Phau Ntawv

Thaum ua ib tug tub hluas Scout uas muaj 12 xyoo, kuv txais ib qho khoom plig uas tau ntxiv rau kuv tej khoom mus ua cov tub Scout. Nws yog ib rab taus me me uas muaj lub hnab tawv tsiaj! Zaum tom qab ntawd thaum peb taug kev mus pem roob, peb tuaj txog qhov chaw uas peb yuav pw thaum tsaus ntuj lawm, peb thawm ntub thiab no heev vim twb los daus lawm. Kuv tsuas xav txog txoj kev rauv taws loj loj xwb. Kuv tau siv kuv rab taus tshiab pib txiav ntoo. Thaum kuv tab tom txiav, kuv pib npau taws vim zoo nkaus li nws txiav tsis tshua zoo. Vim npau taws heev, kuv thiaj tau sib zog me ntsis. Kuv poob siab heev, ces txawm rov qab mus rau qhov chaw yuav rauv taws tiam sis tsuas muaj ob peb yav ntoo xwb. Vim lwm tus twb rauv taws lawm, kuv thiaj pom kev me ntsis es kawm seb yog vim li cas muaj qhov teeb meem ntawd. Kuv tsis tau hle hnab tawv tsiaj ntawm rab taus li. Tiam sis, kuv hais rau nej paub tias kuv twb ua rau lub hnab tawv tsiaj ntawd puas tsuaj tas. Zaj lus qhia yog: kuv tau xav txog lwm yam.

Thaum peb ua hauj lwm kom peb tau kev tsa nto, peb yuav ua hauj lwm ua txhua yam tsav thiab tsis txhob hnov qab txog lwm yam vim peb tshua xav txog ib los sis ob peb yam uas peb ua. Kev nrhiav kom tau Vajtswv lub nceeg vaj ua rau peb muaj kev zoo siab thiab kev xyiv fab.¹ Yog xav tau ces, peb yuav tsum kam muab hloov. Yog tias ib sij kho tej yam me me xwb ces yuav tsis nyuaj thiab kawj teeb meem ntau npaum thaum peb yuav tsum hloov tej yam loj loj.

Tsis ntev tas los lawm, Muam Packer wb tau mus yos xyuas ntau lub teb chaws. Peb tau npaj peb daim ntawv hla ciam teb thiab lwm cov ntaub ntawv. Peb tau mus txhaj tshuaj, mus kuaj mob, ua cov ntawv nkag lwm lub teb chaws, thiab cov cim ntawv. Thaum peb tuaj txog lawm, lawv tau kuaj xyuas peb cov ntaub ntawv, thiab thaum ua txhua yam tsav tiav tas lawm, lawv pub peb nkag los rau lub teb chaws ntawd.

Qhov uas yus yuav tsim nyog tau kev tsa nto zoo nkaus li thaum yus nkag mus hauv lwm lub teb chaws. Peb txhua tus yuav tsum muaj peb ib daim ntawv hla ciam teb ntawm sab ntsuj plig. Peb tsis tsa tej kev cai ntawd, tiam sis peb txhua tus, yuav tsum ua raws li tej kev cai ntawd. Txoj kev cawm seej muaj txhua txoj lus qhuab qhia, tej kev cai, cov lus txib, thiab tej kab ke kom sawv daws yuav tsim nyog tau kev tsa nto.² Ces, “dhau ntawm [Yexus] Khetos txoj Kev Theej Txhoj, kom tib neeg tau txoj kev cawm dim.”³ Lub Koom Txoos yeej pab tiam sis ua tsis tau tej ntawd rau peb. Txoj kev mus txais kev tsa nto yog qhov uas nrhiav kom tau hauv tag nrho yus lub neej.

