Txais Lus Tim Khawv txog Qhov Kaj thiab Qhov Tseeb
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Nej zaj lus tim khawv txog qhov kaj thiab qhov tseeb yuav foom koob hmoov rau nej thiab nej cov poj koob yawm txwv nyob hauv lub neej no, thiab nej yuav muaj nej zaj lus tim khawv mus ib txhis.
Thaum kuv yog ib tug kws tsav nyab hoom, kuv tau siv sij hawm ntau hla tej teb chaws thiab tej dej hiav txwv thaum tsaus ntuj. Thaum kuv saib lub ntuj ceeb tsheej ntawm qhov chaw tsav nyab hoom lub qhov rais, qhov tseem ceeb yog Kab Lig Ntuj, uas ua rau kuv xav tsis thoob txog txhua yam uas Vajtswv tau tsim—tej uas cov vaj lug kub qhia hais tias yog tej ntiaj teb suav tsis txheeb.1
Ze li ib puas xyoo tas los cov kws saib hnub qub feem coob xav tias Kab Lig Ntuj yog tib pawg hnub qub nyob saum ntuj ceeb tsheej.2 Lawv xav tias txhua yam nyob dhau Kab Lig Ntuj yog ib tshav loj uas tsis muaj dab tsi, ib qho chaw khoob lug—txias thiab tsis muaj hnub qub, tsis muaj qhov kaj thiab tsis muaj txoj sia.
Lawv kho tej twj saib hnub qub kom muaj zog zuj zus tuaj—tsis hais cov twj saib hnub qub uas lawv xa mus nyob saum ntuj—ces cov kws saib hnub qub pib to taub qhov tseeb uas ua rau lawv xav tsis thoob: lub ntuj khwb no yeej loj tshaj dua cov neeg tau xav tas los, thiab muaj tej kab lig ntuj suav tsis txheeb uas nyob deb kawg, txhua pawg hnub qub muaj hnub qub ntau kawg nkaus.3
Tsis tau siv sij hawm ntev, es peb txoj kev to taub txog lub ntuj khwb no twb hloov kiag.
Niaj hnub no peb pom tau tej pawg hnub qub uas nyob deb heev.4
Peb paub tias tej hnub qub nyob ntawd.
Cov hnub qub ntawd twb nyob tau ntev lawm.
Tiam sis ua ntej tib neeg muaj tej twj uas txawj pom deb pom qhov kaj nyob saum ntuj thiaj pom tau tej pawg hnub qub, peb tsis tau ntseeg tias yuav muaj li ntawd.
Qhov uas lub ntuj khwb loj heev tsis tau hloov kiag, tiam sis peb txoj kev txawj saib thiab to taub qhov tseeb no twb hloov ntau heev. Thiab vim muaj qhov tseeb ntawd, tib neeg thiaj paub txog tej yam uas peb ib txwm tsis tau xav txog.
Nyuaj rau Peb Ntseeg tej uas Peb Tsis Pom
Cia li xav seb hais tias nej txawj rov qab mus rau yav tas los thiab sib tham nrog cov neeg uas nyob ib txhiab los yog ib puas xyoo dhau los. Cia li xav seb yuav zoo li cas yog nej piav rau lawv txog tej lub tshuab uas muaj niaj hnub no uas peb xav tias txhua tus muaj. Piv txwv hais tias, cov neeg no yuav xav dab tsi yog peb qhia lawv txog cov nyab hoom loj loj, cov qhov cub microwave, tej lub tshuab ntawm tes uas muaj ntaub ntawv ntau kawg nyob haud, thiab cov video txog peb cov xeeb ntxwv ua peb faib tau rau cov neeg coob nyob thoob plaws lub ntiaj teb?
