2010–2019
Nyob Twj Ywm Hauv lub Nkoj thiab Tuav Rawv!
October 2014


Nyob Twj Ywm Hauv lub Nkoj thiab Tuav Rawv!

Yog tias peb tsom ntsoov rau tus Tswv, peb tau lus cog tseg hais tias peb yuav tau ib txoj koob hmoov zoo kawg nkaus.

Tsis ntev tas los lawm, kuv ib tug phooj ywg coj nws tus tub mus caij nkoj ntawm tus Dej Colorado dhau plaws lub Kwj Hav Cataract, uas nyob hauv Utah tim sab qab teb tim sab hnub tuaj. Kwj hav ntawd nto moo vim muaj 14 mais (23 km) uas yog dej ceev ceev uas muaj tau xwm txheej ceev.

Thaum npaj rau lawv txoj kev ua si no, lawv tau ua tib zoo kuaj xyuas lub Teb Chaws Qhov Chaw Ua Si qhov website, uas muaj tej xov xwm tseem ceeb uas qhia seb yuav npaj li cas thiab muaj tau tej kev xwm txheej dab tsi.

Thaum lawv pib yuav caij nkoj, ib tug kws tsav nkoj uas qhia lawv kev tau qhia lawv txog tej tswv yim uas yuav pab kom lawv puaj phais, nws hais tias muaj peb txoj kev cai tseem ceeb uas yuav pab kom lawv raws tus dej ceev ceev ntawd tsis muaj xwm txheej li. “Txoj kev cai thib ib: nyob twj ywm hauv lub nkoj! Txoj kev cai thib ob: yuav tsum hnav lub tsho cawm neeg txoj sia tas mus li! Txoj kev cai thib peb: siv ob txhais tes tuav ruaj khov!” Nws rov qab hais dua, hais lus nchav zog tias, “Qhov tseem ceeb tshaj plaws, nco qab ntsoov txoj kev cai thib ib: nyob twj ywm hauv lub nkoj!”

Txoj kev ua si ntawd ua rau kuv xav txog peb txoj kev ua neej nyob hauv ntiaj teb no. Peb sawv daws feem coob muaj tej lub caij hauv peb lub neej uas peb muaj kev ris txiaj vim cov dej tu tu. Lwm zaus ces, peb muaj cov dej ceev ceev uas yus muab piv tau rau 14 mais dej uas mus dhau plaws lub Kwj Hav Cataract ntawd—tej zaum tej kev cov nyom yog kev cov nyom ntawm sab cev nqaij daim tawv thiab sab paj hlwb, ib tug uas peb hlub tso lub neej no tseg, peb tej kev cia siab thiab kev npau suav raug puas tsuaj tas, thiab—rau ib txhia—kuj muaj teeb meem ntawm lawv txoj kev ntseeg thaum lawv muaj kev cov nyom, lus nug, thiab kev poob siab.

Vim tus Tswv muaj lub siab zoo Nws thiaj muab kev pab, kuj muab ib lub nkoj, thiab tej yam khoom tseem ceeb zoo li lub tsho cawm neeg txoj sia, thiab cov kws tsav nkoj uas coj peb kev thiab qhia tej lus tswv yim uas pab peb muaj kev puaj phais thaum peb raws tus dej hauv lub neej no mus rau qhov chaw kawg.

Yog li ntawd cia peb xav txoj kev cai thib ib: nyob twj ywm hauv lub nkoj!”

Thawj Tswj Hwm Brigham Young pheej hais tias “lub Nkoj Qub Xi-oos” ua ib zaj lus piv txwv txog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Muaj ib zaug nws hais tias: “Peb nyob hauv nruab plawv tus dej hiav txwv. Ces muaj cua caj cua dub, thiab cov kws caij nkoj hais tias, nws sib zog ua hauj lwm. Ib tug hais tias, ‘Kuv yuav tsis nyob twj ywm ntawm no;’ ‘Kuv tsis ntseeg hais tias nov yog lub “Nkoj Xi-oos.”’ ‘Tiam sis peb nyob hauv nruab plawv tus dej hiav txwv.’ ‘Kuv tsis khe li, kuv yuav tsis nyob twj ywm ntawm no.’ Nws hle nws lub tsho, thiab nws dhia mus hauv tus dej. Nws puas yuav poob deg? Aws. Yog ib yam li ntawd rau cov uas tawm ntawm lub Koom Txoos no mus. Nws yeej yog lub ‘Nkoj Qub Xi-oos,’ cia peb nyob twj ywm hauv.”1

