2010–2019
Irooj Ewōr An Karōk n̄an Kōj!
Oktoba 2014


Irooj Ewōr An Karōk n̄an Kōj!

Eļan̄n̄e jej wōnm̧aanļo̧k n̄an mour āinwōt ad mour, enaaj ke kakūrm̧ool kalim̧m̧ur in?

Ej juon kōjeram̧m̧an n̄an erom m̧ōttan iien in epād ilo bwebwenato n̄e rikōnono ro ilo kweilo̧k in eļap rej kōnono ilo kajin eo aer make. Āliktata in aō kar kōnono ilo lokato in, iaar inepata kōn kajin Pālle eo aō. Kiiō, ij inepata kōn m̧ōkajin aō kōnono kajin Portuguese. Ijjab kōņaan bwe en m̧okaj aō ekōnono jen ro rej riit kajin Pālle.

Aolepād wōj jaar en̄jake im naaj en̄jake tōren kōm̧m̧an kālet ko raorōk ilo mour ko ad. Iaikuj ke bōk jerbal in ke ak eo juon? Iaikuj ke jerbale juon mijen? Ej ke armej eo ejim̧we n̄an aō m̧areiki?

Erkein rej jekjek ko ilo eria ko reoktak ilo mour ko ad me juon oktak jidikdik in tōl emaron̄ bōk jem̧ļok ko rem̧m̧an ilju im jekļaj. Ilo ennaan ko an Būreejtōn Dieter F. Uchtdorf: “Kōn elōn̄ iiō in jerbal ko n̄an Irooj …, iaar ekkatak bwe oktak eo ikōtaan m̧ōņōņō im liāājlōl ilo mour an kajjojo, ilo mour in pālele, im baam̧ļe emakijkij an jerbal kōn jon̄an bōd edik” (“A Matter of a Few Degrees,” Ensign ak Liaona, Māe 2008, 58).

Ekōjkan ad kaarmejete bōd kein reddik ilo bōnbōn?

Inaaj kōjerbal juon aō make en̄jake n̄an kōmeļeļeik ennaan in aō.

Ilo jem̧ļokin 1980 jim̧a ko, baam̧ļe eo am̧ eaar ejaak jān lio pāleeō, Mônica, ruo iaan ajri ro nejūm emān, im n̄a. Kōm kar jokwe ilo São Paulo, Brazil, ikar jerbal n̄an juon kompani em̧m̧an. Em̧ōj aō kadedeļo̧k ekkatak ko ilo university im, ej kab mōj kōtļo̧k eō jān bisop ilo ward eo ijo kom̧ kar jokwe ie. Mour eaar em̧m̧an, im men otemjej repād āinwōt aer kar aikuj—m̧āe juon raan juon m̧ōtta ekar lotok kom̧.

Ilo jem̧ļokin loļo̧k eo an, eaar kean̄ im kajjitōk juon kajjitōk me eaar ukōt kōļmenļo̧kjeņ eo aō. Ekar ba, ‟Carlos, āinwōt men otemjej rem̧m̧an n̄an kwe, baam̧ļe ņe am̧, jerbal ņe am̧, im am̧ jerbal in jipan̄ ilo Kabun̄ in, ak—” innām ar itok kajjitōk eo, ‟eļan̄n̄e kwoj wōnm̧aanļo̧k n̄an mour āinwōt am mour, enaaj ke kakūrm̧ool kalim̧m̧ur in kōjeram̧m̧an ko ilo kōjeram̧m̧an in petriak eo am?”

Ikar jan̄in kōlmenļo̧kjeņ kōn kōjeram̧m̧an in petriak eo aō ilo wāween in. Ij riiti jān iien n̄an iien ak jan̄in kar kōn juon erreim̧aanļok n̄an kōjeram̧m̧an ko kalim̧m̧ur kaki ilju im jekļaj im etale wāween aō mour kiiō.

