Npaj Ua Yam uas Tsis Tau Paub Dua Ib Zaug Li

Thaum wb tus ntxhais ntxawm rov qab los tsev tom qab kawm ntawv thawj hnub, kuv noog nus tias “Mus li cas xwb?”

Nws teb tias “Mus zoo los mas.”

Tiam sis, tag kis thaum kuv mus tsa nws sawv mus kawm tsawv, nws puag tes thiab teb hais tias, “Es kuv twb mus kawm tas lawm ne!” Tej zaum kuv tsis tau npaj nws zoo txaus hais tias nws yuav tsum mus kawm tsawv tsib hnub tauj txhua lim tiam rau ntau xyoo tom ntej, tsis yog mus ib zaug xwb.

Thaum peb xav txog txoj ntsiab cai ntawm txoj kev npaj, cia li nrog kuv xav txog ib zaj dab neeg uas mus li no. Koj tab tom zaum hauv hoob xilethi-aus hauv lub tuam tsev ces koj pom ob peb tug ntxhais uas yuav yuav txiv thiab lawv cov nraug vauv zaum twj ywm tias pom lawv tawm mus tawm los tos sib yuav tas mus ib txhis. Tus ntxhais nyab uas nkag los rau hauv hoob xilethi-aus, tuav nws tus hlub txhais tes. Nws hnav ib daim tiab sib yuav uas yeej zoo nkauj thiab tiam sis yog ib daim tiab hnav mus rau hauv lub tuam tsev, thiab nws nyob twj ywm, zoo siab, thiab luag nyuj nyav. Nws yeej tu tau nws tus kheej zoo thiab tiam sis tsis meem txom. Nws zaum nws lub rooj, ntsia ntawm nws ib ncig, ces cia li ua kua muag poob dawb vog. Zoo li tej zaum nws los kua muag vim nws ntseeg tsis tau qho chaw uas nws nyob thiab tej kev cai dawb ceev uas nws thiab nws tus hlub tab tom yuav ua. Zoo li nws xav tias “Kuv zoo siab heev uas kuv nyob hauv tus Tswv lub tsev hnub no, npaj ua ib lub neej nrog tus txiv uas nws hlub tshaj plaws hauv lub ntiaj teb no.” Zoo li nws npaj tau rau ntau tshaj lub sij hawm no xwb.

Wb tus me ntxhais xeeb ntxwv nyuam qhuav tseg ib tsab ntawv rau kuv ntawm kuv tog hauv ncoo thiab sau hais tias: “Ib yam uas kuv pom tseeb thaum kuv nkag hauv lub tuam tsev yog kev nyab xeeb uas hnov ntawm sab ntsuj plig, uas nyob rau hauv. … Tib neeg mus tau rau hauv lub tuam tsev kom txais tau txoj kev tshoov siab.”¹ Nws hais yog lawm. Peb yeej txais tau kev tshoov siab thiab kev tshwm sim thaum peb mus hauv lub tuam tsev---thiab lub hwj chim daws tej kev cov nyom hauv peb lub neej. Nws tab tom kawm txog lub tuam tsev thaum nws rau siab ntso coj nws tsev neeg tej npe mus rau lub tuam tsev thaum nws ua kev cai raus dej thiab kev pom zoo uas yuav npaj nws mus txais lwm yam kab ke hauv lub tuam tsev, tej kev khi lus, thiab tej koob hmoov, rau nws tus kheej thiab rau cov neeg uas twb tso lub neej no tseg lawm.

Txwj Laug Russell M. Nelson qhia tias, “Yam li npaj ua cov tuam tsev rau tib neeg, tib neeg yuav tsum npaj siab txais yuav cov tuam tsev.”²

Thaum kuv nyeem txog tus Nom Maulaunais hauv Phau Ntawv Maumoos, kuv xav txog Maulaunais qhov uas nws ua tiav uas zoo tshaj plaws yog nws txoj kev npaj cov neeg Nifais kom tiv tau cov tub rog Lamas. Nws pab npaj nws cov neeg zoo zoo peb thiaj nyeem hais tias: “Tiam sis saib seb, [cov Neeg Lamas’] kev poob siab ntshai tshaj plaws vim [cov Neeg Nifais] tau npaj tos lawv, ib yam uas tsis tau paub dua ib zaug li.”³

Kab lus ntawd, “tau npaj tos … ib yam uas tsis tau paub dua ib zaug li,” ua rau kuv xav tsis thoob.

