Lagolagoina o Perofeta

Peresitene Eyring matou te faafetai atu mo lau savali anoa ma musuia. Ou uso e ma tuafafine pele, matou te faafetai atu mo lo outou faatuatua ma le tuuto. O ananafi, sa valaaulia ai tatou taitoatasi ia lagolagoina Thomas S. Monson o le perofeta a le Alii ma o le Peresitene o le Ekalesia a le Alii. Ma e tatou te pepese soo lava i le, “Ia viia oe le Atua, mo le perofeta.”¹ Pe o tatou malamalama ea i le uiga o lena mea? Mafaufau i le avanoa ua tuu mai e le Alii ia i tatou e lagolago ai Lana perofeta, o ana fautuaga o le a mama, tonu, e le uunaia e soo se lagona faaletagata, ma e moni atoatoa!

E faapefea ona tatou lagolagoina moni lava se perofeta? Ae lei taitai avea o ia ma Peresitene o le Ekalesia, sa faamalamalama mai ai e Peresitene Iosefa F. Samita e faapea, “O se tiute taua ua tuuina mai i luga o le Au Paia … e lagolago taitai o le Ekalesia, i le faia lea e le gata i le sii ae o lima, o se faailoga faigofie, faapea foi i galuega ma le upumoni.”²

Ou te manatua lelei la’u “galuega” sili ona tupito e lagolago ai se perofeta. I le avea ai ma se fomai faalesoifua maloloina ma se fomai tipitipi o le fatu, sa ou maua ai se tiutetauave e faatino se taotoga o le fatu o Peresitene Spencer W. Kimball i le 1972, a o avea o ia ma Peresitene Lagolago o le Korama a Aposetolo e Toasefululua. Sa ia manaomia se taotoga sili ona faigata. Ae sa leai so’u poto masani i le faia o se taotoga faapena i se gasegase e 77 tausaga le matua i le faaletonu o le fatu. Ou te lei fautuaina le taotoga ma o lea sa faailoa atu ai ia Peresitene Kimball ma le Au Peresitene Sili. Ae, i le faatuatua, sa filifili ai Peresitene Kimball e faia pea lona taotoga, ona sa fautuaina ai e le Au Peresitene Sili. Ua faaalia i lena mea le auala sa ia lagolagoina ai ona taitai! Ma o lana faaiuga sa ou popole tele ai!

E faafetai ai i le Alii, sa manuia le taotoga. Ina ua toe tātā le fatu o Peresitene Kimball, sa tātā ma se malosi tele! I lena lava taimi, sa ou maua ai se molimau manino mai le Agaga e faapea o lenei tamalii o le a i ai se aso e avea ai ma Peresitene o le Ekalesia!³

Ua outou silafia le taunuuga. E na o le 20 masina mulimuli ane, ae avea Peresitene Kimball ma Peresitene o le Ekalesia. Ma sa ia tuuina mai se taitaiga lototoa ma le lototele mo le tele o tausaga.

Talu mai lena taimi ua tatou lagolagoina ai Peresitene Ezra Taft Benson, Howard W. Hunter, Gordon B. Hinckley, ma o le taimi nei o Thomas S. Monson o ni Peresitene o le Ekalesia. O ni perofeta moni lava!

Ou uso e ma tuafafine pele, afai e i ai se mea na faia e le Toefuataiga, na ia olopalaina le talitonuga ua leva e faapea ua le toe fetalai mai le Atua i Lana fanau. E leai se mea o toe mamao mai le upumoni. E tu se perofeta e taitai le Ekalesia a le Atua i tisipenisione uma, mai ia Atamu e oo mai i aso nei.⁴ E molimau mai Perofeta ia Iesu Keriso—e uiga i Lona paia ma Lana misiona ma auaunaga i le lalolagi.⁵ Tatou te faamamaluina le Perofeta o Iosefa Samita o le perofeta o lenei tisipenisione mulimuli. Ma tatou te faamamaluina foi tamalii taitasi na sosoo mai ai o ni Peresitene o le Ekalesia.

A tatou lagolagoina perofeta ma isi taitai,⁶ tatou te tausia le tulafono o le finagalo autasi, aua na fetalai le Alii, “O le a le tuuina atu i soo se tasi e alu e talai atu la’u talalelei, pe ati a’e la’u ekalesia, vagana ai ua faauuina o ia e se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia.”⁷

O lenei mea tatou te maua ai o ni tagata o le Ekalesia a le Alii, le mautinoa ma le faatuatua a o tatou tauivi e tausi le poloaiga faatusitusiga paia e faalogo i le siufofoga o le Alii⁸ pe a oo mai e ala i le leo o Ana auauna, o perofeta.⁹ O taitai uma i le Ekalesia a le Alii e valaauina e le pule tatau ai. E leai se perofeta po o soo se taitai i lenei Ekalesia, i lena tulaga, na ia valaauina o ia lava. E leai ma se perofeta ua filifilia faapalota. Na faamanino mai e le Alii lena mea ina ua Ia fetalai mai, “Ua le filifilia a’u e outou, a ua filifili outou e a’u, ma faauuina outou.”¹⁰ Tatou te le “palotaina” ia taitai o le Ekalesia i soo se tulaga lava. Ae tatou te maua le avanoa e lagolagoina ai i latou.

