2010–2019
Koom Siab Mus Cawm Neeg
October 2014


Koom Siab Mus Cawm Neeg

Yog peb xav pab ua tus Cawm Seej tej hauj lwm, peb yuav tsum koom siab koom ntsws ua hauj lwm ua ke. Txawm muaj hauj lwm dab tsi los, txhua leej txhua tus yeej tseem ceeb.

Feem ntau peb hnov Thawj Tswj Hwm Thomas S. Monson hais tias, “Ncav tes los pab.”1 Ua rau kuv xav txog ib zaj los ntawm Phau Tshiab. Yog ib qho piv txwv txog qhov uas cov mej zeej thiab cov tub txib muaj peev xwm koom siab ua hauj lwm ua ke nyob hauv pawg ntseeg pawg sab laj kom pab thiab cawm tib neeg dim. Zaj no nyob hauv Malakaus 2:1–5. Kuv tau kawm hais tias tej yam uas Yexus siv kom qhia peb txog tej lus qhuab qhia thiab tej ntsiab cai yeej tshoov peb lub siab thiab yooj yim to taub.

Ib tug neeg nyob hauv zaj no yog ib tug uas tuag tes tuag taw, ib tug uas mus tsis taus kev yog tsis muaj leej twg pab. Tus txiv neej no nyob hauv tsev xwb, tos txais kev cawm dim.

Niaj hnub nim no, tej zaum yuav zoo li no. Plaub tug neeg yuav ua raws li lawv tus npisov txib kom lawv mus xyuas ib tug txiv neej uas tuag tes tuag taw nyob tom nws lub tsev. Ua rau kuv xam pom ib tug los ntawm Koom Haum Niam Tsev, ib tug los ntawm pawg txwj laug, ib tug los lub Pov Thawj Hwj Aloos, thiab ib tug yog ib tug tub txib. Nyob hauv pawg ntseeg pawg sab laj, tom qab lawv sib tham ua ke txog tej tug neeg tej kev xav tau, tus npisov txib kom lawv mus “cawm neeg.” Nws tau txib plaub leeg no mus pab tus txiv neej uas tuag tes tuag taw. Lawv tsis muaj cuab kav tos kom nws tuaj koom lub koom txoos nws tus kheej. Lawv yuav tsum mus tom nws lub tsev thiab nrog nws tham. Lawv yuav tsum nrhiav nws, yog li ntawd lawv cia li mus. Lawv yuav kwv tus txiv neej mus rau Yexus.

“Txawm muaj plaub leeg kwv ib tug txiv neej tuag tes tuag taw tuaj rau Yexus kho” (Malakaus 2:3).

Tiam sis, muaj neeg nyob puv tsev tas. Txawm yog ntawm qhov rooj los twb tsis tau kev mus rau hauv tsev. Nyaj lawv twb ua txhua yam lawv ua tau, tiam sis lawv mus tsis taus rau hauv tsev. Tsis tau muaj li lawv tau npaj lawm. Muaj tej yam uas tab kaum lawv txoj kev “cawm neeg dim.” Tiam sis lawv tsis tau tso nws tseg. Lawv tsis tso tus txiv neej uas tuag tes tuag taw tseg ntawm lub qhov rooj. Lawv tau sib tham ua ke seb lawv yuav ua dab tsi—lawv yuav ua li cas kwv tus txiv neej mus rau Yexus Khetos kom Yexus kho nws. Raws li lawv xav, qhov hauj lwm pab Yexus Khetos cawm neeg dim yeej tsis nyuaj dhau. Lawv txawm tawm tswv yim—tsis yog ib qho yooj yim, tiam sis lawv cia li ua kiag xwb.

“Lawv tsis tau kev kwv nws mus cuag Yexus, ces lawv txawm nce mus rau saum ruv tsev thiab rhuav ib qho ncaj ntawm Yexus rau saum. Thaum lawv qhib tau lawm, lawv txawm muab hlua khi daim pam uas pua nws tso nws dauv mus rau hauv” (Malakaus 2:4).

Lawv kwv nws mus rau saum ruv tsev. Thiab nyaj tsis tau muaj ntaiv mus saud nyob sab nraud, yog li ntawd tej zaum lawv twb siv sij hawm ntev me ntsis pab txhua tus nce saum ruv tsev. Kuv xav tias tau muaj li no: tus tub hluas los ntawm nws pawg ntseeg tau nce saum ruv tsev ua ntej. Nws tseem hluas thiab muaj zog heev, yog li ntawd tsis yog ib qho nyuaj rau nws. Nws tus khub mus qhia neeg tom tsev los ntawm pawg txwj laug thiab tus tub txib uas siab heev twb sib zog thawb nyob sab hauv qab. Tus muam los ntawm Koom Haum Niam Tsev twb hais kom lawv ceev faj thiab hais lus txhawb nqa lawv. Ces cov txiv neej twb rhuav ib qho ntawm ruv tsev thaum tus muam nplij tus txiv neej lub siab thaum nws tos Yexus kho nws—nws tos kom mus tau kev nws tus kheej thiab dim.

Txhua tus yuav tsum ua hauj lwm kom ua raws li tus npisov txib. Thaum lub sij hawm tseem ceeb heev, lawv yuav tsum koom tes muab tus txiv neej tuag tes tuag taw nqis mus rau hauv tsev. Plaug tug neeg no yuav tsum koom siab koom ntsws ua hauj lwm ua ke. Plaub tug neeg no yeej yuav tsum tsis sib cav sib ceg. Lawv txhua tus yuav tsum maj mam muab tus txiv neej tuag tes tuag taw nqis mus. Yog tias ib tug tso txoj hlua nqis mus sai dua li lwm tus, ces yuav ua rau tus txiv neej poob ntawm nws lub txaj. Nws tuav tsis tau dab tsi vim nws qaug zog heev.