Ib txhia yuav ntseeg peb. Feem ntau yuav thuam peb, cem peb, los yog xav ua rau peb mob. Ib txhia yuav siv tej tswv yim, kev txawj ntse, thiab qhov tseeb uas lawv paub kom qhia hais tias peb tsis paub tseeb, peb ruam, los yog peb txaus ntshai. Tej zaum lawv yuav rau txim rau peb vim peb sim coj lwm tus ua yuam kev.
Tiam sis, cov neeg no yog cov uas ua yuam kev. Tej zaum lawv muaj siab zoo thiab xav ua ncaj ncees. Tej zaum lawv xav tias lawv paub tseeb tiag tiag. Tiam sis lawv yeej pom tsis meej vim lawv tseem tsis tau txais qhov kaj tag nrho ntawm qhov tseeb.
Kev Cog Lus tias Yuav Muaj Qhov Kaj
Zoo li tib neeg peb txhua tus xav tias peb paub qhov yog txawm peb tsis paub. Yog li ntawd, puas muaj kev cia siab tias peb yuav paub qhov tseeb? Puas yog peb yuav tsis paub qhov tseeb hauv peb lub neej vim muaj tswv yim sib txawv ntau heev thiab peb cia siab rau peb txoj kev to taub thiab kev ntseeg xwb?
Peb puas nrhiav tau qhov tseeb?
Lub hom phiaj ntawm kuv tej lus yog tshaj tawm txoj moo zoo siab uas Vajtswv—Ib Tsoom Tub Rog tus Tswv uas paub txhua yam kev tseeb—tau cog lus rau Nws cov me nyuam hais tias lawv muaj peev xwm paub qhov tseeb ntawm lawv tus kheej.
Cia li xav txog los lus cog tseg tseem ceeb npaum li cas:
Vajtswv tus uas Nyob Kav Ib Txhis thiab Siab Tshaj Plaws, tus uas Tsim tag nrho lub ntuj khwb no, yuav hais lus rau cov uas thov Nws nrog ib lub siab dawb paug thiab thov tiag tiag.
Nws yuav hais lus rau lawv nyob hauv tej zaj npau suav, tej kev ua yog toog, thiab tej kev xav.
Nws yuav siv ib txoj kev hais lus rau lawv uas tsis yog los ntawm neeg los kom lawv paub tseeb. Nws yuav coj lawv kev thiab teb kom pab lawv lub neej.
Yeej yuav muaj ib txhia uas saib tsis taus thiab hais tias yeej muaj tsis tau li ntawd, lawv hais tias yog muaj ib tug Vajtswv, nws yuav muaj tej yam tseem ceeb dua li mloog thiab teb ib tug neeg txoj kev thov Nws.
Tiam sis kuv qhia qhov no rau nej: Vajtswv yeej hlub nej. Nws yuav mloog, thiab Nws yuav teb nej tej lus nug. Raws li txoj kev thiab lub sij hawm uas Nws pom zoo Nws yuav teb nej tej lus thov, thiab yog li ntawd, nej yuav tsum kawm mloog Nws lub suab. Vajtswv xav kom nej rov qab mus cuag Nws, thiab tus Cawm Seej yog txoj kev ntawd.5 Vajtswv xav kom nej kawm txog Nws Leej Tub, Yexus Khetos, thiab nyob kaj siab lug thiab muaj kev xyiv fab uas los ntawm txoj kev ua thwj tim.