O ala a le Alii e ese mai i ala a tagata. O ala a tagata e aveesea tagata mai ofisa ma pisinisi pe a latou matutua pe ua le toe mafaia foi se mea. Ae o ala a tagata e le avea ma o le a le avea lava ma ala a le Alii. O lo tatou lagolagoina o perofeta o se tautinoga patino lea o le a tatou faia le mea sili tatou te mafaia e tausi ai a latou faamuamua faaperofeta. O la tatou lagolago o se faailoga faapei o se tautoga lea tatou te faamamaluina ai lo latou valaauga o se perofeta ina ia faamaoni ma [ia iloa] o loo noatia ai i tatou.

E luasefulu-ono tausaga a o lei avea o ia ma Peresitene o le Ekalesia, a o valaauina ia Elder Siaosi Alapati Samita, sa ia saunoa ai: “O le matafaioi tatou te faia pe a sii ae o tatou lima … o se matafaioi e sili ona paia. E le faapea o le a tatou o atu gugu ai i o tatou ala ma le naunau o le a taitaiina e le perofeta a le Alii lenei galuega, ae o lona uiga … o le a tatou lagolagoina o ia; o le a tatou tatalo mo ia; o le a tatou puipuia lona igoa lelei, ma o le a tatou taumafai e faatino ana faatonuga e pei ona taitaiina ai o ia e le Alii.”¹¹

O loo taitaia e le Alii soifua Lana Ekalesia ola!¹² E faaali mai e le Alii Lona finagalo mo le Ekalesia i Lana perofeta. O ananafi, ina ua maea ona valaaulia i tatou e lagolagoina Thomas S. Monson o le Peresitene o le Ekalesia, sa tatou maua foi le avanoa e lagolagoina ai o ia, o fesoasoani i le Au Peresitene Sili, ma uso o le Korama a Aposetolo e Toasefululua o ni perofeta, tagatavaai, ma talifaaaliga. Mafaufau i lena mea! Tatou te lagolagoina tamalii e 15 o ni perofeta a le Atua! Ua latou umiaina ki uma o le perisitua ua faaee mai i luga o tagata i lenei tisipenisione.

O le valaauina o tamalii e 15 i le valaauga paia faaaposetolo ua tuuina mai ai se puipuiga tele mo i tatou o tagata o le Ekalesia. Aisea? Ona o faaiuga a nei taitai e tatau ona autasi.¹³ E mafai ona e mafaufauina le manaomia e le Agaga ona musuia tamalii e 15 ia maua ai le autasi? O nei tamalii e 15 e eseese uma o latou tulaga faaleaoaoga ma faalegaluega, faatasi ai ma manatu eseese e uiga i le tele o mea. Talitonu mai! O nei tamalii e 15—o perofeta, tagatavaai, ma talifaaaliga—latou te silafia le finagalo o le Alii pe a ausia le autasi! Ua tuuto lava i latou ia vaaia o le a faia moni lava le finagalo o le Alii. O le tatalo a le Alii o loo i ai le mamanu mo nei tamalii taitoatasi e 15 pe a latou tatalo: “Ia faia lou finagalo i le lalolagi e pei ona faia i le lagi.”¹⁴

E pulefaamalumalu le Aposetolo e sili ona umi i le tofi o le Aposetolo.¹⁵ O le faatulagaga o le umi i le tofi e masani lava ona oo ai tamalii matutua i le tofi o le Peresitene o le Ekalesia.¹⁶ E maua ai le le motusiaina, lava o le poto masani, aafiaga, ma sauniuniga e tele, e pei ona taiala ai e le Alii.

O le Ekalesia i nei ona aso ua faatulagaina e le Alii lava Ia. Ua Ia faatulagaina se faiga ofoofogia o le pulega lea e le motusia ai i latou e faasolo i tofiga ma e o loo saunia e faatumu ia tofiga pe a avanoa. O lena faatulagaga e maua ai le taitaiga faaperofeta e oo foi pe a o mai faatasi le matua o tausaga ma gasegase le maalofia ma le le gafatiaina.¹⁷ Ua anoanoai foi aiaiga ma puipuiga ina ia le mafai ai e se tasi ona taitaiseseina le Ekalesia. E aoao pea lava pea taitai sinia ina ia oo mai lena aso ua latou saunia e nofo i aufono sili ona maualuluga. Latou te aoao i le auala e faalogo ai i le siufofoga o le Alii e ala i musumusuga a le Agaga.