Yog peb xav pab ua tus Cawm Seej tej hauj lwm, peb yuav tsum koom siab koom ntsws ua hauj lwm ua ke. Txawm muaj hauj lwm dab tsi los, txhua leej txhua tus yeej tseem ceeb. Peb yuav tsum koom siab nrog peb tus Tswv Yexus Khetos.

Thaum kawg, lawv muab tus txiv neej tuag tes tuag taw tso ntawm Yexus ko taw. “Thaum Yexus pom hais tias lawv muaj kev ntseeg heev, Yexus txawm hais rau tus txiv neej uas tuag tes tuag taw ntawd hais tias, Me tub, kuv twb zam koj lub txim lawm” (Malakaus 2:5) Yexus hlub nws thiab kho nws zoo lawm—tsis yog kho nws sab cev nqaij daim tawv xwb, tiam sis kuj kho nws saj ntsuj plig thiab: “Me tub, kuv twb zam koj lub txim lawm.” Zoo kawg puas yog? Peb txhua tus xav tau li no puas yog? Kuv yeej xav tau.

Peb puas paub leej twg hauv peb lub neej uas raug mob tuag tes tuag taw ntawm sab ntsuj plig, ib tug neeg uas rov qab tuaj koom lub Koom Txoos nws tus kheej? Tej zaum nws yog peb ib tug me nyuam, peb niam peb txiv, ib tug khub, los yog ib tug phooj ywg.

Vim muaj cov tub txib ntau ntxiv uas ua hauj lwm rau peb tej pawg ntseeg, tej zaum yog ib qho zoo uas cov npisov thiab ceg ntseeg cov thawj tswj hwm siv lawv nyob hauv lawv tej pawg ntseeg pawg sab laj. Tus npisov caw tau txhua tus mej zeej ntawm pawg ntseeg pawg sab laj kom qhia txog cov neeg uas tej zaum xav tau kev pab. Cov mej zeej ntawm pawg ntseeg pawg sab laj yuav sib tham ua ke seb lawv yuav ua li cas pab tus ntawd. Cov npisov yuav mloog zoo rau lawv tej tswv yim thiab txib lawv ua tej yam.

Cov tub txib yog cov neeg zoo uas pab tau peb tej pawg ntseeg thaum peb mus cawm tib neeg dim. Lawv hluas thiab muaj zog heev. Lawv nyiam muaj tej npe ntawm tib neeg uas lawv yuav tsum mus pab. Lawv nyiam ua hauj lwm ua ke nrog pawg ntseeg cov mej zeej. Lawv paub tias muaj cib fim zoo heev kom nrhiav tau neeg uas lawv qhia tau. Lawv rau siab ua hauj lwm txhim tsa tus Tswv lub nceeg vaj. Lawv muaj ib zaj lus tim khawv uas muaj zog hais tias lawv yuav ua neeg zoo li Yexus Khetos thaum lawv koom tes pab cawm neeg dim.

Thaum kuv xaus lus, kuv xav qhia ib qho uas muaj nqi ntxiv nyob hauv cov vaj lug kub no. Nyob hauv nqe 5: “Thaum Yexus pom hais tias lawv muaj kev ntseeg heev” (ntxiv qhov uas ntawv qaij). Kuv tsis tau pom lo lus no thaum yav tas los—lawv muaj kev ntseeg heev. Thaum peb koom siab muaj kev ntseeg ces peb kuj pab tau lwm tus thiab.

Cov neeg uas Yexus hais txog yog leej twg? Tej zaum lawv yog plaub tus neeg uas kwv tus txiv neej tuag tes tuag taw, yog tus txiv neej, yog cov neeg uas tau thov Vajtswv pab nws, thiab tag nrho cov uas mloog Yexus tej lus qhuab qhia thiab cov uas zoo siab hais tias nws yuav ua ib qho txuj ci tseem ceeb. Tej zaum kuj yog ib tug khub, ib tug niam tsev txiv tsev, ib tug tub los yos tus ntxhais, ib tug tub txib, ib pawg pov thawj hwj tus thawj tswj hwm, Koom Haum Niam Tsev tus thawj tswj hwm, ib tug npisov, los yog ib tug phooj ywg uas nyob deb. Peb ib leeg muaj peev xwm pab ib leeg. Peb yeej yuav tsum rau siab nrhiav cov uas xav tau kev cawm seej.

Kuv ua tim khawv hais tias Yexus Khetos yog ib tug Vajtswv uas ua txuj ci tseem ceeb. Yexus Khetos hlub peb txhua tus thiab Nws muaj hwj chim cawm thiab kho peb, tsis hais peb sab cev nqaij daim tawv thiab sab ntsuj plig. Thaum peb pab Nws ua Nws lub luag hauj lwm cawm tib neeg dim, ces Nws kuj yuav cawm peb dim thiab. Kuv ua tim khawv li no los ntawm Nws lub npe dawb huv, Yexus Khetos, amees.

Note

  1. Piv txwv, saib, Thomas S. Monson, “Our Responsibility to Rescue,” Ensign los sis Liahona, Kaum Hli Ntuj 2013, 5.