Lwm zaus ces, Thawj Tswj Hwm Young hais tias nws txhawj tsam tib neeg yuav poob zoo thaum lawv tab tom txais koob hmoov—los yog thaum lawv muaj ib lub neej zoo: “Thaum huab cua zoo, thaum lub nkoj Xi-oos mus tu tu ntawm cov dej, [thiab] txhua yam nyob zoo hauv lub nkoj, ces ib txhia kwv tij yuav xav mus caij cov nkoj nuv ntses loj loj … mus ua luam dej, thiab ib txhia yeej yuav poob deg, lwm cov mus rau tej qhov chaw tsis yog, thiab muaj dua lwm cov uas rov qab nkag los rau hauv lub nkoj. Cia peb nyob twj ywm hauv lub nkoj qub thiab nws mam li coj peb mus txog qhov chaw nres nkoj tsis raug xwm txheej li, nej tsis tas yuav txhawj.”2

Thiab qhov kawg, Thawj Tswj Hwm Young qhia ib Tsoom Haiv Neeg Ntseeg tias: “Peb nyob hauv lub nkoj qub Xi-oos. … [Vajtswv] ua tus tswv tsav nkoj thiab yuav nyob rau ntawd. … Txhua yam yeej nyob zoo, hu nkauj qhuas Vajtswv, vim tus Tswv nyob ntawd. Nws txib, coj kav thiab qhuab ntuas. Yog tias tib neeg tso siab plhuav rau lawv tus Vajtswv, tsis tso lawv tej kev khi lus los sis lawv tus Vajtswv tseg, Nws yeej yuav coj peb kev.”3

Vim muaj tej kev cov nyom uas peb sawv daws niaj hnub ntsib, peb yuav ua li cas thiaj nyob twj ywm hauv lub Nkoj Qub Xi-oos?

Yuav tsum ua li no. Peb yuav tsum pheej hloov siab los ntseeg thaum peb ua kom haj yam muaj kev ntseeg txog Yexus Khetos thiab rau siab ntso ua raws li Nws txoj moo zoo hauv tag nrho peb lub neej—tsis yog ib zaug xwb, tiam sis ib sij ua tsis tu tsis tseg. Amas nug hais tias, “Thiab nim no saib seb, kuv hais rau nej, kuv cov mi kwv tij, yog nej tau raug ib qho kev hloov siab, thiab yog nej tau xav hu zaj nkauj txoj kev hlub uas txhiv dim, kuv yuav nug tias, nej puas xav li ntawd nim no?”4

Niaj hnub no yus muab tus kws tsav nkoj piv rau lub Koom Txoos cov thwj tim thiab cov yaj saub thiab cov thawj cov hauv peb zos hauv lub pov thawj hwj thiab lwm cov koom haum pab. Lawv pab peb mus txog peb qhov chaw kawg muaj kev nyab xeeb.

Tsis ntev tas los lawm, kuv tau hais lus hauv ib lub rooj sab laj rau tej qhov chaw tshaj tawm txoj moo zoo cov thawj tswj hwm tshiab thiab tau ntuas cov thawj coj no hais tias:

“Rau siab ntso ua kom cov tub txib tsa qhov muag rau ntawm cov thawj coj hauv lub Koom Txoos. … Peb ua tsis tau thiab … tsis muaj cuab kav coj [nej] mus yuam kev.

“Thiab thaum nej qhia nej cov tub txib kom tsa qhov muag rau ntawm peb, qhia kom lawv tsis txhob raws cov neeg uas xav tias lawv muaj tswv yim dua Leej Txiv Saum Ntuj Ceeb Tsheej thiab tus Tswv Yexus Khetos … los saib xyuas lub Koom Txoos” dhau ntawm lub pov thawj hwj cov thawj coj uas tuav cov yuam sij rau kev coj kav.

