiab tej yam peb ua los xij peem. Nws qhia peb tias txoj kev khaws nyiaj txiag thiab qhov txhia chaw saum ntuj ceeb tsheej tseem ceeb tshaj txoj kev khaws tej ntawd hauv ntiaj teb no.15

Nws tej zaj lus piv txwv muaj hwj chim thiab hwj huam. Hauv zaj dab neeg txog tus neeg Xamalis zoo, Nws qhia peb kom sib hlub thiab ua hauj lwm pab peb cov neeg zej zog.16 Hauv nws zaj paj lug txog cov nyiaj, Nws qhia peb kom kho peb tus kheej thiab sim ua neeg zoo tag nrho.17 Zaj paj lug txog tus yaj uas ploj lawm, Nws qhia peb kom mus cawm cov neeg uas tau tawm ntawm txoj kev thiab tau poob zoov lawm.18

Thaum peb sim tso Khetos hauv nruab plawv peb lub neej thaum peb kawm Nws tej lus, ua raws li Nws tej lus qhia, thiab taug Nws tej kev, Nws cog lus tias nws yuav muab txoj sia nyob mus ib txhis uas Nws raug kev tuag xwv kom peb thiaj tau. Tsis muaj ib yam uas siab tshaj qhov no, qhov uas peb yuav xaiv yuav Nws cov lus qhuab qhia thiab rais los ua Nws cov thwj tim thiab ua Nws tej hauj lwm hauv tag nrho peb lub neej. Tsis muaj lwm yam, lwm txoj kev xaiv rau peb, uas yuav pab peb rais los mus ua tus neeg uas Nws yuav pab peb ua.

Thaum kuv xav txog cov neeg uas twb sim ua raws li tus Cawm Seej tus yam ntxwv thiab tau taug Nws txoj hau kev, kuv txawm xav txog Gustav thiab Margarete Wacker—ob tug neeg uas ua zoo li Yexus tshaj lwm tus uas kuv xav tau txog. Nkawd yog neeg Yelemis thiab nkawd tau tsiv los nyob tim Canada teb tim sab hnub tuaj, ces kuv tau ntsib nkawd thaum kuv ua qhov chaw tshaj tawm txoj moo zoo tus thawj tswj hwm nyob ntawd. Tij Laug Wacker khwv tau nyiaj thaum nws txiav neeg plaub hau. Txawm nkawd tsis tshua muaj nyiaj, nkawd tau faib txhua yam uas lawv muaj. Nkawd tsis muaj hmoov muaj me nyuam li, tiam sis nkawd tau tu txhua tus neeg uas los rau hauv nkawd tsev. Cov txiv neej thiab poj niam uas tau kawm ntaub ntawv siab heev thiab yog neeg nplua nuj tau tuaj xyuas Vajtswv ob tug tub qhe uas txo hwj chim no thiab lawv xav tias lawv tau muaj hmoov vim lawv tau ntsib ob tug no rau ib ob xuab moos xwb.

Nkawd yeej zoo xws luag tej xwb, Nkawd tsis tshua txawj hais lus Akiv thiab nyuaj to taub, nkawd lub tsev tsis loj pes tsawg. Nkawd tsis muaj ib lub tsheb los sis ib lub TV, thiab nkawd tsis tau ua tej yam loj loj uas tib neeg ntiaj teb yuav qhuas nkawd txog. Tab sis mas cov neeg uas rau siab ntseeg tau taug kev mus rau lawv tsev kom lawv yuav hnov tau tus ntsuj plig hauv nkawd tsev. Nkawd lub tsev yog ib lub ntuj ceeb tsheej hauv ntiaj teb no, thiab tus ntsuj plig uas nyob hauv yog kev thaj yeeb nyab xeeb thiab kev ua siab zoo xwb.

Peb kuj muaj tau tib tug ntsuj plig ntawd thiab faib tau rau lub ntiaj teb thaum peb taug peb tus Cawm Seej txoj hau kev thiab ua raws li Nws tus yam ntxwv zoo tag nrho.

Peb nyeem hauv phau Paj Lug hais tias, “Ua tib zoo xav ua ntej uas koj yuav ua ib yam dab tsi.”19 Thaum peb ua li no, peb yuav muaj kev ntseeg, muaj lub siab xav, kom taug txoj hau kev uas Yexus tau taug. Peb yuav ntseeg hais tias peb nyob ntawm txoj hau kev uas peb Leej Txiv xav kom peb yuav taug. Tus Cawm Seej tus yam ntxwv ua ib tug txheej txheem rau peb saib, thiab Nws tej lus yeej coj peb txoj kev. Nws txoj hau kev yuav coj peb mus dawb mus huv txog tsev. Thov kom peb yuav tau txoj koob hmoov no, kuv thov los ntawm Yexus Khetos, tus uas kuv hlub, tus uas kuv ua hauj lwm rau, thiab tus uas kuv ua tim khawv txog lub npe, amees.