Tus Tswv Muaj Ib txoj Hau Kev rau Peb!
Los ntawm Txwj Laug Carlos A. Godoy
Ntawm Pawg Xya Caum
Yog tias peb ua neej zoo ib yam li peb ua tam sim no, peb puas yuav txais cov koob hmoov raws li Vajtswv cog lus?
Kuv zoo siab vim kuv muaj cib fim hais kuv yam lus thaum lawv cia cov uas hais lus hauv lub tuam rooj sab laj siv lawv yam lus. Zaum tas los thaum kuv hais lus ntawm lub sam thiaj no, kuv txhawj txog qhov uas kuv hais lus sis thaum kuv hais lus Akiv. Tam sim no, kuv txhawj hais tias kuv yuav hais lus Portuguese nrawm heev. Kuv tsis xav hais lus nrawm tshaj kev sau ntawv.
Peb txhua tus tau muaj los yog yuav muaj tej lub sij hawm thaum peb txiav txim txog ib qho tseem ceeb hauv peb lub neej. Puas tsim nyog kuv ua txoj hauj lwm no los sis txoj hauj lwm tod? Puas tsim nyog kuv mus ua tub txib? Puas zoo rau kuv yuav tus no?
Tej no yog tej yam ntawm peb lub neej uas ntshe ib qho me me yuav ua rau peb lub neej hloov loj heev thaum yav tom ntej. Raws li Thawj Tswj Hwm Dieter F. Uchtdorf hais tias: “Ntau xyoo thaum kuv ua hauj lwm rau tus Tswv …, kuv tau kawm hais tias, ib tug neeg, ob niam txiv, los yog tsev neeg, lawv yuav zoo siab los yog tu siab saib lawv tau kho lawv lub koob qhia kev li cas.” (“A Matter of a Few Degrees,” Ensign los sisLiahona, Tsib Hlis Ntuj 2008, 58)
Peb yuav ua li cas kom tsis ua yuam kev me me li no?
Kuv yuav hais ib zaj lus los ntawm kuv lub neej kom qhia txog qhov no.
Thaum yuav luag txog xyoo 1990, kuv tsev neeg yog kuv tus poj niam, Mônica, ob tug me nyuam, thiab kuv. Peb nyob hauv São Paulo, Brazil, thiab kuv tau ua hauj lwm rau ib lub koom haum zoo, kuv twb kawm ntawv tiav lawm thiab tsis ntev tas los lawv tso kuv ua tus npisov ntawm peb pawg ntseeg. Peb lub neej yeej zoo, thiab txhua yam yeej zoo li peb nyiam—mus txog thaum ib tug phooj ywg tuaj xyuas peb.
Thaum nws tab tom yuav rov qab mus tsev, nws hais thiab nug ib yam uas ua rau kuv tsis paub meej lawm. Nws hais tias, “Carlos, zoo li txhua yam yeej mus zoo rau koj, koj tsev neeg, koj txoj hauj lwm, thiab koj tej hauj lwm hauv lub Koom Txoos tiam sis—” ces nws nug hais tias, “yog koj ua neej zoo li koj ua tam sim no, koj puas yuav txais cov koob hmoov raws li Vajtswv cog lus nyob hauv koj zaj koob hmoov los ntawm tus yawg suab?”
Kuv ib txwm tsis tau xav txog kuv zaj koob hmoov los ntawm tus yawg suab zoo li no. Tej lub sij hawm kuv twb nyeem zaj no tiam sis kuv tsis tau ntsuas kuv txoj kev ua neej tam sim no seb kuv puas yuav txais cov koob hmoov uas tau cog lus rau kuv thaum yav tom ntej.
Tom qab nws tuaj xyuas kuv, kuv tsom ntsoov rau kuv zaj koob hmoov los ntawm tus yawg suab, thiab xav hais tias, “Yog peb ua neej zoo li peb ua tam sim no, puas yuav txais tau cov koob hmoov raws li Vajtswv cog lus?” Tom qab kuv xav tob, ua rau kuv xav tias kuv yuav tsum hloov tej yam, qhov tseem ceeb yog hais txog kuv txoj kev kawm ntawv thiab kuv txoj hauj lwm.
