Pojak ilo juon Wāween Jan̄in kar Jeļā Kake

Ke leddik eo nejim̧ ediktata eaar jepļaaktok ālkin an jikuuļ raan eo, iaar kajjitōk ippān, “Ejet jikuuļ?”

Eaar uwaak, “Ekar em̧m̧an.”

Jibbon̄in raan eo juon, ijoke, ke ij karuji n̄an jikuuļ, eaar nukwij pā ko pein im ba, “Em̧ōj aō jikuuļ!” Ilo m̧ool iaar jab kōpooj e ak kar kōmeļeļeiki ke etal n̄an jikuuļ ejjab juon men ej waļo̧k wōt juon alen ak ej aikuj in jibadōk ļo̧k jikuuļ laļem raan ilo juon wiik elōn̄ iiō.

Ilo am ļōmņak kōn pedped in katak kōn kōppopo, kōļmenļo̧kjeņ ippa kōn jekjek in. Kwoj jijet ilo celestial ruum̧ eo ilo tam̧peļ im lo lim̧aro im ļōm̧aro pālele ilo aer diwōj deļo̧n̄ ilo aer kōttar n̄an m̧are n̄an iien im n̄an indeeo. Lieo pālele ej deļo̧n̄e ļo̧k celestial ruum̧, jibwe pein ļeo karejeran. Ej kōņak juon nuknuk in tam̧peļ eo eaiboojoj im em̧m̧an, ekarbab, mejen etōn̄ dikdik ilo mejen. Ebolemen ak ejjab inepata. Ej jijet, reito-reitak, innām ejebooļ kōn inem̧m̧an. Dānin kōm̧jaļļaļ ej waļo̧k kōn inem̧m̧an im aiboojoj eo ej jim̧or pād ie im kain̄i eo ekwojarjar eaar kōttare im kōn riākwe eo an ilo mour. Im paoktokin ekōm̧m̧an bwe en kōļmenļo̧kjeņ, “Ewi jon̄an aō m̧ōņōņō bwe in pād ilo m̧wiin m̧ōn Irooj rainin, pojak n̄an jinoe juon iaļ indeeo ippān juon m̧ōtta eo ejitenbōro indeeo.” Eļap ļo̧k anpojakjen juon m̧akūtkūt.

Leddik eo jibūm̧ ejitenbōro eaar likūt juon aō peba ilo pet eo pitō me jidikin ej ba: “Juon men me eaar kailbōk eō ke iaar deļon̄e tam̧peļ eo ej aenōm̧m̧an eo, jetōb eo em̧m̧an ej pād ijo. … Armej remaron̄ etal n̄an tam̧peļ eo n̄an bōk im̧we.”¹ Ej m̧ool. Jemaron̄ bōk im̧we im m̧adenļo̧k ilo tam̧peļ eo―im barāinwōt kajoor n̄an jutak ņae anjiwiwi ko an mour in. Ta eo ej ekkatak kōn tam̧peļ āinwōt bōk koņaan bōk etan āt ko ilo baam̧le eo an make n̄an kōm̧m̧an peptaij ko im kapene ko naaj kōpooj e n̄an bōk kain̄i ko an tam̧pel, bujen ko, im kōjeram̧m̧an ko, jim̧or kōn e make im ro ilo turājet in rōn̄ōl.

Elder Russell M. Nelson eaar ba, “Āinwōt an tam̧peļ ko pojak n̄an armej ro, armej ro raikuj in kōpooj er make n̄an tam̧peļ ko.”²

Ilo aō bar riit kōn Kapen Moronai ilo Bok in Mormon, ij keememej ļo̧k juon iaan tōprak ko reļļap an Moronai ilo an kōpooj ri Nipai ro n̄an jutak peran ņae ritariņae ro an ri Leman ro. Eaar lukkuun kepooj armej ro an ilo ad riit, “Lo, n̄an [ri Leman ro] aer bwilōn̄ eļap, [ri Nipai ro] raar pojak n̄an er, ilo juon wāween jan̄in kar jeļā kake. ”³”

Naan ne, “raar pojak … ilo juon wāween jan̄in kar jeļā kake,” eaar lukkuun ļijur aō.

Ekōjkan an em̧m̧an ļo̧k ad pojak n̄an kōjeram̧m̧an ko rekwojarjar an tam̧peļ? Irooj eaar ba bwe Enaaj letok n̄an kōj juon jon̄ak in aolep men otemjeļo̧k.⁴ Jen ļōmņak kōn juon jon̄ak in jeje ko rekwojarjar n̄an jipan̄ em̧m̧an ļo̧k ad kōppopo. Kōppopo eo an Moronai ņae rikōjdāt ro eaar bōk kije im kijenmej, im ilo jon̄ak in enaaj bar jerbal.

