Kien Jitļo̧k: Juon Eddo An Juon Make ñan Kea kōn Rijeram̧ōl im Riaikuj

Em̧m̧aan ro rejitōnbōro ippa, ij iakwe priesthood eo, im m̧ōnōnō in pād ippāmi. Eļap aō kam̧m̧oolol bwe jemaroñ jerbal ippān doon ilo jerbal in eļap.

Jej mour ilo tōre ko rōmman . Kabwilōn̄lōn̄ in em̧m̧anļok ilo kein taktō, science, im kein kapeel em̧ōj aer em̧m̧anļo̧k an mour n̄an elōn̄. Aaet ebarāinwōt kam̧ool kōn eļap an armej eñtaan im inepata. Ilo kakobaba n̄an tariņae ko im naan ko kōn tariņae ko, ļapļo̧k ilo jorrāān ko rej make waļo̧k—ekoba ibwijleplep ko, kijeek ko, m̧akūtkūt in laļ ko, im nan̄inmej—ej jelet mour ko an milien ko aolepān lal.

Ritōl ro an Kabuñ rej meļeļe kake im mejmej karuo kōn iien em̧m̧an eo an ajri ro nejin Anij aolep jikin. Iien im ia eoemaron̄, kein jipan̄ ko n̄an idin̄ an Kabun̄ rej liļo̧k n̄an jipan̄ro rej aikuj. N̄anwaanjoñak, Nobōm̧ba eo ļo̧k, Taipuun Haiyan eaar kakkure āne ko ilo Philippines.

Juon taipuun ekajoor Category 5, Haiyan ekar em̧m̧akūt ak eļap kakkure im ļap eñtaan. Bukōn ko raar lukkuun jorrāān; elōñ armej raar mej; milien m̧ōko raar kanooj jorrāān ak rup; im menin aikuj ko raorōk āinwōt den, jikin kōppojak, im jarom raar bōjrak aer jerbal.

Menin jipan̄ ko an Kabun̄ raar pād ilo tōre ko im̧aan tata ālkin wōt jorrāān in. Membōr ro an Kabun̄ rej jokwe ilo Philippines raar ikitōltōl n̄an lo̧mo̧o̧ren ro jeier im jatier kōn leļo̧k m̧ōn̄ā, dān in idaak, nuknuk, im kein karreok ko n̄an membōr ro im ro rejjab membōr barāinwōt.

Imōn jar ko raar erom jikin kone ko ñan taujin ro ejjeļo̧k m̧weer. Ium̧win tōl an Eria Būreejtōnji eo im ritōl ro an priesthood ro ijo, elōñ wōt iaan ro ejako aolep men ko m̧weer, kar kōm̧m̧ani etali ko āinwōt n̄an jekjek eo im em̧m̧an eo an aolep membōr ro. Karōk ko reim̧we raar jino kōm̧m̧an n̄an jipan̄ kōjepļaak jekjek ko rem̧m̧an n̄an jokwe an membōr ro im aer maroñ uñare-peid make.

Kein jerbal ko raan kein kar jilkinļo̧k ñan jipañ membōr ro an Kabun̄ bar kalōk im̧ōk im̧weer kōmm̧an jān aļaļ. Menin eaar jab juon jipan̄ ejjeļo̧k wōņāān. Membōr ro an Kabun̄ raar bōk kamminene im kar kōm̧m̧ani jerbal eo emenin aikuj n̄an er make innām n̄an ro jet.

Juon tōprak ekōjeram̧m̧an eaar bwe ilo an membōr ro jeļāļo̧k kaam̧tō, kōm̧m̧an baib, im kapeeļ ko jet in ekkal, aar maron̄ wōr aer jerbal em̧m̧an n̄an kake ilo an jikin kweilo̧k ko repaak im jukjukinpād ko jino bar ekkal.

Kea kōn rijeram̧ōl im riaikuj ro ej juon pedped im̧aantata in katak an ko̧jpeļ eo im juon men eaorōk ilo karōk inlo̧mo̧o̧r eo n̄an indeeo.