Peb yuav tsum npaj li cas rau peb tej koob hmoov dawb ceev hauv lub tuam tsev es thiaj li zoo tshaj? Tus Tswv qhia tias “Thiab hais dua, kuv yeej yuav muaj ib tug qauv ntawv txhua yam.”⁴ Cia peb xav txog ib tug qauv hauv vaj lug kub uas yuav pab peb npaj zoo dua. Maulaunais tej kev npaj rau cov yeej cuab siv tswv yim thiab kev rau siab ntso, thiab tus quav no yuav siv ib yam li no.

Kuv yeej nyiam zaj paj lug uas tus Cawm Seej hais txog tsib tug nkauj xwb uas muaj tswv yim thiab tsib tug uas tsis muaj tswv yim. Txawm tias zaj paj lug no hais txog txoj kev npaj tos rau qhov uas peb tug Cawm Seej yuav Rov Qab Los Zaum Thib Ob, peb yeej muab piv tau rau txoj kev npaj los txais tej koob hmoov hauv lub tuam tsev, uas yuav zoo kawg nkaus rau cov neeg uas ua tib zoo npaj.

Hauv Mathais 25 peb nyeem hais tias:

“Lub sij hawm ntawd [lub nceeg vaj ceeb tsheej] piv ib yam li kaum tus hluas nkauj uas taws teeb mus tos tus nraug vauv.

“Tsib tug tsis muaj tswv yim thiab tsib tug muaj tswv yim. …

“Cov uas muaj tswv yim, lawv nqa teeb thiab ib leeg npaj ib hwj nroj nqa mus.

“Twb lig lig lawm tus nraug vauv pheej tsis txawj tuaj, ces cov hluas nkauj txawm tsaug zog ncaws nruj nris.

“Thaum txog ib tag hmo txawm muaj ib lub suab hu nrov nrov hais tias, Tus nraug vauv tuaj lawm! Cia li tawm tuaj tos nws!

“Kaum tus hluas nkauj txawm sawv huv tib si, thiab nyias kho nyias lub teeb kom cig.

“Ces tsib tus uas tsis muaj tswv yim hais rau tsib tus uas muaj tswv yim hais tias, Thov muab nej cov roj faib me ntsis rau peb, rau qhov peb cov teeb roj tas lawm twb yuav tuag.

“Tsib tug uas muaj tswv yim teb hais tias, Tsis tau, nyob tsam tsis txaus rau peb thiab nej. Nej cia li mus nrhiav yuav tom khw rau nej.

“Thaum tsib tug uas tsis muaj tswv yim tab tom mus yuav roj lawm; tus nraug vauv txawm tuaj txog. Tsib tug muaj tswv yim uas twb xub npaj roj tseg lawm, txawm nrog tus nraug vauv mus noj tshoob hauv tsev, thiab kaw qhov rooj rau lawm.

“Tom qab ntawd tsib tug hluas nkauj uas tsis muaj tswv yim rov los txog. Lawv txawm hu hais tias, Tus Tswv, tus Tswv! Thov qhib qhov rooj rau peb!

“Tus nraug vauv teb hais tias, ’Kuv tsis paub nej!.”⁵

Kuv xav tias txhua tus, uas muaj siab mos siab muag, yeej yuav xav pab cov ntxhais hluas uas tsis muaj tswv yim tu siab. Thiab peb ib txhia xav hais rau lwm cov ntxhais hluas hais tias, “Nej puas kam faib ib qho ces sawv daws mam li zoo siab?” Tiam sis nej sim xav seb. Nov yog ib zaj dab neeg uas tus Cawm Seej tau qhia, thiab Nws yog tus uas hu lawv ua tsib tug uas “muaj tswv yim” thiab tsib tug uas “tsis muaj tswv yim.”

