O Le Tulafono o le Anapogi: O Se Tiutetauave Faaletagata Lava Ia e Tausia ai Ē Matitiva ma Ē Le Tagolima
Saunia e Epikopo Dean M. Davies
Fesoasoani Lua i le Au Epikopo Pulefaamalumalu
I le avea ai ma soo o le Faaola, ua ia i tatou se tiutetauave faaletagata lava ia e tausi i e matitiva ma e le tagolima.
Ou uso pele, ou te fiafia i le perisitua, ma ou te fiafia e faatasi ma outou. Ou te matua faafetai ua mafai ona tatou auauna faatasi i lenei galuega tele.
Ua tatou ola i taimi ofoofogia. O le alualu i luma faavavega i vailaau faafomai, faasaienisi, ma tekinolosi ua faaleleia atili ai olaga mo le toatele o tagata. Ae o loo i ai foi se faamaoniga o le mafatiaga ma le le fiafia tele o tagata. E faaopoopo atu i taua ma tala o taua, se faateleina o faalavelave faalenatura—e aofia ai lologa, mu, mafuie, ma faamai—o loo aafia ai ia soifua o le faitau miliona i le lalolagi atoa.
O loo nofouta ma mataala taitai o le Ekalesia e faatatau i le soifua manuia o fanau a le Atua i soo se nofoaga. Po o le a lava le taimi ma le nofoaga e mafai ai, e tuuina atu lava punaoa o faalavelave faafuasei a le Ekalesia e tali atu ai ia i latou o e le tagolima. Mo se faataitaiga, ia Novema ua tea, sa taia ai le atu motu o Filipaina i le Afa fulifao o Haiyan.
O se afa fulifao tele o le vaega 5 sili ona malosi, sa matuai ogaoga ai faatafunaga ma mafatiaga o Haiyan. Sa faatamaia atoa aai; na maumau le tele o soifua; e faitau miliona fale sa matuai faaleagaina pe na faatamaiaina; ma sa motusia auaunaga autu e pei o vai, alavai, ma le eletise.
Sa tuuina atu punaoa a le Ekalesia i le vaveao po ina ua mavae lenei faalavelave. Sa tutufaatasi tagata o le Ekalesia o loo aumau i Filipaina e laveai o latou uso ma tuafafine i le sauniaina o meaai, vai, lavalava, ma pusa o mea faamama mo tagata o le ekalesia faapea ma e e le auai i le ekalesia.
Na avea falelotu a le Ekalesia ma nofoaga o le malutaga mo le fia afe o tagata ua leai ni fale. I lalo o le taitaiga a le Au Peresitene o le Eria ma taitai perisitua o le lotoifale, o le toatele na leiloloa mea uma, sa faia ni iloiloga e fuafua ai tulaga ma le saogalemu o tagata uma o le ekalesia. Na fatuina ma faagaoioia ni fuafuaga musuia ina ia fesoasoani e toefuatai tagata i tulaga talafeagai e ola ai ma le ola faalagolago o le tagata ia te ia lava.
Sa saunia punaoa faigofie e fesoasoani ai i tagata o le Ekalesia e toe fausia o latou fale laupapa ma aiga. E lei tuuina atu lenei mea e aunoa ma se faamoemoega e toe taui mai ai. Sa faia ni aoaoga mo tagata o le ekalesia ma faatino ni galuega manaomia mo i latou lava ma sosoo ai ma isi.
O se tasi o faamanuiaga na maua mai ai, a o atiaeina tagata i tomai faakamuta, palama, ma isi tomai faufale, sa mafai ona latou maua ni avanoa faigaluega lelei i nuu lata ane ma sa amata ai ona toe fausia ia nuu ma alalafaga.
O le tausiga o ē matitiva ma ē lē tagolima o se aoaoga faavae autu o le talalelei ma o se elemene taua i le ata o le faaolataga e faavavau.
A o lei faataunuuina Lana galuega faaletino, sa fetalai mai Ieova e ala i Lana perofeta: “Aua e le aunoa ona i ai i le nuu o le tagata mativa; o le mea lea ou te fai atu ai ia te oe, o loo faapea atu, Ia e matua faamafola atu lou lima i lou uso, le ua tigaina, ma le ua mativa e ia te oe i lou nuu.”1
I lo tatou vaitaimi, o le tausiga o e matitiva ma e le tagolima o se tasi lea o tiutetautave e fa a le Ekalesia ua tofia mai le lagi e fesoasoani atu i tagata taitoatasi ma aiga ina ia agavaa ai mo le faaeaga.2
O le tausiga o e matitiva ma e le tagolima e mafaufauina o se faaolataga faaletino ma le faaleagaga. E aofia ai le auaunaga a tagata taitoatasi o le Ekalesia a o latou tausia patino e matitiva ma e le tagolima, faapea foi ma uelefea aloaia a le Ekalesia, lea e faatautaia e ala atu i le pule o le perisitua.
