Ia Mafaufau i le Ala o Ou Vae

Ou uso e ma tuafafine pele, ua faamaualaloina lava a’u a o ou tu atu ai i o outou luma i lenei taeao. Ou te talosagaina lo outou faatuatua ma tatalo mo au a o ou faasoa atu ia te outou la’u savali

Sa tatou amatalia uma se malaga matagofie ma le taua ina ua tatou tuua le lalolagi o agaga ma ulufale mai i lenei laasaga luitauina ua ta’ua o le olaga faaletino. O faamoemoega autu o lo tatou ola ai i luga o le fogaeleele o le mauaina lea o se tino o aano ma ivi, ia oo i se aafiaga lea e na o le valavala lava ma o tatou matua faalelagi e mafai ai, ma iloa ai pe tatou te tausia ia poloaiga. I le tusi a Aperaamo, mataupu e 3 tatou te faitau ai: “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”¹

Ina ua tatou o mai i le lalolagi, sa tatou aumaia faatasi ma i tatou lena meaalofa maoae mai le Atua—o lo tatou faitalia. Ua anoanoai auala ua faamanuiaina ai i tatou e filifili mo i tatou lava. O i ua tatou aoao ai mai manaoga faigata o aafiaga faaletagata lava ia. Tatou te iloatino le va o le lelei ma le leaga. Tatou te iloa le eseesega o le oona ma le suamalie. Ua tatou iloa o faaiuga e iloa ai le taunuuga.

Ou te mautinoa lava sa tatou tuua lo tatou Tama ma se manao faagaeetiaina ia toefoi atu ia te Ia, ina ia mafai ai ona tatou maua le faaeaga na Ia fuafuaina mo i tatou ma lea tatou te matua mananao ai lava. E ui ua tuua i tatou ia saili ma mulimuli i lena ala lea o le a toe taitai atu ai i tatou i lo tatou Tama i le Lagi, ae Na te lei auina maia i tatou iinei e aunoa ma se taitaiga ma se taiala. Ae, ua Ia tuuina mai ia i tatou ni meafaigaluega tatou te manaomiaina, ae o le a Ia fesoasoani mai ia i tatou pe a tatou saili atu i Lana fesoasoaniga ma taumafai e fai mea uma i lo tatou malosi e tumau ai e oo i le iuga ma maua ai le ola e faavavau.

Ina ia fesoasoani e taiala i tatou, ua ia i tatou afioga a le Atua ma Lona Alo o loo maua i totonu o a tatou tusitusiga paia. Ua tatou maua fautuaga ma aoaoga a perofeta a le Atua. O le mea sili ona taua, ua sauniaina mo i tatou se faataitaiga atoatoa e mulimuli i ai—o le faataitaiga a lo tatou Alii ma le Faaola, o Iesu Keriso—ma ua faatonuina i tatou ia mulimuli i lena faataitaiga. Na fetalai le Faaola lava Ia: “Sau, mulimuli mai ia te au.”² “O galuega na outou vaai na ou faia o mea ia tou te faia foi.”³ Sa Ia faia le fesili, “O a ituaiga o tagata e tatau ona outou i ai?” Ona Ia tali lea, “E moni ou te fai atu ia te outou, e pei lava o au nei.”⁴ “Sa Ia fai le ala ma taitai mai.”⁵

A tatou tepataulai atu ia Iesu o lo tatou Faataitaiga ma a tatou mulimuli i Ona tulagaao, e mafai ona tatou toe foi atu ma le saogalemu i lo tatou Tama Faalelagi e mau faatasi ma Ia e faavavau. Sa saunoa le perofeta o Nifae, “Vagana ai ua tumau le tagata sei oo i le iuga, i le mulimuli lea i le faataitaiga a le Alo o le Atua soifua, e le mafai ona faaolaina o ia.”⁶

O se tasi tamaitai, o taimi uma na te faamatalaina ai ni aafiaga na ia oo i ai i ana asiasiga i le Nuu Paia, e alaga ai lava, “Sa ou savali i le mea na savali ai Iesu!”

Sa oo o ia i le nuu sa soifua ma aoao atu ai Iesu. Masalo sa ia tu i luga o se papa sa tu muamua ai o Ia pe matamata atu foi i se atumauga na silasila i ai Iesu. O ia lava aafiaga, sa faagaeetia ai o ia; ae o le savali patino i le mea sa savali ai Iesu e itiiti sona taua i lo le savali e pei ona Ia savali. O le faataitaiga o Ana amioga ma mulimuli i Ana faataitaiga e matuai taua lava nai lo le taumafai e toe suesue toega o alasavali na Ia savalia i le olaga faaletino.

Ina ua tuu atu e Iesu i se alii mauoa patino le valaaulia, “Sau mulimuli mai ia te au,”⁷ Sa lei faamoemoe moni o Ia ia taumulimuli atu le alii mauoa ia te Ia i luga o mauga ma lalo o vanu o le atunuu.