Ālkin lotok eo an, iaar oktak kōlmenļo̧kjeņ eo aō n̄an kōjeram̧m̧an an petriak, bwilōn̄, ‟Eļan̄n̄e jej wōnm̧aanļo̧k n̄an mour āinwōt ad mour, enaaj kakūrm̧ool kalim̧m̧ur in kōjeram̧m̧an an petriak?” Ālkin jet kejōkļo̧kjeņ, eaar wōr aō en̄jake bwe jet oktak rej aikuj kōm̧m̧an, eļaptata ilo ekkeijel n̄an jeļāļo̧kjeņ im jerbal eo aō.

Ekar jab juon ļōmņak ikōtaan ta eo ejim̧we im bōd ak ikōtaan ta em̧m̧an im em̧m̧an ļo̧k, āinwōt an kar Elder Dallin H. Oaks katakin kōj ke eaar ba: ‟Ilo ad ļōmņak kōn jokālet ko rellōn̄, jej aikuj kememej bwe ejabwe an juon men em̧m̧an. Jokālet ko jet rem̧m̧an ļo̧k, im ko jet rem̧m̧an tata ” (“Good, Better, Best,” Ensign ak Liahona, Nov. 2007, 104–5).

Innām ekōjkan ad kam̧ool bwe jej kōm̧m̧ane kālet eo em̧m̧an tata?

Erkein rej jet pedped in katak ko me iaar ekkatak kaki.

Pedped in Katak Nōmba Juon: Jej aikuj Kōļmenļo̧kjeņ kōn Kālet ko Ad kōn Kōttōpar ilo Ļōmņak

Kōm̧m̧ani jokālet ko remaron̄ ļam̧e mour ko ad im ro jej iakwe er ilo an ejjeļo̧k meļeļe ko rem̧wilaļ kōn waļo̧kier maron̄ bōktok jet kauwōtata ko. Ijowōtke, n̄e jej ļōmņak kōn kaje ko rekkar kōn jem̧ļo̧k kein ilju im jekļaj, jemaron̄ lo kōn tualikkar iaļ eo em̧m̧antata n̄an bōke kiiō.

Meļeļe wōn kōj, etke jej pād ijin, im ta Irooj ej kōtmāne jān kōj ilo mour in enaaj letok n̄an kōj meļeļe eo em̧wilaļļo̧k im jej aikuji.

Jemaron̄ lo waanjon̄ak ko ilo jeje ko rekwojarjar me n̄an bōk juon jeļā edepakpak eletok alikkar kōn ta iaļ n̄an bōke.

Moses ekar jelm̧ae Irooj im kōnono ippān, ekkatak kōn karōk in lo̧mo̧o̧r, im meļeļe eddo eo an āinwōt rikanaan eo ej bōk eddoin aintok Israel.

Anij eaar jiron̄ Moses bwe Eaar Irooj Ekajoor im bwe Moses ej Nejin m̧aan. …

Innām eaar bar jiron̄ Moses n̄an reilo̧k bwe En maron̄ kwaļok n̄ane ta Eaar kōm̧anm̧ane. …

Anij barāinwōt eaar jiron̄ Moses bwe ewōr juon An jerbal n̄ane (LaleMoses 1:3–4, 6).

Kōn meļeļe in, Moses ekar maron̄ dipļo̧ke elōn iiō in en̄taan ilo āne jem̧den im kōjepļaak Israel n̄an kapijuknen.

Liai, rikanaan eo em̧m̧an ilo Bok in Mormon, kar ettōņak juon ettoņak, im ilo visōn ko eaar ekkatak ilo mijen n̄an tōl baam̧le eo an n̄an juon ānen kalim̧m̧ur.

‟Im ālkin men kein, Irooj eaar jiron̄ jema, ilo juon tōņak, bwe ej aikuj bōk baam̧le eo an im ilo̧k n̄an āne jem̧aden.

‟…  Im eaar likūt m̧weo im̧ōņ, im bwidej in jolōt eo an, im an gold, an silver, im an men in aorōk otemjej” ( (1 Nipai 2:2, 4).