M̧oktaļo̧k jān jerbal in kwaļo̧k eo An ilo mour in, Jeova eaar ba: “Bwe ro ri jeramōl re jāmin jako jān āneo am; kōn menin, ij jiroñ eok im ba, ‘kwōn erļo̧ke wōt peim ñan eo jeōm im jatūm, ñan am ri aikuj, im ñan am ri jaram̧ōl, ilo āneo am̧.”¹

Ilo tōre in ad, kea kōn rijeram̧ōl im riaikuj ej juon iaan eddo ko emen rekwojarjar an Kabun̄ in ilo jipañ armej im baam̧le ko bwe ren karbōb n̄an mour āinwōt Anij.²

Kea kōn rijeram̧ōl im riaikuj ej kūtbuuj lo̧mo̧o̧r ñan mour in kanniōk im jetōb jim̧or. Ej kūtbuuj jipañ kajjojo membōr ro an Kabuñ in āinwōt aer make barāinwōt kea kōn rijeram̧ōl im riaikuj ro, barāinwōt menin jipan̄ eo an Kabun̄ in, eo ej kōm̧m̧an jān mālim an priesthood eo.

Dilepen karōk eo an Irooj ñan lale rijeram̧ōl im riaikuj ro ejkien jitļo̧k. “Irooj eaar ejake kien jitlo̧k im jortak in jitlo̧k ko n̄an kōjeram̧man armej ro An im n̄an leļo̧k juon iaļ n̄an er n̄an jerbal n̄an ro rej aikuj.”³

Āinwōt rikaļoor ro an Rilo̧mo̧o̧r eo, ewōr ad eddo ñan lale rijeram̧ōl im riaikuj ro. Membōr ro an Kabuñ in retiljek ijoko otemjej rej jipañ jān aer jitlo̧k kajjojo allōñ—bōjrak jān mōñā im idaak ium̧win 24 awa—innām leļo̧k ñan Kabuñ juon jāān in jitlo̧k dettan aorōkin wōt naaj kar m̧ōn̄ā ko renaaj kar kan̄i.

Naan ko an Aiseia rej aikuj lukkuun ļōmņak kaki ilo aolep em̧:

“E jab eñin jitlo̧k eo Iar kāālōte? n̄an jeļate korak in jero̧wiwi, jelate toon ine eo, im kōtļo̧k ro emōj kamakokoik er, im bwe komwin ruji ine otemjej ke?

“E jab bwe kwōn ajejļo̧k kijōm ippān ro rej kwōle, im bwe kwōn āñintok ñan mweo imōm̧ ro ri jeramōl im raar joļo̧k er ke? Elaññe kwōj lo eo ej keelwaan, bwe kwōn kanknuk e; im kwōn jab tilekek jān kanniōkium̧ make?”⁴

Innām Aiseia eaar wōnmaanļo̧k wōt n̄an laajrak in kōjeram̧m̧an ko rem̧m̧an Irooj eaar kallim̧ur kaki ñan ro rej pokake kien jitļo̧k eo. Ej ba:

“Innām am meram enaaj mejaļļo̧k āinwōt raantak, im am kājmour enaaj eddekļo̧k mōkaj, im am wānōk enaaj ilo̧k im̧aamļo̧k; aiboojoj an Irooj enaaj kōjparok eok.

“Innām kwō naaj kūr, im Jeova enaaj uwaak; kwōnaaj lamōj, im Enaaj ba, ‘Ņa ije.

Elaññe kwōj bōkļo̧k jān bwiljōm ine eo, kwaļo̧k kōn addiin peim, im kōnono jab wānōk; im elaññe kwōj leļo̧k ñan ro rikwōle men eo am ear kōnaan, im kamat āinwōt ke al ej pād eoļap:

“Im Jeova enaaj tōl eok iien otemjej, im kamat am ilo jikin re mōrā.”⁵

Ikkijen eoon in, Būreejtōn Harold  B. Lee eaar aikuj ba menin: “Kōjeram̧m̧an ko reļļap tata ej itok [jān jitlo̧k]em̧ōj an alikkar ilo aolep tōre in bōk eddo, im en̄in Irooj ej jiron̄ kōj bwe kōn rikanaan in eļap etke ewōr jitlo̧k, im kōjeram̧m̧an ko rej itok jān jitlo̧k. … Eļañn̄e kwonaaj ekkatak kake … jepta 58 ilo bok in Aiseia kwonaaj lo un ko kōn etke Irooj ekōņaan bwe jān kōļļā jortak in jitlo̧k ko, etke ekōņaan bwe jān jitlo̧k. Ej kōnke jān kakōrbōb kōn menin jemaron̄ kajjitōk im Irooj emaron̄ uwaak. Jemaron̄ jan̄ im Irooj enaaj ba, ‘N̄a ije.’”

