Buk Ia

Taem mi wan yang skaot blong 12 yia, mi kasem wan presen we mi wantem tumas blong ademap long Skaot tul blong mi. !Hemi wan smol akis wetem wan hevi raba we i kavremap! Long nekis ovanaet we mifala i wokbaot, mifala i kasem kamp afta we ples i tudak, mo mifala i wetwet mo kolkol from hevi sno we i foldaon long rod. Naoia, mi tingting nomo blong mekem wan bigfala faea. Wantaem nomo mi go katem wan tri we i foldaon wetem niufala smol akis blong mi. Taem mi stap katkat i go, mi kros from mi luk se i no katem gud samting. Mi kros nao, mi wok had moa. Mi harem nogud, mi gobak long kamp wetem sam pis wud nomo. Be wetem laet blong faea blong wan narafala, mi luksave problem. Mi no bin karemaot bigfala raba long akis. Mi save talem se raba ia, i brokbrok evriwan. Lesen we mi lanem: mi letem ol nara samting oli pulum tingting blong mi.

Taem yumi wok blong kam wan god, yumi mas mekem evri samting we i nid blong mekem se yumi no lukluk nomo long wan o tu samting nomo o ol samting we i aotsaed olgeta. Blong stap lukaotem kingdom blong God i lid i go long glad mo hapines.¹ Sapos i nid, yumi mas glad blong jenis. Taem yumi korektem smol samting oltaem, i mekem i no had mo i isi bitim blong stretem ol bigfala mistek long laef.

I no longtaem i pas, mi mo Sista Peka i bin travel i go long sam nara kantri. Mitufala i rere long ol paspot mo ol nara pepa blong mitufala. Mitufala i kasem evri stik, medikol jekap, ol visa, mo ol stamp. Taem mitufala i kasem ol kantri, oli jekem ol pepa blong mitufala, mo taem mitufala i mitim evri samting we oli nidim, oli letem mitufala i go insaed long kantri ia.

Blong kwalifae blong kam olsem wan god, i olsem we yumi rere blong go insaed long wan nara kantri. Yumi mas kasem wanwan paspot blong yumi long saed blong spirit. Yumi no putum wanem we i nidim blong mekem, be, wanwan long yumi mas mekem evri samting ia. Plan blong fasin blong sevem man i gat evri doktrin, loa, komanmen, mo odinens we i nid blong evriwan i kwalifae blong kam olsem wan god.² Afta, “tru long Atonmen blong [Jisas] Kraes, evri man long wol i save sef.”³ Jos i help be i no save mekem blong yumi. Blong kwalifae blong kam olsem wan god, i kam gol we yumi traehad blong kasem long laef.

Kraes i oganaesem Jos blong Hem blong helpem yumi. Hem i bin singaotem 15 man we yumi sastenem olsem ol profet, sia mo reveleta blong gaedem Jos mo tijim ol pipol. Fas Presidensi⁴ mo Kworom blong Olgeta Twelef Aposol⁵ oli ikwol long paoa mo atoriti,⁶ wetem senia Aposol we i stap olsem Presiden blong Jos. Olgeta Seventi, oli singaotem olgeta blong help.⁷ Ol lida ia oli no putum ol kondisen blong kam olsem wan god. !God i mekem! Ol lida, God i singaotem olgeta blong tij, eksplenem, leftemap tingting, mo tu, blong givim woning blong save stap long rod.⁸

Olsem we i stap long hanbuk blong instraksen: “Blong fulfilim stamba tingting blong helpem wanwan mo ol famle blong kwalifae blong kam olsem wan god, Jos i luk long ol tabu responsabiliti we oli kasem. Insaed, i gat tu fasin blong helpem ol memba blong laef folem gospel blong Jisas Kraes, karem haos blong Isrel i kam tugeta tru misinari wok, stap kea long olgeta we i pua mo olgeta long nid, mo mekem se Jisas i save sevem olgeta we oli ded taem oli bildim ol tempol mo mekem ol odinens long bihaf blong olgeta.”⁹ Ol fofala poen ia, mo evri nara loa, komanmen, mo odinens, oli mas mekem mo i no blong jusum. Tru long Atonmen blong Jisas Kraes mo taem yumi mekem wanwan samting ia, yumi stap putum moa stamp we i nid long ol paspot blong yumi long spirit.

Long taem blong konfrens ia, oli bin tijim yumi abaot ol jenis we bae i helpem yumi evriwan blong rere gud moa.

Famle i stamba samting long plan blong fasin blong sevem man mo ating from hemia nao oli singaotem tu “bigfala plan blong stap glad.”¹⁰ Presiden Boed K. Peka i bin talem: “Bigfala stamba tingting blong evri aktiviti long Jos, hem i we wan man mo waef blong hem mo ol pikinini blong tufala oli save stap hapi long hom.”¹¹

Presiden Spensa W. Kimbol i talem se: “Sakses blong yumi, wanwan mo olsem wan Jos, bae i kamaot moa long olsem wanem nao yumi stap fetful blong lukluk nomo blong laef folem gospel long hom.”¹² Tempol mo famle histri wok i pat blong laef folem gospel long hom. I mas kam wan famle aktiviti moa bitim we i wan Jos aktiviti.

I bin gat sam impoten samting we Fas Presidensi mo Kworom blong Olgeta Twelef,¹³ i bin mekem i niu bakegen long famle histri mo tempol wok. Taem yu mekem ol samting ia, bae i mekem yuwan mo famle i glad mo hapi.