A o auauna ai o le Fesoasoani Muamua ia Peresitene Ezra Taft Benson, o le sa pulapula lagoto lona soifua faaletino, sa faamalamalama mai ai e Peresitene Gordon B. Hinckley:

“Ua i ai i mataupu ma ala faatutuina ua faia e le Alii mo le taitaiga o Lana ekalesia ni fuafuaga mo tulaga faapenei. E taua … ona le i ai o le masalosalo po o le popole e uiga i le taitaiga o le Ekalesia, ma le faaaogaina o meaalofa faaperofeta, e aofia ai le aia i musumusuga ma faaaliga i le taitaiga o le galuega ma polokalama o le Ekalesia, pe a gasegase le Peresitene pe ua le mafai ona ia galue atoatoa.

“O le Au Peresitene Sili ma le Aufono a Aposetolo e Toasefululua, ua tofia ma faauuina e umia ki o le perisitua, ua i ai le pule ma le tiute e taitai ai le Ekalesia, ma faia ai ona sauniga, ma faamalamalama ona mataupu, ma faatuina ma faamautuina ona aoaoga.”

Sa faaauau pea le saunoaga a Peresitene Hinckley:

“A gasegase le Peresitene pe ua le mafai ona ia galue atoatoa i tiute uma o lona tofi, o ona fesoasoani faatasi e toalua, o le Korama lena a le Au Peresitene Sili. O i laua e faia galuega o aso taitasi a le Au Peresitene Sili. …

“… Ae o soo se mataupu mamafa o aiaiga, tulafono, polokalama, po o mataupu, e iloiloina ma le agaga tatalo faatasi e le Au Peresitene Sili ma le Toasefululua.”¹⁸

I le tausaga ua tea, ina ua ausia e Peresitene Monson le matāti’a o le 5 tausaga o le auaunaga o se Peresitene o le Ekalesia, sa ia toe manatunatu ai i lona 50 tausaga o le auaunaga faaaposetolo ma faia ai le saunoaga lenei: “E oo mai lava aafiaga le lelei o le matua ia i tatou uma. Peitai, tatou te tuufaatasi o tatou leo ma le Tupu o Peniamina, lea na fai mai, … ‘Ua pei lava a’u o outou, e oo i ai vaivaiga eseese uma o le tino ma le mafaufau; peitai ua filifilia a’u … ma faapaiaina e lo’u tama, … ma sa tausia ma faasaoina e lona mana le mafaatusalia, e auauna atu ia te outou ma le manatu atoa, mafaufau, ma le malosi atoa ua tuu mai e le Alii ia te a’u’ (Mosaea 2:11).”

Sa faaauau pea le saunoaga a Peresitene Monson: “E ui i soo se luitau o le soifua maloloina e ono oo mai ia i tatou, e ui i soo se vaivaiga i le tino po o le mafaufau, tatou te auauna pea i le mea sili tatou te mafaia i lo tatou tomai. Ou te faamautinoa atu ia te outou o le Ekalesia o loo saogalemu lona taitaiga. O le faatulagaga ua faatulagaina mo le aufono a le Au Peresitene Sili ma le Korama a [Aposetolo] e Toasefululua ua faamautinoa ai [ia i tatou] o le a i ai pea i taimi uma le saogalemu o lona taitaiga ma po o le a lava se mea e ono oo mai, e leai ma se mea e ono popole ai pe fefe ai. O lo tatou Faaola, o Iesu Keriso, le o loo tatou mulimuli i ai, le o loo tatou tapuai i ai, ma le o loo tatou auauna i ai, o loo i ai pea i le taitaiga [o le Ekalesia].”¹⁹

Peresitene Monson, matou te faafetai atu mo na upumoni! Ma e matou te faafetai atu mo lou soifuaga atoa o faataitaiga ma auaunaga tuuto. Ou te fia fai ma sui o tagata o le Ekalesia i le lalolagi atoa i lo matou faailoaga autasi ma le faamaoni o le loto faafetai mo oe. Matou te faamamaluina oe! Matou te alolofa ia te oe! Matou te lagolagoina oe, e le na o le siilima ae ma o matou loto atoa ma taumafaiga faapaiaina. I le lotomaualalo ma le faatauanau, “le perofeta pele e, ia talosia”!²⁰ I le suafa o Iesu Keriso, amene.