Būreejtōn Lee ej kakobab: “Jej ke kōņaan pād ilo juon jekjek eo me jemaron̄ kajjitōk im ejjab uwaak? Jenaaj jan̄ ilo ad inepata im eban pād ippā? Ij ļōmņak ej iien eo jemaron̄ ļōmņak kake pedped kein kōnke errein rej raan ko me rej pād im̧aan, n̄e jenaaj aikuj elōn̄ im lōn̄ļo̧k kōjeram̧m̧an ko an Irooj, n̄e ekajet ko rej lukōt tok ilo ejjeļok kakobaba ioon aolep laļ.”⁶

Rikanaan eo ad ejitōnbōro, Būreejtōn Thomas S. Monson, eaar kwaļo̧k naan in kam̧ool eo ankōn pedped kein—juon naan in kam̧ool eo kar kwaļo̧k kōn en̄jake eo an juon make. Eaar ba: Ejjeļo̧k membōr an Kabun̄ in eaar leļo̧k jipan̄ n̄an ro rej pād ilo aikuj en jab meļo̧kļo̧k ak ajļo̧k kōn en̄jake eo. Jikin jerbal, menin jeram̧m̧an, un̄n̄are pein make, im kwaļo̧k ippān ro jet rejjab kāāl n̄an kōj.”⁷

Em̧m̧aan ro jeiū im jatū, membōr ro an Kabuñ eo an Jisōs Kraist im Armej ro Rekwojarjar ilo Raan-ko Āliktata rej armej in kōm̧m̧an-bujen, armej in kōjparo- kien. Ebar ejjeļo̧k kien ij imaron̄ ļōmņak kake, jabdewōt kien, me, eļan̄n̄e kar kōjparok ilo tiljek, epidodoļo̧k kōjparoke im ej letok eļapļo̧k kōjeram̧m̧an ko jān kien jitlo̧k. N̄e jej jitlo̧k im leļo̧k juon jortak in jitlo̧k em̧ool, jej jipan̄ļo̧k joko eo an Irooj ta enaaj kar kōļapļo̧k wōņāān eo an m̧ōn̄ā ko. Ejjab juon karjemet emenin aikuj kōn jāān ilo tōpar ta eo enaaj kar ļapļok ilo m̧ool. Ilo ejja iien eo wōt, kar kallimūri kōj kōn kōjeram̧m̧an ko reļļapļo̧k, āinwōt kar kwaļo̧k im̧aanļo̧k.

Kien jitļo̧k ej ñan aolep membōr ro an Kabuñ in. Em̧ool ajri ro reddik maroñ katakin er n̄an jitlo̧k, jino kōn juon iien m̧ōñā innām lak mōj ruo, ilo aer maron̄ meļeļe im ilo kanniōk kōjparok kien jitļo̧k. Ļeo im lio pālele, membōr ro ejjeļo̧k rejetaer, jodikdik ro, im ajri ro rej aikuj jino jitlo̧k im jar, leļo̧k kam̧m̧oolol kōn kōjeram̧m̧an ko ilo mour ko aer ilo aer pukōt kōjeram̧m̧an jān Irooj im kajoor eo kōn iien jitlo̧k eo. Likkuun in kakūrm̧ool kein jitlo̧k ej waļo̧k jortak in jitlo̧k eo ej kōm̧m̧an n̄an rijerbal eo an Irooj, bisop eo.