“Hauv kuv txoj kev qhuab qhia neeg kuv nrhiav pom hais tias cov uas pib poob zoo [thiab] muaj kev ntxhov siab yog cov uas feem ntau … tsis nco qab hais tias thaum Thawj Pawg Thawj Tswj Hwm thiab Pawg Kaum Ob tug Thwj Tim koom ib siab hais lus, twb yog lawv hais raws li tus Tswv yuav hais rau lub sij hawm ntawd. Tus Tswv qhia peb tias, txawm yog los ntawm Nws lub suab los yog los ntawm Nws cov tub qhe lub suab los yog, ob yam zoo tib yam nkaus [saib D&C 1:38].”5

Ua lwm yam lus hais, lawv tawm ntawm lub Nkoj Qub Xi-oos—lawv poob mus; lawv tso txoj kev ntseeg tseg. Tu siab kawg, vim feem ntau lawv raug txim rau ib ntus thiab thaum kawg raug txim ntev mus uas lawv tsis tau xav tias lawv yuav raug, tsis yog rau lawv tus kheej xwb tiam sis rau lawv tsev neeg thiab.

Peb lub Koom Txoos cov thawj coj hauv zos, zoo li cov kws tsav nkoj, tau kawm ntau yam hauv lawv lub neej; lawv tau kawm thiab tau lus qhuab ntuas los ntawm cov thwj tim thiab cov yaj saub thiab lwm cov nom tswv hauv lub Koom Txoos, thiab, qhov tseem ceeb tshaj plaws, tus Tswv Kiag tau qhuab qhia lawv.

Lwm zaus xyoo no, kuv tau hais lus rau cov poj niam thiab txiv neej hluas hauv lub Koom Txoos hauv ib lub rooj sab laj CES thaum lub Tsib Hlis Ntuj. Kuv hais tias:

“Kuv hnov hais tias ib txhia xav tias cov thawj coj hauv lub Koom Txoos nyob rau hauv ib lub ‘npuas.’ Tiam sis lawv tsis nco qab tias peb yog ib co txiv neej thiab poj niam uas tau ua ntau yam hauj lwm, thiab tau nyob hauv ntau qhov chaw hauv lub ntiaj teb no thiab tau ua hauj lwm nrog coob tug neeg sib txawv. Tam sim no peb tej hauj lwm coj peb mus thoob plaws ntiaj teb no, nyob ntawd peb ntsib cov thawj coj ntawm kev kas moos, kev teev ntuj, kev ua lag ua luam, thiab kev pab tib neeg hauv tag nrho lub ntiaj teb no. Txawm hais tias peb tau xyuas [cov thawj coj] hauv lub Tsev Dawb tim Washington, D.C., thiab cov thawj coj rau ntau lub teb chaws [thiab tej kev teev ntuj] thoob plaws ntiaj teb, peb kuj tau xyuas tej qhov chaw uas txom nyem [tej yim neeg thiab tib neeg] hauv ntiaj teb no thiab. …

“Thaum nej ua tib zoo xav txog peb tej neej thiab kev qhuab qhia tib neeg, tej zaum nej yuav lees paub tias peb yeej pom thiab paub txog lub ntiaj teb no zoo li lwm tus neeg tsis tshua paub txog. Nej yuav pom hais tias peb tsis nyob hauv ib lub ‘npuas’ ntau npaum li lwm tus neeg nyob hauv. …

“… Yeej muaj ib yam dab tsi txog lub [Koom Txoos cov thawj coj] tej tswv yim tsis yog ib tug xwb tiam sis lawv sawv daws ua ke uas yuav pab kom sawv daws tso tau siab rau lawv. Peb twb pom txhua nrho lawm, kuj pom muaj tau tej xwm txheej dab tsi thaum tsa tej kev cai rau pej xeem, tej kev poob siab, kev xwm txheej ceev, thiab kev tuag hauv peb tsev neeg thiab. Peb yeej paub hais tias nej tej lub neej zoo li cas tiag.”6

Nrog rau txoj kev cai thib ib raws li kuv tau hais tseg, nco qab ntsoov txoj kev cai thib ob thiab peb: hnav lub tsho cawm neeg txoj sia tas mus li thiab siv ob txhais tes tuav rawv. Yus nrhiav pom tus Tswv tej lus hauv cov vaj lug kub thiab cov thwj tim thiab cov yaj saub tej lus qhia. Tej ntawd muab lus qhuab qhia thiab kev coj qhia rau peb, ces thaum ua tej ntawd, cov lus ntawd yuav zoo li ib lub tsho uas cawm neeg txoj sia thiab yuav pab peb paub tias peb yuav ua li cas thiaj siv ob txhais tes tuav rawv.

