2010–2019
Kwōn Kanooj Lale Iaļ In Neem̧
Oktoba 2014


Kwōn Kanooj Lale Iaļ In Neem̧

Ilo ad reilo̧k n̄an Jisōs āinwōt ad Riwaanjon̄ak im ilo ad ļoor e bun̄tōn Neen, jemaron̄ jepļaakļo̧k n̄an Jemedwōj Ilan̄.

Ro jeiū im jatū, ij ettā ilo aō jutak im̧aan mejāmi jibbon̄ in. Ij kajjitōk kōn tōmak im jar eo ami ilo eta ilo aō kwaļo̧k ippāmi ennaan in aō.

Kōj wōj aolep rej jino juon iaļ em̧m̧an im aorōk ke jaar likūt laļ eo an jetōb im deļo̧n̄e tok jikin in ekkā an apan̄ ņae etan laļ in. Jibadbad eo eļap ilo ad pād ioon laļ in ej n̄an bōk juon ānbwin in kanniōk im dii, n̄an bōk en̄jake eo emaron̄ itok wōt jān jepeļo̧k jān ro jined im jemedwōj ilan̄, n̄an lale n̄e jenaaj kōjparok kien ko. Ilo Bok in Abraham jepta 3 jej riit bwe Anij eaar ba renaaj idajon̄jon̄ er n̄an lale n̄e renaaj kōm̧m̧ane aolep men ko Er raan kean̄ er n̄an kōm̧m̧ane.1

Ke jaar itok n̄an laļ in, jaar bōktok ippād menin letok eo eļap jān Anij—aaet anemkwoj eo ad. Ilo taujin wāween ko jej jeram̧m̧an n̄an kālet n̄an kōj make. Ijin jej katak jān jerbal eo epen kōn en̄jake. Jej kile kōtaan em̧m̧an im nana. Jej kōjenolo̧k meo im tōn̄al. Jej katak jokālet ko rej jekņaļōmen mejān kajik eo.

Ijeļā bwe jaar likūt Jemād kōn juon ikdeleel eļap n̄an ro̧o̧lļo̧k n̄an E, bwe jen maron̄ bōk mour eo ilōn̄tata eo E eaar karōk tok n̄an kōj im eo kōj, kōj make, eļap ad aikuji. Men̄e jaar likūt n̄an pukōt im ļoor iaļ in eo enaaj tōļļo̧k kōj ļo̧k n̄an Jemād ilo Lan̄, E eaar jab jilkintok kōj ijin ilo ejjeļo̧k tōl im jineet. Ijjelo̧kin, E eaar letok n̄an kōj kein jerbal ko jaikuji, im E enaaj jipan̄ kōj ilo ad pukōt jipan̄ eo An im kajjieon̄ in kōm̧m̧ane aolep ilo ad kajoor n̄an kijenmej n̄an jem̧ļo̧kin im bōk mour indeeo.

N̄an jipan̄ tōl kōj ewōr ippād naan ko an Anij im Nejin maron̄ loe ilo jeje ko ad rekwojarjar. Ewōr ippād kapilōk ko im katak ko jān rikanaan ro an Anij. Eo eaorōktata, kar kōpoojetok n̄an kōj juon waanjon̄ak n̄an ļoore—aaet waanjon̄ak eo an Irooj im Rilo̧mo̧o̧r, Jisōs Kraist—im jaar ekkatak n̄an ļoor waanjon̄ak in. Rilo̧mo̧o̧r Make eaar ba: “Kwōn Itok im ļoor Eō.”2“Jerbal ko kom̧ ar lo Aō kōm̧m̧an i kom̧ naaj barāinwōt kōm̧m̧an i.”3Eaar letok kajjitōk in, “Armej rot kom̧ij aikuj in āinwōt?” Im Eaar uwaak, “Em̧ool ij ba n̄an kom̧, em̧ool āinwōt N̄a ij.”4“Eaar kōkkaļļeik iaļ eo im Ej bwilōk m̧aan iaļ in.”5