Bisop ro, kom̧ij tōl menin jeram̧m̧an ilo ward eo. Epād ippāmi ijjitōn̄ eo ekwojarjar n̄an pukōtļo̧k im kea kōn rijeram̧ōl ro. Kōn rie an būreejtōn eo an Doulul eo an Kōrā im ritōl ro an doulul eo an Melkisedek Priesthood eo, kōttōpar eo ami ej n̄an jipan̄ membōr ro jipan̄ er make im maroñ un̄n̄are-pein make. Kom̧ij kea kōn aikuj ko ilo kanniōk im jetōb an membōr ro kōn mejmej karuo kōjerbal jortak in jitlo̧k ko āinwōt juon jipan̄ ejjab aitok kitien im āinwōt juon jortoklik n̄an kein jipan̄ an nuki im jukjukinpād. Ilo ami kanooj kōjerbal kii ko an priesthood eo im kile ilo jipan̄ rijeram̧ōl im riaikuj ro, kom̧ naaj itok n̄an jeļā bwe jim̧we kōjerbal jortak in jitlo̧k ko ej jibadbad eo n̄an rie mour, ejjab jekjek in mour.

Būreejtōn ro an Aaron Priesthood eo, kom̧ij kabwijer kii ko im ewōr kajoor ñan kōm̧m̧ani kaiñi ko. Kwōj jerbal ippān bisop eo ñan katakin ro uwaan doulul eo ikijen eddo ko aer ilo priesthood im tōl er ñan leļo̧k aer iien ñan bo̧k koņaer ilo jitlo̧k. Ilo an rikabwijer ro an Aaronic Priesthood kōļapļo̧k priesthood eo aer im leļo̧k iien em̧m̧an in n̄an aolep membōr ro an Kabun̄, kwōj kepaaktok kōjeram̧m̧an ko an jitlo̧k kake ro rej lukkuun aikuji. Kom̧ naaj kam̧ool bwe jetōb in kea kōn rijeram̧ōl im riakuj ro ewōr kajoor n̄an kapidodoik bōro ko raankeke im kōjeram̧m̧an mour ko aer eļaptata n̄an ro ejjab em̧m̧akijkij aer etal n̄an jar.

Būreejtōn Monson ear ba, “Bisop ro rej kōpooj doulul ko aer ilo Aaronic Priesthood eo ñan bōk koņaer ilo aiin menin jortak ko renaaj lo eļapļo̧k jeram̧m̧an ilo eddo in ekwojarjar.”⁸

Bisop ro, kememej bwe wāween ko rej oktak jān doon ilo jikin im laļ ko reoktak jān doon. Kepaak membōr ro an doulul eo an Aaronic Priesthood ilo bukwōn eo kwoj jokwe ie. Bōtaab, jej rōjañ eok bwe kwōn jar im ļōmņak kōn kōkakpilōklōk jān rikanaan im pukōt tōl an jetōb ikkijen wāween eo ro rej kabwijer Aaronic Priesthood ilo ward eo am maroñ kōļapļo̧k priesthood eo ilo aer bōk koņaer ilo aini menin jortak ko.

Ilo jepta 27 in 3  Nipai, Irooj eo eaar jerkakpeje, “Armej rot komij aikuj in āinwōt? Em̧ool ij ba ñan kom̧, em̧ool āinwōt N̄a ij.”⁹ Ilo ad bōk iood etan Kraist im kate kōj ilo ad ļoor E, jenaaj bōk Nememeen im jōkjōkin im erom āinwōt E. Kea kōn rijeram̧ōl im riakuj ro eaar waļo̧k ilo katak ko an Rilo̧mo̧o̧r eo. Epād ilo aolep men Ej kōm̧m̧ani. Ej tōpar aolep ro jet im kōj. Ine eo an emman, im men eo Ej ineke emōra. Ij kūr ñan aolepād bwe en lapļo̧k ad āinwōt Rilo̧mo̧o̧r kōn kea kōn ri jeramōl im ri aikuj, ilo ad kauteej kien jitlo̧k, im leļo̧k menin jortak ko. Ij ettā ilo kam̧ool bwe ilo ad lale ro ri jeram̧ōl im riaikuj ilo tōmak ej kalikar ad ekeke ilo jetōb im enaaj kōjeram̧m̧an jim̧or eo ej leļo̧k im eo ej bōk. Ilo āt eo ekwojarjar etan Jisos Kraist, amen.