Kuv cov phooj ywg zoo, muaj ib qho yooj yim uas nej ua tau kom sim seb tej no puas muaj tseeb, nrog kev cog lus ntawm Vajtswv, uas muaj nyob hauv phau vaj lug kub rau txhua tus txiv neej, poj niam thiab me nyuam uas muaj siab xav ua:
Qhov thib ib, nej yuav tsum tshawb nrhiav Vajtswv txoj lus. Qhov no txhais hais tias nej nyeem cov vaj lug kub thiab kawm txog cov yaj saub tej lus txog Yexus Khetos txoj moo zoo tsis hais cov yaj saub thaum ub thiab cov yaj saub niaj hnub nim no—tsis yog vim nej xav ua xyem xyav los yog cem tiam sis yog vim nej xav paub qhov tseeb tiag. Xav txog tej yam uas nej yuav hnov hauv nej lub siab, thiab npaj nej lub siab kom txais tau qhov tseeb.6 “Yog tsis muaj dab tsi ntau tshaj li uas nej xav los ntseeg, cia lub siab xav ntseeg no ua hauj lwm nyob hauv nej, mus txog thaum nej … muab tau ib qho chaw rau [Vajtswv txoj lus] nyob.”7
Qhov thib ob, nej yuav tsum xav txog thiab rau siab xav ntseeg,8 thiab ua Vajtswv tsaug rau tus Tswv txoj kev hlub tshua rau Nws cov me nyuam txij thaum Adas nyob los txog peb lub caij nyoog thaum nws muab cov yaj saub, cov pom tau, thiab cov qhia kev tshwm sim kom coj Nws lub Koom Txoos thiab pab peb nrhiav kev rov qab mus cuag Nws.
Qhov thib peb, nej yuav tsum nug nej Leej Txiv Saum Ntuj Ceeb Tsheej, los ntawm Nws Leej Tub, Yexus Khetos, lub npe kom Nws qhia rau nej tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj tseeb. Thov nrog ib lub siab dawb paug, xav paub tiag tiag, thiab muaj kev ntseeg Khetos.9
Kuj muaj qhov thib plaub, uas tus Cawm Seej qhia peb hais tias: “Yog leej twg txaus siab ua raws li Vajtswv lub siab nyiam, tus ntawd yuav paub hais tias tej lus uas kuv qhia no yog Vajtswv kom kuv hais los sis yog kuv hais kuv xwb.”10 Ua lwm yam lus hais, thaum nej sim seb txoj moo zoo tej ntsiab cai puas muaj tseeb, nej yuav tsum ua raws li tej ntsiab cai ntawd ua ntej. Ua raws li tej lus qhuab qhia ntawm txoj moo zoo thiab tej lus qhia ntawm lub Koom Txoos sim seb puas muaj tseeb. Muaj siab dawb paug ua thiab muab siab rau ntseeg Vajtswv.
Yog nej ua li no, Vajtswv cog lus rau nej—Nws tej lus yeej yog kev khi lus11—hais tias Nws yuav qhia qhov tseeb rau nej los ntawm tus Vaj Ntsuj Plig Dawb Huv lub hwj chim. Nws yuav muab qhov kaj ntxiv kom nej pom tau hauv qhov tsaus ntuj thiab ua tim khawv txog tej yam uas tib neeg hauv lub ntiaj teb yeej tsis txawj to taub.
Ib txhia hais tias nyuaj ua tej yam no los yog tsis tas siv zog ua li ntawd. Tiam sis kuv hais tias ib zaj lus tim khawv txog txoj moo zoo thiab lub Koom Txoos yog qhov tseem ceeb tshaj plaws uas koj txais tau hauv lub neej no. Ib zaj lus tim khawv yuav foom koob hmoov thiab coj nej hauv lub neej no, thiab yuav pab nej lub neej nyob mus ib txhis.
Yuav Tsum Muaj tus Ntsuj Plig Kom To Taub tej Yam Los ntawm tus Ntsuj Plig
Cov kws tshawb fawb twb tsis to taub kab lig ntuj loj npaum li cas mus txog thaum lawv tej cuab yeej muaj zog txaus kom pom qhov kaj loj zog ces lawv thiaj yuav to taub qhov tseeb ntau dua li qhov qub.
