Lub Pov Thawj Hwj uas Npaj Siab

Kuv zoo siab vim kuv nrog cov uas tuav Vajtswv lub pov thawj hwj sib sau ua ke, uas nyob thoob plaws ntiaj teb no. Kuv ua nej tsaug rau nej txoj kev ntseeg, tej kev ua hauj lwm pab, thiab nej tej kev thov Vajtswv.

Hmo no kuv zaj xov hais txog lub Pov Thawj Hwj Aloos. Nws yog rau peb txhua tus uas paub txog tus Tswv tej kev cog lus rau lawv cov uas tuav li phau vaj lug kub hais “lub pov thawj hwj qis dua.”¹ Nws kuj muaj npe hu ua lub pov thawj hwj uas npaj siab. Hmo no kuv yuav tham txog txoj kev npaj siab zoo kawg nkaus ntawd.

Tus Tswv txoj hau kev rau Nws txoj hauj lwm yeej muaj ntau yam kev npaj siab. Nws tau npaj lub ntiaj teb rau peb los raug kev sim siab thiab kom muaj cib fim ua neej nyob. Thaum peb nyob ntawm no, peb nyob hauv ib qho chaw uas cov vaj lug kub hu ua “lub caij sim siab.”²

Tus yaj saub Amas piav hais tias txoj kev npaj rau lub neej nyob mus ib txhis tseem ceeb npaum li cas, vim nyob ntawd peb muaj cuab kav nyob ua ib tse neeg tas mus li nrog Vajtswv Leej Txiv thiab Yexus Khetos.

Nws piav txog txoj kev npaj li no hais tias: “Thiab peb pom tias txoj kev tuag tau los rau tib neeg, muaj tseeb tiag, txoj kev tuag uas Amulej tau hais txog, uas yog txoj kev tuag sab cev nqaij daim tawv; txawm li ntawd los twb tau muaj ib lub sij hawm pub rau tib neeg kom nws yuav hloov siab lees txim; yog li ntawd lub neej no tau rais los mus ua lub caij sim siab; ib lub sij hawm los npaj ntsib Vajtswv; ib lub sij hawm los npaj rau qhov uas tsis muaj qhov kawg uas wb tau hais lawm, uas yog tom qab txoj kev sawv hauv qhov tuag rov qab los ntawm cov tuag.”³

Ib yam li peb muaj sij hawm ua neej nyob los npaj siab mus ntsib Vajtswv, lub sij hawm uas peb tau ua hauj lwm hauv lub Pov Thawj Hwj Aloos yog lub cim fib rau peb tau npaj los kawm seb yuav ua li cas thiaj pab tau lwm leej lwm tus. Ib yam li tus Tswv pab peb xeem tau mus dhau tej kev sim siab hauv lub neej no, Nws kuj xa kev pab rau peb thaum peb npaj siab hauv lub pov thawj hwj.

Kuv zaj xov yog rau cov uas tus Tswv txib los pab npaj cov uas yuav los pab cov uas tuav lub Pov Thawj Hwj Aloos thiab rau cov uas tuav lub Pov Thawj Hwj Aloos kiag. Kuv hais rau tej leej txiv. Kuv hais rau cov npisov. Thiab kuv hais rau cov uas tuav lub Pov Thawj Hwj Mekixedes uas ua khub thiab xib hwb qhia cov tub hluas hauv lub pov thawj hwj uas npaj siab no.

Kuv hais lus qhuas thiab ua nej tsaug rau nej coob leej thoob plaws ntiaj teb thiab hauv txhua lub caij.

Ntshe kuv yuav ua txhaum me ntsis yog tias kuv tsis tham txog ib ceg ntseeg tus thawj tswj hwm thiab ib tug npisov thaum kuv tseem ua tub hluas. Kuv tau los ua ib tug dikas thaum kuv muaj 12 xyoos hauv ib ceg ntseeg me me hauv Teb Chaws Amelikas tim sab hnub tuaj. Ceg ntseeg ntawd me kawg nkaus li kuv tus tij laug wb yog ob tug uas tuav lub Pov Thawj Hwj Aloos xwb mus txog thaum kuv txiv, uas yog ceg ntseeg tus thawj tswj hwm, tau caw ib tug txiv neej laus zog tuaj koom lub Koom Txoos.