Liai eaar pād wōt im tōmak e visōn in men̄e eaar ioon kapan̄pan̄ ko ilo itokitak im n̄an likūt juon mour em̧m̧an ilo Jerusalem.

Rikanaan Joseph Smith ej bar juon waanjon̄ak. Kōn elōn̄ revelesōn, jino kōn Visōn eo M̧okta, eaar maron̄ kadedeļo̧k mijen eo an kōn kōjepļaak men otemjej (Lale Joseph Smith—History 1:1–26).

Im Ta kōn kōj? Ta eo Irooj ej kōtmāne jān kōj kajjojo?

Jejjab aikuj lo juon enjeļ n̄an meļeļe. Ewōr jeje ko rekwojarjar, tampeļ, rikanaan ro remour, kōjeram̧man ko ad an petriak, ritōl ro reim̧we, im ilōn̄in men otemjej, maron̄ eo n̄an bōk revelesōn eo ad make n̄an tōl jokālet ko ad.

Pedped in katak Nōmba Ruo: Jej Aikuj M̧aanjabpopo n̄an Apan̄ ko Renaaj Itok

Iaļ ko rem̧m̧antata ilo mour ejeja aer pidodo. Enan̄in aolep iien, elukkuun in oktak. Jemaron̄ kalimjek waanjon̄ak ko an rikanaan ro ej kab m̧ōj Aō kwaļo̧ki.

Moses, Liai, im Joseph Smith ejjab pidodo iaļen itoitak ko aer kōn m̧ool eo bwe ļōmņak ko aer rejim̧we.

Jej ke ikdeleel n̄an kōļļā wōņaan jokālet ko ad? Jej ke pojak n̄an likūt iminene ko peļaakid n̄an tōpar juon jikin em̧m̧an?

Jepļaak n̄an en̄jake eo aō kōn kōjeram̧m̧an eo an petriak, iaar itok n̄an jem̧ļo̧k eo ilo tōre eo bwe ij aikuj pukōt kakobaba in jeļāļo̧kjeņ im kanne n̄an juon jāān in jipan̄ n̄an jikuuļ jān juon university ilo Amedka. Eļan̄n̄e naaj kālet eō, imaron̄ em̧m̧akūt jān jerbal eō aō, wia kake men ko m̧weiō, im itok im jokwe ilo Amekda āinwōt juon rijikuuļ ej kōjerbal jāān in jipan̄ ium̧win ruo iiō.

Teej ko āinwōt TOEFL im GMAT raar kapan̄pan̄ ko m̧okta n̄an eļļā jāni. Ebōk jilu iiō ko raitok n̄an kōppopo, elōn̄ kar lōmņak ko nan “jab kōm̧m̧ane”, im ko jet im ij “lōmņak bolen” m̧okta jen Aō deļo̧n̄e university eo. Ij keememej wōt taļboon ko̧o̧l eo iaar bōke ilo jem̧ļo̧kin iiō eo kein kajilu jān armej eo ej bōk eddoin jāān in jipan̄ ko n̄an jikuuļ.

Eaar ba, ‟Carlos, ippa ewōr ennaan ko rem̧m̧an im renana n̄an eok. Ennaan eo em̧m̧an ej bwe kwoj ilubwilijin ro jilu āliktata iiō in.” Ekar wōr juon wōt peļļo̧k ilo tōre eo. ‟Ennaan eo enana ej bwe juon iaer ej ļaddik eo nejin juon eo eaorōk, ļaddik eo juon ej nejin bar juon eo eaorōk, innām kwe.”

Em̧ōkaj Aō uwaak, ‟Im N̄a … N̄a Nejin Anij.”

Armej eo em̧ōņōņō ioon laļ ejjab juon kilen ekkāleel, im kar kalet Eō iiō eo, ilo 1992.

