Kwojkwoj eo―juon Kōkāāl n̄an ad Jetōb

Juon kumi in jiron̄ ro raar kajjitōk ippa, “Ta eo kwoj lōmņak kwon kar jeļā kake ke kwar dedjab ke am?” Eļan̄n̄e in kar uwaake kajjitōk ņe kiiō, in kar likūt kōļmenļo̧kjeņ in: “Ij katmene n̄e in kar dedjab kane ami en kar em̧m̧an ļo̧k aō meļeļe kōn aorōk eo an kwojkwoj jen kar m̧okta. Ij katmene n̄e in kar meļeļe kwojkwoj eo ilo wāween eo Elder Jeffrey R. Holland eaar kōmeļeļeiki. Eaar ba, ‘juon iaan naan in karuwainene ko ilo m̧ottan kain̄i eo an kwojkwoj ej bwe kwojkwoj eo ej lukkuun juon en̄jake em̧m̧an, juon iien ekwojarjar, juon kōkāāl n̄an jetōb eo ad.’¹”

Ekōjkan an kwojkwoj eo maron̄ “juon en̄jake in jetōb em̧m̧an, juon iien ekwojarjar, juon kōkāāl n̄an jetōb eo ad” kajjojo wiik?

Kwojkwoj eo ej erom̧ juon jetōbin kōkajoor n̄e jej ron̄jake jar in kwojkwoj eo im bar kōkāāl bujen ko ad. N̄an kōm̧m̧ane menin, jej aikuj in bōk iood etan Jisōs Kraist.²Kōnono kōn kallim̧ur in, Būreejtōn Henry B. Eyring eaar katakin: “Meļeļein bwe jeaikuj ļōmņak kōn kōj make āinwōt An. Jenaaj likūt E m̧oktata ilo mour ko ad. Jenaaj kōņaan ta eo Ej kōņaan ijjelo̧kin ta eo jej kōņaan ak ta eo laļ in ej katakin kōj bwe jen kōņaan.”³

N̄e jej bōk kwojkwoj eo, jej barāinwōt kallim̧ur n̄an “kememej aolep iien”⁴ Jisōs Kraist. Bon̄en eo m̧okta jen An debweel, Kraist eaar kobaik Rijilōk ro An Ipeļaakin im kar kōjeram̧m̧an kwojkwoj eo. Eaar ruje pilawā eo, kōjeram̧m̧an e, im ba, “Kom̧win bōke im m̧ōn̄ā; en̄in ānbwinnū.”⁵ Tok ālik eaar bōk kab, im jar, im leļo̧k n̄an Rijilōk ro An, im ba, Men in daō da in kallim̧ur, eo e to̧o̧r ļo̧k kōn elōn̄ n̄an juurļo̧k jero̧wiwi ko.” ⁶

Ilubwiljin ri Nipai ro im bar juon alen ilo Jepļaaktok in Kabun̄ eo an ilo raan kein āliktata, Eaar bar āliji bwe jen bōk kwojkwoj eo n̄an kememej E.⁷

Ilo ad bōk kwojkwoj eo, jej kam̧ool n̄an Anij bwe jenaaj kememej Nejin iien otemjej, ejjab wōt ilo iien kwojkwoj eo. Meļeļein bwe jenaaj lukkuun mije waanjon̄ok eo an Rilo̧mo̧o̧r im katak ko n̄an tōl kōļmenļo̧kjeņ ko ad, kālet ko ad, im m̧akūtkūt ko ad.⁸

Jar in kwojkwoj eo ebarāinwōt kakeememej kōj bwe jej aikuj kōjparok kien ko an.⁹

Jisōs eaar ba, “Elan̄n̄e Kwom̧ij yokwe eō, kōjparok kien ko aō.”¹⁰ Kwojkwoj eo ej letok n̄an kōj juon iien em̧m̧an n̄an etale ļōmņak im en̄jake ko ad make im juon iien em̧m̧an n̄an ukōt būruwōd im kōņaan ko ad n̄an Anij. Pokake n̄an kien ko ebōk tok kajoor in ko̧jpeļ eo n̄an mour ko ad im eļapļo̧k aenōm̧m̧an im jetōb.

