!Lod I Gat Wan Plan blong Yumi!
I Kam long Elda Karlos O. Godoe
Blong Olgeta Seventi
Sapos yumi gohed blong stap laef olsem we yumi stap laef, ?bae ol blesing we God i promesem oli kamtru o no?
Hem i wan spesel janis blong pat blong wan histri taem, taem ol spika blong jeneral konfrens oli gat janis blong toktok long lanwis blong olgeta. Las taem we mi toktok long pulpit ia, mi wari tumas se Inglis blong mi i no stret. Naoia, mi wari moa se bae mi tok hariap tumas long lanwis blong Potugal. Mi no wantem toktok i hariap bitim ol toktok long Inglis.
Yumi evriwan i bin gotru o bae i gotru ol taem blong ol bigfala desisen long laef blong yumi. ?Bae yumi gohed long wok ia, o long defrenwan? ?Bae mi go long misin? ?Hemia i raetwan blong mi maredem?
Oli ol situesen ia long ol defren eria blong laef blong yumi, we sapos yumi jenisim rod, bae i save gat defren samting i hapen long fiuja. Long toktok blong Presiden Dita F. Ukdof: “Tru ol yia we mi wok blong Lod … mi bin lanem wanem i defren bitwin hapines mo nogud taem long laef blong wanwan, long mared, mo ol famle, mo i hapen from wan smol rong blong sam digri nomo.” (“A Matter of a Few Degrees,” Ensign o Liahona, Mei 2008, 58).
?Olsem wanem nao yumi save stap longwe long ol smol rong long desisen?
Bae mi yusum wan eksperiens blong mi blong eksplenem mesej blong mi.
Long en blong ol yia 1980, yang famle blong mifala i gat waef blong mi, Monika, tu long ol fo pikinini blong mitufala, mo mi. Mifala i stap long Sao Polo, Brasil, mo mi wok blong wan gudfala kampani, mi finisim yunivesiti stadi blong mi, mo oli jes rilisim mi olsem bisop long wod we mifala i bin stap long hem. Laef i bin gud, mo evri samting i stap olsem we i sapos blong stap—kasem taem we, wan dei, wan fren blong longtaem i kam visitim mifala.
Long en blong visit blong hem, hem i talem wan toktok mo i askem wan kwestin we i mekem mi tingting defren. Hem i talem: “Karlos. I luk se evri samting i gud blong yu, famle blong yu, wok blong yu, mo seves blong yu long Jos, be—” mo nao kwestin i kam: “sapos yu gohed blong laef olsem we yu stap laef, ?bae ol blesing we God i promesem long petriakel blesing blong yu bae oli kamtru o no?”
Mi neva tingting long petriakel blesing blong mi long wei ia. Mi bin ridim wanwan taem be neva wetem tingting blong lukluk long ol blesing we God i promesem long fiuja, mo skelem olsem wanem nao mi stap laef long taem naoia.
Afta long visit blong fren, mi tanem tingting blong mi long petriakel blesing blong mi, mo askem miwan: “Sapos mifala i gohed blong laef olsem we mifala i stap laef long hem, ?bae ol blesing we God i promesem bae oli kamtru, o no? Afta we mi tingting hevi long hem, mi gat filing se i nid blong mekem samfala jenis, speseli long saed blong skul mo wok blong mi.
I no wan desisen se i raet o i rong, be i bitwin wanem we i gud mo wanem i moa gud, olsem we Elda Dalin H. Oks i bin tijim yumi taem hem i talem: “Taem yumi lukluk long ol defdefren joes, yumi mas tingbaot se hem i no inaf blong wan samting i gud i stap. Ol nara joes oli moa gud, mo yet, ol narawan oli bes.” (“Good, Better, Best,” Ensign o Liahona, Nov 2007, 104–5).
?Olsem wanem nao yumi save meksua se yumi stap mekem bes desisen?
Hemia sam prinsipol we mi bin lanem.
