2010–2019
Priesthood eo Ettāļo̧k
Oktoba 2014


Priesthood eo Ettāļo̧k

Ilo m̧aanjabpopo n̄an priesthood, “kōm̧m̧ane juon waanjon̄ak em̧m̧an ej aorōkļo̧k jān leļo̧k kōmeļeļe em̧m̧an.”

Ij m̧ōņōņō in kobatok ippāmi ippān priesthood eo an Anij, eo ej tōparļo̧k peļaakin laļ in. Ij kam̧m̧oolol kōn tōmak eo ami, jipan̄ eo ami, im jar ko ami.

Ennaan eo aō jotenin ej kōn Aaronic Priesthood. Ej n̄an kōj aolep ro rej jipan̄ ilo kalim̧m̧ur ko an Irooj bwe ren waļo̧k n̄an ro rej kabwijer ta eo ej mōj kōmeļeļeik ilo jeje ko rekwojarjar āinwōt “priesthood eo ettāļo̧k.”1Ņaetan barāinwōt ej priesthood in m̧aanjabpopo. En̄in ej bwe m̧aanjabpopo eo eaiboojoj eo inaaj kōnono kake jotenin.

Karōk eo an Irooj n̄an jerbal eo An eobrak kōn m̧aanjebpopo. Eaar kōpooj laļ in n̄an kōj n̄an jelm̧ae idajon̄jon̄ ko im iien ko rem̧m̧an an mour in. Tōre in jej pād ijin, jej pād ijo jeje ko rekwojarjar rej ņae etan juon “iien m̧aanjabpopo.”2

Rikanaan Alma eaar kōmeļeļeiki iien eo eaorōk kōn m̧aanjabpopo in n̄an mour indeeo, ijo jemaron̄ jokwe n̄an indeeo ilo baam̧le ko ippān Anij Jemād im Jisōs Kraist.

Eaar kōmeļeļeik aikuj eo n̄an m̧aanjabpopo ilo wāween in: “Im jej lo bwe mej ej itok ioon armej otemjeļo̧k, aaet, mej eo Amulek eaar kōnono kake, eo ej mej ilo kanniōk; mekarta ewōr jidik iien letok n̄an armej eo im emaron̄ ukweļo̧k; kōn menin mour in eaar erom juon iien melijon̄; juon iien n̄an maanjabpopo n̄an ioon Anij; juon iien maanjabpopo n̄an jekjek eo ejjeļo̧k jem̧ļo̧kin eo kōmar kōnono kake, eo ej ālkin jerkakpeje an ro re mej.”3

Āinwōt iien in kar letok n̄an kōj n̄an mour ilo laļ in n̄an m̧aanjabpopo n̄an iioon Anij, iien eo kar letok n̄an kōj n̄an jerbal ilo Aaronic Priesthood in ej juon iien em̧m̧an n̄an kōpooj kōj n̄an katak wāween leļo̧k jipan̄ n̄an ro jet. Āinwōt Irooj ej letok jipan̄ eo jej kajjitōk kake n̄an eļļāļo̧k jān mālijjon̄ ko an mour in kanniōk, Ej barāinwōt jilkintok n̄an kōj jipan̄ ilo priesthood in m̧aanjabpopo eo ad.

Ennaan eo aō ej n̄an ro Irooj ej jilkinļo̧k n̄an jipan̄ m̧aanjabpopo eļap āinwōt n̄an ro rej kabwijer Aaronic Priesthood. Ij kōnono n̄an baba ro. Ij kōnono n̄an bisop ro. Im ij kōnono n̄an jabdewōt Melkisedek Priesthood ro lōke er n̄an leiaia ippāer im likao ro rej rūkaki ilo priesthood in m̧aanjabpopo in.

Ij kōnono ilo nōbar im kam̧oolol n̄an elōn̄ iami peļaakin laļ in im iien in ak tokālik.

Inaaj maron̄ bōd n̄e iaar jab kōnono kōn juon branch būreejtōn im juon bisop ke iaar jodikdik. Iaar erom juon tikōn ke iaar 12 iiō ilo juon branch jidikdik ilo jikin ko iturear in United States. Branch eo ekar lukkuun in dik bwe ļaddik eo jeiū im n̄a kar rikabwijer Aaronic Priesthood ro wōt m̧ae iien jema, eo eaar branch būreejtōn, kar karuwaineneik juon em̧m̧aan n̄an kobatok ilo Kabun̄ in.