Tsis yog ib txoj kev txiav txim ntawm qhov yog thiab qhov tsis yog tiam sis nyob ntawm seb qhov twg yog qhov zoo thiab qhov zoo dua, raws li Txwj Laug Dallin H. Oaks qhia peb thaum nws hais tias: “Thaum peb xav txog peb tej kev xaiv, peb yuav tsum nco qab ntsoov tias qhov uas ib yam dab tsi yog ib qho zoo yeej tsis txaus.” Muaj dua lwm txoj kev xaiv uas zoo dua thiab zoo tshaj plaws” (“Good, Better, Best,” Ensign los sis Liahona, Kaum Ib Hlis Ntuj 2007, 104–5)
Ces peb yuav ua li cas kom paub tias peb xaiv qhov zoo tshaj plaws?
Kuv yuav qhia nej txog tej ntsiab cai uas kuv tau kawm.
Ntsiab Cai thib Ib: Peb Yuav Tsum Xav txog Peb tej Kev Xaiv Thaum Peb Xav txog Qhov Xaus
Tej zaum yuav muaj teeb meem yog tias peb txiav txim siab ua tej yam uas hloov tau peb thiab cov uas peb hlub lub neej yog peb tsis muaj lub zeem muag txog yav tom ntej. Tiam sis, yog peb xav txog tej yam uas yuav muaj los yav tom ntej thaum peb txiav txim, ces peb yuav pom meej hais tias txoj kev twg yog txoj kev zoo tshaj taug tam sim no.
Qhov uas peb to taub peb yog leej twg, vim li cas peb nyob no, thiab tus Tswv xav kom peb ua dab tsi yuav pab peb hauv lub neej no thiab ua rau peb pom tau yav tom ntej.
Muaj tej piv txwv nyob hauv cov vaj lug kub uas qhia tias kev pom tau yav tom ntej tau qhia meej hais tias yuav tsum taug txoj kev twg.
Mauxes tau hais lus nrog tus Tswv tim ntsej tim muag, tau kawm txog txoj kev cawm seej, thiab nws txawm to taub nws txoj hauj lwm ua tus yaj saub uas yuav muab Ixayees sau ua ke.
Thiab Vajtswv hais lus rau Mauxes hais tias: Saib seb, kuv yog tus Tswv Vajtswv uas Muaj Hwj Chim Tag Nrho. …
Thiab kuv yuav muab kuv tes hauj lwm tshwm sim rau koj. …
Thiab kuv muaj ib txoj hauj lwm rau koj ua, Mauxes, kuv tus tub (saib Mauxes 1:3–4, 6).
Vim nws to taub li no, Mauxes muaj peev xwm nyiaj tau kev txom nyem tau ntau xyoo hauv roob moj sab qhua thiab tau coj Ixayees rov qab mus tsev.
Lihais, tus yaj saub zoo ntawm Phau Ntawv Maumoos, nws ua npau suav, thiab nyob haud nws tau kawm txog nws txoj hauj lwm coj nws tsev neeg rau ib thaj av uas tau cog lus cia lawm.
“Thiab tau muaj tias tus Tswv tau txib kuv txiv, twb tau hais nyob hauv ib zag npau suav, kom nws yuav tsum coj nws tsev neeg thiab khiav tawm mus rau tom roob maj sab qhua.
“… Thiab nws tau tso nws lub vaj lub tsev tseg, thiab thaj av uas yog nws qub txeeg qub teg, thiab nws tej nyiaj thiab nws tej kub, thiab nws tej khoom muaj nuj nqis” (1 Nifais 2:2, 4).
Lihais tau ua raws li nws zaj npau suav no txawm nyuaj rau lawv taug kev mus thiab lawv tau tso lawv lub qub neej tseg nyob hauv Yeluxalees lawm.