Tus txiv neej uas nyuam qhuav los ntseeg no tau txais lub Pov Thawj Hwj Aloos thiab ces, raug hu los saib xyuas lub Pov Thawj Hwj Aloos. Kuv tseem nco ntsoov qhov ntawd zoo nkaus li yog nag hmo xwb. Kuv tseem nco qab thaum lub caij nplooj ntoo zeeg thiab tus neeg uas los ntseeg tshiab tau coj kuv thiab kuv tij laug mus ua dab tsi pab ib tug poj ntsuam. Kuv tsis nco qab tias peb ua hauj lwm dab tsi, tiam sis kuv nco qab txoj kev xav tias lub hwj chim ntawm lub pov thawj hwj tau pab ua qhov ntawd es yav tom qab ntawd kuv kawm tias tus Tswv tau hais tias peb yuav tsum ua tej ntawd peb thiaj tau kev zam txim peb thiaj tau npaj siab mus pom Nws dua.

Tam sim no thaum kuv ntsia yav nram qab, kuv muaj kev ris txiaj rau ceg ntseeg tus thawj tswj hwm uas hu ib tug neeg ntseeg tshiab los pab tus Tswv npaj ob tug tub hluas uas yav tom ntej yuav los ua npisov, uas raug txib mus saib xyuas cov neeg pluag thiab coj kav cov uas nyob hauv lub pov thawj hwj npaj siab no.

Kuv tseem ua ib tug dikas thaum peb tsev neeg tsiv mus nyob hauv ib pawg ntseeg loj loj hauv Utah. Yog thawj thawj zaug uas kuv hnov lub hwj chim vim muaj ib pawg neeg uas tuav lub Pov Thawj Hwj Aloos. Tiag tiag, yog thawj zaug us kuv tau pom ib pawg loj npaud. Thiab tom qab ntawd yog thawj zaug uas kuv hnov lub hwj chim thiab txoj koob hmoov vim kuv muaj ib tug npisov uas coj kav pawg pov thawj ntawd.

Tus npisov hu kuv los ua nws tus pab cuam thib ib hauv pawg pov thawj ntawd. Kuv nco qab tias nws qhia pawg ntawd nws tus kheej—tab txawm nws muaj hauj lwm ntau, tseem muaj lwm tus txiv neej txawj ntse uas nws hu tau los qhia peb. Nws tau muab cov rooj zaum tso ua ib lub voj voog. Nws tau kom kuv zaum ntawm nws ib sab, ntawm nws sab xis.

Kuv tau ntsia ntawm nws xub pwg thaum nws qhia. Tej thaum nws mam li saib nws cov ntawv uas nyob ntawm nws ib sab hauv caug thiab cov vaj lug kub qub qub uas nws muab qhib cia ntawm nws lwm sab hauv caug. Kuv tseem nco qhov uas kuv nyiam mloog tej dab neeg txog kev ua siab loj los ntawm phau Danias thiab nws zaj lus tim khawv txog tus Cawm Seej, tus Tswv Yexus Khetos.

Kuv yeej yuav nco ntsoov qhov uas tus Tswv hu cov khub zoo zoo rau cov uas tuav lub pov thawj hwj uas tab tom npaj siab.

Kuv tus npisov muaj ob tug pab cuam zoo heev, es thaum ntawd kuv tsis to taub yog vim li cas, tiam sis muaj ntau zaus uas nws hu xov tooj rau kuv tom tsev thiab hais tias, “Hal, kuv xav kom koj ua kuv tus khub mus xyuas ib co neeg.” Muaj ib zaug, wb tau mus xyuas ib tug poj ntsuam uas nyob nws ib leeg tom tsev thiab tsis muaj mov noj. Thaum wb tab tom los tsev nws nres tsheb, qhib nws cov vaj lug kub, thiab qhia kuv seb vim li cas nws ua rau tus poj ntsuam ntawd xav tias nws muaj peev xwm tu nws tus kheej thiab tseem yuav muaj ib hnub twg tom ntej, thaum nws yuav muaj peev xwm pab lwm tus neeg thiab.

Lwm zaus tau mus xyuas ib tug txiv neej uas tau tawm ntawm lub Koom Txoos ntev lawm. Kuv tus npisov caw nws rov qab tuaj nrog ib Tsoom Haiv Neeg Ntseeg sib koom ua ke. Kuv pom tias kuv tus npisov hlub ib tug txiv neej uas kuv xav tias yog ib tug uas tsis tsim nyog hlub thiab yog ib tug yeeb ncuab xwb.