Kōj jej ro nejin Anij Ekajoor Pōtata. Ej ej Jemād, Ej iakwe kōj, im ewōr An karōk n̄an kōj. Jejjab pād ijin ilo mour in n̄an kakkure iien ko ad, bwij wōļā, im mej. Anij ekōņaan bwe jen rūtto ļok im kakūrm̧ool aorōk eo ad.

Ilo ennaan ko an Būreejtōn Thomas  S. Monson: “Kom̧ kajjojo, rim̧are ak jaab, jekdo̧o̧n iiō ta, ewōr ami iien em̧man n̄an ekkatak im eddōkļo̧k. Kōļapļo̧k jeļāļo̧kjeņ eo am̧i, jim̧or ilo kapeel im jetōb, n̄an kobrak am̧ kwojarjar” (“The Mighty Strength of the Relief Society,” Ensign, Nov. 1997, 95).

Pedped in katak Nōmba Jilu: Jej Aikuj Kwaļo̧k Visōn in ippān Armej ro Jej Iakwe Er.

Liai eaar kajjieon̄ elōn̄ kōttan n̄an jipan̄ Laman im Lemuel meļeļe aorōkin oktak eo rej kōm̧m̧ane. M̧ool eo bwe rejjab kwaļo̧k visōn eo an jemāer ekōm̧m̧an bwe ren nūrbōktak ilo iaļ eo. Nipai, eaar pukōt Irooj n̄an lale ta eo Jemān eaar loe.

‟Im ālkin men kein, n̄a Nipai, ke em̧ōj aō kar rōn aolep naan kein an jema, kōn visiōn in, im barāinwōt men ko eaar kōnono kōn kajoor in Jetōb Kwojarjar” (1 Nipai 10:17).

Kōn visiōn in, Nipai eaar maron̄ eļļā jān mālijjon̄ ko ilo iaļ eo ak barāinwōt n̄an tōl baam̧le eo an n̄e enaaj ekkar.

Elukkuun alikkar bwe n̄e jej kōņaan bōk jet iaļ, enaaj jelōt armej ro jej iakwe er, im jet renaaj m̧adm̧ōd ippād uwaak in kālet eo. Renaaj maron̄ lo ta eo jej loe im m̧adm̧ōd kōn ejja tōmak eo ad. Menin ejjab aolep iien pidodo, ak n̄e ej waļo̧k, ekapidodoik ļo̧k iaļ eo.

Ilo en̄jake eo aō make iaar kōjerbale āinwōt juon kōmeļeļe, iaar aikuji jipan̄ eo an kōrā eo ippa. Ajri ro reddik im jab lōn̄ men remaron̄ ba, ak jipan̄ eo an lio pāleeō eaorōk. Ij keememej, ilo jinoin, Mônica im n̄a kar aikuj in kōnono ippān doon oktak in kōlmenļo̧kjeņ ko m̧ae iien eaar inem̧m̧an im barāinwōt wujlepļo̧k. Kwaļo̧k m̧adenļo̧k in ekōm̧m̧an bwe en jab jipan̄ oktak eo ak barāinwōt n̄an erom juon m̧ōttan eaorōk ilo tōprak eo an.

Ijeļā bwe Irooj ewōr an karōk n̄an kōj ilo mour in. Ejeļā wōn kōj. Ejeļā ta em̧m̧an n̄an kōj. Kōnke aolep men rem̧m̧an ejjab meļeļein bwe jejjab aikuj jān iien n̄an iien kejōkļo̧kjeņ eļan̄n̄e ewōr men raikuj em̧m̧an ļo̧k. Eļan̄n̄e jej wōnm̧aanļo̧k n̄an mour āinwōt ad mour, enaaj ke kakūrm̧ool kalim̧m̧ur in?

Anij ej mour. E ej Jemād. Rilo̧mo̧o̧r Jisōs Kraist ej mour, im ijeļā bwe kōn en̄taan in pinmuur eo An jemaron̄ lo kajoor n̄an eļļā jen apan̄ ko ad kajjojo raan. Ilo etan Jisōs Kraist, amen.