Ahosiesie wɔ Kwan a Wonnhun Bi Da Ho

Ber a hɛn babasiaba sanee baa fie wɔ ne da a odzi kan a ɔdze kɔɔr skuul no, mibisaa dɛ, “Nna ɔtse dɛn?

Oyii ano dɛ, “Nna oye.”

Adzekyee no, mbom, ber a menyanee no dɛ ɔnkɔ skuul no, ɔbobɔɔw n’abasa na osii no pi dɛ, “Maakɔ skuul!” Nna mennsiesiee no dada anaa mennkyerɛkyerɛɛ no mu dɛ skuulkɔ nnyɛ adze a osi ber kor pɛr mbom enyida no kwan dɛ ɔbɔkɔ skuul nda enum dapɛn biara mu, mfe pii mu.

Ber a yɛrodwendwen ahosiesie nkyerɛkyerɛ ho no, kã moho nye me nsusu enyido adzehwɛ yi. Itse temple celestial dan mu na ihu ayeforfo mbasiafo nye ayeforekun pii a wodzi hɔn enyim enyidzi mu ara rehɛn mu na worupue ber a wɔtweɔn dɛ wɔbɔwar hɔn aber yi nye mbersantsen nyina mu. Ayefor bi hɛn celestial dan no mu, a oesũo no dɔfo a ɔrobɔwar no nsa da nsamu. Ɔhyɛ temple atar a ɔyɛ fɛw a ɔnnyɛ kyinkyinɛnn, na anoyerɛwee fɛɛfɛw a ɔwɔ n’enyim no kyerɛ abodwee, na asomdwee. Oesiesie noho yie na naaso ɔmmbor do. Ɔtsena ase na n’enyi tsetsɛw, nkyii awerɛfir mu ara bohu dɛ sũ etu no. Gyama osũ osian ahobow na enyidzi a ɔwɔ ma bea no a ɔwɔ no, na ayɛdze krɔnkrɔn a ɔrotweɔn ɔno na n’abrabɔ mu dɔfo no ntsi. No subea yɛ dɛ ma ɔrodwendwen dɛ, “Mbrɛ m’enyi si sɔ dɛ mowɔ Ewuradze ne fie ndɛ, a mayɛ krado dɛ menye me onnyiewiei adamfo dɔfo rebɛhyɛ akwantu a onnyi ewiei ase!” Nna ɔayɛ ahosiesie a ɔtra dza ɔrobɔkɔ do no ara.

Ɔnnkyɛree na hɛn nanaba basia fɛfɛw bi gyaa asɛnsin bi wɔ mo sundze do a ne fã kãa dɛ: “Adze kor a sɛ mehɛn temple a muhu nye, asomdwee, ɔdɔ sunsum a ɔwɔ hɔ no. … Nkorɔfo botum akɔ temple ekenya nkenyan.”¹ N’asɛm yɛ nokwar. Yebotum enya nkenyan na nyikyerɛ wɔ temple no mu … na tum so a yedze begyina abrabɔ n’atseetee ano. Dza orusũa a ɔfa temple ho no ber a ɔwɔw do dze nankasa n’ebusua edzin kɔ kɛyɛ temple enuma na pisi no bɛma ɔayɛ ahoboa akɛyɛ temple ayɛdze, ahyɛmudzi na nhyira binom so akã ho, ama ɔno ankasa noho nye hɔn a wɔwɔ ntwamutam afã noho no.