Rioktak eo ekāāl eaar bōk Aaronic Priesthood im, ippān, juon kūr n̄an oņaake Aaronic Priesthood eo. Ij keememej wōt āinwōt n̄e ekar inne, Imaron̄ keememej wūt ko raiboojoj ilo fall eo ke rioktak in eaar itok ippān ļeo jeiū im n̄a n̄an kōm̧m̧ane jet men ko n̄an juon kōrā ejako pāleen. Ij jab keememej ta jerbal eo, ak ij keememej en̄jake eo kajoor in priesthood in eaar koba ippān ilo kōm̧m̧ane ta eo tokālik iaar jeļā bwe Irooj eaar ba jej aikuj kōm̧m̧ane bwe jerawiwi ko ad ren jako im m̧aanjabpopo n̄an lo E.

Ilo aō relikļo̧k kiiō, ij en̄jake kam̧oolol kōn juon branch būreejtōn eo eaar kūr juon rikāāl n̄an jipan̄ Irooj kōpooj ruo ļaddik jidikdik ro renaaj oktak juon raan erom bisop n̄an kea kōn rijeramōļ ro im riaikuj ro im barāinwōt n̄an tōl ioon priesthood in m̧aanjabpopo eo.

Ikar juon tikōn wōt ke baam̧le eo aō eaar em̧m̧akūt tok n̄an juon ward ekilep ilo Utah. Ekar kein kajuon in aō en̄jake kajoor an likio in juon doulul in Aaronic Priesthood. Im tokālik ekar kein kajuon in aō en̄jake kajoor im kōjeram̧m̧an an juon bisop ej tōl ilo juon doulul an pris.

Bisop eo eaar kūr eō n̄an āinwōt rijipan̄ eo kein kajuon ilo doulul eo an pris ro. Ij keememej bwe eaar katakin doulul eo—boub āinwōt eaar im em̧m̧aan ro jet rejeļā ro emaron̄ kar kūr n̄an katakin kōj. Eaar karōk jea ko ilo kūlaaj ruum̧ eo ilo juon doulul. Eaar kajijet n̄a iturin ituanbwij maron̄in.

Imaron̄ kar reilo̧k ioon aeran ilo an katakin. Ekkā an reilaļļo̧k ilo naan in kakeememej ko ioon juon binder ioon neen im ilo jeje ko rekwojarjar an eaar kōppeļļo̧ki ioon ne eo juon. Ij keememej en̄jake eo ke eaar bar kwaļo̧k bwebwenato ko reperan ilo bok in Daniel im ilo naan in kam̧ool eo an kōn Rilo̧mo̧o̧r eo.

Inaaj aolep iien keememej ekōjkan an Irooj kūr ro m̧ōttad kar kāleti n̄an rikabwijer priesthood ro An ilo m̧aanjabpopo.

Bisop eo aō ekar wōr an rikakpilōklōk ro rekajoor, im kōn un ko iaar jab meļeļe tōre eo, elōn̄ ļo̧k jān juon iien eaar kūr n̄a ilo m̧weo im ba, “Hal, ij aikuji eok n̄an itok ippa āinwōt juon m̧ōtta n̄an kōm̧m̧ane jet loļo̧k ko.” Ke, ekar bōk eō ippān n̄an m̧weo imōn juon eo emej pāleen ej jokwe ippān make im ejjeļo̧k kijen m̧ōn̄ā. Ilo iaļ eo ļo̧k n̄an m̧weo eaar kōppeļļo̧k kaar eo waan, kōppeļļo̧ke jeje ko an rekwojarjar, im jiron̄ eō etke eaar kōm̧m̧an bwe kōrā eo emej pāleen eļan̄n̄e ekar wōr an kajoor in lale e make ak naaj, ilo jet iien tokālik, maron̄ jipan̄ ro jet.