Tus Yaj Saub Yauxej Xamiv yog ib tug yam ntxwv zoo ntxiv. Los ntawm tej kev tshwm sim ntau, pib ntawm Thawj Zaj Ua Yog Toog, nws twb ua tiav nws txoj hauj lwm muab txhua yam txum tim rov qab los (saib Yauxej Xamiv—Keeb Kwm 1:1–26).
Es peb nev? Tus Tswv xav kom peb txhua tus ua dab tsi?
Peb tsis tas pom ib tug tim tswv thiaj to taub. Peb muaj cov vaj lug kub, lub tuam tsev, cov yaj saub, peb tej zaj koob hmoov los ntawm tus yawg suab, cov thawj coj uas txais kev tshoov siab, thiab qhov tseem ceeb, peb txoj kev txais tau kev tshwm sim kom coj peb txoj hau kev.
Ntsiab Cai thib Ob: Peb Yuav Tsum Npaj rau tej Kev Nyuaj uas Yuav Los
Tej kev zoo tshaj plaws hauv peb lub neej yeej tsis yog tej kev yooj yim. Feem ntau, tsis yog li ntawd. Peb pom tau cov yam ntxwv ntawm cov yaj saub uas kuv hais txog lawm.
Mauxes, Lihais, thiab Yauxej Xamiv tsis tau muaj lub neej yooj yim txawm lawv txiav txim yog lawm.
Peb puas kam them tus nqi rau peb tej kev txiav txim? Peb puas npaj ncaim tej qhov chaw zoo kom mus txog ib qho chaw zoo dua?
Kuv rov qab hais txog kuv zaj koob hmoov los ntawm tus yawg suab, thaum ntawd kuv twb txiav txim siab hais tias kuv yuav tsum kawm ntawv ntxiv thiab rau npe kom txais tau nyiaj pab kawm ntawv los ntawm ib lub tsev kawm ntawv hauv teb chaws Amelikas. Yog lawv xaiv kuv, kuv yuav tsum tso kuv txoj hauj lwm tseg, muag txhua yam uas peb muaj, thiab tuaj kawm ntawv nyob hauv Teb Chaws Amelikas tau ob xyoos.
Tej kev xeem ntawv xws li TOEFL thiab GMAT yog tej kev nyuaj thib ib uas kuv yuav tsum kov yeej. Ntau tus tsis kam txais kuv, ib txhia hais tej zaum thiab kuv tau siv peb xyoos kom npaj ua ntej ib lub tsev kawm ntawv kam txais kuv. Kuv tseem nco txog thaum tus uas pub nyiaj pab kawm ntawv hu xov tooj tuaj rau kuv thaum kawg ntawm xyoo peb.
Nws hais tias, “Carlos, kuv muaj xov xwm zoo thiab xov xwm tsis zoo qhia rau koj. Xov xwm zoo yog qhov uas koj yog ib tug ntawm peb leeg uas lawv tau xaiv xyoo no.” Tsuas muaj chaw rau ib tug thaum lub sij hawm ntawd xwb. “Xov xwm tsis zoo yog qhov uas ib tug yog tus tub ntawm ib tug neeg tseem ceeb, ib tug ntxiv yog tus tub ntawm ib tug neeg tseem ceeb thiab, ces muaj koj nev.”
Kuv teb kiag hais tias, “Es kuv … kuv yog Vajtswv tus tub nev.”
Zoo siab uas lawv tsis txiav txim raws li seb peb leej txiv yog leej twg, thiab lawv txais yuav kuv xyoo ntawd, yog xyoo 1992.
Peb yog Vajtswv tus uas Muaj Hwj Chim Tag Nrho cov me nyuam. Nws yog peb Leej Txiv, Nws hlub peb, thiab Nws npaj ib txoj hau kev rau peb lawm. Peb tsis ua neej no kom peb nkim sij hawm, rais los ua neeg laus, thiab tuag xwb. Vajtswv xav kom peb loj hlob thiab rais los ua neeg zoo li Nws.