Khetos tau txhim tsa Nws lub Koom Txoos los pab peb. Nws tau hu 15 tug txiv neej uas peb txhawb nqa ua cov yaj saub, cov neeg pom tau, thiab cov neeg qhia kev tshwm sim uas coj kav lub Koom Txoos thiab qhia tib neeg. Thawj Pawg Thawj Tswj Hwm⁴ thiab Pawg Kaum Ob tug Thwj Tim⁵ yeej muaj hwj chim thiab txoj cai sib txig,⁶ es tsa tus Thwj Tim hlob uas tus Thawj Tswj Hwm rau lub Koom Txoos. Tau hu Pawg Xya Caum los pab.⁷ Cov thawj coj no tsis tau tsa tej kev cai rau txoj kev tsa nto. Vajtswv tau tsa cia! Cov thawj coj no raug hu los qhia, piav, ntuas thiab tej thaum ceeb toom xwv kom peb yuav nyob rau hauv txoj hau kev.⁸

Li piav tseg hauv phau ntawv coj qhia nws hais tias: “Thaum ua raws li lub hom phiaj los pab tib neeg thiab tej yim neeg txais tau kev tsa nto, lub Koom Txoos ua raws li tej kev lav ris uas los saum ntuj ceeb tsheej los. Qhov no hais txog kev pab cov mej zeej ua raws li Yexus Khetos txoj moo zoo qhia, muab haiv neeg Ixayees sib sau ua ke dhau ntawm cov tub txib tej hauj lwm, saib xyuas cov neeg pluag thiab cov neeg txom nyem, thiab pab tsa cov neeg tuag kom nto thaum ua cov tuam tsev thiab ua tej kab ke sawv lawv cev.”⁹ Yuav tsum ua plaub lub hom phiaj thiab txhua yam kev cai, lus txib, thiab kab ke, tsis muaj kev xaiv li. Dhau ntawm Yexus Khetos txoj Kev Theej Txhoj thiab thaum ua txhua yam tsav no, peb tab tom tso tej cim rau hauv peb daim ntawv hla ciam teb ntawm sab ntsuj plig.

Hauv lub rooj sab laj no peb tab tom kawm txog tej kev hloov uas yuav pab peb haj yam ua tib zoo npaj siab.

Tsev neeg nyob nruab plawv txoj kev cawm seej thiab tej zaum yog vim li ntawd qhov no hu ua “txoj kev zoo siab heev.”¹⁰ Thawj Tswj Hwm Boyd K. Packer hais tias, “Qhov zoo tshaj plaws uas yus yuav txais vim yus koom lub Koom Txoos twb yog qhov uas ib tug txiv neej thiab nws tus poj niam thiab nkawd cov me nyuam yuav muaj kev zoo siab hauv tsev.”¹¹

Thawj Tswj Hwm Spencer W. Kimball hais tias, “Qhov uas peb ua tau zoo, tsis hais ib tug neeg thiab ua ib lub Koom Txoos, yuav nyob ntawm seb peb rau siab ntso npaum li cas ua raws li txoj moo zoo qhia nyob hauv tsev.”¹² Tej hauj lwm hauv lub tuam tsev thiab nrhiav tsev neeg keeb kwm yog ib qho ntawm kev ua raws li txoj moo zoo qhia nyob hauv tsev. Nws yuav tsum yog tuaj koom tsev neeg ntau dua qhov uas peb tuaj koom lub Koom Txoos.

Thawj Pawg Thawj Tswj Hwm thiab Pawg Kaum Ob tug Thwj Tim rov qab tham ntau txog kev nrhiav tsev neeg zaj keeb kwm thiab tej hauj lwm hauv lub tuam tsev.¹³ Nws hais ntxiv hais tias: “Tej yam yus siv sij hawm ua yus tus kheej thiab ua hauv nej tsev neeg zoo dua lwm yam, thiab muaj tej yam uas zoo tshaj plaws.