Ijamin m̧ōk kōn būrabōļ eo em̧m̧an Rilo̧mo̧o̧r eaar kwaļo̧k kōn virgin ro ļalem rimāletlet im ļalem ribwebwe. Men̄e būrabōļ in ej eokļo̧k kōppopo n̄an Itok eo Kein Karuo an ad Rilo̧mo̧o̧r, jej aikuj barāinwōt keidi tok n̄an kōppopo n̄an kōjeram̧m̧an ko an tam̧peļ, me emaron̄ āinwōt juon kannin jetōb n̄an ro rej lukkuun kōppopo.

Ilo Matu 25 jej riit:

“Ilo iien eo aelōn̄ in lan̄ enaaj āinwōt jon̄oul virgin, rej bōk lamp ko aer, im ilo̧k bwe ren wōnm̧ae ļeo pālele.

“Ļalem iaer re mālōtlōt, im ļalem iaer re bwebwe. …

“[A ro] re mālōtlōt rej bōk oil ilo aer kein ettein̄ ņa ippā lamp ko aer.

“Ke ļeo pālele e ru mwij tok, er otemjej rej mejki im kiki.

“Im n̄e lukkuun bon̄, juon lam̧ōj, ‘Lo, ļeo pālele! Kom̧win itōn wōn mae e,

“Innām virgin ro otemjej rej jerkak, im kōm̧m̧ani lamp ko aer.

“Im ro re bwebwe re ba n̄an ro re mālōtlōt, ‘Kom̧win letok n̄an kōm jān ami oil, bwe lamp ko am re nan̄in kun.

“A ro re mālōtlōt re uwaak im ba, ‘Bōlen kōm jāmin bwe kake, a kom̧win ilo̧k n̄an ippān ro rej wia im wiaik ami.

“Im ke raar ilen wiaik, ļeo pālele ej itok, im ro rej dedeļo̧k rej deļo̧n̄ ippān n̄an kwōjkwōj in pālele, im e kiil aor.

“Tokālik virgin ro jet rej barāinwō itok im ba, ‘Irooj, irooj, kwōn kapeļļo̧k n̄an kōm.

“A e uwaak im ba, ‘Em̧ool Ij ba n̄an kom̧, I jaje kom̧.”⁵

Ijjab jeļā n̄e ewōr jabdewōt, eļaptata ro ilubwiljin ro ettā būruweer, ro rejjab būrom̧ōj kōn jiron̄ ro rebwebwe. Im jet iaad remaron̄ ba n̄an jiron̄ ro jet, “kwon ke jab ajej bwe aolep ren m̧ōņōņō?” Ak ļōmņak kake. En̄in ej bwebwenato eo Rilo̧mo̧o̧r eaar kwaļo̧ke, im E eo eaar kūr “rimālōtlōt ro” ļalem im ļalem iaer raar “bwebwe.”

Ilo ad ļōmņak kōn būrabōļ in āinwōt juon jon̄ak in kōppopo n̄an tam̧peļ, ļōmņak kōn naan ko an rikanaan ilo raan-ko āliktata me eaar kwaļo̧k bwe “oil eo kar kōpooj eban maron̄ ajije.” ⁶Būreejtōn Spencer W. Kimball eaar lukkuun kalikar etke jiron̄ ro ļalem “remālōtlōt” raar jab ajije oil in lamp ko aer ippān ro “rebwebwe” ilo an kar ba: “Pād ilo kweilo̧k ko an kwojkwoj ej kobaik tok oil n̄an lamp ko ad, jidik kōn jidik kajjojo iiō. Jitlo̧k, jar an baam̧le, jerbal in loļo̧k m̧oko an em̧m̧aan ro, kōjparok mour ko ad, kwaļo̧k ko̧jpeļ eo, katak jeje ko rekwojarjar―rej kajjojo jerbal ekkar n̄an wūjļepļo̧k im pokake n̄an likūt ilo ad. Jerbal in jouj, kōļļā jortak im juon m̧ōttan jon̄oul rej letok kōļmenļo̧kjeņ im m̧akūkūt  … ―men kein barāinwōt, eletok aorōk eo n̄an oil eo me jemaron̄ kanne n̄e lamp ko ad rekun likon bon̄.”⁷

Komaron̄ ke lo jon̄ak in kōppopo in―jidik kōn jidik―me emaron̄ jipan̄ kōj ilo ad ļōmņak wāween ad maron̄ kijenmej ilo ad kōppopo n̄an bōk kain̄i ko rekwojarjar n̄an kōj make im ro jet? Ta men ko reddik im men ko repidodo me jemaron̄ kōm̧m̧ani n̄an kobaik pilil in oil ko n̄an lamp in kōppopo eo ad?

Jej ekkatak jān Elder Richard G. Scott bwe “erreeo an juon make eaorōk n̄an m̧ōņōņō kōn kōjeram̧m̧an ko an tam̧peļ. … Erreeo, m̧wil eo em̧m̧an tata ilo mour bolemen, kālet ko rejim̧e rej io̧ļepen katak ko an M̧ajta eo.”⁸ Ij iakwe naan in jejjet. N̄an jejjet ej pojak, jim̧we, im make ļo̧k. Kōmeļeļe eo eļap n̄an pedped in ej erreeo!