E le manaomia ona tatou savavali i matafaga o Kalilaia po o atumauga o Iutaia e savali ai i mea na savali ai Iesu. E mafai e i tatou uma ona savavali i le ala na Ia savali ai pe a tatou manatua pea Ana fetalaiga, pe a faatumulia e Lona Agaga o tatou loto, ma Ana aoaoga e taialaina ai o tatou olaga, ma pe a tatou filifili e mulimuli ia te Ia a o tatou faimalaga i le olaga faaletino. E faamalamalamaina e Ana faataitaiga le ala. Sa Ia fetalai, “O au nei le ala, ma le upu moni, ma le ola.”⁸

A o tatou suesueina le ala na savali ai Iesu, o le a tatou iloa ai sa oo foi o Ia i le anoanoai o luitau lava e tasi ia o loo tatou feagai ai i tatou lava i le olaga.

Mo se faataitaiga, sa savalia e Iesu le ala o le le fiafia. E ui sa oo o Ia i le tele o le le fiafia, ae o se tasi o mea sa sili ona faamomoiloto lea sa faaalia i Lana auega i Ierusalema a o faamaeaina Lana galuega i nofoaga faitele. Sa teenaina e le fanauga a Isaraelu le saogalemu o le apaau o le puipuiga lea sa Ia ofoina atu ia i latou. A o Ia silasila atu i le aai lea o le a le pine ae tuulafoaiina i le faafanoga, sa lofituina o Ia i lagona ootia o le faavauvau tele. I le tiga tele sa Ia alaga ai, “Ierusalema e, Ierusalema e, o le fasioti perofeta, ma fetogi i maa ē na aauina atu ia te oe; ua tele lava o’u manao e faapotopoto i lau fanau, e pei o le moa ona ofaofatai i lana toloai i lalo i ona apaau, a e le mafafai outou!”⁹

Sa savalia e Iesu le ala o faaosoosoga. O Lusifelo, lena leaga e toatasi, na faapotopotoina lona malosi silisili, o ana pepelo faatauanau, ma faaosooso o Ia o lē na anapogi mo le 40 aso ma le 40 po. Sa lei gauai atu i ai Iesu, ae, sa Ia teenaina faaosoosoga taitasi. O Lana fetalaiga faatofā: “Alu ese ia oe Satani.”¹⁰

Sa savalia e Iesu le ala o le tiga. Mafaufau i Ketesemane, le nofoaga sa “puapuaga [ai] o ia … [ma] lona afu foi ua pei o ‘alu’alu toto ua pa’u ifo i le eleele.”¹¹ Ma e leai se tasi e mafai ona faagaloina Ona mafatiaga i luga o le satauro tiga.

O le a savalia e i tatou taitoatasi le ala o le le fiafia, masalo ona o se avanoa ua maumau, o se pule ua faaaoga sese, o ni filifiliga a sē pele, po o se filifiliga e faia e i tatou lava. O le a avea foi le ala o faaosoosoga ma ala o tagata taitoatasi. Tatou te faitau i le vaega 29 o le Mataupu Faavae ma Feagaiga: “Ma e ao ina faaosoosoina e le tiapolo le fanauga a tagata, [a leai] e le mafai ona avea i latou ma pule ia te i latou lava.”¹²

E faapena foi ona tatou savavali i le ala o le tiga. I le avea ai ma ni auauna, e le mafai ona tatou faamoemoeina nisi mea e sili atu nai lo mea na oo i le Matai, o le na tuua le olaga nei ina ua mavae le tiga tele ma puapuaga.

Peitai, e ui lava o le a tatou mauaina i luga o lo tatou ala le faanoanoa matuitui, e mafai foi ona tatou mauaina le fiafia tele.

E mafai foi ona tatou savavali faatasi ma Iesu i le ala o le usiusitai. O le a le faigofie i taimi uma, ae ia avea ma a tatou anavatau le tofi na tuuina mai e Samuelu: “Faauta, o le faalogo e sili lea i le taulaga, ma le usiusitai e sili lea i le ga’o o le mamoe po’a.”¹³ Ia tatou manatua o le taunuuga faaiu o le le usiusitai o le nofopologa ma le oti, ae o le taui o le usiusitai o le saolotoga ma le ola e faavavau.

E pei o Iesu, e mafai ona tatou savavali i le ala o le auauna atu. E pei o se sulu malamalama o le agalelei, o le soifuaga lea o Iesu a o Ia auauna atu i tagata. Sa Ia aumaia le malosi i vae o pipili, le pupula i mata o tauaso, le faalogo i taliga o e logonoa.