Thaum peb xav tias zaj paj lug no yog ib tug qauv rau kev npaj mus rau hauv lub tuam tsev, sim xav txog ib tug yaj saub hauv lub caij nyoog kawg cov lus thaum nws qhia tias “cov roj ntawm kev npaj siab ntawm sab ntsuj plig yog ib yam uas faib tsis tau rau lwm tus.”⁶ Thawj Tswj Hwm Spencer W. Kimball piav ntxiv seb yog vim li cas cov ntxhais hluas uas “muaj tswv yim” faib tsis tau lawv cov roj mus rau cov uas “tsis muaj tswv yim” thaum nws hais tias: “Kev koom txoj kev sib ntsib txais lub cim nco txog ua rau peb cov teeb muaj roj ntxiv, ib tee dhau ib tee, ib xyoos dhau ib xyoos. Kev yoo mov, tsev neeg kev thov Vajtswv, kev mus qhia tom tsev, kev tswj hwm tej uas peb lub cev ntshaw, kev tshaj tawm txoj moo zoo, kev kawm vaj lug kub—txhua yam uas peb rau siab ua yog ib tee roj uas ntxiv rau peb sab ntsuj plig. Kev ua siab zoo, kev them ib feem kaum, kev coj dawb huv thiab ua zoo … —tej no, kuj ua rau peb muaj roj txaus kom cig tau peb lub teeb thaum ib tag hmo.”⁷

Nej puas pom tus qauv rau kev npaj siab no—ib tee dhau ib tee—uas pab tau peb thaum peb xav seb peb yuav ua li cas thiaj haj yam rau siab ntso npaj siab mus txais tej kab ke dawb ceev rau peb tus kheej thiab rau lwm tus neeg? Muaj dua lwm yam dab tsi me me uas peb muaj peev xwm ua kom ntxiv tau roj rau peb lub teeb ntawm sab ntsuj plig.

Peb kawm los ntawm Txwj Laug Richard G. Scott tias “qhov uas yus ua neeg tsim nyog yog ib qho uas yus yuav tsum ua yus thiaj txais tau tej koob hmoov hauv lub tuam tsev. … Qhov uas yus muaj ib tug cwj pwm zoo los thaum yus rau siab ntso, xaiv qhov zoo raws li tus Xib Hwb zoo qhia.”⁸ Kuv nyiam lo lus rau siab ntso. Rau siab ntso txhais tau hais tias kom ua ruaj khov, tsis tu tsis tseg, thiab tas mus li. Nov yeej piav zoo zoo txog txoj kev tsim nyog tau!

Hauv phau Bible Dictionary ceeb toom peb tias, “Tsuas yog lub tsev thiaj li muaj piv tau rau qhov dawb ceev hauv lub tuam tsev.”⁹ Peb tej tsev los sis tsev kem puas zoo li ntawd? Ib tug ntxhais hluas hauv peb pawg ntseeg tuaj tom peb tsev tsis ntev tas lo no. Kuv paub tias nws tus nus nyuam qhuav mus ua tub txib rov qab los, ces kuv noog nws tias, es zoo li cas lawm xwb mas vim nws rov qab los tsev lawm. Nws teb tias, yeej zoo heev, tiam sis tej lub sij hawm nws hais kom peb kaw cov nkauj kom yau me ntsis. Nws hais tias, “Thiab cov nkauj twb tsis phem li!” Tiam sis tej zaum tsim nyog peb xyuas seb peb tej tsev puas yog tej chaw zoo rau peb npaj los hnov tus Ntsuj Plig. Thaum npaj peb lub tsev uas ib qho chaw uas tus Ntsuj Plig yuav xav nyob, peb thiaj yuav npaj siab los “nyob tsev” thaum peb mus rau hauv tus Tswv lub tsev.