Nyob hauv Phau Lus Qhuab qhia thiab Kev Khi Lus peb nyeem hais tias tus Tswv hnub zoo kawg nkaus twb nyob tom peb hau ntej. Yog li ntawd, cia peb, uas yog ib lub koom txoos thiab ib haiv neeg, thiab ua Haiv Neeg Ntseeg hauv Hnub Nyoog Kawg, muab ib qho kev txi rau tus Tswv ua neeg ncaj ncees, thiab cia peb los rau hauv nws lub tuam tsev dawb ceev, ib phau ntawv uas muaj tej ntawv qhia txog peb cov neeg uas tuag lawm, uas yuav tsim nyog txais tau.¹⁴

Yuav ua “phau ntawv” no thaum siv lub Koom Txoos cov ntaub ntawv nrhiav tsev neeg caj ceg tej npe thiab tej kab ke.

Kuv tab tom xyuas thiab ntxiv ntaub ntawv hauv no vim kuv xav kom tag nrho cov neeg uas kuv hlub tej npe yuav nyob hauv phau ntawv no thiab. Nej puas xav li ntawd?

Phau Lus Qhuab Qhia thiab Kev Khi Lus tshooj 128 hais tias rau qhov peb cov uas tsis muaj peb cov poj koob yawm txwv yuav ua tsis tau neeg zoo tag nrho; thiab lawv yuav ua tsis tau neeg zoo tag nrho yog lawv tsis muaj peb.¹⁵

Kev nrhiav tsev neeg keeb kwm yeej ntau tshaj txoj kev nrhiav caj ceg, tej kev cai, tej npe, tej hnub, thiab tej qhov chaw xwb. Nws ntau tshaj txoj kev xav txog yav tas los lawm. Tsev neeg zaj keeb kwm kuj hais txog lub caij nyoog no thaum peb tab tom tsim peb zaj keeb kwm thiab. Nws kuj hais txog yav tom ntej thaum peb kho peb zaj keeb kwm dhau ntawm peb cov xeeb leej xeeb ntxwv. Piv xam hais tias, ib leej niam hluas uas tab tom qhia tej dab neeg thiab cev duab txog nws tsev neeg rau nws cov me nyuam saib yog tab tom ua tej hauj lwm ntawm tsev neeg zaj keeb kwm.

Zoo li thaum noj lub cim nco txog, tuaj koom tej kev sib ntsib, nyeem vaj lug kub, thiab kev thov Vajtswv, nrhiav tsev neeg keeb kwm thiab ua tej hauj lwm hauv lub tuam tsev yuav tsum yog ib qho ntawm peb txoj kev teev tiam. Qhov uas cov tub ntxhais hluas thiab lwm tus neeg tau los ua raws li cov yaj saub caw lawv ua yeej tau tshoov kuv lub siab thiab qhia tseeb hais tias txoj hauj lwm no yog ib yam uas txhua tus mej zeej ua tau thiab yuav tsum ua lawv muaj hnub nyoog li cas los xij.

Raws li Txwj Laug Quentin L. Cook piav tias, “Nim no peb tau cov lus qhuab qhia, cov tuam tsev, thiab tej txuj ci lawm.”¹⁶ Nim no nws haj yam yooj yim los ua tej hauj lwm thiab tsuas muaj ciaj ciam rau cov mej zeej uas yog kev tsis mob siab ua tej no. Tseem yuav tau txi ntau yam thiab siv sij hawm los ua tej hauj lwm no, tiam sis txhua leej txhua tus muaj cuab kav ua, thiab nws yooj yim tshaj ob peb xyoos tas los lawm.

Kom pab tau cov mej zeej, lub Koom Txoos tau sau cov ntaub ntawv ua ke thiab tau tsim tej qhov cuab yeej xwv kom peb thiaj ua tau tej hauj lwm no hauv peb vaj peb tsev los sis hauv peb pawg ntseeg lub tsev sib ntsib thiab cov tuam tsev. Twb tshem yuav luag txhua yam uas thaiv peb kev. Tab txawm yav tas los lawm koj xav li cas, tas sim no twb hloov hlo lawm!

