Txoj Kev Cai Yoo Mov: Ib lub Luag Hauj Lwm Saib Xyuas cov Neeg Pluag thiab Txom Nyem

Kuv cov kwv tij, kuv nyiam lub pov thawj hwj, thiab kuv nyiam tias kuv tau nyob nrog nej. Kuv zoo siab heev tias peb ua tau Vajtswv txoj hauj lwm tseem ceeb no ua ke.

Peb nyob ib lub caij nyoog tseem ceeb heev. Muaj tej txuj ci uas tib neeg tau kawm, txog kev kho mob, kev tshawb fawb, thiab tej tshuab ua hauj lwm uas pab coob leej nyob zoo zog. Txawm li ntawd los peb pom tias yeej muaj ntau leej uas txom nyem heev thiab muaj kev ntxhov siab ntau. Tsis yog muaj kev ua tsov rog thiab hnov lus paj lus cua txog kev ua tsov rog xwb, kuj muaj ntau yam kev puas tsuaj hauv ntiaj teb ntau zog thiab—tej dej nyab, tej hluav taws, tej av qeeg, thiab tej kab mob—uas raug ntau lab leej nyob thoob plaws lub ntiaj teb.

Lub Koom Txoos cov thawj coj paub txog thiab ceev faj txog seb Vajtswv cov me nyuam uas nyob txhua qhov chaw nyob li cas. Thaum lub Koom Txoos muaj peev xwm mus pab tau ib qhov chaw, nws xa khoom thiab tib neeg mus pab cov uas xav tau kev pab. Piv txwv li thaum, lub Kaum Ib Hlis Ntuj tas los no, ib qho cua daj cua dub uas chiv tom hiav txwv los hu ua Haiyan tau raug lub teb chaws koog pov txwv Philippines.

Haiyan yog ib qho cua daj cua dub phem tshaj plaws, uas ua rau ntau yam puas tsuaj thiab txom nyem tas. Tej lub zos puas tsuaj tag nrho; coob leej tau tuag; ntau lab lub tsev puas ntau los yog puas tag nrho; thiab tej yam uas yus yuav tsum tau xws li dej, tej khoom tso dej qias tawm mus, thiab hluav taws xob tsis muaj los sis tsis ua hauj lwm lawm.

Thaum nyuam qhuav muaj kev puas tsuaj no lub Koom Txoos xa khoom thiab tib neeg mus pab. Lub Koom Txoos cov mej zeej uas nyob hauv Philippines cia li sib koom mus pab lawv cov kwv tij thiab muam es pab muab mov noj, dej haus, khaub ncaws hnav, thiab tej khoom tu cev rau cov uas yog mej zeej thiab cov uas tsis yog mej zeej tib yam.

Lub Koom Txoos cov tsev sib ntsib pauv los ua cov chaw nkaum rau ntau txhiab leej uas nim no tsis muaj tsev lawm. Raws li Cheeb Tsam Pawg Thawj Tswj Hwm thiab cov thawj coj pov thawj hwj uas nyob ntawd pom zoo, ntau leej ntawm cov no uas tau poob txhua yam lawv muaj, lawv xyuas seb tag nrho cov mej zeej nyob li cas thiab puas tau zoo nyob. Raws li tus Vaj Ntsuj Plig Dawb Huv tshoov lawv lub siab, lawv npaj pab cov mej zeej kom rov qab los nyob zoo dua thiab kawm pab lawv tus kheej.

Lub Koom Txoos cov mej zeej tau txais ib me ntsis khoom los pab lawv ua lawv tej tsev pheeb suab ntoo thiab tsev nyob. Qhov no tsis yog ib qho khoom dawb xwb. Lawv qhia cov mej zeej ua tsev thiab cov mej zeej yuav tsum ua tsev rau lawv tus kheej thiab ces rau luag tej thiab.

Ib qho koob hmoov uas muaj vim ua li no yog cov mej zeej kawm siv ntoo ua tsev, kawm kho tej kav dej, thiab kawm lwm yam tswv yim ua tsev, ces lawv thiaj mus nrhiav tau hauj lwm zoo ua thaum cov zos uas nyob ze lawv pib ua tsev tshiab thiab.

Txoj kev saib xyuas cov neeg pluag thiab txom nyem yog txoj moo zoo ib txoj lus qhuab qhia tseem ceeb thiab ib yam tseem ceeb heev hauv txoj kev cawm seej nyob ntev dhawv ib txhis.