Elder Russell  M. Nelson kyerɛkyerɛɛ dɛ, “Ber a wosiesie temple ma nkorɔfo no, nkorɔfo no so hia dɛ wobesiesie hɔnho ama temple.”²

Ber a merekenkan Ɔsahen Moroni noho asɛm bio wɔ Mormon Nwoma mu no, ɔkaa me dɛ Moroni no konyimdzi kɛsenara kor nye mbrɛ osiesiee Nephifo no ahwɛyie mu ara ma wɔnye Laman nsordaafo huhuufo no gyinae no. Osiesiee no nkorɔfo no ara yie ma yɛkenkan dɛ: “Na mbom hwɛ [Lamanfo no], hɔnho boow hɔn kɛsenara, ber a wohun dɛ [Nephifo no] woesiesie hɔnho rotweɔn hɔn, wɔ kwan bi do a wonnhun bi da.”³

M’adwen bɛdaa dɛm kasin, “oesiesie … wɔ kwan bi do a wonnnhun bi da,” do.

Yebesidɛn botum esiesie hɛnho yie agye temple krɔnkrɔn nhyira? Ewuradze kyerɛkyerɛɛ dɛ “Na bio, mebɛma hom nhwɛdo wɔ ndzɛmba nyina mu.”⁴ Hom ma yɛnhwɛ kyerɛwsɛm mu nhwɛdo a ɔbɔboa hɛn ma yɛayɛ ahosiesie yie. Moroni n’ahosiesie a ɔyɛɛ maa ɔtamfo no gyee nokwar enyimpi a wɔwɔw do yɛe, na nhwɛdo yi behia iyi ara ne yɛ.

Abɛbusɛm dɛɛdɛw a Agyenkwa no kãa faa mbaabun enyansafo beenum nye nkwasea beenum no mmfon me da. Abɛbusɛm yi fa yɛreyɛ ahosiesie ama hɛn Agyenkwa no Ne Mbae a Otsĩa Ebien no ho dze, naaso yebotum yɛdze ato yɛreyɛ ahosiesie ama temple nhyira a, obotum ayɛ dɛ sunsum mu aponto ma hɔn wɔayɛ ahosiesie yie no.

Matthew tsir 25 mu no yɛkenkan dɛ:

“Na sor ahenman no wɔdze bɔto mbaabun du a wɔfaa hɔn kandzea dɛ worikehyia ayeforkun kwan no ho.

“Na hɔn mu beenum yɛɛ enyansafo, na beenum yɛɛ nkwasea. …

“[Na hɔn a wɔyɛ] enyansafo no faa ngo guu hɔn ntoa mu kaa hɔn nkandzea no ho.

“Na ayeforkun no kyinkyimii no, hɔn nyinara na totɔɔ nkom na wɔdedae.

“Na esuom no, wɔtsẽaa mu dɛ, Hwɛ, ayeforkun no reba o! Hom nkɔ nkehyia no kwan.

“Nna mbaabun no nyina soɛree na wɔkekaa hɔn nkandzea.

“Na nkwasea no see enyansafo no dɛ, Hom mma hɛn hom ngo no bi, na hɛn nkandzea rudundum.

“Na enyansafo no buaa dɛ, Oho, bɛyɛ na ɔronnsõ hɛn nye hom; na mbom hom nkɔ hɔn a wɔtɔn no hɔ nkɔtɔ homdze.

“Na ber a wɔkɔree rokɔtɔ no, ayeforkun no bae, na hɔn a wɔayɛ krado no nye no kɔr ayefor ase, na wɔtoow abow no mu.

“Na ekyir no na mbaabun nkaa no so bae bɛsee dɛ, Ewuradze, bue hɛn.

“Na ɔnodze, obuae see hɔn dɛ, Nokwar mese hom dɛ hom nnyim me.”⁵

Minngye nndzi dɛ obi wɔ hɔ a, nkanka hɔn a hɔn akoma yɛ mberɛw no a, no werɛ nnkɔhow mma nkataasia nkwaseafo no. Na hɛn mu binom pɛ dɛ wɔkã kyerɛ nkaafo no dɛ, “Nkyɛ hom nnkotum akyɛ homdze no ama obiara enyi agye a? Mbom dwen ho. Iyi yɛ asɛm a Agyenkwa no kãe, Ɔno na Ɔfrɛɛ enum no “enyansafo” na enum no so “nkwaseafo.”