Thiab lwm zaus wb tau mus xyuas ib tsev uas muaj ob tug ntxhais me me tuaj qhib qhov rooj vim nkawd niam thiab txiv qaug cawv. Ob tug ntxhais hais ntawm qhov rooj tias nkawd niam thiab txiv tab tom tsaug zog. Tus npisov pheej nrog nkawd tham, luag nyav thiab qhuas nkawd vim nkawd tsim txiaj thaib ua siab loj, tam li kuv xav nws tau ua li ntawd ntev li 10 feeb tawm. Thaum wb taug kev mus tsev, nws ntxhis lus rau kuv tias, “Yeej yog ib txoj kev mus xyuas neeg zoo. Ob tug me ntxhais ntawd yeej yuav nco qab ntsoov tias wb tau tuaj.”

Ob txoj koob hmoov uas tus khub laus zog hauv lub pov thawj hwj muab tau yog kev tso siab thiab ib tug yam ntxwv txog kev hlub neeg. Kuv pom li ntawd thaum kuv tus tub tau ib tug khub mus qhia tom tsev uas twb ua hauj lwm ntau tshaj nws hauv lub pov thawj hwj. Nws tus khub laus zog ntawd twb ua tus thawj tswj hwm ntawm qhov chaw tshaj tawm txoj moo zoo ob zaug lawm thiab tau ua lwm tus thawj coj dua.

Ua ntej nkawd mus xyuas ib tse neeg, tus thawj coj ntawm lub pov thawj hwj ntawd tau thov tuaj xyuas kuv tus tub ua ntej nkawd yuav mus. Nkawd cia kuv mloog nkawd hais lus. Tus khub laus zog ntawd tau pib thov Vajtswv, thov kom tau kev pab. Ces nws hais li no rau kuv tus tub hais tias: “Kuv xav hais tias peb yuav tsum qhia ib zaj lus qhia uas yuav zoo nkaus li peb txib kom lawv yuav hloov siab lees txim. Lawv yuav tsis tshua zoo siab yog tias kuv qhia zaj lus ntawd rau lawv. Kuv xav tias lawv haj yam yuav nyiam zaj lus yog koj ua tus qhia. Ua li ces koj xav li cas?”

Kuv nco qab tias kuv tus tub ntshai npaum li cas. Kuv tseem zoo siab heev thaum kuv tus tub lees yuav ua li ntawd vim nws pom hais tias nws tau kev tso siab lawm.

Tsis yog tus npisov lam tau lam tso nkawd ua khub. Twb yog vim tus khub laus zog ntawd tau ua tib zoo npaj nws thiaj paub tias tsev neeg ntawd xav tau lus qhia zoo li cas. Nws tau kev tshoov siab nws thiaj tau nres, es tau tso siab rau ib tug tub hluas uas tsis tshua txawj kom nws yuav yog tus uas hu Vajtswv cov me nyuam laus zog los hloov siab lees txim kom lawv yuav puaj phais.

Kuv tsis paub txoj kev xyuas tsev neeg mus li cas, tiam sis kuv paub tias ib tug npisov, ib tug uas tuav lub Pov Thawj Hwj Mekixedes, thiab tus Tswv tab tom npaj ib tug tub hluas los ua ib tug txiv neej uas tuav lub pov thawj hwj thiab ib hnub tom ntej yuav ua ib tug npisov.

Nim no, tej dab neeg zoo hauv lub pov thawj hwj npaj siab no yog tej zaj uas nej twb pom dua thiab yog tej yam hauv nej lub neej thiab. Nej twb paub thiab tau ua cov npisov, cov khub, thiab niam txiv li no dua. Nej tau pom tus Tswv txhais tes los pab nej npaj rau tej hauj lwm hauv lub pov thawj hwj uas Nws paub tias tseem nyob tom nej hauv ntej.

Peb txhua tus hauv lub pov thawj hwj muaj kev lav ris kom pab tus Tswv npaj lwm tus neeg. Muaj tej yam uas peb muaj cuab kav ua uas tseem ceeb heev. Yeej muaj hwj chim dua txoj kev hais tej lus thaum qhia cov lus qhuab qhia qhov ntawd twb yog qhov uas peb ua yam ntxwv zoo txog kev ua raws li cov lus qhuab qhia.