Bar juon loļo̧k n̄an juon em̧m̧aan eo etto an jako jān Kabun̄ in. Bisop eo aō eaar karuwaineneik tok ippān Rikwojarjar ro. Iaar en̄jake iakwe eo an bisop eo aō n̄an juon eo āinwōt ekar juon rikōjdat ejjeļo̧k an iakwe im nana.

Ilo bar juon iien ke kōm̧ ar loļo̧k juon em̧ ijo ruo leddik jiddik kar jilkintok n̄an ioon kōm̧ ilo kōjam̧ eo jān rikadōkdōk ro jineer im jemāer. Leddik rein reddik raar ba ilo kōjem̧ ok eo bwe jineer im jemāer rekiki. Bisop eo eaar kōnono wōt n̄an er, ettōn̄ im nōbar em̧m̧an eo aer, n̄an n̄a ekar 10 minit ak aitokļo̧k. Ke iaar etal n̄an turājet in, eaar ba, “Ekar juon loļo̧k em̧m̧an. Leddik rein reddik rej jamin meļo̧kļo̧k ke jaar itok.”

Ruo iaan kōjeram̧m̧an ko an juon m̧ōtta eo erūtto ej priesthood emaron̄ kar letok rej lōke im juon waanjon̄ak in kea. Iaar loe bwe n̄e ļaddik eo nejū kar leļo̧k n̄an e juon m̧ōttan riloļo̧k m̧ōko eļapļo̧k an imminene jān e. Eo m̧ōttan erūtto em̧ōj an mijen būreejtōn ruo kōttan im eaar jerbal ilo jerbal in tōl ko jet.

M̧okta jān aer kar loļo̧k juon iaan baam̧le ko kar jitōn̄ er n̄ani, bwe priesthood ritōl ro retijemļo̧k kar kajjitōk n̄an lotok ļaddik eo nejūm̧ m̧okta. Raar kōtļo̧k aō ron̄jake. Eaar kōppeļļo̧k kōn jar, kajjitōk kōn jipan̄. Innām eaar ba juon men āinwōt in n̄an ļaddik eo nejū: “Ij ļōmņak jej aikuj katakin juon katak enaaj juon kūr n̄an ukweļo̧k n̄an baam̧le in. Ij ļōmņak renaaj bōk ennaan in em̧m̧anļo̧k jān eok jān n̄e renaaj ron̄jake eō. Ejet am en̄jake kōn menin?”

Ij keememej mijak eo ilo mejān ļaddik eo nejū. Ij maron̄ en̄jake lem̧ōņōņō eo ke ļaddik eo nejū eaar kile lōke eo.

Ekar jab jān jidilo̧k bwe bisop eo en leiaiaiki rein ippān doon. Ekar jān juon m̧aanjabpopo etiljek bwe m̧ōttā in erūtto eaar katak kōn en̄jake ko bwe baam̧le in raar iten katakin er. Ekar jān im̧we eo bwe eaar en̄jake bwe en jānliktak, n̄an lōke juon jodikdik ejaje n̄an kūr ajri ro nejin Anij n̄an ukweļo̧k im n̄an kōjparok.

Ijjab jeļā waļo̧k in loļo̧k eo aer, ak ijeļā bwe juon bisop, juon rikabwijer Melkisedek Priesthood eo, im Irooj kar kōpooj juon ļaddik n̄an erom juon em̧m̧an in priesthood eo im juon raan juon bisop make.

Kiiō, bwebwenato in tōprak kein ilo m̧aanjabpopo in priesthood rej jab kāāl n̄an kom̧ jān ta eo kom̧ kar loe im ta eo kom̧ kar en̄jake ilo mour ko ami make. Kom̧ jeļā im emōj ami bisop ro, kampanien ro, im ro jinen im jemān. Kom̧ kar loe pein Irooj ilo m̧aanjabpopo eo ami n̄an eddo ko an priesthood ko Ejeļā renaaj pād im̧aami.

Kōj aolep ilo priesthood eo ewōr juon ad eddo n̄an jipan̄ Irooj kōpooj ro jet. Ewōr jet men ko jemaron̄ kōm̧m̧ani ko relukkuun in menin aikuj. Aaet kajoorļo̧k jān kōjerbali naan in katakin ko ad, katak ko renaaj ad waanjon̄ak ko ilo mour kōn katak ko.

