O Loo I Ai se Fuafuaga a le Alii mo i Tatou!
Saunia e Elder Carlos A. Godoy
O Le Fitugafulu
Afai e faaauau pea ona tatou ola e pei ona tatou ola ai, mata o le a faataunuuina faamanuiaga ua folafolaina?
O se faamanuiaga le avea ma se vaega o lenei taimi maoae faasolopito lea ua mafai ai e failauga o le konafesi aoao ona lauga atu i a latou lava gagana. O le taimi mulimuli na ou lauga ai, sa ou popole i la’u tautala faaPeretania. O le taimi lenei, ou te popole e uiga i le saoasaoa o lau tautala faaPotukale—ia aua ne’i vave atu le tautala nai lo tusiga i luga o le lau.
Ua tatou oo uma pe o le a oo i ni taimi o faaiuga taua i o tatou olaga. Pe tatau ona ou tuliloaina le galuega lea po o le galuega le la? Pe tatau ea ona ou auauna atu i se misiona? O le tagata sa’o ea lenei ou te faaipoipo i ai?
O nisi taimi o suiga laiti i le ala o o tatou olaga e mafai ona i ai taunuuga taua i le lumanai. Ua saunoa mai Peresitene Dieter F. Uchtdorf: “I le gasologa o tausaga i le auauna ai i le Alii …, ua ou aoaoina ai le eseesega i le va o le fiafia ma le faanoanoa i tagata taitoatasi, ulugalii faaipoipo, ma aiga e masani lava ona mafua i sina sese i ni nai tikeri lava” (“Na o Ni Nai Tikeri Lava,” Liahona, Me 2008, 58).
E faapefea ona tatou aloese mai nei mea sese laiti pe a fuafua i ai?
O le a ou faaaogaina se aafiaga patino e faamatala ai la’u savali.
I le faaiuga o le vaitau 1980, sa nonofo ai lo matou aiga, o ma’ua ma lou toalua, o Mônica, ma le toalua o le ma fanau e toafa i São Paulo, Pasila, sa ou faigaluega ai mo se kamupani lelei, na maea la’u aoga i le iunivesite, ma sa lei leva ona faamalolo mai a’u o se epikopo i la matou uarota. Sa lelei le olaga, ma o mea uma na foliga mai na tulaga lelei e pei ona tatau ai—seia oo i se tasi aso ina ua sau se uo ua leva e asiasi mai.
I le faaiuga o lana asiasiga, na ia faia ai se faamatalaga ma fai mai se fesili na le mautonu ai ou talitonuga. Sa ia fai mai, “Carlos, e foliga mai o loo sologa lelei mea uma mo oe, lou aiga, lau galuega, ma lau auaunaga i le Ekalesia, ae—” ona sau lea o le fesili, “afai e faaauau pea ona e soifua e pei ona e soifua ai, mata e faataunuuina faamanuiaga na folafola atu i lou faamanuiaga faapeteriaka?”
Ou te le’i mafaufau lava i lo’u faamanuiaga faapeteriaka i le ala lenei. Sa ou faitauina mai lea taimi i lea taimi ae sa aunoa ma se faamoemoe e tulimatai atu i faamanuiaga ua folafolaina mai i le lumanai ma le iloiloina o le auala o loo ou ola ai i le taimi nei.
I le mavae ai o lana asiasiga, sa ou mafaufau i lo’u faamanuiaga faapeteriaka, ma tuufesili, “Afai e faaauau pea ona matou ola e pei ona matou ola ai, mata o le a faataunuuina faamanuiaga ua folafola mai?” Ina ua mavae ni mafaufauga loloto, sa ou lagona e tatau ona faia ni suiga, aemaise lava i la’u aoga ma le galuega.
Sa le’i avea o se faaiuga i le va o le mea na sa’o ma sese, ae i le va o le mea na lelei ma mea na lelei atu, e pei ona sa aoao mai ai e Elder Dallin H. Oaks: “A o tatou manatunatu i filifiliga eseese, e tatau ona tatou manatua e le lava le na ona lelei o se mea. O isi filifiliga e lelei tele, ae o isi e silisili ona lelei” (“Lelei, Lelei Tele, Lelei Silisili,” Liahona, Nov. 2007, 104–5).
E mafai faapefea la ona tatou mautinoa ua tatou faia le faaiuga silisili ona lelei?
O nisi nei o mataupu faavae na ou aoaoina.