Peb yuav tsum rais los mus ua neeg zoo li Mauxiyas cov tub uas “tau loj hlob muaj zog ntawm txoj kev paub qhov tseeb.” Peb ua tsis tau cov txiv neej thiab poj niam uas nyob “ruaj ntawm txoj kev to taub.” Peb tsuas ua tau li no thaum peb “rau siab nrhiav vaj lug kub, xwv kom [peb] yuav paub Vajtswv txoj lus.”7

Thaum nrhiav cov vaj lug kub thiab cov thwj tim thiab cov yaj saub thaum ub thiab niaj hnub no tej lus, peb yuav tsum rau siab kawm, ua neej nyob, thiab nyiam Yexus Khetos tej lus qhuab qhia.

Ntxiv rau txoj kev nyeem cov vaj lug kub rau peb tus kheej, peb yuav tsum ua zoo li Mauxiyas cov tub thiab yuav tau “thov Vajtswv thiab yoo mov ntau.”8

Zoo nkaus li tej yam no uas yus tsis tshua txawj ntsuas seb ua zoo npaum li cas yeej tseem ceeb heev. Cia li tsom ntsoov rau tej yam me me no, thiab txhob xav yuam kev txog lwm yam.

Thaum kuv paub tib neeg uas tsis nyob twj ywm hauv lub nkoj thiab tsis tau siv ob txhais tes tuav rawv thaum muaj teeb meem thiab kev cov nyom los sis tsis tau nyob twj ywm hauv lub nkoj thaum twg ib ncig lawv yeej nyab xeeb, kuv pom lawv coob leej tsis nco qab xav txog tej kev tseeb hauv txoj moo zoo—lub ntsiab yog vim li cas thaum lawv xub tuaj koom lub Koom Txoos; lub ntsiab uas qhia seb vim li cas lawv tau rau siab ntso thiab ua raws li txoj moo zoo tej kev cai thiab tau foom koob hmoov rau lwm tus neeg dhau ntawm lawv tej hauj lwm; thiab tej yam uas lub Koom Txoos nyob rau hauv lawv lub neej ua “ib qho chaw rau sab ntsuj plig tau kev tu thiab loj hlob zoo.”9

Yauxej Xamiv qhia txoj lus tseeb no hais tias: “Cov hauv paus ntsiab cai ntawm peb txoj kev ntseeg yog zaj lus tim khawv txog cov thwj tim thiab cov yaj saub, txog Yexus Khetos, … ‘tias nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm;’ thiab tag nrho lwm yam uas hais txog peb txoj kev ntseeg ces yog kev txuas ntxiv rau peb txoj kev teev ntuj.”10

Yog peb pheej tsom ntsoov rau tus Tswv, peb tau lus cog tseg hais tias peb yuav tau ib txoj koob hmoov zoo kawg nkaus hais tias: “Yog li ntawd, nej yuav tsum thawb mus lawm tom hauv ntej nrog txoj kev ntseeg Khetos [uas khov kho], muaj ib txoj kev cia siab uas ci kawg nkaus, thiab muaj ib txoj kev hlub ntawm Vajtswv thiab ntawm tib neeg sawv daws. Yog li ntawd, yog tias nej yuav thawb lawm tom hauv ntej, mloog nkaus rau Khetos tej lus, thiab tiv kom mus txog thaum kawg, saib seb, Leej Txiv hais li no tias: Nej yuav muaj txoj sia nyob mus ib txhis.”11

Tej thaum ib Tsoom Haiv Neeg Ntseeg hauv Hnub Nyoog Kawg thiab cov uas tshawb nrhiav txog txoj moo zoo uas rau siab ntseeg pib xav txog tej “yam uas txuas ntxiv” rau txoj moo zoo tsis yog tej ntsiab cai uas ua lub hauv paus. Los yog hais tias, Dab Ntxwg Nyoog ntxias peb kom tsis tsom ntsoov rau txoj xov tseeb ntawm txoj moo zoo uas raug muab txum tim rov qab los lawm. Cov neeg uas ua li no tsum tsis noj lub cim nco txog lawm vim lawv pheej xav txog tej kev cai los sis tej lus qhia uas tsis tshua tseem ceeb.

