2010–2019
Lub Cim Nco Txog—Kev Kho Peb lub Siab
October 2014


Lub Cim Nco Txog—Kev Kho Peb lub Siab

Tus Ntsuj Plig kho peb sab ntsuj plig kom zoo. Txoj koob hmoov uas Vajtswv cog lus tias peb yuav txais los ntawm lub cim nco txog yog qhov uas peb “yuav muaj nws tus Ntsuj Plig niaj hnub nrog [peb] nyob.”

Ib pawg ntxhais hluas nug kuv hais tias, “Kheev lam koj tau paub dab tsi thaum koj muaj hnub nyoog ib yam li peb?” Yog kuv teb lo lus nug ntawd tam sim no, kuv yuav hais li no hais tias: “Thaum kuv muaj hnub nyoog li nej kheev lam kuv to taub lub cim nco txog tseem ceeb npaum li cas. Kheev lam kuv to taub lub cim nco txog ib yam li Txwj Laug Jeffrey R. Holland piav. Nws hais tias, ‘Txoj kab ke txais lub cim nco txog caw peb kom txais kev txhawb zog rau peb sab ntsuj plig, koom siab nrog Vajtswv, thiab kho peb sab ntsuj plig.’1

Txhua lub lim tiam yuav ua li cas kom “txais kev txhawb zog rau peb sab ntsuj plig, koom siab nrog Vajtswv, thiab kho peb sab ntsuj plig” los ntawm lub cim nco txog?

Lub cim nco txog yuav txhawb nqa peb sab ntsuj plig thaum peb mloog ob zag foom koob hmoov rau lub cim nco txog thiab rov qab cog lus tias peb yuav ua raws li peb tej kev khi lus. Yog peb xav ua li no, peb yuav tsum txaus siab ris Yexus Khetos lub npe.2 Hais txog kev cog lus no, Thawj Tswj Hwm Henry B. Eyring qhia hais tias: “Qhov no txhais hais tias peb yuav tsum saib tias peb yog Nws li. Peb yuav saib Nws ua tus tseem ceeb tshaj hauv peb lub neej. Peb yuav xav tau qhov uas Nws xav tau ntau tshaj peb xav tau qhov uas neeg ntiaj teb qhia kom peb xav tau.”3

Thaum peb txais lub cim nco txog, peb kuj khi lus tias peb yuav “nco ntsoov”4 Yexus Khetos. Ib hmo ua ntej Nws raug ntsia saum ntoo khaub lig, Yexus Khetos hais kom Nws cov Thwj Tim sib sau ua ke thiab muab lub cim nco txog rau lawv. Nws tais mov mog, foom koob hmoov rau, thiab hais tias, ‘Cia li txais mus noj; qhov no yog kom nco txog kuv lub cev uas kuv muab txhiv nej.’5 Ces nws muab ib lub kho cawv txiv hmab, ua Vajtswv tsaug, muab rau Nws cov Thwj Tim haus, thiab hais tias, “Qhov no yog kom nco txog kuv cov ntshav … , uas tau nrog theej tag nrho cov uas yuav ntseeg kuv lub npe.”6

Nrog cov Neeg Nifais thiab thaum Nws muab Nws lub Koom Txoos txum tim rov qab los hauv lub caij nyog kawg no, Nws rov qab hais tias peb yuav tsum txais lub cim nco txog kom nco txog Nws.7

Thaum peb txais lub cim nco txog, peb cog lus rau Vajtswv tias peb yuav nco ntsoov Nws Leej Tub, tsis yog thaum peb ua txoj kab ke txais lub cim nco txog xwb. Qhov no txhais hais tias peb yuav saib ntsoov tus Cawm Seej tus yam ntxwv thiab tej lus qhia kom coj peb tej kev xav, tej yam uas pb xaiv thiab ua.8

Zaj foom koob hmoov rau lub cim nco txog qhia peb tias peb yuav tsum “ua raws li nws cov lus txib.”9

Yexus hais tias, “Yog nej hlub kuv tiag, nej yeej yuav mloog kuv lus.”10 Lub cim nco txog muab cib fim rau peb xav txog peb lub neej thiab tig peb lub siab thiab lub siab nyiam mus rau Vajtswv. Kev ua raws li cov lus txib ua rau peb lub neej txais tau lub hwj chim ntawm txoj moo zoo thiab ua rau peb haj yam nyob kaj siab lug.