O se vaega autu o le fuafuaga a le Alii mo le tausiga o e matitiva ma e le tagolima o le tulafono lea o le anapogi “Ua faavaeina e le Alii se tulafono o le anapogi ma taulaga anapogi e faamanuiaina ai Lona nuu ma tuuina atu ai se auala mo i latou e auauna atu ai ia i latou e le tagolima.”3
I le avea ai ma soo o le Faaola, ua ia i tatou se tiutetauave faaletagata lava ia e tausi i e matitiva ma e le tagolima. E fesoasoani tagata faamaoni o le Ekalesia i soo se nofoaga e ala i le anapogi i masina taitasi—e le ‘ai ma inu mo le 24 itula—ona foai atu lea i le Ekalesia se taulaga anapogi tautupe e tutusa ma le tau o meaai lea semanu latou te taumafaina.
E tatau ona mafaufau ma le agaga tatalo i upu a Isaia ma ia aoaoina i totonu o aiga uma:
“E le o le nei ea le anapogi ou te loto i ai? Ina ia tatalaina fusi [o] le amio leaga, e tatala fusi o le amo, e tuuina atu ia saoloto e ua faasauaina, ma ia outou gausia amo uma lava?
“E le o lenei ea, ona ia tofitofi au mea e ‘ai i le ua fia ‘ai, ia au mai i lou fale e ua matitiva ma faasauaina; a e iloa le ua le lavalava e te faaofuina o ia, aua foi e te lafi ia i latou o lou lava aiga?”4
Sa faaauau pea Isaia ma lisiina mai ia faamanuiaga matagofie na folafolaina e le Alii ia i latou o e usiusitai i le tulafono o le anapogi. Ua ia faapea mai:
“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muliau mai le pupula o Ieova ia te oe.
“Ona e valaau lea, a e tali mai Ieova; e te alaga atu, a e fetalai mai o ia, O a’u lenei. …
“Afai foi e te alofa atu i le ua fiaai, ma e fafaga ia maona o le ua tiga; ona alu ae lea o lou malamalama i le pouliuli ma lou pogisa e pei o le pauli ia:
“E taitaiina foi oe e le aunoa e Ieova; e faamalie foi o ia ia te oe pe a oge vai.”5
Sa saunoa mai Peresitene Harold B. Lee e faatatau i lenei mau: “O faamanuiaga matagofie lea e oo mai [mai le anapogi] ua uma ona faamaninoina mai i tisipenisione uma, ma i lenei mau o loo fetalai mai le Alii ia i tatou e ala mai i lenei perofeta maoae le mafuaaga ua i ai le anapogi, ma faamanuiaga e oo mai i le anapogi. … Afai e te sailiili … i le mataupu e 58 o le tusi a Isaia o le a e maua ni mafuaaga pe aisea na finagalo ai le Alii ia tatou totogi ia taulaga anapogi, ma pe aisea ua ia finagalo ai ia tatou anapopogi. O le agavaa o le a mafai ai ona tatou valaau atu ma mafai ai ona tali mai le Alii. E mafai ona tatou tagi atu i le Alii ma o le a Ia fetalai mai, ‘O A’u lenei.’”
Sa faaopoopo mai Peresitene Lee: “Tatou te fia oo ea i se tulaga tatou te valaau atu ai ae le tali mai o ia? Tatou te fetagisi i o tatou mafatiaga ae le faatasi ma o ia ia i tatou? Ou te manatu ua tatau nei ona tatou mafaufau i nei mea faavae ona o le a i ai ia ituaiga aso i le lumanai, lea o le a tatou manaomia atili ai ni faamanuiga a le Alii, pe a sasaa mai faamasinoga e aunoa ma le suia i luga o le lalolagi atoa.”6
Sa faasoa mai e lo tatou perofeta pele, o Peresitene Thomas S. Monson, lana molimau e uiga i mataupu faavae nei—o se molimau na pogai mai se aafiaga faaletagata lava ia. Sa ia saunoa mai: “E leai se tagata o le Ekalesia o e na fesoasoani ia i latou e le tagolima na faagaloina pe sa’i i le mea na tupu. O le galue malosi, magafagafa, ola faalagolago o le tagata ia te ia lava, ma le fefaasoaa’i ma i isi e le fou ia i tatou.”7
Uso e, o tagata o Le Ekalesia a Iesu Keriso o le Au Paia o Aso e Gata Ai o ni tagata osi-feagaiga ma tausi-poloaiga. Ou te le o manatua se tulafono, se poloaiga, lea, afai e tausia ma le faamaoni, e sili atu ona faigofie le tausiga ma aumaia ai le tele o faamanuiaga nai lo le tulafono o le anapogi. A tatou anapopogi ma foai atu se taulaga anapogi faamaoni, ua tatou foai atu i le faleteuoloa a le Alii mea semanu tatou te faaaluina i le tau o meaai. E le manaomia le faia o ni osigataulaga tautupe e sili atu ma le tupe masani e faaaluina. I le taimi lava lea e tasi, ua folafola mai ai ia i tatou ni faamanuiaga ofoofogia e pei ona taua muamua.