Kwojkwoj eo ej letok juon iien n̄an en̄jake jetōb ilo ad kōļmenļo̧kjeņ kōn pinmuur eo an Rilo̧mo̧o̧r im kajoor eo kōn Pinmuur eo An. Juon ritōl an Doulul eo an Jiron̄ ro ej kab jeļā kōn kajoor eo jej bōke ilo ad kajjieon̄ in lukkuun bōk m̧ōttan kwojkwoj eo. Jerbal n̄an kadedeļo̧k jet men ilo Personal Progress eo, liin eaar kōm̧m̧ane juon kōttōpar n̄an mije naan ko ilo al ko im jar ko an kwojkwoj eo.

Kajjojo wiik, liin ej etale e make ilo iien kwojkwoj eo. Liin eaar keememej bōd ko eaar kōm̧m̧ani, im eaar kallim̧ur n̄an em̧m̧an ļo̧k ilo wiik eo juon. Liin eaar m̧ōņōņō bwe eaar kōm̧m̧ani men ko rejim̧we rerreeo. Lōmņak kōn en̄jake in, liin eaar ba, “Iaar dipļo̧k m̧ōttan eo an ukwelo̧k ilo Pinmuur eo.”

Juon Jabōt ālkin etal e make, liin eaar jino en̄jake burom̧ōj im inepata. Liin eaar lo bwe eaar kōm̧m̧ani ejja bōd ko wōt, iien n̄an iien, kajjojo wiik. Innām eaar wōr juon an liin en̄jake bwe ekar kōjekdo̧o̧n m̧ōttan eo eļap ilo Pinmuur eo―ekajoor an Kraist. Liin eaar meļo̧kļo̧k aolep tōre ko Rilo̧mo̧o̧r eaar jipan̄ e wōn eo ekōņaan bwe en āinwōt im jerbal eļapļo̧k jān jon̄an maron̄ eo an.

Kōn kōļmenļo̧kjeņ in, eaar bar ļōmņak kōn wiik ko m̧okta ļo̧k. Liin eaar ba: “Juon lan̄lōn̄ eo ettā kōn aō burom̧ōj ke iaar jeļā bwe Eaar letok n̄an eō elōn̄ iien ko rem̧m̧an im maron̄ ko. Iaar kile kōn kam̧m̧oolol kōn maron̄ eo aō n̄an kakke aikuj eo an eo nejū me eaar jab alikkar. Iaar kile raan eo ke iaar en̄jake aō jab maron̄ kadedeļo̧k juon men, iaar maron̄ in leļo̧k naan in kalōk n̄an eo m̧ōtta. Iaar kwaļo̧k kijenmej ilo juon wāween ej kwaļo̧k oktak eo jān n̄a.”

Eaar kadedeļo̧k: “Ke iaar kam̧m̧oolol Anij kōn kajoor eo an Rilo̧mo̧o̧r ilo mour eo aō, iaar en̄jake eļap kajoor n̄an ukwelo̧k ilo aō kar jerbale iaar reim̧aan ļo̧k n̄an wiik eo juon kōn kōjatdikdik eo ekāāl.”

Elder Melvin J. Ballard eaar kwaļo̧k kōn wāween an kwojkwoj eo maron̄ kemour im karreoik en̄jake ko. Eaar ba:

“Wōn ilubwiljid me ejjab ikinejnej kōn jetōb eo an ilo naan, lōmņak, ak kōm̧m̧an, jān Jabōt n̄an Jabōt? Jej kōm̧m̧ani men ko me jej burom̧ōj kaki im kōņaan jeo̧rļo̧k bōd kaki. … Jekjek eo n̄an bōk jeo̧rļo̧k bōd ej … ukwelo̧k jān jerawiwi ko ad, jibadōkļo̧k ro jaar bōd ņae im bōk aer jeo̧rļo̧k bōd innām jepļaak n̄an tabōļ in kwojkwoj eo ijo, eļan̄n̄e jaar lukkuun ukwelo̧k im likūt kōj make ilo jekjek eo ekkar, jenaaj bōk jeo̧rļo̧k bōd, im jetōbin kemour enaaj itok n̄an jetōb ko ad.  …

“Ij juon rikam̧ool,” Elder Ballard eaar ba, “bwe ewōr juon jetōb ej pād ilo iien kōjeram̧m̧an kwojkwoj eo me ekam̧weer ad jetōb jen bōrad n̄an need; kwoj en̄jake kinej ko jen an jetōb kōmouri, eddodo eo ej kotake. Aenōm̧m̧an im m̧ōņōņō ej itok n̄an jetōb bwe ej erreeo im ikideleel eo em̧ool n̄an bōk m̧ōttan m̧ōn̄ā ekwojarjar.”¹¹