Mataupu Faavae Muamua: E Manaomia ona Tatou Mafaufau i a Tatou Filifiliga faatasi ai ma le Taunuuga i le Mafaufau
O le faia o faaiuga ia e mafai ona i ai se aafiaga i o tatou olaga ma olaga o e tatou te alolofa i ai e aunoa ma le mauaina o se vaaiga mamao lautele o o latou taunuuga e mafai ona aumaia ai nisi o tulaga lamatia. Peitai, a tatou manatunatu i taunuuga e mafai ona oo i ai nei faaiuga i le lumanai, e mafai ona manino atili la tatou vaai i le ala silisili ona lelei e ui ai i le taimi nei.
O le malamalama po o ai i tatou, aisea ua tatou i ai iinei, ma le mea ua faamoemoe e le Alii mai ia i tatou i lenei olaga o le a fesoasoani tatou te maua ai se vaaiga mamao lautele tatou te manaomiaina.
E mafai ona tatou maua ni faataitaiga i totonu o tusitusiga paia e uiga i le mauaina o se vaaiga mamao lautele lea na aumaia ai se faamaninoga e tusa ai ma le auala e ui ai.
Na talanoa faafesagai Mose ma le Alii, ma aoao e uiga i le ata o le faaolataga, ma o lea na sili atu ai lona malamalama i lana matafaioi o le avea ma perofeta o le faapotopotoina o Isaraelu.
“Ma sa fetalai mai le Atua ia Mose, ua fai mai: Faauta, o A’u o le Alii le Atua Malosi Aoao. …
“… Ma o le a Ou faaali atu ia te oe galuega a o’u lima. …
“Ma ua ia te au se galuega mo oe, Mose e, lo’u atalii” (Mose 1:3–4, 6).
Faatasi ai ma lenei malamalamaaga, na mafai ai e Mose ona onosaia le tele o tausaga o puapuaga i le toafa ma le toe taitai atu o Isaraelu i lona aiga.
O Liae, le perofeta o le Tusi a Mamona, na faia se miti, ma i lana miti na ia aoao ai i lana misiona e taitai lona aiga i se nuu folafolaina.
“Ma sa oo ina poloaiina e le Alii lo’u tama, i se miti lava, e tatau ia te ia ona ave lona aiga ma o ese atu i le vao.
“… Ma sa tuu e ia lona fale, ma le fanua o lona tofi, ma ana auro, ma ana ario, ma ana mea taua” (1 Nifae 2:2, 4).
Na tumau ma le faamaoni Liae i lenei miti e ui lava i le faigata o femalagaaiga ma le tuua o se olaga sologa lelei i Ierusalema.
O le Perofeta o Iosefa Samita o se tasi o faataitaiga sili. E ala i le tele o faaaliga, e amata i le Muai Faaaliga, na mafai ona ia faamaeaina lana misiona o le toefuataiina o mea uma (tagai Iosefa Samita—Talafaasolopito 1:1–26).
Ae a tatou? O le a le mea ua faamoemoeina e le Alii mai ia i tatou taitoatasi?
E le manaomia ona tatou vaai i se agelu ina ia maua ai le malamalama. Ua ia i tatou tusitusiga paia, malumalu, o perofeta soifua, o tatou faamanuiaga faapeteriaka, o taitai musuia, ma le mea aupito i taua, o le aia e maua ai faaaliga faaletagata lava ia e taiala ai a tatou faaiuga.
Mataupu Faavae Lona Lua: E Manaomia Ona Tatou Saunia Mo Luitau O Le A Oo Mai
O auala sili ona lelei i le olaga e seasea lava o ni auala sili ona faigofie. E masani lava, o le faafeagai tonu lava. E mafai ona tatou tagai i faataitaiga a perofeta ia faatoa uma ona ou taua.
O Mose, Liae, ma Iosefa Samita sa lei mauaina ni malaga faigofie e ui lava i le faia o faaiuga sa’o.
Pe o tatou naunau ea e totogi le tau mo a tatou faaiuga? Pe o tatou saunia ea e tuua o tatou tulaga toafimalie ia ausia ai se nofoaga sili atu?
I le toe ta’ua ai o le aafiaga o lo’u faamanuiaga faapeteriaka, na ou faia ai le faaiuga i lena taimi e tatau ona ou saili se isi aoaoga faaopoopo ma talosaga mo se sikolasipi mai se iunivesite i Amerika. Afai e filifilia a’u, o le a tatau ona ou tuua lau galuega, faatau atu a matou mea uma, ma malaga mai e aumau i le Iunaite Setete o se tagata aoga faasikolasipi mo le lua tausaga.
O suega Igilisi ma suega ulufale na avea ma luitau muamua e ao ona faatoilaloina. Na alu ai tausaga uumi e tolu o sauniuniga, sa tele ni “leai,” ma ni nai, “atonu lava” a o lei taliaina au i se iunivesite. Ou te manatua pea le telefoni sa ou mauaina i le faaiuga o le tausaga lona tolu mai le tagata e nafa ma sikolasipi.