Qhov tseem ceeb tshaj plaws ntawm peb tej hauj lwm hauv lub pov thawj hwj yog qhov uas peb caw tib neeg los cuag Khetos thaum lawv muaj kev ntseeg, hloov siab lees txim, ua kev cai raus dej, thiab txais yuav tus Vaj Ntsuj Plig Dawb Huv. Piv xam hais tias, Thawj Tswj Hwm Monson, tau hais tej lus uas txhib tib neeg siab hais txog cov lus qhuab qhia no. Tiam sis qhov uas kuv paub txog tej yam nws ua rau neeg thiab cov tub txib thiab cov phooj ywg rau lub Koom Txoos thaum nws saib xyuas qhov chaw tshaj tawm txoj moo zoo hauv Toronto yeej txhib kom kuv los ua hauj lwm.

Nyob hauv kev pab npaj hauv lub pov thawj hwj, txoj kev “ua rau kuv pom” tseem ceeb dua txoj kev “hais qhia rau kuv paub.”

Yog vim li ntawd cov vaj lug kub tseem ceeb heev los pab peb npaj rau lub pov thawj hwj. Muaj tej qhov piv txwv puv npo hauv. Kuv xav tias kuv pom tau thaum Amas ua raws li tus tim tswv txib es nws khiav nrawm nroos mus qhia cov neeg Amonaihas uas twb xyeej nws pov tseg lawm.⁴ Kuv hnov tau qhov txias txias hauv lub qhov taub thaum tus Yaj Saub Yauxej hnov Vajtswv cov lus uas hais kom nws ua siab loj vim nws raug kev saib xyuas lawm.⁵ Thaum xav txog cov nqe vaj lug kub no, peb thiaj npaj siab nyiaj mus dhau tej hauj lwm nyuaj nyuaj no.

Ib leej txiv los sis ib tug npisov los sis ib tug khub laus zog uas mus qhia tom tsev uas tso siab rau ib tug tub hluas hauv lub pov thawj hwj yeej pauv tau tus ntawd lub neej. Muaj ib zaug ib tug hauv Pawg Kaum Ob tug Thwj Tim tau thov kom kuv txiv yuav sau ib tsab ntawv txog tej txuj ci thiab kev teev ntuj. Kuv txiv yog ib tug kws txawj ua txuj ci thiab ib tug rau siab ntso uas tuav lub pov thawj hwj. Tiam sis kuv tseem nco txog lub sij hawm uas nws cev daim ntawv rau kuv thiab hais tias, “Saib qhov no, ua ntej kuv xa mus rau Pawg Kaum Ob tug, kuv xav kom koj yuav nyeem. Koj yuav paub yog tias kuv hais yog lawm.” Nws yeej hlob kuv 32 xyoo thiab nws haj yam txawj ntse thiab paub dua kuv.

Kuv tseem tau dag zog vim leej txiv uas tuav lub pov thawj hwj ntawd tau tso siab rau kuv. Kuv paub tias nws tsis yog tso siab rau kuv tiam sis tias Vajtswv muaj cuab kav thiab yuav qhia kuv qhov tseeb. Nej cov khub laus zog foom tau koob hmoov rau cov tub hluas uas tuav lub pov thawj hwj kom npaj siab thaum nej qhia lawv tias nej tso siab rau lawv. Qhov no yuav pab nws tso siab plhuav rau tej kev tshoov siab uas nws yuav hnov ib hnub yav tom ntej thaum nws tso tes khi ib txoj koob hmoov yuav kho ib tug me nyuam uas muaj mob uas cov kws kho mob hais tias yuav tuag mus. Qhov kev tso siab ntawd tau pab kuv ntau zaus.

Qhov uas peb pab tau lwm tus neeg hauv lub pov thawj hwj yeej nyob ntawm seb peb hlub lawv npaum li cas. Qhov no haj yam muaj tseeb thaum twg peb yuav tsum qhuab ntuas lawv. Cia li xav txog lub sij hawm thaum ib tug uas tuav lub Pov Thawj Hwj Aloos, tej zaum ntawm lub rooj foom koob hmoov rau lub cim nco txog, ces nws ua yuam kev thaum lawv tab tom ua ib txoj kab ke. Qhov no tseem ceeb heev. Tej thaum yuav tau kho lawv tab meeg lwm tus neeg thiab tej thaum lawv yuav tu siab me ntsis, vim lawv txaj muag los sis xav tias lawv ua tsis zoo lawm.