Aorōk eo ilo jerbal in jipan̄ in ad an priesthood eo ej karuwaineneiktok armej ro n̄an itok n̄an Kraist jān tōmak, ukweļo̧k, peptaij, im bōk Jetōb Kwojarjar. Būreejtōn Monson, ilo m̧ool, kar letok kwaļo̧k ko n̄an kōm̧akūt būruwōn aolep kōn katak kein. Ak ta eo ijeļā kōn ta eo eaar kōm̧m̧ane ippān armej im mijenede ro im ro m̧ōttad jān Kabun̄ in n̄e ej tōl ilo mijen ilo Toronto ej kalimotak eō n̄an m̧akūtkūt.

Ilo m̧aanjabpopo ilo priesthood, “kōm̧m̧ane juon waanjon̄ak em̧m̧an ej aorōkļo̧k jān leļo̧k kōmeļeļe em̧m̧an.”

En̄in ej unin an jeje ko rekwojarjar aorōk n̄an kōpooj kōj ilo priesthood eo. Robrak kōn waanjon̄ak ko. Ij en̄jake āinwōt n̄e imaron̄ loe Alma ej ļo̧o̧r kean̄ eo an enjeļ eo innām kaiūr ro̧o̧lļo̧k n̄an katakin armej ro renana ilo Ammonihah ro raar kōjekdo̧o̧n e.4Imaron̄ en̄jake m̧ōļo in jikin kalbuuj eo ke Rikanaan Joseph kar jiron̄ jān Anij n̄an peran im bwe e kar oņaanke.5Ippān eoon kein pijaik ilo kōlmenļo̧kjeņ, jemaron̄ kōppopo n̄an kijenmeji jerbal eo ad n̄e epen.

Juon baba ak juon bisop ak juon m̧ōttā erūtto ilo lo̧ļo̧k m̧ōko eo ej kwaļo̧k bwe e ej lōke juon rikabwijer priesthood edik emaron̄ ukōt mour eo an. Jema eaar kajjitikin jān juon membōr in Doulul eo an Jon̄oulruo n̄an jeje juon peba ekadu kōn science im kabun̄. Jema eaar juon scientist im juon rikabwijer priesthood etiljek. Ij keememej wōt iien eo eaar letok peba eo eaar je im ba, “En̄in, m̧okta jān aō jilkinļo̧k menin n̄an Jon̄oulruo eo, ikōņaan bwe kwon riiti. Kwonaaj jeļā eļan̄n̄e ejim̧we.” Eaar 32 iiō rūttoļo̧k jān n̄a, im jeļāļo̧k im māletlet ļo̧k jān n̄a.

Ij bōk wōt kōkajoorļo̧k jān lōke in jān juon baba im em̧m̧aan in priesthood em̧m̧an. Ijeļā bwe lōke in an ekar jab ilo n̄a ak bwe Anij emaron̄ im enaaj jiron̄ eō ta eo em̧ool. Kom̧ ro m̧ōttā rerūtto maron̄ kōjeram̧m̧an juon rikabwijer priesthood eo eddik ilo m̧aanjabpopo jabdewōt iien kwoj kwaļo̧k n̄an e kain lōke in. Enaaj jipan̄ e lōke en̄jake eo em̧m̧an an im̧we n̄an e make n̄e ej itok n̄e juon raan ej likūt pein ioon n̄an liāp e kōjeram̧m̧an eo n̄an kōmour juon ajri taktō ro rej ba enaaj mej. Lōke in eaar jipan̄ eō elōn̄ kōttan.

Tōprak eo ad ilo kōpooj ro jet ilo priesthood eo enaaj itok ilo m̧ōttan eo ilo wāween ad lukkuun iakwe er. Menin enaaj lukkuun m̧ool n̄e jej aikuj kajim̧we er. Kōlmenļo̧kjeņ kōn iien eo juon rikabwijer Aaronic Priesthood eo ej kōm̧m̧ane juon bōd ilo kōm̧m̧ane juon kain̄i. Menin ej juon bōd eļap. Jet iien bōd eo ejelet kajjim̧we ilo̧bwilej ippān juon illu, jook im bōlen kowaan.