Sa savalia e Iesu le ala o le tatalo. Sa Ia aoao mai i tatou i le ala e tatalo ai e ala i le tuuina mai ia i tatou o le tatalo matagofie ua tatou iloa o le Tatalo a le Alii. Ma o ai se e galo ia te ia Lana tatalo i Ketesemane: “Aua le faia lo’u loto, a o lou finagalo.”?¹⁴

O isi faatonuga ua tuuina mai ia i tatou e le Faaola ua tatou taulimaina, o loo maua i tusitusiga paia. I Lana lauga i luga o le Mauga, ua Ia tau mai ai ia i tatou ia alofa mutimutivale, ia lotomaualalo, ia amiotonu, ia loto mama, ia avea ma ē faatupuina le filemu. Ua Ia faatonuina i tatou ia tutu atu ma le totoa mo o tatou talitonuga, e tusa lava pe tauemuina ma sauaina i tatou. Ua Ia faatonuina i tatou ia faasusulu atu lo tatou malamalama ina ia mafai ona vaaia e isi ma mananao ai e vivii atu i lo tatou Tama i le Lagi. Ua Ia aoaoina i tatou ia amio mama i o tatou mafaufauga ma a tatou amioga. Ua Ia tau mai ia i tatou e sili atu lava le taua o le faaputuina o oa i le lagi i lo oa i le lalolagi.¹⁵

O Ana faataoto o loo aoao mai i le mana ma le pule. I le tala i le Samaria agalelei, ua Ia aoao ai i tatou ia alolofa atu ma auauna atu i o tatou tuaoi.¹⁶ I Lana faataoto i taleni, ua Ia aoao mai ai i tatou ia faaleleia i tatou lava ma ia tauivi mo le atoatoa.¹⁷ I le faataoto o le mamoe na se, ua Ia faatonuina ai i tatou ia ō atu e laveai mai i latou o ē ua tuua le ala ma ua leiloa lo latou ala.¹⁸

A o tatou taumafai e tuu Keriso i le totonugalemu o o tatou olaga e ala i le aoaoina o Ana afioga, e ala i le mulimuli i Ana aoaoga, ma e ala i le savavali i Ona ala, ua Ia folafola mai e faasoa mai ia i tatou le ola e faavavau lea na Ia maliu ai ia maua. E leai se isi taunuuga e maualuga atu i lo lenei, ia tatau ona tatou filifili e talia Lana aoaiga ma avea ma Ona soo ma faia Lana galuega i o tatou olaga atoa. E leai se isi lava mea, leai se isi lava filifiliga tatou te faia, e mafai ai ona avea i tatou ma tagata e sili atu i lo le tagata e mafai ona Ia faia e avea ai i tatou.

A o ou mafaufau ia i latou o ē o loo taumafai moni lava e mulimuli i le faataitaiga a le Faaola ma ē o loo savavali i Lona ala, e vave lava ona ou mafaufau ia Gustav ma Margarete Wacker—o nisi e toalua o tagata sili ona faapei o Keriso ua ou iloaina. O i laua o ni tagatanuu o Siamani sa malaga atu i Kanata i sasae, ma sa ou feiloai i ai a o ou auauna atu o se peresitene o se misiona iina. Sa faigaluega Uso Wacker o se tagata oti ulu. E ui sa tapulaa a la tupe maua, ae sa la faasoa atu pea a laua mea uma e maua. Sa lei faamanuiaina i laua i se fanau, ae sa laua faafaileleina uma ē na ulu atu i lo la fale. O alii ma tamaitai aoaoina ma sili ona atamamai sa saili atu i nei auauna a le Atua faatauvaa e le’i aotauina ma faitaulia lo latou lava manuia pe afai sa mafai ona latou faaaluina se itula e faatasi ai ma i laua.

O o la foliga vaaia masani o aso uma, sa tau panupanu le nanu ma sa fai si faigata ona malamalama i ai, ma sa faatauvaa lava si o la fale. Sa lei o la umiaina se taavale po o se televise, pe na faia soo se mea lea e masani ona gauai atu i ai le lalolagi. Ae sa asa atu pea e ē faatuatua se ala i lo la fale ina ia mafai ona latou tofo i le agaga sa i ai iina. O lo la fale o se lagi i le lalolagi, ma o le agaga na la faasusulu atu o se filemu a’ia’i ma le agalelei.

E mafai foi ona tatou mauaina lena agaga ma e mafai ona faasoa atu i le lalolagi a o tatou savavali i le ala o lo tatou Faaola ma mulimuli i Lana faataitaiga atoatoa.

Tatou te faitau i le Faataoto i le apoapoaiga, “Ia mafaufau i le ala o ou vae.”¹⁹ A tatou faia, o le a tatou maua le faatuatua, e oo lava i le manao, e savavali i le ala lea na savalia e Iesu. O le a leai so tatou masalosalo o loo tatou i ai i luga o le ala lea e finagalo lo tatou Tama ia tatou mulimuli i ai. O le faataitaiga a le Faaola ua tatou maua ai se mamanu mo mea uma tatou te faia, ma o Ana afioga ua maua ai se taiala lemafaatoilaloina. O Lana ala o le a taitai atu ai i tatou ma le saogalemu i le aiga. Ia avea lenei mea ma o tatou faamanuiaga, ou te tatalo ai, i le suafa o Iesu Keriso, le ou te alofa i ai, le ou te auauna i ai, ma le ou te molimau atu ai, amene.