Koj yuav tsum nco qab ntsoov tus Tswv cov lus ntuas hais tias peb yuav tsum muab lawv cem raws caij raws nyoog, thiab piav meej meej seb lawv ua txhaum li cas raws li tus Vaj Ntsuj Plig Dawb Huv tshoov peb lub siab, thiab ces tom qab ntawd haj yam muab kev hlub rau tus neeg uas peb twb cem lawm, xwv kom lawv tsis txhob xav yuam kev hais tias peb yog lawv tus yeeb ncuab.⁶

Lo lus haj yam tseem ceeb heev thaum hais txog kev npaj cov uas tuav lub pov thawj hwj thaum yuav tsum qhuab ntuas lawv. Lo lus ntawd qhia tias yus twb hlub tus neeg ntawd lawm. Ces yuav tsum haj yam “muab kev” hlub rau tus ntawd. Nej cov uas tab tom npaj lwm tus neeg los tuav lub pov thawj hwj yeej yuav pom lawv ua yuam kev me ntsis. Ua ntej nej qhuab ntuas lawv, lawv yuav tsum tau hnov nej txoj kev hlub dua tsis tu tsis tseg. Lawv yuav tsum tau hnov nej cov lus qhuas lawv ntau ntau ua ntej lawv yuav kam txais yuav nej cov lus qhuab ntuas.

Tus Tswv kiag pom tau hais tias cov uas tuav lub pov thawj hwj qis dua yeej muaj nuj nqi thiab Nws saib lawv rau nqi. Cia li mloog cov lus no, uas Yauhas tus uas Muab Neeg Ua Kev Cai Raus Dej tau hais thaum muab lub Pov Thawj Hwj Aloos txum tim rov qab los hais tias: Rau neb kuv ob tug kwv luag tub qhe, los ntawm Mexiyas lub npe, kuv muab lub Pov Thawj Hwj Aloos rau neb, uas tuav cov yuam sij ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum; thiab yuav tsis muab qhov no tshem tawm hauv lub ntiaj teb no mus dua ib zaug ntxiv, kom txog thaum Levis cov tub tiam dua ib qho kev tiam rau tus Tswv los ntawm kev ncaj ncees.⁷

Lub Pov Thawj Hwj Aloos yog ib qho txuas ntxiv rau lub siab dua uas yog lub Pov Thawj Hwj Mekixedes.⁸ Ua tus thawj tswj hwm rau tag nrho lub pov thawj hwj, tus Thawj Tswj Hwm rau lub Koom Txoos coj kav lub pov thawj hwj npaj siab no thiab. Tau ntau xyoo nws tej zaj xov hais txog txoj kev mus cawm tib neeg yeej haum txoj kev txib uas peb raug txib kom coj txoj moo zoo rau kev hloov siab lees txim thiab kev cai raus dej mus rau lwm tus lub neej.

Tej pawg dikas, xib hwb, thiab pov thawj ib sij sib sab laj seb yuav ua li cas coj tau txhua tus neeg hauv lawv pawg los cuag tus Tswv. Tej pawg thawj tswj hwm txib tej tus neeg ncav tes muaj kev ntseeg thiab kev hlub rau lawv. Cov dikas muaj kev tswm seeb thiab kev ntseeg thaum lawv yais lub cim nco txog xwv kom cov mej zeej yuav hnov tau Kev Theej Txhoj hauv lawv lub neej thiab pab lawv cog lus hais tias lawv yuav ceev cov lus txib thaum lawv tab tom noj.

Cov xib hwb thiab pov thawj nrog lawv tus khub thov Vajtswv thaum lawv ua li lawv raug txib kom mus saib xyuas lub Koom Txoos, ib leeg dhau ib leeg. Thiab tej khub ntawd thov Vajtswv ua ke thaum lawv kawm seb tej yim neeg ntawd xav tau dab tsi thiab cia siab rau yej yam twg. Thaum lawv ua li ntawd, lawv tab tom npaj rau hnub uas lawv los ua ib leej txiv, muaj kev ntseeg, hauv lawv tsev neeg thiab.

Kuv hais lus tim khawv tias tag nrho cov neeg uas ua hauj lwm ua ke hauv lub pov thawj hwj tab tom npaj tib neeg tos txais yuav tus Tswv uas yuav los rau Nws lub Koom Txoos. Vajtswv Leej Txiv muaj txoj sia nyob. Kuv paub—Kuv paub—tias Yexus yog tus Khetos thiab tias Nws hlub peb. Thawj Tswj Hwm Thomas S. Monson yog tus Tswv tus yaj saub uas muaj sia nyob. Kuv ua tim khawv li no los ntawm Yexus Khetos lub npe dawb ceev, amees.