Tus Thwj Tim Povlauj qhia ib lub ntsiab cai li no txog tej kev txawj ntse ntawm sab ntsuj plig. Nws sau rau cov Neeg Khauleethaus hais tias, “Tus neeg ntiaj teb yeej tsis tau txais tej uas Vajtswv tus Ntsuj Plig pub, rau qhov lawv pom hais tias tej ntawd tsis muaj qab hau dab tsi, thiab lawv tsis to taub txog tej ntawd, rau qhov lawv tsis muaj Vaj Ntsuj Plig lawv thiaj tsis to taub tej ntawd.”12
Ua lwm yam lus hais, yog nej xav paub qhov tseeb ntawm sab ntsuj plig, nej yuav tsum siv tej cuab yeej yog lawm. Nej yuav tsis to taub qhov tseeb ntawm sab ntsuj plig yog nej tsis siv tej cuab yeej uas ntsuas tau sab ntsuj plig.
Tus Cawm Seej tau qhia rau peb hauv peb lub caij nyoog hais tias yam uas los ntawm Vajtswv los, yog qhov kaj; thiab tus uas txais qhov kaj, thiab ua raws li Vajtswv hais ntxiv mus, txais qhov kaj ntxiv; thiab qhov kaj ntawd yuav ci kaj zus kaj zus mus txog hnub zoo tag nrho.13
Peb yim tso siab rau Vajtswv, qhov kaj yim loj tuaj hauv peb sab ntsuj plig. Thiab txhua zaus peb rau siab nrhiav qhov kaj ntawd, peb qhia rau Vajtswv hais tias peb twb npaj txais qhov kaj ntxiv. Ua rau tej yam tsis meej, tsaus ntuj nti, thiab nyob deb thaum yav tas los hloov los ua tej yam meej, kaj zuj zus, thiab nyob ze.
Tiam sis zoo ib yam li ntawd, yog tias peb tawm ntawm qhov kaj ntawm txoj moo zoo, peb qhov kaj yuav pib ploj zuj zus—tsis yog ploj thaum ib hnub xwb tiam sis ploj zuj zus mus—mus txog thaum peb xav txog peb lub neej thiab tsis to taub vim li cas peb twb ntseeg hais tias txoj moo zoo muaj tseeb. Tej zaum ua rau peb xav tias tej yam uas peb paub dhau los yog kev ruam xwb vim qhov uas meej thaum yav tas los twb plooj thiab nyob deb zuj zus.
Povlauj thiaj qhia hais tias zaj xov ntawm txoj moo zoo twb tsis tseem ceeb rau cov uas piam sij, “tiam sis [rau cov uas]txais kev cawm seej [txoj moo zoo] yog Vajtswv lub hwj chim.14
Lub Koom Txoos Tsis Ntsuas Neeg lub Siab
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog ib qho chaw rau cov neeg uas muaj tej zaj lus tim khawv tsis hais muaj zog npaum li cas los yog. Muaj tej tug mej zeej ntawm lub Koom Txoos uas lawv zaj lus tim khawv ruaj khov thiab ci ntsa iab nyob hauv lawv. Lwm tus tseem nrhiav xav paub ntawm lawv tus kheej. Lub Koom Txoos yog ib lub tsev rau txhua tus koom ua ke, txawm lawv zaj lus tim khawv muaj zog npaum li cas. Kuv tsis paub txog ib daim uas peb muab dai ntawm peb tej tsev sib ntsib uas hais tias, “Nej zaj lus tim khawv yuav tsum siab npaum li no kom thiaj muaj cai nkag hauv.”
Lub Koom Txoos tsis yog ib qho chaw rau neeg zoo tag nrho tiam sis yog ib qho chaw pab neeg “los cuag Khetos, thiab ua kom zoo tshaj plaws [dhau los ntawm] nws.”15 Lub Koom Txoos no yog ib qho chaw rau neeg zoo li nej thiab kuv. Lub Koom Txoos yog ib qho chaw uas tos txais thiab pab neeg, tsis yog ib qho chaw uas ntiab neeg tawm los yog cem lawv. Yog ib qho chaw uas peb ib leeg ncav tes pab thiab txhawb nqa ib leeg thaum peb nrhiav qhov tseeb.
