2010–2019
Lub Cim Nco Txog thiab txoj Kev Theej Txhoj
October 2014


Lub Cim Nco Txog thiab txoj Kev Theej Txhoj

Peb txhua tus yuav tsum saib txoj kab ke txais lub cim nco txog dawb huv ntxiv.

Hmo uas Nws yuav raug mob hauv Khexemanes, Yexus nyob nrog Nws cov Thwj Tim ua ke ib zaug ntxiv teev tiam Vajtswv. Yog ib chav nyob txheej saud hauv ib tug thwj tim lub tsev hauv Yeluxalees, thiab twb txog lub caij ua Kev Cai Hla Dhau.1

Lawv pib noj pluas mov ntawm Kev Cai Hla Dhau, lawv txi ib tug yaj, haus cawv txiv hmab, thiab noj ncuav uas tsis xyaw keeb, yog tej lub cim txog Ixayees txoj kev dim kev ua qhev thiab kev tuag2 thiab lub cim txog kev txhiv dim uas lawv tseem tsis tau txais.3 Thaum lawv noj mov tas, Yexus foom koob hmoov rau lub ncuav ces muab ntais4 cev rau Nws cov Thwj Tim hais tias, “Nej cia li txais mus noj.”5 “Nov yog kuv lub cev uas kuv muab rau nej: Nej ua li no nej thiaj yuav nco ntsoov kuv.”6 Nws txawm muab ib lub khob cawv txiv hmab los ua ib yam li ntawd, thiab nws ua Vajtswv tsaug thiab muab rau cov neeg nrog nws nyob ntawd, thiab hais tias: “Lub khob cawv txiv hmab no [ua tim khawv tshiab txog kuv cov ntshav],”7 “[uas] yuav ntws los ntxuav ntau leej tej kev txhaum huv tib si mus.”8 “Nej ua li no [kom nej] yuav nco ntsoov kuv.”9

Yexus tau siv tus txheej txheem no kom txhim tsa ib txoj kab ke tshiab rau Vajtswv cov neeg khi lus. Lawv tsis ua rau cov tsiaj cov ntshav nrog thiab tsis siv cov nqaij tsiaj ntxiv kom nco txog Khetos txoj kev txi uas yuav muaj los yav tom ntej.10 Tiam sis, lawv yuav noj thiab haus lub cim txog cov nqaij thiab ntshav ntawm tus Khetos uas twb los lawm kom nco txog Nws txoj kev txhiv dim.11 Cov uas ua txoj kab ke tshiab no yuav qhia tias lawv lees txais Yexus ua tus Khetos thiab lawv txaus siab tag nrho coj raws li Nws thiab ua raws li Nws cov lus txib. Rau cov uas ua lub cim no thiab coj lawv lub neej zoo, kev tuag ntawm sab ntsuj plig yuav “hla dhau” thiab lawv yuav muaj txoj sia nyob mus ib txhis.

Txij thaum ntawd mus txog ob peb hnub tom qab, Yexus tau mus rau hauv Khexemanes, raug coj mus rau Calvary, thiab tawm tus Neeg Alimatas lub ntxa los. Tom qab Nws ncaim lawv, Yexus cov thwj tim nyob hauv thiab nyob ib puag ncig Yeluxalees tau los ua ke thaum thawj hnub ntawm lub lim tiam kom “tais mov mog”12 thiab lawv “rau siab ntso” ua li no.13 Lawv tsis tau ua li no kom nco txog lawv tus Tswv xwb tiam sis lawv kuj ua Nws tsaug thiab qhia tias lawv ntseeg Nws txoj Kev Txhiv Dim.

Thaum Yexus los xyuas Nws cov thwj tim nyob hauv Amelikas, Nws kuj txhim tsa lub cim nco txog thiab.14 Thaum nws ua li ntawd, Nws hais tias: “Nej yuav tsum nco ntsoov coj ua li no”15 thiab “[qhov no] yuav ua ib qho tim khawv rau Leej Txiv tias nej yeej nco ntsoov txog kuv.”16 Ces thaum Nws muab txoj moo zoo Txum Tim Rov Qab Los, tus Tswv txhim tsa txoj kab ke lub cim nco txog, thiab qhia peb ua ib yam li Nws tau qhia Nws cov thwj tim thaum ub.17

Txoj kab ke txais lub cim nco txog yog “ib txoj kab ke dawb huv tshaj nyob hauv lub Koom Txoos.”18 Peb yuav tsum saib txoj kab ke no dawb huv tshaj peb xav tam sim no. Yexus Khetos twb txhim tsa txoj kab ke no kom peb nco txog Nws txoj kev txhiv dim thiab qhia peb tias peb yuav tsum siv Nws txoj Kev Theej Txhoj li cas kom rov qab mus nyob nrog Vajtswv.