Kinjen jetōb ko ad remaron̄ in bar mour im kāāl ejjab kōnke pilawā eo im dān eo rej kakememej kōj kōn en̄taan in Kanniōkin im bōtōktōkin Rilo̧mo̧o̧r ak kōnke ej kakememej kōj barāinwōt bwe Enaaj aolep iien ad “ bread in mour”¹²im “dānin mour.”¹³

Ālkin kōjeram̧m̧an kwojkwoj eo n̄an riNipai ro, Jisōs eaar ba:

“E eo ej m̧ōn̄ā pilawā in ej m̧ōn̄ā jān ānbwinū n̄an an, im e eo ej idaak wain in ej idaak bōtōktōkū n̄an an. Im an enaaj jamin kwōle ak maro, a naaj obrak.

“Kiiō, ke jarlepju eo eaar aolep m̧ōn̄ā im kar idaak, lo, raar obrak kōn Jetōb.”¹⁴

Kōn naan kein, Kraist eaar katakin kōj bwe Jetōb ej kōmour im kōkāāl jetōb ko ad. Kōjeram̧m̧an eo kallim̧ur kake kōn kwojkwoj ej bwe jenaaj “aolep iien bōk Jetōb eo An [ippād].”¹⁵

N̄e ij bōk kwojkwoj eo, jet iien ij pijaik ilo kōļmenļo̧kjeņ eo aō juon pijain jerkakpeje eo an Rilo̧mo̧o̧r ilo an Pein eaar erļo̧k, āinwōt n̄e Ej pojak in bōk kōj n̄an iakwe eo An ejjeļo̧k jem̧ļo̧kin. Ij iakwe pija in. N̄e ij kōļmenļo̧kjeņ kake ilo iien kōjeram̧m̧an kwojkwoj eo, jetōb eo aō ej em̧akūt ilo aō maron̄ ron̄jake naan ko an Rilo̧mo̧o̧r: “Lo, pein tiriam̧o eo Aō ej erļo̧k waj n̄an kom̧, im jabdewōt eo enaaj itok, e Inaaj bōk, im em̧ōņōņō ro rej itok n̄an Eō.” ¹⁶

Rikabwijer Priesthood ro an Aron rej pinej jenkwan Rilo̧mo̧o̧r n̄e rej kōpooje, kōjeram̧m̧ane, im leto-letak kwojkwoj eo. Ilo an juon rikabwijer priesthood erļo̧k e pein n̄an letok kwojkwoj eo ekwojarjar ej āinwōt n̄e Rilo̧mo̧o̧r Make en kar erļo̧k e Pein tiriam̧o eo An, kūr kōj kajjojo n̄an bōk m̧ōttan menin letok eo ekwojarjar an iakwe eo ej waļo̧k ilo pinmuur eo An eļap―menin letok ko an ukwelo̧k, jeo̧rļo̧k bōd, kaenōm̧m̧an, im kōjatdikdik.¹⁷

Toon wōt ad kōļmenļo̧kjeņ kake aorōk eo an kwojkwoj, naaj toon wōt an kwojarjar im alikkar itok n̄an kōj. En̄in ej ta eo juon jemen 96 an iiō ej kwaļo̧k n̄e juon nejin ļaddik ej kajjitōk, “Baba, etke kwoj etal n̄an jar? Koban lo̧ļo̧kjeņ, koban ron̄ļo̧kjeņ, epen am etetal. Etke kwoj etal n̄an jar?” Baba eo eaar uwaak, “kōn kwojkwoj eo. Ij etal n̄an bōk m̧ōttan kwojkwoj eo.”

Ij kōjatdikdik bwe kajjojo iaad renaaj pojak in itok n̄an kweilo̧k in kwojkwoj eo n̄an bōk “juon en̄jake em̧m̧an, juon iien ekwojarjar, kōkāāl n̄an jetōb eo ad.”¹⁸

Ijeļā bwe Jemedwōj Ilan̄ im ad Rilo̧mo̧o̧r rej mour. Ij m̧ōņōņō kōn iien eo em̧m̧an me kwojkwoj ej letok n̄an en̄jake iakwe eo Aer im n̄an bōk m̧ōttan Jetōb eo. Ilo etan Jisōs Kraist, amen.