Na ia faapea mai, “Carlos, e i ai sa’u tala fiafia ma se tala le lelei mo oe. O le tala fiafia, o oe o se tasi o sui tauva e toatolu mulimuli ua filifilia i lenei tausaga.” Sa na o le tasi le avanoa i lena taimi. “O le tala le lelei, o le toalua o isi sui tauva o atalii a ni tagata taua (VIP), ona sosoo ai lea ma oe.”
Na vave ona ou tali atu, “Ae o a’u … o a’u o se atalii o le Atua.”
Ma le fiafia tele, sa le i fuafuaina i pasene faalelalolagi, ma na taliaina ai au i lena tausaga, i le 1992.
O i tatou o fanau a le Atua Silisili Ese. O Ia o lo tatou Tama, e alofa o Ia ia i tatou, ma o loo i ai Sana fuafuaga mo i tatou. Tatou te le o i ai iinei i lenei olaga ia tau na ona faamaumau o tatou taimi, ia matutua, ma maliliu. E finagalo le Atua ia tatou tuputupu a’e ma ausia o tatou gafatia.
I le saunoaga a Peresitene Thomas S. Monson: “O outou taitoatasi, nofofua pe ua faaipoipo, po o le a lava le matua, ua i ai le avanoa e aoao ma tuputupu ae ai. Ia faalautele lou iloa faaleatamai ma faaleagaga, i le tulaga atoatoa o lou gafatia faalelagi” (“O Le Malosiaga Maoae o le Aualofa,” Liahona, Ian. 1998, 114).
Mataupu Faavae Lona Tolu: E Manaomia ona Tatou Faasoa Atu Lenei Vaaiga Mamao i Tagata Tatou Te Alolofa I Ai
Na faia e Liae le tele o taumafaiga e fesoasoani ai ia Lamana ma Lemuelu ia malamalama i le taua o suiga na latou faia. O le mea moni i lo laua lē opogiina o le miti a lo la tama na mafua ai ona la muimui i le taimi o le faigamalaga. O Nifae, i le isi itu, na saili atu i le Alii ina ia vaai i mea na vaaia e lona tama.
“Ma sa oo ina ua uma ona faalogo atu o a’u o Nifae, i upu uma a lo’u tama, e uiga i mea sa vaai i ai o ia i se faaaliga vaaia, … o a’u … sa ou manao foi ia mafai ona vaai, ma faalogo, ma iloa e uiga i ia mea, i le mana o le Agaga Paia” (1 Nifae 10:17).
Faatasi ai ma lenei faaaliga, sa le gata ina mafai e Nifae ona faatoilalo ia luitau o le malaga ae na taitai foi lona aiga ina ua manaomia.
Pe a tatou filifili e ui i se auala faapitoa, o le a aafia ai tagata tatou te alolofa i ai, ma e oo lava i nisi o le a tatou aafia atu ai i taunuuga o lea filifiliga. I le tulaga moni, e tatau ona latou vaaia mea tatou te vaaia ma tausoa faatasi o tatou talitonuga. E le o taimi uma e tupu ai lenei mea, ae a tupu, o le a sili atu ona faigofie le malaga.
I le aafiaga patino ua ou faapupula atu, sa ou manaomia ai le lagolago a lo’u toalua. Na laiti lava le ma fanau ma na le tele se tala e fai mai, ae sa taua le lagolago a lo’u toalua. Ou te manatua i le taimi muamua, na ma manaomia ai ma Mônica le talanoaina ma le toto’a o suiga i fuafuaga seia oo ina ia lagonaina le mafanafana ma le tuuto. O lenei miti na tausoa faatasi na le gata ina mafua ai ona ia lagolagoina le suiga ae ina ia avea foi ma se vaega taua i lona tulaga manuia.
Ou te iloa o loo i ai se fuafuaga a le Alii mo i tatou. Na te silafia i tatou. Na te silafia le mea e silisili ona lelei mo i tatou. E le faapea ua sologa lelei ni mea ona lē tatau ai lea ona iloilo mai lea taimi i lea taimi pe le’o i ai se isi mea e sili atu. Afai e faaauau pea ona tatou ola e pei ona tatou ola ai, mata o le a faataunuuina faamanuiaga ua folafolaina?
O loo soifua le Atua. O Ia o lo tatou Tama. O loo soifua le Faaola o Iesu Keriso, ma ou te iloa e ala i Lana taulaga togiola e mafai ai ona tatou maua le malosi e faatoilalo ai o tatou luitau i aso uma. I le suafa o Iesu Keriso, amene.