Kwonaaj keememej kapilōk eo an Irooj: Jej aikuj kam̧ool ilo iien eo ekkar kōn peran n̄e jej em̧m̧akūt kōn Jetōb Kwojarjar, im kwaļo̧k juon ļapļo̧k in iakwe n̄an armej eo jaar kam̧ool kake, bwe jej jab naaj loe āinwōt juon rikōjdat.6

Naan eo ļapļo̧k ewōr meļeļein ilo kōpooj rikabwijer priesthood ro n̄e rej aikuj kajim̧we. Naan eo ej kwaļo̧k juon ļapļo̧k in juon iakwe bwe eaar pād kadede ijeņ. Ta menin aikuj eo eaikuj kwaļo̧k kōn ļapļo̧k in iakwe. Kom̧ ro rej kōpooj rikabwijer priesthood ro naaj loi aer kōm̧m̧an bōd ko. M̧okta jān aer bōk kajjim̧we, rej aikuj en̄jake iakwe m̧okta im pen. Raar aikuj en̄jake nōbar eo em̧m̧an m̧okta jān errā kōn kajim̧we eo am.

Irooj Make ej kabwijer ro jān priesthood eo ettāļo̧k kōn juon iakwe eo ej kautiej jibadbad eo aer em̧m̧an im aorōk eo aer n̄an E. Ron̄jake naan kein, kar konono jān Jon Ripeptaij ke Aaronic Priesthood eo eaar jepļaaktok: Jon Ripeptaij eaar likūt pein ioon Joseph Smith im Oliver Cowdery im kapit er, ba bwe ioer, rikarejar ro an, ilo etan Messaia ej leļo̧k ioer Priesthood eo an Aron, eo ej kabwijer priesthood ko an kwaļo̧k ko an enjeļ ro, im gospel in ukweļo̧k eo, im peptaij jān tulo̧k jān karreoik jerawiwi ko. Im ej jamin bar bōke jān laļ in, m̧ae iien ļaddik ro nejin Levi rej bar leļo̧k juon katok n̄an Irooj ilo wāppen.7

Aaronic Priesthood ej juon kakobaba n̄an eo ekilepļo̧k Melkisedek Priesthood.8Āinwōt būreejtōn eo an aolep priesthood, Būreejtōn eo an Kabun̄ in ej tōl ioon priesthood in m̧aanjabpopo eo barāinwōt. Ennaan ko An ium̧win elōn̄ iiō ko etal n̄an lo̧mo̧o̧ren kar jejjet n̄an bōke gospel in ukweļo̧k im peptaij in n̄an mour ko an ro jet.

Doulul ko an tikōn ro, rūkaki ro, im pris ro aolep iien rej kapilōk n̄an kepaakļo̧k aolep membōr an doulul eo n̄an Irooj. Būreejtōnji ko rej jitōn̄ membōr ro n̄an pukōtļo̧k ilo tōmak im iakwe. Tikōn ro rej ajeje kwojkwoj eo ilo kautiej im ippān tōmak bwe membōr ro renaaj en̄jake jelet in Pinmuur eo im pukōt mejļan n̄an kōjparok kien ko ilo aer bōk m̧ōttan kōkkaļļe kein rekwojarjar.

Rūkaki ro im pris ro rej jar ippān ro m̧ōttāer n̄an kakūrm̧ool eddo in n̄an oņaake Kabun̄ eo, juon armej ilo juon iien. Im m̧ōttā rein rej jar ippān doon ilo aer katak kōn aikuj ko im kōjatdikdik kōn jeban ko an baam̧le ko. Ilo aer kōm̧m̧ane, rej m̧aanjabpopo n̄an raan eo eļap n̄e renaaj tōl āinwōt juon baba, ilo tōmak, ilo juon baam̧le aer make.

Ij kam̧ool bwe aolep ro rej jerbal ippān doon ilo priesthood eo rej kōpooj juon armej n̄an itok eo an Irooj n̄an Kabun̄ eo An. Anij Jemed ej mour. Ijeļā bwe Jisōs Kraist is RiKraist eo im bwe Ej iakwe kōj. Būreejtōn Thomas S. Monson ej rikanaan eo emour an Irooj. Ij kam̧ool ilo etan Jisōs Kraist, amen.