Lub cim nco txog ua rau peb muaj sij hawm kom txhawb nqa peb sab ntsuj plig thaum peb xav txog tus Cawm Seej lub hwj chim uas txhiv peb dim thiab txhawb peb lub zog dhau los ntawm Nws txoj Kev Theej Txhoj. Ib tug thawj coj hauv Koom Haum Ntxhais Hluas tau kawm txog lub zog uas peb txais thaum peb ua tib zoo xav thaum peb txais lub cim nco txog. Nws ua hauj lwm kom ua raws li Personal Progress, nws cuab hom phiaj kom tsom ntsoov rau tej lus nyob hauv lub cim nco txog tej zaj nkauj thiab ob zaj thov Vajtswv.

Txhua lub lim tiam, nws ntsuam xyuas nws tus kheej thaum nws txais lub cim nco txog. Nws nco txog thaum nws ua yuam kev, thiab nws cog lus tias nws yuav ua neeg zoo dua thaum lub lim tiam tom ntej. Nws zoo siab ua Vajtswv tsaug vim nws muaj cib fim ua qhov yog thiab ua neeg huv. Thaum nws xav txog qhov no, nws hais tias, “Kuv twb ua raws li ib feem ntawm txoj Kev Theej Txhoj uas yog kev hloov siab lees txim.”

Muaj ib hnub Sunday tom qab nws ntsuam xyuas nws tus kheej, nws pib tu siab thiab xav phem txog nws tus kheej. Nws pom hais tias nws pheej ua yuam kev zoo ib yam, txhua lub lim tiam. Ces ua rau nws txais kev tshoov siab hais tias nws tsis nco qab txog ib feem ntawm txoj Kev Theej Txhoj uas tseem ceeb heev—Yexus Khetos lub hwj chim kom txhawb zog. Nws tsis nco qab txog tag nrho tej lub sij hawm thaum tus Cawm Seej pab nws ua li nws yuav tsum ua thiab ua hauj lwm pab lwm tus tshaj nws muaj zog ua.

Thaum nws xav txog qhov no, nws rov qab xav txog lub lim tiam tas los. Nws hais tias, “Muaj kev xyiv fab uas ua rau kuv txoj kev tu siab ploj mus thaum kuv xav txog qhov uas Nws muab tej lub cib fim thiab tej txuj ci ntau heev rau kuv. Kuv ua Vajtswv tsaug vim kuv twb paub txog kuv tus me nyuam tej kev xav tau thaum tsis muaj dab tsi qhia kuv li ntawd. Kuv nco txog ib hnub thaum kuv xav tias kuv ua tsis tau ib yam dab tsi ntxiv, kuv tseem hais tau lus kom txhawb nqa ib tug phooj ywg. Kuv twb ua siab ntev thaum kuv raug xwm txheej uas feem ntau ua rau kuv ua siab luv.”

Nws xaus lus hais tias, “Thaum kuv ua Vajtswv tsaug rau tus Cawm Seej lub hwj chim txhawb kuv lub zog hauv kuv lub neej, ua rau kuv xav zoo txog kuv txoj kev hloov siab lees txim thiab kuv cia siab rau lub lim tiam tom ntej.”

Txwj Laug Melvin J. Ballard qhia hais tias lub cim nco txog ua li cas kom kho peb zoo thiab ntxuav peb. Nws hais tias:

“Txhua leej txhua tus ua rau nws tus ntsuj plig mob thaum nws hais lus, xav los yog ua tej yam tsis zoo, ib Hnub Caiv dhau ib Hnub Caiv. Peb ua tej yam uas ua rau peb tu siab thiab peb xav txais kev zam txim. … Tus txheej txheem kom txais kev zam txim yog … kev hloov siab lees txim, mus xyuas cov uas peb ua txhaum rau thiab thov kom lawv zam txim rau peb ces rov qab mus rau ntawm lub rooj rau lub cim nco txog, es yog tias peb twb hloov siab lees txim tiag tiag thiab muaj siab xav ua zoo, ces peb yuav txais kev zam txim, thiab tus Ntsuj Plig yuav kho peb sab ntsuj plig. …

Txwj Laug Ballard hais tias, “Kuv ua tim khawv hais tias tus Ntsuj Plig ua rau peb sab ntsuj plig sov so, txij ntawm lub taub hau mus txog ko taw; ua rau yus paub tias twb kho yus tus ntsuj plig zoo lawm, thiab twb tshem lub nra mus. Tus uas tsim nyog thiab xav txais tej yam uas txhawb nqa nws sab ntsuj plig tiag tiag yuav txais kev nplij siab thiab kev zoo siab.”11