Prinsipol Nambawan: Yumi Nid blong Lukluk long Ol Defren Joes Wetem En I Stap long Tingting
Blong mekem desisen we i save tajem laef blong yumi mo hemia blong olgeta we yumi lavem mo yumi no gat bigfala pikja blong risal blong hem, i save putum denja i stap. Be, sapos yumi luk finis wanem risal bae ol desisen ia oli mekem long fiuja, bae yumi save luk klia moa, rod ia blong tekem naoia.
Taem yumi andastanem huia yumi, from wanem yumi stap ia, mo wanem Lod i wantem yumi mekem long laef ia, bae i helpem yumi blong gat bigfala pikja ia we yumi nidim.
Yumi save faenem ol eksampol long ol skripja, we taem i gat bigfala pikja, i mekem klia wanem rod nao blong tekem.
Moses i toktok wetem Lod, i fesem Hem, i lanem abaot plan blong fasin blong sevem man, mo long wei ia, i andastanem gud moa rol blong hem olsem profet blong karem Isrel i kam tugeta.
Mo God i bin toktok long Moses, i talem se Hem i Lod God we I Gat Olgeta Paoa
mo bae Hem i soemaot long Moses ol samting we Hem i mekem wetem ol han blong Hem;
Mo God i gat wan wok blong Moses i mekem (luk long Moses 1:3–4, 6).
Wetem save ia we hem i andastanem, Moses i bin save stap strong tru long plante yia blong hadtaem long draeples mo i lidim Isrel i gobak hom.
Lihae, bigfala profet blong Buk blong Momon, i drim long wan drim, mo long ol visen blong hem, i lanem abaot misin blong hem blong lidim famle blong hem i go long promes graon.
“Mo i bin hapen se Lod i givim oda long papa blong mi, long wan drim tu, blong hem i mas tekem famle blong hem mo go aot long ples we i no gat man long hem.
“… Mo hem i livim haos blong hem, mo graon blong hem we i kam long ol papa blong hem, mo ol gol blong hem, mo ol silva blong hem, mo ol gudgudfala samting blong hem.” (Fas Nifae 2:2, 4).
Lihae i gohed blong stap fetful long visen ia nomata ol hadtaem long rod mo blong mas livim wan gudfala laef long Jerusalem.
Profet Josef Smit i wan nara eksampol. Tru long plante revelesen, stat wetem Fas Visen, hem i bin save komplitim misin blong hem blong putumbak evri samting (luk long Joseph Smith—History 1:1–26).
?Be olsem wanem long yumi? ?Wanem nao Lod i wantem aot long wanwan long yumi?
Yumi no nid blong luk wan enjel blong save andastanem samting. Yumi gat ol skripja, tempol, ol profet we oli stap laef, petriakel blesing blong yumi, ol lida wetem insperesen, mo antap long evri samting ia, yumi gat raet blong kasem revelesen blong yumiwan blong lidim ol desisen blong yumi.
Prinsipol Nambatu: Yumi Nid blong Rere from Ol Jalenj we Bae Oli Kam
Ol bes rod long laef, oli no olgeta we oli isi. Plante taem, i nara wei. Yumi save luk long ol eksampol blong ol profet we mi jes tokbaot olgeta.
Moses, Lihae mo Josef Smit oli no gat ol isi rod nomata we, i tru, we desisen blong olgeta i bin stret.
?Yumi rere o no blong pem praes from ol desisen blong yumi? ?Yumi rere o no blong livim ol gud ples long haos blong kasem wan ples we i gud moa?
Gobak long eksperiens wetem petriakel blesing blong mi, mi kam blong mekem desisen se long tetaem ia bae mi mas go skul bakegen, mo aplae long wan skolasip blong wan yunivesiti long Amerika. Sapos oli jusum mi, bae mi mas lego wok blong mi, salem evri samting mifala i gat, mo go laef long Yunaeted Stet olsem wan skolasip studen blong 2 yia.
Ol tes olsem TOEFL mo GMAT oli kam ol fas jalenj blong winim. I tekem tri longfala yia blong rere, plante “no,” mo samfala “ating,” bifo oli akseptem mi long wan yunivesiti. Mi tingbaot yet telefon kol we mi kasem long en blong nambatri yia long wan we i responsibol long skolasip.