Ilo ad reilo̧k n̄an Jisōs āinwōt ad Riwaanjon̄ak im ilo ad ļoor bun̄tōn Neen, jemaron̄ ro̧o̧lļo̧k ilo kōjparok n̄an Jemedwōj Ilan̄ n̄an mour Ippān n̄an indeeo. Rikanaan Nipai eaar ba, “Bwe eļan̄n̄e juon armej ej jamin niknik n̄an jem̧ļo̧kin, ilo lor waanjon̄ak eo an Nejin Anij emour, e jamin bōk lo̧mo̧r.”6

Juon kōrā, kajjojo iien ej keidi en̄jake ko kar ippān ilo kar juon an iien loļo̧k n̄an Holy Land, kar kōmeļeļeiki, “Iaar etetal ijo Jisōs eaar etetal ie!”

Liin ekar pād ilo jikin eo ijo Jisōs eaar mour im katak ie. Bōlen liin eaar jutak ioon juon dōkā eo Eaar jutak ioon ak reilo̧k n̄an toļ ko Eaar reilo̧k n̄an i. En̄jake ko, ilo e im ilo er, rekar kaļo̧kjenan kōrā in; ak lukkuun etetal ijo Jisōs eaar etetal ie edik an aorōk jān etetal āinwōt An kar etetal. Ļoor m̧akūtkūt ko An im ļoor waanjon̄ak ko An rej aorōk ļo̧k jān kajjieon̄ bar ro̧o̧lļo̧k n̄an maalkan iaļ ko Eaar etetal ie ilo mour in.

Ke Jisōs ekar leļo̧k n̄an juon rim̧weie kūr in, “Itok, ļoor Eō,”7Eaar jab ļōmņak bwe rim̧weie in en ļoor E lōn̄ļo̧k im laļļo̧k ilo bat ko im bukwōn ko ilo āne eo.

Jej aikuj jab etetal itōrerein parijet ko ilo Galilee ak ibuļōn bat ko iJudeia n̄an etetal ijo Jisōs eaar etetal ie. Kōj aolep maron̄ etetal ilo iaļ eo Eaar etetal ie n̄e, naan ko An rej jilel ilo lo̧jidn̄id, jetōb eo An ej kobrak būruwōd, im katak ko An rej tōl mour ko ad, jej kālet n̄an ļoor E ilo ad ilo̧k ilo mour in. Waanjon̄ak eo An ej rome iaļ eo, Eaar ba, “N̄a iaļ, im m̧ool, im mour.”8

Ilo ad etale iaļ eo Jisōs eaar etetal ie, jenaaj loe bwe eaar bōk elōn̄ kain apan̄ kein wōt n̄an E kōj make naaj jelm̧ai ilo mour.

N̄an waanjon̄ak, Jisōs eaar etetal ilo iaļ in būromōj. Men̄e Eaar en̄jaki elōn̄ būromōj, juon iaan en̄jake ko rekabūromōjmōj ekar ilo An kar limō kōn Jerusalem ke Eaar kōjemļo̧k An kwaļo̧k imejān armej. Ro nejin Israel raar kōjoole mour in kōjparok eo Eaar leļo̧k n̄an er. Ke Eaar reilo̧k ioon jikin kweilo̧k eo ejjab etto naaj ilo̧k jān e n̄an kakkure, Eaar anjo jān en̄jake in būromōj ko rem̧wilaļ. Ilo metak Eaar lamōj, “O Jerusalem, Jerusalem, kwe kwaar m̧an ro ri kanaan, im kade ro jilkinwōj er n̄an eok; elōn̄ alen I ar kōņaan kokweilo̧ktok ro nejim̧, āinwōt lo̧lo̧ ej kokweilo̧klo̧k ro nejin jojo ium̧win pein, im kom̧ ar jab kōņaan.”9

Jisōs eaar etetal ilo iaļen kapo. Lucifer, juon eo enana, ej bwilōn̄ kōn kajoor eo An eļap, an meļeļe eļap kōn laļ in kar kajjitōk, kar kapo E eo eaar jitlo̧k ium̧win 40 raan im 40 bon̄. Jisōs eaar jab ebbeer; ijjelo̧kn, Eaar jum̧ae kajjojo kapo. Naan ko an rejepelōklōk: “Kwōn ilo̧k, Setan.”10

Jisōs eaar etetal ilo iaļen metak. Ļōmņak kōn Gethsemane, ijo Eaar pād “ilo An en̄taan … im An menokadu āinwōt eļap pilin̄lin̄ in bōtōktōk e wōtlo̧k ioon bwidej.”11Im ejjeļo̧k emaron̄ meļo̧kļo̧k en̄taan eo An ioon dōbwāāl eo.