Lwm tus ces yuav tsom ntsoov rau tej lus nug thiab lawv tej kev tsis ntseeg xwb. Tiag tiag mas, txoj kev muaj lus nug thiab tsis tshua ntseeg yeej yog ib qho ntawm txoj kev ua ib tug pab coj uas rau siab ua. Tsis ntev tas los lawm, Thawj Pawg Thawj Tswj Hwm thiab Pawg Kaum Ob tug Thwj Tim hais tias: “Peb to taub tias tej lub sij hawm lub Koom Txoos cov mej zeej yuav muaj tej lo lus nug txog lub Koom Txoos cov lus qhuab qhia, zaj liv xwm, los sis tej kev cai. Cov mej zeej yeej muaj kev ywj siab xaiv kom muaj cov lus nug thiab rau siab kawm kom to taub ntxiv.”12

Nco qab ntsoov tias, Yauxej Xamiv kiag tau muaj lus nug thiaj tau muaj txoj Kev Txum Tim Rov Qab Los no. Nws yog neeg tshawb nrhiav, es zoo li Anplaham, nrhiav kom tau lus teb rau tej lo lus tseem ceeb tshaj plaws hauv lub neej no.

Tej lo lus tseem ceeb tshaj yeej tsom ntsoov rau tej yam tseem ceeb uas yog—Leej Txiv Saum Ntuj Ceeb Tsheej txoj hau kev thiab tus Cawm Seej txoj Kev Theej Txhoj. Peb txoj kev tshawb nrhiav yuav tsum ua kom peb ua neeg siab zoo, muaj siab mos, siab hlub, siab xav zam txim, siab ntev, thiab cov uas rau siab ntseeg. Peb yuav tsum muaj lub siab kam los ua raws li Pov Lauj qhia hais tias, “nej yuav tsum sib pab ris nra, yog nej ua li ntawd thiaj yog nej coj raws li Yexus Khetos txoj kev cai.”13

Txoj kev ris lwm tus neeg tej nra hais txog kev pab, kev txhawb nqa, thiab ib leeg to taub ib leeg, kuj hais txog cov neeg mob, cov neeg nyuaj siab, cov neeg uas tsis muaj ntawm sab ntsuj plig thiab sab cev nqaij daim tawv, tus uas nrhiav thiab tus uas txom nyem, thiab lwm cov mej zeej uas ua pab coj—qhov no kuj hais txog lub Koom Txoos cov thawj coj uas tus Tswv tau hu los ua hauj lwm rau ib ntus.

Cov kwv tij thiab cov muam, cia li nyob twj yam hauv lub nkoj, hnav nej lub tsho uas cawm neeg txoj sia, thiab siv ob txhais tes tuav rawv. Tsis txhob cia lwm yam thaiv nej kev! Thiab yog nej leej twg twb poob ntawm lub nkoj lawm, peb yuav nrhiav nej, qhuab qhia nej, thiab rub nej rov qab los nyob rau hauv lub Nkoj Qub Xi-oos, vim nyob ntawd Vajtswv peb Leej Txiv thiab tus Tswv Yexus Khetos yog ob tug kws tsav nkoj thiab yuav coj peb mus taug txoj kev yog, kuv hais lus tim khawv li no los ntawm Yexus Khetos lub npe, amees.

Lus Cim

  1. Teachings of Presidents of the Church: Brigham Young (1997), 82–83.

  2. Brigham Young, “Discourse,” Deseret News, Ib Hlis Ntuj 27, 1858, 373.

  3. Brigham Young, “Remarks,” Deseret News, Kaum Ib Hlis Ntuj 18, 1857, 291.

  4. Amas 5:26.

  5. M. Russell Ballard, “Mission Leadership” (lub rooj sab laj rau cov thawj tswj hwm rau tej qhov chaw tshaj tawm txoj moo zoo tshiab, Rau Hli Ntuj hnub tim 25, 2014), 8.

  6. M. Russell Ballard, “Be Still, and Know That I Am God” (Church Educational System devotional, Tsib Hlis Ntuj hnub tim 4, 2014); lds.org/broadcasts.

  7. Amas 17:2.

  8. Amas 17:3.

  9. Thawj Pawg Thawj Tswj Hwm thiab Pawg Kaum Ob tug Thwj Tim ib tsab ntawv, Rau Hli Ntuj hnub tim 28, 2014.

  10. Joseph Smith, Elders’ Journal, Xya Hli Ntuj 1838, 44.

  11. 2 Nifais 31:20.

  12. Thawj Pawg Thawj Tswj Hwm thiab Pawg Kaum Ob tug Thwj Tim ib tsab ntawv, Rau Hli Ntuj hnub tim 28, 2014.

  13. Kalatias 6:2.