Ber a yɛdwendwen abɛbusɛm yi ho dɛ temple ahosiesie ho nhwɛdo no, dwen nda a odzi-ekyir nkɔnhyɛnyi a ɔkyerɛkyerɛɛ dɛ “sunsum mu ahosiesie ngo no wonnkotum akyɛ.”⁶ President Spencer W. Kimball boae ma yɛtsee ase siantsir a nkataasia “enyansafo” beenum enntum nye hɔn a wɔyɛɛ “nkwasea” no annkyɛ ngo no a ɔwɔ hɔn kandzea mu no ber a ɔkãa dɛ: “Sacrament nhyiamu no nkɔree dze ngo gu hɛn nkandzea mu, a ɔsosɔ mfe pii a ɔsen no mu. Akɔnkye, ebusua mpaabɔ, fie akyerɛkyerɛ, honandua akɔndɔdze ho nhyɛdo, kyerɛwsɛm nsuae—etuhoakyɛ nye setsie ndzeyɛɛ biara dze ngo sɔ hɛn kuraba no mu kã ho. Ayamuyie ndzeyɛɛ, ebupɛn du na afɔrbɔdze no ntuae, ahosan adwen na ndzeyɛɛ  … —yinom nyinara so, boa papaapa ma yenya ngo a esuom yɛdze bogu hɛn nkandzea wɔatotɔ bahaw no.”⁷

Itum hu ahosiesie nhwɛdo no a—ɔsosɔ nkakrankakra—dɛm no bɔboa hɛn ber a yɛdwen mbrɛ yɛdze mbɔdzembɔ bɛyɛ hɛn ahosiesie akɛgye ayɛdze krɔnkrɔn no ama hɛnho na binom? Ebɛn akwan na ndzɛmba nketseketse binom do na yɛdze sunsum mu ngo a ɔsom bo no sosɔ hɛn ahosiesie nkandzea no mu?

Yesũa fi Elder Richard G. Scott hɔ dɛ “ankorankor emudziyɛ hia tsitsir ama yeenya temple mu nhyira … Suban pa wɔwen no fi abrabɔ a wɔwɔw do san mu yi dza oye a ogyina Owura no Ne nkyerɛkyerɛ do.”⁸ Mepɛ asɛmfua no wɔwɔw do. Iwɔw do kyerɛ dɛ itsen, ewɔ hɔ daa, na wobotum atwer wo. Mbrɛ osi yɛ emudziyɛ ne nkyerɛkyerɛ kɛse no a!

Wɔkaa hɛn wɔ Bible Nkyerɛase mu dɛ: “Fie no nko na ɔto temple no wɔ krɔnkrɔnyɛ mu.”⁹ Ana hɛn efiefie anaa hɛn mpia da dɛm su yi edzi a? Ɔnnkyɛree na akataasia dɔfo bi a ɔwɔ hɛn ward baa hɛn fie. Minyim dɛ no nuabanyin fi asɛmpakã bae ɔnnkyɛree no, mibisaa no dɛ, no nuabanyin ne fie mbae no tse no dɛn. Ɔkãa dɛ ɔyɛ nwanwa, mbom ɔtɔfabi a ɔserɛ dɛ yɛmbrɛ ndwom ne dede no adze. Ɔkãa dɛ, “Na ɔnnyɛ ndwom bɔn mpo!” Mbom ɔbɛyɛ mfaso ama hɛn dɛ ɔto ber bi a yebobu hɛnho nkontaa ahwɛ no pefee dɛ hɛn efiefi yɛ mbea a yebotum ayɛ ahosiesie atse Sunsum no. Ber a yɛsiesie hɛn efiefi mu dɛ wɔbɛyɛ mbea a yɛbɛgye Sunsum no, yɛbɛyɛ ahoboa dɛ ber a yɛhɛn Ewuradze fie yɛbɛtse dɛ “yɛaba fie.”