Tab sis mas, tseem muaj ib yam thaiv kev uas lub Koom Txoos tshem tsis tau. Qhov ntawd yog qhov uas tib neeg tsis tshua kam los ua tej hauj lwm no. Peb tsuas yuav tau txiav txim los ua thiab sib zog me ntsis. Tsis yog yuav siv sij hawm ntau heev. Tiam sis siv sij hawm me me tsis tu tsis tseg ces yus yuav muaj kev zoo siab uas los thaum yus ua txoj hauj lwm no. Cia li txiav txim chais ib ruam taw, mus kawm thiab thov kom lwm tus neeg los pab nej. Lawv yuav pab! Tej npe uas nej nrhiav thiab nqa mus rau lub tuam tsev yuav rais los ua cov ntaub ntawv rau “phau ntawv” no.”¹⁷

Txawm tias muaj mej zeej coob heev uas los pab ua tej no los, peb pom hais tias muaj mej zeej hauv lub Koom Txoos tsawg heev uas pheej pab nrhiav thiab ua tej kab ke hauv lub tuam tsev rau lawv tsev neeg.¹⁸Yog li ntawd peb yuav tsum pauv peb lub hom phiaj. Tsis txhob tawm tsam txoj kev pauv no, cia li ua kiag!

Yuav tsum ua tej hauj lwm no, tsis yog kom pab lub Koom Txoos tiam sis yog kev pab rau cov neeg tuag thiab rau peb tus kheej. Peb thiab peb cov poj koob yawm txwv uas tuag lawm xav tau cov cim hauv peb daim ntawv hla ciam teb ntawm sab ntsuj plig.

Txoj kev muab peb tsev neeg “khi ua ke”¹⁹ rau txhua tiam neeg tsuas yog ua tau hauv cov tuam tsev los ntawm txoj kab ke muab neeg khi ua ke. Tej theem no yeej yooj yim ua: cia li nrhiav ib lub npe thiab nqa mus rau lub tuam tsev. Nyob nyob ces nej thiaj yuav muaj cuab kav pab lwm tus neeg ua li ntawd thiab.

Tsis tshua muaj kev zam cai, rau qhov sawv daws—sawv daws—yeej ua tau li no!

Cov uas ua tej hauj lwm no yeej yuav pom tej koob hmoov tshwm los. Coob tug niam txiv thiab thawj coj txhawj txog tej yam hauv ntiaj teb no thiab tej ntawd yuav ua li cas rau tej yim neeg thiab cov tub thiab ntxhais hluas.

Txwj Laug David A. Bednar tau cog lus hais tias: “Kuv caw cov tub hluas ntxhais hluas ntawm lub Koom Txoos kawm thiab paub zoo txog Eliyas lub Hwj Huam. … Kuv cog lus [tias] nej yuav txais kev pov hwm kom tiv thaiv tsis raug tus yeeb ncuab lub hwj huam uas loj zuj zus tuaj. Thaum nej koom tes ua hauj lwm thiab nyiam ua tej hauj lwm dawb huv no, Vajtswv yuav pov hwm nej thaum nej yog tub hluas ntxhais hluas thiab tas nej lub neej.”²⁰

Cov kwv tij cov muam, twb txog lub caij rau peb tau tshem lub hnab tawv tsiaj ntawm peb rab taus thiab tawm mus ua hauj lwm. Peb yuav tsum tsis txhob tso peb los sis peb tsev neeg txoj kev tsa nto tseg kom thiaj tau lwm yam uas tsis tshua tseem ceeb.

Nov yog Vajtswv txoj hauj lwm, cov mej zeej thiab cov uas tsis yog mej zeej tib si yuav tau ua, cov laus cov hluas, txiv neej thiab poj niam.

Kuv xaus hais nqe thib ib rau zaj nkauj naj npawb 324, yuav pauv ib lo lus:

Yexus Khetos yog tus Vaj Ntxwv! Kuv ua tim khawv li no los ntawm Yexus Khetos lub npe, amees.