Ua ntej Yehauvas ua hauj lwm qhuab qhia hauv ntiaj teb no, Nws tshaj tawm dhau los ntawm Nws tus yaj saub hais tias: “Nej muaj cov kwv tij txom nyem uas nrog nej nyob: yog li ntawd kuv hais rau nej hais tias, Nej yuav tsum ua siab dawb siab zoo rau lawv.”¹

Hauv peb lub caij no, txoj kev saib xyuas cov neeg pluag thiab txom nyem yog ib qho ntawm plaub lub luag hauj lwm peb muaj hauv lub Koom Txoos, uas los ntawm Vajtswv los, uas pab tib neeg thiab tej tsev neeg tsim nyog tau txoj kev tsa nto.²

Txoj kev pab cov neeg pluag thiab txom nyem yog txoj kev cawm seej ntawm sab cev nqaij daim tawv thiab sab ntsuj plig. Nws yog thaum lub Koom Txoos cov mej zeej pab saib xyuas cov neeg pluag thiab txom nyem, thiab kuj yog thaum peb siv lub Koom Txoos txoj kev pab, uas los ntawm lub pov thawj hwj txoj cai.

Lub hauv paus ntawm tus Tswv txoj hau kev saib xyuas cov neeg pluag thiab txom nyem yog txoj kev cai yoo mov. “Tus Tswv tau tsim txoj kev cai yoo mov thiab tej nyiaj yoo mov xwv kom foom koob hmoov rau Nws cov neeg thiab xwv kom muab ib txoj kev rau lawv pab cov uas xav tau kev pab.”³

Vim peb coj raws li tus Cawm Seej, peb txhua tus muaj lub luag hauj lwm saib xyuas cov neeg pluag thiab txom nyem. Lub Koom Txoos cov mej zeej uas ntseeg nyob txhua qhov chaw pab thaum lawv yoo mov txhua hli—siv 24 teev tsis txhob noj mov los haus dej—ces muab qhov nyiaj yoo mov rau lub Koom Txoos, tsawg tshaj yog cov nyiaj uas lawv yuav them yog tias lawv tau noj.

Txhua tsev neeg cia li thov Vajtswv txog Yaxayas cov lus thiab qhia lawv hauv nej tsev neeg:

“Txoj kev cai yoo mov uas kuv txaus siab ua yog li no: Daws tej saw hlau ntawm txoj kev tsim txom thiab txo tus quab ntawm txoj kev tsis ncaj ncees, thiab tso cov neeg uas nej tsim txom tawm mus.

“Faib nej tej zaub mov rau cov neeg tshaib plab noj thiab qhib qhov rooj rau cov neeg pluag uas tsis muaj tsev nyob. Pub ris tsho rau cov neeg txom nyem tau hnav, thiab yuav tsum pab nej tej kwv tij.”⁴

Ces Yaxayas hais ntxiv mus txog cov koob hmoov zoo uas tus Tswv tau cog lus cia pub rau cov uas ua raws li txoj kev cai yoo mov. Nws hais tias:

“Ces kuv txoj kev kaj yuav ci rau nej ib yam li lub hnub ci thaum sawv ntxov, thiab nej tej qhov txhab yuav zoo sai. Kuv yuav nrog nraim nej thiab ua nej tus cawm seej; kuv lub hwj chim yuav tsom kwm puag ncig nej.

“Ces thaum nej thov, tus Tswv yuav teb nej; thaum nej hu kom nws pab, nws yuav teb hais tias kuv nyob ntawm no. …

“Yog nej pub zaub mov rau cov neeg tshaib plab noj thiab pab cov neeg txom nyem; ces tej kev tsaus ntuj uas nyob ib ncig nej yuav hloov ua lub teeb ci rau nej pom kev ib yam li thaum tav su.

“Kuv yuav ua tus coj nej kev mus ib txhis thiab pub txhua yam zoo rau nej kom txaus nej siab.”⁵

Thawj Tswj Hwm Harold B. Lee tau hais txog nqe vaj lug kub no hais tias: “Tib neeg hauv txhua lub caij nyoog yeej qhia meej txog tej koob hmoov uas zoo tshaj plaws uas los [ntawm txoj kev cai yoo mov], thiab tus Tswv qhia peb vim li cas muaj txoj kev cai yoo mov dhau los ntawm tus yaj saub zoo no, thiab tej koob hmoov uas peb muaj thaum peb yoo mov. … Yog nej nyeem thiab xav zoo zoo txog … tshooj 58 hauv phau Yaxayas nej yuav paub vim li cas tus Tswv xav kom peb them qhov nyiaj yoo mov, thiab vim li cas nws xav kom peb yoo mov. Yog vim thaum peb ua li no peb thiaj thov tau rau Nws thiab tus Tswv yuav teb peb. Peb hu tau kom Nws pab thiab tus Tswv yuav teb hais tias, ‘Kuv nyob ntawm no.’”