Peb noj mov mog uas tau muab ntais, kom qhia tias peb nco txog Yexus Khetos lub cev nqaij daim tawv—ib lub cev uas raug mob, raug txom nyem, thiab nyiaj kev ntxias txhua yam,19 ib lub cev uas raug kev nyuaj siab kawg nkaus kom nws txhua lub qhov hws los ntshav,20 nws lub cev nqaij ntuag thiab nws lub siab ntais rhe thaum nws raug ntsia saum ntoo khaub lig.21 Peb qhia tias peb ntseeg tias txawm lawv muab nws lub cev tso hauv lub ntxa thaum nws tuag, nws twb sawv rov los, thiab yuav tsis muaj kab mob, kev lwj, los yog kev tuag ntxiv.22 Thiab thaum peb noj cov mov mog, peb lees hais tias, ib yam li Yexus Khetos lub cev nqaij daim tawv, peb tej cev yuav daws tej hlua ntawm kev tuag, yuav sawv ntawm lub ntxa rov los thiab txum tim rov qab los nrog peb sab ntsuj plig uas nyob mus ib txhis.23

Peb haus ib lub khob dej, peb qhia hais tias peb nco ntsoov Yexus cov ntshav uas nrog thiab kev txom nyem ntawm sab ntsuj plig uas Nws raug kom theej txhua tus neeg. Peb nco txog qhov mob uas ua rau Nws los ntshav nyob hauv Khexemane.24 Peb nco txog qhov uas cov neeg txhom Nws muab nws ntaus thiab nplawm.25 Peb nco txog cov ntshav uas nrog los ntawm Nws txhais tes, txhais taw, thiab sab tav thaum nyob saum lub toj Calvary.26 Thiab peb nco qab Nws hais li cas txog Nws txoj kev txom nyem hais tias mob npaum li cas los peb tsis paub, heev npaum li cas los peb tsis paub, thiab, nyuaj ris npaum li cas los peb tsis paub.27 Thaum peb haus dej, peb lees hais tias Nws cov ntshav thiab txoj kev raug txom nyem twb theej peb lub txhoj thiab Nws yuav zam txim rau peb tej kev txhaum thaum peb ua raws li cov ntsiab cai thiab cov kab ke ntawm Nws txoj moo zoo.

Yog li ntawd, nrog cov mov mog thiab cov dej, peb nco txog Yexus Khetos txoj kev txhiv peb dim ntawm kev tuag thiab kev txhaum. Qhov uas peb noj cov mov mog ua ntej thiab haus cov dej tom qab yeej tseem ceeb. Thaum peb noj cov mov mog, ua rau peb nco txog qhov uas peb yuav sawv rov los, uas tsis yog qhov uas peb lub cev thiab tus ntsuj plig yuav rov qab los koom ua ke xwb. Los ntawm lub hwj chim ntawm Kev Sawv Rov Los, peb txhua tus yuav rov qab mus nyob ntawm Vajtswv lub xub ntiag.28 Qhov uas yuav muaj li no ua rau peb xav nug ib qho tseem ceeb txog peb lub neej. Qhov tseem ceeb uas peb txhua tus xav paub tsis yog seb peb puas muaj txoj sia tom qab peb tuag tiam sis yog qhov uas peb yuav nyob nrog leej twg tom qab peb tuag. Txawm peb txhua tus yuav rov qab mus cuag Vajtswv, tsis yog peb txhua tus yuav nrog Nws nyob tas mus li.

Nyob hauv lub neej no, peb txhua tus ua txhaum.29 Peb twb xav, hais lus, thiab ua tej yam uas tsis tsim nyog.30 Peb thiaj yog neeg tsis huv. Thiab hais txog tej yam tsis huv nyob ntawm Vajtswv lub xub ntiag, Yexus piav meej hais tias: Tsis muaj ib yam tsis dawb huv uas nyob tau ntawm nws lub xub ntiag.31 Amas tus Hluas paub qhov no muaj tseeb thaum ib tug tim tswv hais lus rau nws es qhov uas nws tsis dawb huv ua rau nws raug nyuaj siab ntxhov plawv heev nws xav tias kheev lam ua rau nws tus ntsuj plig thiab lub cev ploj mus, xwv kom tsis txhob coj nws mus sawv nyob ntawm Vajtswv xub ntiag.32

Thaum peb haus dej ntawm lub cim nco txog, peb kawm hais tias peb yuav tsum ua li cas kom tsis muaj kev txhaum thiaj muaj cuab kav sawv ntawm Vajtswv lub xub ntiag. Thaum Nws cia Nws cov ntshav nrog uas tsis muaj txim, Yexus Khetos them tus nqi ntawm kev txim lij rau txhua qhov kev txhaum. Ces nws qhia tias nws yuav ntxuav peb huv yog tias peb muaj kev ntseeg txaus kom peb hloov siab lees txim; lees txais tag nrho cov kab ke thiab kev khi lus ntawm txoj kev cawm seej, tsis hais ua kev cai raus dej; thiab txais tus Vaj Ntsuj Plig Dawb Huv. Thaum peb txais tus Vaj Ntsuj Plig Dawb Huv, peb twb yog neeg huv lawm. Yexus qhia li no:

“Thiab tsis muaj ib yam tsis dawb huv yuav muaj peev xwm nkag tau mus rau hauv [Vajtswv] lub nceeg vaj; … tsis muaj ib yam dab tsi nkag tau mus rau hauv nws qhov chaw so tsuas yog cov uas tau ntxuav lawv tej ris tsho nyob hauv kuv cov ntshav. …

“Nim no qhov no yog txoj lus txib: Cia li hloov siab lees txim, nej sawv daws tag nrho hauv qab ntuj kawg, thiab los cuag kuv thiab ua kev cai raus dej nyob ntawm kuv lub npe, xwv kom nej yuav … dawb huv vim nej txais tus Vaj Ntsuj Plig Dawb Huv, xwv kom nej yuav sawv tsis muaj qhov ceb rau ntawm kuv xub ntiag nyob rau hnub kawg.”33

Nov yog Yexus Khetos cov lus qhuab qhia.34 Thaum peb txais cov lus qhuab qhia no thiab ua neej raws li cov lus no, ces Yexus Khetos cov ntshav ntxuav peb kom peb ua neeg huv.35

Los ntawm ob zaj foom koob hmoov rau lub cim nco txog, peb qhia tias peb lees txais Yexus Khetos cov lus qhuab qhia thiab peb cog lus tias peb yuav ua raws li Yexus cov lus qhuab qhia. Thaum peb thov Vajtswv peb Leej Txiv Nyob Mus Ib Txhis, peb hais tias peb yuav “nco txog” Nws Leej Tub. Ua ntej, peb hais tias peb “txaus siab” nco txog. Ces peb hais tias peb “yuav” nco txog. Thaum peb ua li no, peb cog lus tiag tiag hais tias peb yuav muab siab rau ntseeg Yexus Khetos thiab Nws txoj Kev Txhiv peb Dim ntawm kev tuag thiab kev txhaum.

Peb kuj hais tias peb yuav “ua raws li nws cov lus txib.” Peb cog lus hais tias peb yuav hloov siab lees txim. Yog tias thaum yav tas los peb tau xav, hais lus, los sis ua tej yam tsis tsim nyog, peb rov qab cog lus tias peb yuav coj peb lub neej zoo li Nws thaum yav tom ntej.

Thiab peb hais tias peb “txaus siab txais [Nws] Leej Tub lub npe.”36 Peb cog lus tias peb yuav ua raws li Nws xav thiab ua Nws txoj hauj lwm, tsis hais kev txais txhua txoj kab ke thiab kev khi lus uas cawm peb txoj sia.37

Thaum peb cog lus tias peb yuav ua raws li tej ntsiab cai no, nyob hauv ob zaj foom koob hmoov rau lub cim nco txog tus Tswv cog lus tias peb yuav “muaj nws tus Ntsuj Plig niaj hnub nrog [peb] nyob.”38 Kev rov qab txais tus Ntsuj Plig yog ib txoj koob hmoov zoo kawg vim tus Ntsuj Plig yog tus uas ua rau peb dawb huv kom tsis muaj kev txhaum.39

Cov kwv tij thiab cov muam, lub sij hawm tseem ceeb tshaj plaws nyob hauv lub neej no thiab nyob mus ib txhis yog Yexus Khetos txoj Kev Theej Txhoj. Tus uas Theej peb lub Txhoj tau muab txoj kab ke txais lub cim nco txog rau peb kom peb nco ntsoov thiab txais tag nrho cov koob hmoov uas los ntawm Nws txoj kev tshav ntuj. Thaum peb mob siab txais txoj kab ke dawb huv no ces qhov no pab peb ua raws li Yexus Khetos cov lus qhuab qhia tom qab peb ua kev cai raus dej thiaj li rais los ua neeg dawb huv. Muaj tseeb tiag, txoj kab ke txais lub cim nco txog pab peb rau siab nyiaj mus kom txog thaum kawg thiab txais tag nrho tej uas Leej Txiv muaj ib yam li Yexus tau ua, txais kev tshav ntuj ntxiv rau kev tshav ntuj.40

Kuv ua tim khawv txog Yexus Khetos lub hwj chim uas txhiv peb dim ntawm kev tuag thiab kev txhaum thiab ua tim khawv txog lub hwj chim ntawm cov kab ke ntawm Nws lub pov thawj hwj, tsis hais lub cim nco txog, uas npaj peb pom Vajtswv lub ntsej muag thiab muaj txoj sia.41 Thov kom peb yuav txais lub cim nco txog lub lim tiam tom ntej, thiab txhua lub lim tiam tom qab ntawd, nrog kev mob siab thiab lub siab xav tau tiag tiag, kuv thov los ntawm tus Tswv Yexus Khetos lub npe, amees.