Thaum kawg, peb txhua tus nrhiav Vajtswv txoj kev kaj thaum peb taug kev ua Nws cov thwj tim. Peb tsis rau txim rau lwm tus vim lawv tsis muaj qhov kaj ntau; tiam sis peb tu qhov kaj kom mus txog thaum qhov kaj ci ntsa iab, meej thiab tseeb.
Kev Cog Lus rau Txhua Tus
Xav kom peb paub tias kev txais ib zaj lus tim khawv tsis yog ib qho uas peb yuav siv ib feeb, ib teev, los yog ib hnub xwb. Tsis yog yus ua ib zaug xwb es yus thiaj tau. Qhov uas peb nrhiav qhov kaj ntawm sab ntsuj plig yog ib qho uas siv tag nrho peb lub neej ua.
Nej zaj lus tim khawv txog Vajtswv Leej Tub thiab Nws lub Koom Txoos uas tau muab txum tim rov qab los, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, tej zaum yuav tsis los rau nej sai sai, tiam sis kuv cog lus rau nej tias, yog nej ua tej yam nej yuav tsum ua, ces nej yeej yuav txais tau.
Thiab yuav muaj koob meej heev.
Kuv ua tim khawv rau nej tias qhov tseeb ntawm sab ntsuj plig yuav puv nej lub siab thiab coj qhov kaj rau nej sab ntsuj plig. Yuav ua rau nej txais kev txawj ntse tseeb thiab kev xyiv fab thiab kev kaj siab lug. Kuv tau txais tej yam no los ntawm tus Vaj Ntsuj Plig Dawb Huv lub hwj chim.
Ib yam li cov vaj lug kub thaum ub cog lus, Vajtswv tus Ntsuj Plig yuav ua rau nej xav hu zaj nkauj ntawm kev hlub uas txhiv dim,16 tsa muag saib ntuj ceeb tsheej, thiab tsa suab qhuas Vajtswv tus uas Siab Tshaj Plaws, tus uas Tiv Thaiv nej, tus uas nej Cia Siab rau, tus uas Pov Hwm nej, nej Leej Txiv. Tus Cawm Seej cog lus tias yog nej nrhiav, ces nej yuav nrhiav tau.17
Kuv ua tim khawv tias qhov no muaj tseeb. Yog nej nrhiav Vajtswv txoj kev tseeb, ces qhov uas tam sim no nej pom tsis meej, qhov uas nyob deb mas nej yuav pom meej zuj zus tuaj, thiab yuav los nyob ze hauv nej lub siab dhau los ntawm Vajtswv txoj kev tshav ntuj. Vajtswv yuav muab tej yam zoo kawg nkaus ntawm sab ntsuj plig, uas nej ib txwm tsis tau pom tshwm sim rau nej.
Kuv ua tim khawv hais tias qhov kaj ntawm sab ntsuj plig yog ib qho uas Vajtswv txhua tus me nyuam txais tau. Qhov kaj no yuav ua rau nej to taub zoo, kho nej lub siab thiab ua rau nej muaj kev xyiv fab. Kuv cov phooj ywg, tsis txhob sej tsis txhob tos kom ntxiv zog rau nej zaj lus tim khawv txog Vajtswv txoj hauj lwm, uas yog txoj hauj lwm ntawm qhov kaj thiab qhov tseeb.
Nej zaj lus tim khawv txog qhov kaj thiab qhov tseeb yuav foom koob hmoov rau nej thiab nej cov poj koob yawm txwv nyob hauv lub neej no, thiab nej yuav muaj nej zaj lus tim khawv mus ib txhis, nyob hauv tej lub ntiaj teb uas suav tsis txheeb. Kuv ua tim khawv txog qhov no thiab thov Vajtswv foom koob hmoov rau nej los ntawm Yexus Khetos lub npe amees.