O le tulafono o le anapogi e faatatau i tagata uma o le Ekalesia. E oo lava i fanau laiti e mafai ona aoaoina ia anapopogi, e amata i se ‘aiga se tasi ona sosoo lea ma le lua, pe a mafai ona latou malamalama ma tausia faaletino le tulafono o le anapogi. Ua tatau i tane ma ava, tagata nofofua, autalavou, ma tamaiti ona amata le anapogi i le talalo, tuu atu le faafetai mo faamanuiaga i o latou olaga a o saili i faamanuiaga a le Alii ma maua le malosi i le taimi o le anapogi. E maea le faataunuuina atoatoa o le tulafono o le anapogi pe a tuu atu le taulaga anapogi i le sui o le Alii, le epikopo.
Epikopo, o outou e taitaia le uelefea i le uarota. Ua i ai ia te outou se tiute paia o le saili atu ma tausi ia tagata matitiva. Faatasi ai ma le lagolagosua a le peresitene o le Aualofa ma taitai o korama o le Perisitua Mekisateko, o la outou sini o le fesoasoani lea i tagata o le ekalesia ia latou fesoasoani ia i latou lava ma ia avea ma tagata e ola faalagolago i latou ia i latou lava. O outou e tausia ia manaoga faaletino ma faaleagaga o tagata e ala i le faaaogaina ma le faaeteete o taulaga anapogi e avea ma se fesoasoaniga mo se taimi lē tumau ma o se punaoa faaopoopo ua foaiina mai e aiga lautele ma nuu. A o outou faaaogaina ma le agaga tatalo ia ki o le perisitua ma le iloatino o mea pe a fesoasoani atu i e matitiva ma e le tagolima, o le a e iloa ai o le faaaoga sa’o o le taulaga anapogi ua faamoemoe e tausi ai ia ola, ae le o le sitaili o le olaga [e fia manao i ai].
Peresitene o korama a le Perisitua Arona, o outou o loo umiaina ki ma ua i ai le mana e galulue ai i sauniga i fafo. Tou te galulue ma le epikopo ma faatonu uso o le korama e faatatau i o latou tiute i le perisitua ma i le sailia o tagata o le Ekalesia e tuu atu i ai le avanoa e foai mai ai i le anapogi. A o faalautele e outou o umia le Perisitua Arona o outou tiutetauave faaleperisitua ma avatu lenei avanoa i tagata uma o le Ekalesia, o le a outou faafaigofieina e le aunoa avanoa mo faamanuiaga folafolaina o le anapogi mo i latou o e atonu e sili ona manaomiaina. O le a outou molimauina o le agaga o le tausiga o e matitiva ma e le tagolima o loo i ai le mana e faamalulu ai loto ua faamaaaina ma faamanuiaina olaga o i latou o e atonu e le auai soo i le Lotu.
Sa saunoa mai Peresitene Monson, “O epikopo o loo faatulagaina a latou korama o le Perisitua Arona ina ia auai i le aoina mai o taulaga anapogi o le a faamanuiaina atili i lenei tiutetauave paia.”8
Epikopo, manatua e eseese tulaga i le tasi eria i le isi ma eseese foi mai lea atunuu i lea atunuu. Atonu o le asiasi atu o uso o le korama o le Perisitua Arona i aiga e le talafeagai i le eria o loo e nofo ai. Peitai, matou te valaaulia outou ina ia iloilo ma le agaga tatalo le fautuaga a le perofeta ma saili musumusuga i auala talafeagai e mafai ai e le Au Perisitua Arona i la outou uarota ona faalauteleina lo latou perisitua i le aoina o taulaga anapogi.
I le mataupu e 27 o le 3 Nifae, sa fesili ai le Alii toetu, “O a ituaiga o tagata e tatau ona outou i ai?” Sa Ia tali mai, “E pei lava o A’u nei.”9 A o tatou tauaveina i o tatou lava luga le suafa o Keriso ma taumafai e mulimuli ia te Ia, o le a tatou mauaina Ona foliga i o tatou mata ma avea atili e faapei o Ia. O le tausiga o e matitiva ma e le tagolima o se vaega e lemavavaeeseina mai le galuega a le Faaola. O mea uma lava ia sa Ia faia. Sa aapa mai o Ia i tagata uma ma siitia i tatou i luga. Aua e avegofie la’u amo, o la’u avega foi e mama ia. Ou te valaau atu ia i tatou uma ina ia avea atili e faapei o le Faaola i le tausiga o e matitiva ma e le tagolima, e ala i le tausia ma le faamaoni o le tulafono o le anapogi, ma e ala i le foai atu o se taulaga anapogi loto foai. Ou te molimau atu ma le faamaulalo o le tausiga ma le faamaoni o e matitiva ma e le tagolima o se faatusa lena o le matua faaleagaga ma o le a manuia uma ai le tagata foai ma le tagata e taliaina. I le suafa paia o Iesu Keriso, amene.