Hem i talem: “Karlos, mi gat sam gud nius mo sam nogud nius blong yu. Gud nius, hem i we yu yu stap long ol top tri blong yia ia.” I gat wan ples nomo long tetaem ia. “Nogud nius i we, wan long ol nara kandidet i boe blong wan impoten man, mo narawan, i boe blong wan narawan we i impoten, mo afta i gat yu.”
Wantaem nomo mi ansa: “Mo mi, mi wan pikinini blong God.”
I gud tumas we, huia papa blong yu i no wan impoten samting, mo oli akseptem mi long yia ia, long 1992.
Yumi ol pikinini blong God we I Gat Olgeta Paoa. Hem i Papa blong yumi, Hem i lavem yumi, mo Hem i gat wan plan blong yumi. Yumi no stap ia long laef ia nomo blong westem taem, gro olfala, mo ded. God i wantem yumi blong groap mo kasem ful paoa blong yumi.
Long ol toktok blong Presiden Tomas S. Monson: “Wanwan long yufala, singgel o mared, nomata yia blong yu, i gat janis blong lanem samting mo gro. Mekem save blong yu i kam bigwan, long saed blong waes mo long spirit, i go kasem ful paoa blong yu.” (“The Mighty Strength of the Relief Society,” Ensign, Nov 1997, 95).
Prinsipol Nambatri: Yumi Nidim blong Serem Visen ia Wetem Ol Pipol Yumi Lavem
Lihae i bin traem moa long wan taem blong helpem Leman mo Lemyul blong andastanem se jenis we oli stap mekem i impoten. From se tufala i no agri long visen blong papa blong tufala i mekem tufala i komplen long rod ia. Nifae, long nara han, i lukaotem Lod blong save luk wanem we papa blong hem i bin luk.
“Mo i bin hapen se afta mi, Nifae, from mi bin harem ol toktok blong papa blong mi, long saed blong ol samting we hem i bin luk long wan visen, … mi bin wantem tu se bae mi save luk, mo harem, mo save long ol samting ia, tru long paoa blong Tabu Spirit.” (Fas Nifae 10:17).
Wetem visen ia, Nifae i bin winim ol jalenj blong rod ia, be tu, i lidim famle blong hem long taem we i bin nid.
I luk olsem se taem yumi disaed blong tekem wan rod, ol pipol we yumi lavem olgeta, bae i tajem laef blong olgeta mo sam bae oli serem risal blong joes ia. Wanem i gud, bae olgeta tu oli luk wanem yumi luk, mo serem ol semfala strong tingting blong yumi. Hemia i no posibol oltaem, be taem i hapen, rod ia i kam isi moa.
Long eksperiens blong mi we mi yusum blong soem hemia, i no gat tu tingting, mi nidim sapot blong waef blong mi. Ol pikinini oli bin yangfala, mo oli no gat tumas samting blong talem, be sapot blong waef blong mi i bin impoten. Mi tingbaot se, long fas taem, Monika mo mi i nid blong toktok gud long jenis blong ol plan, kasem taem hem i filim gud mo glad blong komitim hem. Visen ia we mitufala i serem, i mekem hem i sapotem jenis ia, be tu, blong kam wan stamba pat blong sakses ia.
Mi save se Lod i gat wan plan blong yumi long laef ia. Hem i save yumi. Hem i save wanem i bes blong yumi. Jes from ol samting oli stap go gud, i no minim se bae, wanwan taem, bae yumi lukluk se i gat wan samting gud moa blong mekem. Sapos yumi gohed blong stap laef olsem we yumi stap laef, ?bae ol blesing we God i promesem oli kamtru o no?
God i stap laef. Hem i Papa blong yumi. Sevya Jisas Kraes i stap laef, mo mi save se tru long sakrifaes blong Hem we i pem praes from yumi, bae yumi save faenem paoa blong winim ol jalenj blong yumi evri dei. Long nem blong Jisas Kraes, amen.