Long Doktrin mo Ol Kavenan yumi rid se bigfala dei blong Lod i kam kolosap nao. From hemia, olsem wan jos mo wan pipol, mo olsem Ol Lata-dei Sent, yumi mas givim long Lod, wan ofring long stret mo gud fasin; mo yumi mas givim insaed long tabu tempol blong hem, wan buk we oli raetemdaon insaed, ol rekod blong olgeta dedman blong yumi, we i inaf blong Lod i akseptem.¹⁴

“Buk” ia bae oli rere long hem taem oli yusum ol rekod insaed long Famle Tri program blong Jos.

Mi stap jekem mo ademap ol rekod long program ia from mi wantem ol nem blong evriwan we mi lavem blong stap long buk ia. ?Be olsem wanem long yu?

Long Doktrin mo Ol Kavenan seksen 128 i talem se from we yumi, sapos i no gat olgeta, [ol bubu long yumi] yumi no save kam stret gud evriwan; mo semmak, olgeta, sapos i no gat yumi, oli no save kam stret gud evriwan.¹⁵

Famle histri i moa bitim wok blong famle laen, ol rul, ol nem, ol deit, mo ol ples. Hem i moa bitim we blong jes luk i gobak bifo. I gat tu insaed long famle histri, histri blong taem naoia taem yumi krietem histri blong yumi. I gat fiuja insaed, taem yumi stretem fiuja histri tru ol laen blong yumi. Eksampol, wan yang mama, we i stap serem famle stori mo pikja blong hem wetem ol pikinini blong hem, i stap mekem famle histri wok.

Olsem tekpat long sakramen, atendem ol miting, ridim ol skripja, mo talem ol prea blong yumiwan, mekem famle histri mo tempol wok, oli mas kam pat blong ol evri dei wosip blong yumi. Ansa blong ol yut blong yumi mo ol narawan long ol invitesen blong ol profet blong yumi i bin wan insperesen mo i pruvum se wok ia i save mo i mas gohed tru evri memba nomata wanem yia oli gat.

Olsem Elda Kwentin L. Kuk i bin eksplenem: “Naoia yumi gat doktrin, ol tempol, mo teknoloji.”¹⁶ Hem i moa isi nao blong mekem wok ia mo be namba blong ol memba ia we oli putum hemia i kam faswan, i smol tumas. Wok ia i nidim moa taem mo sakrifaes, be evriwan i save mekem, mo i stap kam moa isi komperem long ol yia we i pas.

Blong helpem ol memba, Jos i bin putum tugeta ol rekod mo givim ol tul blong mekem se wok i save gohed long ol hom blong yumiwan o long ol bilding blong ol wod blong yumi mo long tempol. Plante long ol samting we i stap blokem wok ia, oli karemaot finis. Nomata wanem we yu stap tingting long hem abaot famle histri bifo, !naoia i defren!

Be, i gat wan samting i blokem wok ia we Jos i no save karemaot. Hem i blong no gat strong tingting blong mekem wok ia. Wanem we i nidim nomo, i wan desisen mo gat tingting blong mekem. I no nidim wan bigfala taem. Wan smol taem oltaem bae i soem glad blong wok ia. Mekem wan desisen blong tekem wan step, blong lanem mo askem ol narawan blong helpem yu. !Bae oli helpem yu! Ol nem we yu faenem, mo tekem i go long tempol bae oli kam ol rekod blong “buk ia.”¹⁷

Nomata bigfala namba blong ol memba we oli tekpat tu, yumi faenem se sam long ol memba blong Jos nomo oli gohed oltaem blong faenem mo mekem tempol odinens blong ol famle blong olgeta.¹⁸ Yumi nidim blong mekem wan jenis long wanem i kam faswan long laef. !No stopem jenis, be akseptem! Jenis i pat blong bigfala plan blong stap glad.

Yumi nid blong mekem wok ia, i no blong Jos i luk gud long hem be blong gud blong ol famle blong yumi we oli ded mo blong yumiwan. Yumi, wetem olgeta we oli ded finis, i nidim ol stamp blong ol paspot blong yumi long saed blong spirit.

Fasin blong joenem tugeta¹⁹ ol famle blong yumi truaot ol jeneresen i save hapen nomo insaed ol tempol tru ol siling odinens. Ol step oli simpol nomo: jes faenem wan nem nomo mo tekem i go long tempol. Afta sam taem, bae yu save helpem ol narawan blong mekem olsem tu.

Wetem smol help, !evriwan—evriwan i save mekem samting ia!

I gat plante blesing we i go wetem wok ia we i tru. Plante papa mo mama mo ol lida oli wari abaot wol tedei mo wanem we i stap mekem long ol famle mo yut.

Elda Bedna i bin promes: “Mi invaetem evri yang pipol blong Jos blong lanem abaot mo eksperiensem Spirit blong Ilaeja. … Mi promes [se] bae yufala i kasem proteksen agensem strong paoa blong devel we i stap kam antap bigwan. Taem yu tekpat long, mo lavem tabu wok ia, bae yu stap sef olsem wan yut mo truaot long laef blong yu.”²⁰

Ol brata mo sista. Hem i taem blong karemaot raba long smol akis blong yumi mo go wok. Yumi no mas sakrifaesem fasin blong yumi blong kam wan god o hemia blong ol famle blong yumi from ol samting we oli no impoten nating.

Hemia i wok blong God, we ol memba i mas mekem, semmak wetem olgeta we oli no memba, yangfala mo olfala, man mo woman.

Mi endem wetem fas ves blong hym 324, mo jenisim wan toktok:

!Jisas Kraes i King ia! Mi testifae abaot Hem long nem blong Jisas Kraes, amen.