Jej loe ilo Bible Dictionary eo, “M̧weo wōt maron̄ keidi ippān tam̧peļ ilo kwojarjar.”⁹ Im̧oko im̧ōd ak abaatmen ko ad rekkar ke kōn naan in? Juon jiron̄ ejitenbōro ilo ward eo am̧ eaar itok n̄an m̧weo im̧ōm̧ jem̧aan ļo̧k. Kar jeļā bwe ļaddik eo jein ej kar ro̧o̧l jen mijen eo an, iaar kajjitōk ippān ta oktak eo ilo an ro̧o̧l tok. Eaar ba eļap, ak ekkā an ba bwe jen kadik ļo̧k al ko. Eaar ba, “men̄e ejjabnanaal eo!” Emaron̄ wōr tokjen n̄an kōj n̄an etale kōj make kiiō innām n̄an lukkuun lale kapijuknen ko ad bwe ren jikin ko repojak n̄an en̄jake Jetōb. Ilo ad kōpooj kapijuknen ko ad n̄an jikin ko ijo Jetōb emaron̄ pād, ilo ad pojak n̄an en̄jake eļapļo̧k ilo “kapijuknen” n̄e jej deļo̧n̄e ļo̧k m̧weo im̧ōn Irooj.

Ilo ad kepooj kōj make ilo erreeo n̄an deļo̧n̄e tam̧peļ eo im lukkuun tiljek n̄an bujen ko an tam̧peļ, Irooj enaaj lutōkleplep elōn̄ kōjeram̧m̧an ko iood.¹⁰ Jem̧aan ļo̧k eo m̧ōtta em̧m̧an Bonnie Oscarson eaar ukōt naan eo ilo eoon in ilo an kar ba, “Ijo eļap aikuj ie, eļap ļeļo̧k.”¹¹ Iaar lukkuun errā. Kōnke jej itok n̄an tam̧peļ eo n̄an bōk kōjeram̧m̧an ko indeeo, ejjab aikuj kam̧weeir kōj kōn juon jon̄ak eļap ej bōk n̄an kōrbab n̄an bōk kōjeram̧m̧an kein. Elder Nelson eaar ba: “Kōnke tam̧peļ ej m̧weo im̧ōn Irooj, Jon̄ak ko n̄an deļōn̄e rej eletok in E. Juon eo ej deļo̧n̄e. N̄an bōk juon peba in mālim an tam̧peļ ej juon men eļap tokjeņ im ej kōkaļļein pokake n̄an Anij im rikanaan ro An.”¹²

Rikkure ro rebun̄bun̄ tata im rijikuuļ in taktō ro ilo university rej joļo̧k elōn̄ awa ko im raan ko im wiik ko im allōn̄ ko im aaet iiō ko n̄an kōppopo. Kajjojo iien kōppopo ebōk jidik iien n̄an er n̄an aer tōpar ijo. Āinwōt, ro rej kōtmene n̄an kōkarbab n̄an mour ijo eutiej tata ilo celestial kingdom rej ro rej mour kake juon jon̄ak eo eutiej ļo̧k an pokake me ej itok ilo katak kōn erreeo eo an pokake jān raan n̄an raan im jidik kōn jidik.

Ilo an jejjet im tiljek ad kanne oil, jidik kōn jidik, n̄an kaan in lamp ko ad, kōm̧m̧ani men ko reddik im reddik, jemaron̄ bōk lamp ko ad “rerreeo im okmāneen”¹³ kōn eļap kōppopo. Ļeo ippa, eo ej juon stake būreejtōn, eaar kwaļo̧k bwe emaron̄ aolep iien jiron̄ ro jet n̄an kōppopo im erreeo n̄an deļo̧n̄e tam̧peļ eo, kōnke “raar kōmeram̧ ruum̧ eo” n̄e rej itok im kappok aer peba in mālim an tam̧pel.

Ilo jar in aje eo an Kirtland Temple, Rikanaan Joseph Smith eaar kajjitōk ippān Irooj bwe aolep ro rej deļo̧n̄e im̧weo im̧ōn Irooj remaron̄ en̄jake kajoor eo An, bwe ren maron̄ kajoor ilo E, im bōk kam̧ool eo an Jetōb Kwojarjar, im pojak n̄an bōk kajjojo menin aikuj.¹⁴

Ej aō jar n̄an kōj, etal n̄an tam̧peļ enaaj ļapļo̧k jen juon alen. Kōm̧m̧an bwe jen kōppopo ilo erreeo n̄an bōk kain̄i ko an lo̧mo̧o̧r jidik kōn jidik im ilo ad dāpij wōt bujen ko. Ilo ad kōm̧m̧ane āindein, Ijeļā jenaaj karbab n̄an bōk kōjeram̧m̧an ko kar kallim̧ur kaki kōn jem̧jerā eo an Jetōb Kwojarjar im kajoor eo an Irooj ilo im̧oko im̧ōd im mour ko ad kajjojo. Ilo etan Jisōs Kraist, amen.