Yuav kho thiab txhawb lub zog ntawm peb sab ntsuj plig tsis yog vim mov mog thiab cov dej ua rau peb nco txog tus Cawm Seej txoj kev muab Nws nqaij daim tawv thiab cov ntshav txi xwb tiam sis kuj yog vim cov cim ua rau peb nco txog qhov uas Nws yeej yog peb “cov mov uas cawm neeg txoj sia”12 thiab “cov dej uas muaj txoj sia.”13

Tom qab Yexus muab lub cim nco txog rau cov Neeg Nifais, Yexus hais tias:

“Tus uas noj cov mov mog no noj kuv lub cev rau nws tus ntsuj plig; thiab tus uas haus cov cawv txiv hmab no haus kuv cov ntshav rau nws tus ntsuj plig; thiab nws tus ntsuj plig yuav tsis tshaib los sis nqhis ntxiv lawm, tiam sis tsuas muaj tsau npo xwb.

Nim no, thaum cov neeg coob coob tag nrho sawv daws tau noj thiab haus, saib seb, lawv tau muaj tus Ntsuj Plig puv npo.”14

Yexus hais tej lus no qhia peb hais tias tus Ntsuj Plig kho peb tus ntsuj plig tau. Txoj koob hmoov uas Vajtswv cog lus tias peb yuav txais los ntawm lub cim nco txog yog qhov uas peb “yuav muaj nws tus Ntsuj Plig niaj hnub nrog [peb] nyob.”15

Thaum kuv txais lub cim nco txog, ua rau kuv xav txog ib daim duab ntawm tus Cawm Seej uas Sawv Rov Los es Nws ncav tes, zoo li Nws npaj khawm peb. Kuv nyiam daim duab no. Thaum kuv xav txog daim duab no thaum kuv txais lub cim nco txog, kuv zoo siab kawg zoo li kuv hnov tau tus Cawm Seej tej lus: “Saib seb, kuv, txhais caj npab hlub tshua twb muab cev tuaj rau nej, thiab leej twg uas yuav los, kuv, yuav txais tus ntawd, thiab cov, uas los cuag kuv [yuav] tau koob hmoov.”16

Cov uas tuav lub Pov Thawj Hwj Aloos sawv tus Cawm Seev cev thaum lawv npaj, foom koob hmoov, thiab muab lub cim nco txog rau peb. Thaum ib tug uas tuav lub pov thawj hwj ncav tes muab tej cim dawb ceev rau peb, zoo li tus Cawm Seej ncav tes muab Nws txoj kev hlub tshua rau peb, thiab caw peb txhua tus txais tej txiaj ntsim ntawm txoj kev hlub uas los ntawm Nws txoj kev theej txhoj—tej txiaj ntsim uas yog kev hloov siab lees txim, kev zam txim, kev nplij siab, thiab kev cia siab.17

Peb yim xav txog qhov uas lub cim nco txog tseem ceeb npaum li cas, peb yim saib lub cim nco txog dawb huv thiab tseem ceeb rau peb. Qhov no yog qhov uas ib leej txiv uas muaj 96 xyoo teb thaum nws tus tub nug hais tias, “Txiv es, vim li cas koj ho mus koom lub koom txoos? Koj twb tsis pom kev, hnov tsis tau lus, nyuaj rau koj taug kev. Vim li cas koj mus koom lub koom txoos?” Leej txiv teb hais tias, “Yog vim lub cim nco txog. Kuv mus kom txais lub cim nco txog.”

Thov kom peb txhua tus yuav tuaj rau kev sib ntsib txais lub cim nco txog thiaj yuav txais “kev txhawb zog rau peb sab ntsuj plig, kev koom siab nrog Vajtswv, thiab kev kho [peb] sab ntsuj plig kom zoo.”18

Kuv paub tias peb Leej Txiv Saum Ntuj Ceeb Tsheej thiab peb tus Cawm Seej muaj txoj sia nyob. Kuv zoo siab rau lub cib fim kom paub Nkawd txoj kev hlub thiab muaj tus Ntsuj Plig uas los ntawm kev txais lub cim nco txog. Los ntawm Yexus Khetos lub npe, amees.