Kōj kajjojo naaj etetal ilo iaļen būromōj, bōlen kōnke jeluuji juon iien em̧m̧an, juon kajoor ebōd kōjerbale, juon kālet an juon eo jākwe, ak juon kālet kōj make jaar kālet e. iaļen kapo ebarāinwōt iaļ eo an kajjojo. Jej riit ilo 29th section in Doctrine and Covenants: Eļan̄n̄e devil ekar jab kapo armej, er reban kar erom agent n̄an er make.12

Āinļo̧k wōt ad naaj etetal ilo iaļen metak. Kōj, āinwōt rikarejar ro, maron̄ kōtmāne eļapļo̧k jān M̧aajta eo, eo eaar likūt mour in wōt ālkin eļap metak im en̄taan.

Iien in jenaaj loe iaļ eo ad emeo̧ im kaburomōjmōj, jemaron̄ bar loe lem̧ōņōņōņō eo eļap.

Kōj, ippānļo̧k Jisōs, maron̄ etetal ilo iaļ in pokake. Ej jāmin naaj pidodo aolep iien, ak kōm̧m̧an bwe naan ko ad ren kōjolet kōj jān Samual: “Lo, pokake em̧m̧an jān katok, im eo̧ron̄ em̧m̧an jān gris an sip kom̧aan ko.”13Jen keememej bwe jem̧ļo̧kin jab pokake ej kakkure im mej, ejja iien eo wōt nōbar eo kōn pokake ej anemkwoj im mour indeeo.

Kōj, āinwōt Jisōs, maron̄ etetal ilo iaļ in jerbal in jipan̄. Āinwōt juon meram em̧m̧an ej mour eo an Jisōs āinwōt Eaar kwaļo̧k ilubwilijin armej ro. Eaar bōktok kajoor n̄an neen ko neen riajikuk ro, loļo̧kjeņ n̄an māj an ripilo, ron̄ļo̧kjeņ n̄an lo̧jiln̄ii an rijaron̄ron̄.

Jisōs eaar etetal ilo iaļen jar. Eaar katakin kōj wāween eo n̄an jar jān letok n̄an kōj jar eo eaiboojoj jeļā bwe ej jar an Irooj. Im eo emaron̄ meļo̧kļo̧k jar eo An ilo Gethsemane: “A en jab ankil Aō a Am̧ wōt.”?14

Kōmeļeļe ko jet kar litok n̄an kōj jān Rilo̧mo̧o̧r eo rej pād ilo annan̄in peid, loe ilo jeje ko rekwojarjar. Ilo Kwaļo̧k eo An ilo Toļ eo, Ej jiron̄ kōj n̄an tūriam̧o̧, ettā bōro, kabun̄, erreo ilo bōro, rikōm̧m̧an aenōm̧m̧an. Ej katakin kōj n̄an leļo̧k meram bwe ro jet remaron̄ loe im kōņaan in kaiboojoj Jemed ilo Lan̄. Ej katakin kōj n̄an erreeo ilo ļōmņak im ad kōm̧anm̧an. Ej jiron̄ kōj bwe eļapļo̧k an aorōk n̄an pukōt m̧weie ilan̄ jān ilaļ.15