Thawj Tswj Hwm Lee hais ntxiv tias: “Peb puas xav kom thaum peb thov rau Vajtswv thiab nws tsis yuav teb peb? Peb yuav hu kom nws pab thiab nws tsis yuav nrog peb nyob? Kuv xav tias twb txog lub sij hawm lawm uas peb yuav tau xav txog tej ntsiab cai no vim yav tom ntej peb yuav xav tau tej no, thaum peb xav tau tus Tswv tej koob hmoov los rau peb ntau zog ntau zog, thiab thaum tus Tswv yuav txiav txim meej meej rau lub ntiaj teb tag nrho.”⁶

Peb tus yaj saub uas peb hlub, Thawj Tswj Hwm Thomas S. Monson, tau hais lus tim khawv txog tej ntsiab cai no-nws muaj zaj lus tim khawv no los ntawm tej yam uas tau tshwm sim hauv nws lub neej. Nws hais tias: “Tsis muaj ib tug mej zeej hauv lub Koom Txoos uas tau pab cov uas xav tau kev pab uas yuav hnov qab txog txoj kev pab ntawd los yog khuv xim lub sij hawm ntawd kiag. Peb yeej ib txwm paub txog txoj kev ua hauj lwm, txoj kev siv nyiaj txiag zoo, txoj kev pab yus tus kheej, thiab txoj kev nrog luag sib faib.”⁷

Cov kwv tij, cov mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog ib co neeg uas xav khi lus tseg thiab ua raws li tej lus txib. Kuv tsis paub lwm txoj cai, los sis lwm txoj lus txib, uas yog tias nej ua siab ntseeg coj, yuav yooj yim tshaj thiab foom koob hmoov ntau tshaj txoj kev cai yoo mov. Thaum peb yoo mov thiab muab qhov nyiaj yoo mov ncaj, peb ntxiv cov nyiaj uas peb yuav siv yog tias peb yuav noj cov pluag mov ntawd rau tus Tswv lub tsev rau khoom. Tsis tas peb yuav muab nyiaj ntau tshaj cov nyiaj them rau ob pluag mov uas peb tsis tau noj. Thaum peb ua li ntawd, Nws tau cog lus tias peb yuav txais tej koob hmoov zoo tshaj plaws, li kuv tau hais txog.

Tag nrho lub Koom Txoos cov mej zeej yuav tau ua raws li txoj kev cai yoo mov. Nej kuj qhia tau kom me nyuam yau yoo mov thiab thaum lawv muaj peev xwm to taub txoj kev cai yoo mov thiab lawv lub cev yoo mov tau, pib yoo ib pluag mov thiab ces ob pluag. Cov txiv tsev thiab niam tsev, cov uas tsis tau sib yuav, cov hluas, thiab cov me nyuam yau yuav tsum thov Vajtswv thaum nej pib yoo mov, hais lus ua tsaug rau tej koob hmoov uas nej muaj nyob hauv nej lub neej thaum nej tab tom yoo mov thiab nrhiav tus Tswv tej koob hmoov thiab lub zog txhawb nej lub zog. Nej ua txoj kev cai yoo mov tiav thaum nej muab qhov nyiaj yoo mov rau tus uas sawv cev rau tus Tswv, uas yog tus npisov.

Nej cov npisov, nej siab xyuas txoj kev pab hauv nej pawg ntseeg. Nej muaj txoj hauj lwm los ntawm Vajtswv mus nrhiav thiab saib xyuas cov neeg pluag. Koom Haum Niam Tsev tus thawj tswm hwm thiab pawg Pov Thawj Hwj Mekixedes cov thawj coj pab tau nej, thiab nej lub hom phiaj yog kom pab cov mej zeej pab lawv tus kheej thiab qhia lawv ua li ntawd. Nej pab cov mej zeej ntawm sab cev nqaij daim tawv thiab sab ntsuj plig thaum nej saib xyuas tias cov nyiaj yoo mov yuav pab lawv ib ntus xwb thiab yuav ntxiv rau tej uas lawv cov kwv tij thiab neeg zej zos muab rau lawv. Yog nej thov Vajtswv thaum nej siv lub pov thawj hwj cov yuam sij thiab paub tau seb nej yuav ua li cas thaum nej pab cov neeg pluag thiab txom nyem, nej yuav los paub tias txoj kev siv cov nyiaj yoo mov ncaj yog kom pab neeg txhob txom nyem, tsis yog kom pab lawv muaj muaj tas mus li.