Raws li Thawj Tswj Hwm Thomas S. Monson hais tias, “Txawm nej yuav txiv yuav poj niam los yog tsis tau yuav, txawm nej muaj hnub nyoog li cas, nej muaj cib fim kawm thiab loj hlob tuaj tau. Cia li kawm ntawv, tsis hais kawm txawj kawm ntse thiab kawm txog sab ntsuj plig, kom nej muaj peev xwm li Vajtswv” (“The Mighty Strength of the Relief Society,” Ensign, Kaum Ib Hlis Ntuj 1997, 95).
Ntsiab Cai thib Peb: Peb Yuav Tsum Qhia lub Zeem Muag nrog cov uas Peb Hlub
Lihais tau sim pab Lamas thiab Lemuyees kom nkawd to taub tias qhov uas lawv tsev neeg ua tseem ceeb npaum li cas. Qhov uas nkawd tsis pom yav tom ntej zoo ib yam li nkawd txiv ua rau nkawd yws yws thaum lawv taug mus. Tiam sis, Nifais nrhiav tus Tswv kom nws pom tau tej uas nws txiv tau pom.
“Thiab tau muaj tias tom qab uas kuv, Nifais, tau hnov kuv txiv txhua lo lus, ntsig txog yam uas nws tau pom nyob rau hauv txoj kev ua yog toog, … kuv … kuj tau xav tias kheev lam kuv yuav pom, thiab yuav hnov, thiab yuav paub txog tej yam no, los ntawm lub hwj chim ntawm tus Vaj Ntsuj Plig Dawb Huv” (1 Nifais 10:17).
Nrog lub zeem muag no, Nifais txawj kov yeej tej teeb meem ntawm lawv txoj kev taug mus thiab pab nws coj nws tsev neeg thaum nws yuav tsum ua li ntawd.
Thaum peb txiav txim siab peb yuav taug ib txoj kev twg, nyaj qhov peb xaiv ua li ntawd yuav hloov cov uas peb hlub lub neej, thiab ib txhia yuav qhia tias tau muaj li cas. Cia siab hais tias lawv yuav pom qhov uas peb pom thiab koom siab nrog peb. Tsis zoo li ntawd txhua lub sij hawm, tiam sis thaum zoo li ntawd, ua rau peb txoj kev taug mus yooj yim dua.
Thaum peb tsev neeg tau ua li kuv tau hais lawm, kuv yeej xav tau kuv tus poj niam txoj kev txhawb nqa. Cov me nyuam tseem hluas thiab tsis muaj cai hais li cas, tiam sis kuv yuav tsum muaj kuv tus poj niam txoj kev txhawb nqa. Kuv nco qab tias thaum xub thawj, Mônica thiab kuv wb tau ua tib zoo sib tham txog qhov kev hloov no mus txog thaum nws txaus siab thiab xav ua thiab. Qhov uas wb ob leeg pom yav tom ntej zoo ib yam ua rau nws txhawb nqa qhov kev hloov no thiab nws yog ib tug tseem ceeb uas pab kom peb vam meej.
Kuv paub tias tus Tswv muaj ib txoj hau kev rau peb lub neej. Nws paub peb. Nws paub dab tsi yog qhov zoo tshaj plaws rau peb. Txawm tej yam mus zoo tam sim no tsis txhais hais tias peb tsis tas siv sij hawm xav seb puas muaj ib yam dab tsi zoo dua. Yog tias peb ua neej zoo ib yam li peb ua tam sim no, peb puas yuav txais cov koob hmoov raws li Vajtswv cog lus?
Vajtswv muaj txoj sia nyob. Nws yog peb Leej Txiv. Tus Cawm Seej Yexus Khetos muaj txoj sia nyob, thiab kuv paub tias dhau los ntawm Nws txoj kev theej txhoj, peb yuav muaj zog kov yeej peb tej teeb meem uas muaj niaj hnub no. Los ntawm Yexus Khetos lub npe, amees.