Būrabōļ ko An rej katakin kōn kajoor im mālim. Ilo bwebwenato in Risamaria eo em̧m̧an, Ej katakin kōj n̄an iakwe im n̄an jerbal n̄an ro riturir.16Ilo būrabōļ eo An kōn tōļan, Ej katakin kōj n̄an kōm̧anm̧anļo̧k kōj make im n̄an kajjieon̄ wāppen.17Ilo būrabōļ an sip eo ejōbwābwe, Ej katakin kōj n̄an etal im lo̧mo̧o̧r ro raar pād wōt ilo iaļ eo im kar jōbwābwe.18

Ilo ad kajjieon̄ likūt Kraist ilo ioļapān mour ko ad jān katak naan ko An, jān ļoor katak ko An, im jān etetal iaļ eo An, Eaar kalim̧m̧ur n̄an ajije ippād mour indeeo eaar mej kake bwe jen mour. Ejjeļo̧k bar jem̧ļo̧k eutiej ļo̧k jān in, bwe jej aikuj kālet n̄an bōke kauwe in An im erom rikaļoor ro An im kōm̧m̧an jerbal eo An aolepān mour ko ad. Ebar ejjeļo̧k, ebar ejjeļo̧k kālet jej kōm̧m̧ane, maron̄ kōm̧m̧ane n̄an kōj ta eo Emaron̄e.

Ilo aō ļōmņak kōn ro raar m̧ool ļoor waanjon̄ak eo an Rilo̧mo̧o̧r eo im ro raar etetal ilo iaļ eo An, emōj an itok n̄an ļōmņak eo aō et ko etan Gustav im Margarete Wacker—ruo iaan armej ro āinwōt Kraist iaar jeļā kajjeer. Raar armej in Germany ro raar em̧m̧akūttok n̄an tūrear in Canada, im iaar ioon er ke iaar jerbal āinwōt juon mijen būreejtōn ijeņ. Brother Wacher eaar jerbal āinwōt juon rimijbar. Men̄e jeram̧m̧an ko aer raar jab bwe, raar ajeje jabdewōt ewōr ippāer. Raar jab jeram̧m̧an kōn ajri, ak raar naajdik aolep ro rej deļo̧n̄e m̧weo m̧weer. Em̧m̧aan im kōrā ro ewōr jeļā im imminene ippāer raar pukōt rein rettā, rikarejar ro an Anij im kar bwine ippāer make jeram̧m̧an n̄e remaron̄ joļo̧k juon awa im̧aan mejāer.

Paotokier eaar ejjeļo̧k oktak, aer kajin English eraļo̧k im jidik pen n̄an meļeļe, m̧weo m̧weer ejjab lukkuun aorōk. Ejjeļo̧k waer wa ak talbejen, barāinwōt rej jab kōjerbal jabdewōt men ko laļ ej itok limo kaki. Tiljek ej kwaļo̧k juon iaļ n̄an kōjem̧ eo aer n̄an maron̄ bōk m̧ōttan jetōb eo ijo. M̧weo m̧weer ekar juon lan̄ ioon laļ in, im jetōb eo eaar kwaļo̧k ekar aenōm̧m̧an im em̧m̧an.

Kōj jemaron̄ bōk jetōb in im maron̄ kwaļo̧k e ilaļ in ilo ad etetal ilo iaļ eo an Rilo̧mo̧o̧r eo im ļoor waanjon̄ak eo An ewāppen.

Jej riit kapilōk in ilo Jabōn Kōnnaan ko, “Kwōn kanooj lale iaļ in neem̧.”19Ilo ad kōm̧m̧ane, jenaaj bōk tōmak in, aaet ikdeleel eo, n̄an etetal ilo iaļ eo Jisōs eaar etetal ie. Enaaj ejjeļo̧k ad pere bwe jej pād ilo juon iaļ eo Jemād enaaj kar kōņaan bwe jen ļoor e. Waanjon̄ak eo an Rilo̧mo̧o̧r eo ej letok juon mōņakjen kōn aolep men jej kōm̧m̧ane, im naan ko An rej letok tōl eban likjab. An iaļ enaaj kōjparokļo̧k kōj n̄an m̧weo. Jeram̧m̧an in en ad, ij jar, ilo etan Jisōs Kraist, eo ij iakwe, eo ij jerbal n̄an e, im eo ij kam̧ool kake, amen.