Ber a yɛyɛ ahosiesie emudzi mu dɛ yɛbɛhɛn temple mu no na yedzi nokwar ma temple ahyɛmudzi no, Ewuradze dze “nhyira mbɔho”¹⁰ behyira hɛn. Me nyɛnko pa Bonnie Oscarson ndaansa yi daan kyerɛwsɛm ekyir mbedzi enyim ber ɔkãa dɛ, “Nyia wɔbɛgye no dodow no, wɔbɛma no dodow.”¹¹ Menye no yɛ adwen dodow! Osiandɛ yɛba temple bɛgye onnyiewiei nhyira ntsi, onnyi dɛ ɔyɛ hɛn ahobow dɛ wohia gyinapɛn a ɔkrɔn ama aafata dɛm nhyira no. Elder Nelson kyerɛkyerɛɛ bio dɛ, “Osiandɛ temple no yɛ Ewuradze ne fie ntsi, Ɔno na ɔkyerɛ gyinapɛn a wɔdze hɛn mu. Obi hɛn mu dɛ Ɔno no hɔhoe. Ibekita temple recommend yɛ adom a wonntwa bo na setsie ma Nyankopɔn nye No nkɔnhyɛfo ho sɛnkyerɛdze.”¹²

Mbirikatufo a wɔagye wiadze abɔdzen nye esũapɔn mu abemfo no hwer dɔnhwer na nda nye adapɛn na abosoom na mfe pii mpo yɛ ahoboaboa. Wohia daa daa ahoboaboa a ɔsosɔ ama woeetum eenya konyimdzi a ɔkrɔn. Dɛmara so, enyi da hɔn a wɔpɛ dɛ wɔfata nkwagye ntowdo wɔ celestial ahenman mu no dɛ wɔdze setsie gyinapɛn a ɔkrɔn bɔ bra ber a wɔyɛ setsie daa daa na ɔsosɔ nkakrankakra no.

Ber a yɛwɔw do daa daa dze ngo, sosɔ hɛn sunsum mu nkandzea mu, ber a yɛyɛ adze na ndzɛmba nketsenketse, yebotum ama hɛn nkandzea no “wɔakeka ma wɔadzɛw”¹³ ɔnam ahosiesie nwanwa ntsi. Mo kun aberantsɛ a, ɔyɛ stake president no, ndaansa yi ɔkãa dɛ otum hu ber biara obi ayɛ ahoboa na ɔfata dɛ ɔkɔ temple, osiandɛ sɛ wɔba dɛ worobɔhwehwɛ temple recommend a “wɔdze kan hyerɛn dan no mu.”

Mpaa a wɔbɔe dze tuu Kirtland Temple no hyɛɛ Nyame nsa mu no, Nkɔnhyɛnyi Joseph Smith serɛɛ Ewuradze dɛ “Na ama nkorɔfo nyinara a wɔbɛhɛn Ewuradze ne fi yi mu no aatse wo tum nkã … na ama woeenyin wɔ wo mu, na hɔn nsa aakã Sunsum Krɔnkrɔn no ne mãhyɛ no … na wɔayɛ krado dɛ wɔbɛper enya biribiara a no ho hia no.”¹⁴

Ɔyɛ me mpaabɔ dɛ hɛn dze, hɛn temple nkɔree no bɔbor adze a osi ber kor pɛr no. Hom mma yɛnyɛ ahosiesie emudzi mu dɛ yɛbɛgye nkwagye ayɛdze no nkakrankakra na yɛdze hɛn akoma nyina esie ahyɛmudzi no a ɔkã ho no. Sɛ yɛyɛ a, minyim dɛ yɛbɛfata agye Sunsum Krɔnkrɔn no ne mãhyɛ anohoba nhyira no na Ewuradze no tum wɔ hɛn efiefie na hɛn ankorankor abrabɔ mu. Wɔ Jesus Christ Ne dzin mu, amen.