Nej cov thawj tswj hwm ntawm pawg Pov Thawj Hwj Aloos, nej tuav cov yuam sij thiab muaj lub hwj chim ua tej kab ke rau tib neeg. Nej ua hauj lwm nrog tus npisov thiab qhia cov mej zeej hauv nej pawg txog lawv tej luag hauj lwm hauv lub pov thawj hwj thiab txoj kev mus nrhiav cov mej zeej hauv lub Koom Txoos xwv kom muab lub cib fim rau lawv pab rau txoj kev cai yoo mov. Thaum nej cov uas tuav lub Pov Thawj Hwj Aloos ua raws nej lub pov thawj hwj tej luag hauj lwm thiab muab lub cib fim no rau tag nrho cov mej zeej hauv lub Koom Txoos, ntau zaus nej pab muab tej koob hmoov uas tau cog lus cia lawm ntawm txoj kev cai yoo mov rau cov uas xav tau lawv tshaj. Nej yuav pom tias thaum nej saib xyuas cov neeg pluag thiab txom nyem nws muaj lub hwj chim ua kom cov uas muaj siab tawv hloov los ua siab muag thiab foom koob hmoov rau cov uas tsis tsuas tuaj koom lub Koom Txoos hnub puav xwb.

Thawj Tswj Hwm Monson tau hais tias, “Cov npisov uas sib sau lawv tej pawg Pov Thawj Hwj Aloos kom pab mus sau cov nyiaj yoo mov yuav pom tias txoj luag hauj lwm dawb ceev no yuav zoo tuaj.”⁸

Nej cov npisov, nco qab ntsoov tias ib qhov chaw txawv lwm qhov chaw thiab ib lub teb chaws txawv lwm lub teb chaws. Tej zaum tsis zoo tias cov mej zeej hauv nej pawg Pov Thawj Hwj Aloos mus sau nyiaj qhov rooj rau qhov rooj nyob qhov chaw uas nej nyob. Tiam sis, peb thov kom nej thov Vajtswv txog tus yaj saub cov lus ntuas thiab nrhiav kom tus Ntsuj Plig tshoov nej lub siab seb tej yam uas cov uas tuav lub Pov Thawj Hwj Aloos hauv nej pawg ntseeg ua tau yog dab tsi, kom pab sau tej nyiaj yoo mov, kom lawv ua tau raws li lawv lub pov thawj hwj.

Nyob hauv tshooj 27 hauv phau 3 Nifais, tus Tswv uas tau sawv rov los nug hais tias, “Nej yuav tsum ua neeg zoo li cas?” Nws teb hais tias, “Zoo tib yam li kuv.”⁹ Thaum peb ris Khetos lub npe rau saum peb thiab rau siab lawv Nws qab, peb yuav txais Nws tus meej yim rau saum peb tej ntsej muag thiab yuav zoo zog li Nws. Txoj kev saib xyuas cov neeg pluag thiab txom nyem yog tus Cawm Seej ib txoj hauj lwm tseem ceeb. Txhua yam Nws ua muaj txoj kev saib xyuas no. Nws ncav tes rau sawv daws thiab txhawb peb lub zog. Tus quab uas Nws muab rau peb kwv yooj yim kwv, thiab lub nra uas Nws muab rau peb ris, lub ntawd tsis hnyav. Kuv thov kom peb txhua tus los ua li tus Cawm Seej ntau zog thaum peb saib xyuas cov neeg pluag thiab txom nyem, thaum peb ua siab ntseeg txoj kev cai yoo mov, thiab thaum peb siab zoo pub ib qho nyiaj yoo mov. Kuv ua tim khawv tias thaum peb ua siab ntseeg thiab saib xyuas cov neeg pluag thiab txom nyem nws qhia hais tias peb lub siab ntseeg loj npaum li cas thiab nws yuav foom koob hmoov rau tus uas pub thiab tus uas txais. Los ntawm Yexus Khetos lub npe dawb ceev, amees.