Thaum peb npaj peb tus kheej kom peb tsim nyog mus hauv lub tuam tsev thiab ua raws li tej lus cog hauv lub tuam tsev, ces tus Tswv yeej “yuav muab ntau qhov koob hmoov ”¹⁰ rau peb. Kuv tus phooj ywg zoo, Bonnie Oscarson nyuam qhuav piav ib qho vaj lug kub kom meej heev thaum nws hais tias, “Thaum uas yuav tsum ua kom tau ntau, yeej yuav tsum muab kom ntau thiab.”¹¹ Kuv ntseeg li ntawd thiab! Vim peb mus hauv lub tuam tsev kom peb txais tau tej koob hmoov nyob mus ib txhis, peb yuav tsum to taub tias yuav tsum yog peb tsim nyog es thiaj li yuav tau tej koob hmoov hauv. Thiab ntxiv Txwj Laug Nelson qhia tias: “Vim lub tuam tsev yog tus Tswv lub, ces tej kev cai ua yuav tau coj thiaj mus tau rau hauv yuav tsum yog raws li Nws hais. Thaum yus mus hauv yus yog Nws qhua. Yog ib qho zoo heev yog yus muaj daim ntawv tso cai nkag tuam tsev thiab ua rau yus paub tias yus mloog Vajtswv thiab Nws cov yaj saub cov lus.”¹²

Cov navkilas uas zoo tshaj plaws thiab cov tub ntxhais kawm ntawv uas keej heev yuav tsum siv ntau xuab moos thiab ntau hnub thiab ntau lim tiam thiab ntau hlis thiab tej zaum ntau xyoo thiaj npaj tau zoo. Txhua hnub yuav tau npaj ib tee dhau ib tee lawv thiaj ua tau cov zoo tshaj plaws. Yeej ib yam li no, rau cov uas tsim nyog tau kev tsa nto hauv lub nceeg vaj xilethi-aus, lawv yuav tsum coj tej kev cai uas zoo tshaj thiab mloog lus thaum lawv xyaum ua neeg mloog lus ib hnub dhau ib hnub thiab ib tee dhau ib tee.

Thaum peb rau siab ntso thiab niaj hnub ntxiv roj, ib tee dhau ib tee, rau peb lub teeb ntawm sab ntsuj plig, thaum ua tej yam me me no, peb cov teeb thiaj yuav “ci laim lug”¹³ vim peb tau ua tib zoo npaj siab. Kuv tus txiv, uas yog ceg txheem ntseeg ib tug thawj tswj hwm, nyuam qhuav hais tias nws paub thaum ib tug neeg twg tau npaj thiab ua neeg tsim nyog mus hauv lub tuam tsev vim “lawv ua rau chav tsev ntawd ci ntsa iab” thaum lawv tuaj txais lawv daim ntawv tso cai nkag tuam tsev.

Thaum Yauxej Xamiv thov Vajtswv muab lub tuam tsev Kirtland fij tseg, nws thov tus Tswv tias “kom txhua tus ua tuaj dhau lub taw rooj ntawm tus Tswv lub tsev kom lawv yuav hnov Nws lub hwj chim.....kom lawv txoj kev ntseeg loj hlob, thiab txais tau tus Vaj Ntsuj Plig Dawb Huv,...thiab npaj kom tau txhua yam ua xav tau.”¹⁴

Kuv thov Vajtswv hais tias peb yuav npaj siab mus hauv lub tuam tsev ntau tshaj ib zaug xwb. Thov peb npaj kom tsim nyog tau tej kab ke ib qho zuj zus mus thiab ceev txhua txoj kev sib cog lus tas siab tas ntsws. Yog peb ua li no, kuv paub tias peb yeej yuav tsim nyog txais tej lus cog tseg ntawm tus Ntsuj Plig Dawb Huv thiab tus Tswv lub hwj chim rau hauv peb tej tsev thiab peb tej neej. Los ntawm Yexus Khetos lub npe, amees.