O Le Faamanatuga ma le Togiola

I le tauafiafi o Ketesemane ma Kalevario, na faapotopoto faatasi ai e Iesu Ana Aposetolo mo le taimi mulimuli e tapuai. O le nofoaga o le afeafe pitoaluga o se maota o se soo i Ierusalema, ma o le vaitau o le Paseka.¹

A o lei oo mai ia i latou sa faia ai le tausamaaga masani o le Paseka, lea sa i ai le mamoe e osi ai le taulaga, uaina, ma le areto le faafefeteina, o faatusa ia o le faaolataga o Isaraelu ua tuanai mai le pologa ma le oti² ma o se togiola i le lumanai e le i iloaina.³ Ina ua faaiuiu le tausamaaga, sa ave e Iesu le areto, faamanuia ma tofitofi,⁴ ma tuu atu i Ana Aposetolo, ma fetalai atu, “Ina tago ia, ina aai.”⁵ “O lo’u tino lenei, ua foaiina atu mo outou; tou te faia le mea nei e fai ma faamanatuga ia te au.”⁶ I se tulaga lava e tasi, na Ia ave le ipu uaina, ma faamanuia i ai, ma tuu atu ia i latou na vagaia o Ia, ma fetalai atu: “O lenei ipu o le feagaiga fou lea i lo’u toto,”⁷ “ua faamaligiina … e faamagalo ai agasala.”⁸ “Tou te faia le mea nei e fai ma faamanatuga ia te au.”⁹

I lenei tulaga faatauvaa ae matua loloto lava, sa faavaeina ai e Iesu se sauniga fou mo le nuu o le feagaiga a le Atua. O le a le toe faamasaaina se toto o se manu pe aai i aano o manu ma faamoemoe i se taulaga togiola a se Keriso o le a i ai se aso e afio mai ai.¹⁰ Ae, o faatusa o le tino mavaevae ma le toto na faamaligiina o le Keriso na afio mai o le a fetagofi i ai ma taumafaina e fai ma faamanatuga o Lana taulaga togiola.¹¹ O le auai ai i lenei sauniga fou o le a faailoa atu ai i tagata uma e taliaina ma le naunautai ia Iesu o le Keriso folafolaina ma le faanaunautaiga o le loto atoa e mulimuli ia te Ia ma tausi i Ana poloaiga. Ia i latou o le a faailogaina ma faatautaia o latou olaga [e tusa ma Ana poloaiga], o le a “laaloa” le oti faaleagaga ia i latou, ma o le a faamautinoa atu i ai le ola e faavavau.

I itula ma aso na sosoo ai, na ulu atu ai Iesu i Ketesemane, sa avatu [o Ia] i Kalevario, ma sa toetu manumalo mai le tuugamau o Arimataia. Ina ua mavae Lona afio a’e i le lagi mai ia i latou, sa feiloai faatasi soo faamaoni o Iesu i totonu ma fafo atu o Ierusalema i le aso muamua o le vaiaso e “tofitofi le areto”¹² ma sa latou faia ma le “tumau pea.”¹³ O le mea mautinoa, sa le gata ina latou faia e manatua ai lo latou Alii ua alu ese ae ia faailoa atu ai foi le lotofaafetai ma le faatuatua i Lana Togiola ofoofogia mo i latou.

O le mea iloa, ina ua asiasi atu Iesu i Ona soo i Amerika, sa Ia faia foi le faamanatuga ia i latou.¹⁴ I le faia o lea mea, sa Ia fetalai ai: “Ia outou tausisi e faia lenei mea e le aunoa”¹⁵ ma “o le a avea lea o se molimau i le Tama ua outou manatua pea au,”¹⁶ Sa toe faapena foi i le amataga o le Toefuataiga, sa faia ai e le Alii le sauniga o le faamanatuga, ma tuu mai faatonuga ia i tatou e talitutusa lava ma faatonuga na Ia tuu atu i Ona soo anamua.¹⁷

O le sauniga o le faamanatuga ua ta’ua o se “tasi o sauniga aupito silisili ona paia i le Ekalesia.”¹⁸ E manaomia ona paia atili ma mamalu ia i tatou taitoatasi. Sa faia e Iesu Keriso lava Ia le sauniga e faamanatu mai ai ia i tatou le mea sa Ia faia e togiola ai i tatou ma ia aoao ai i tatou i le auala e mafai ai ona faamanuiaina lo tatou faaaogaina o Lana Togiola ma mafai ai ona toe mau faatasi ma le Atua.

I le falaoa ua tofitofi ma vaevae, tatou te faailoa atu ai o loo tatou manatuaina le tino o Iesu Keriso—o se tino na puapuagatia i tiga, mafatiaga, ma faaosoosoga o soo se ituaiga,¹⁹ o se tino na tauaveina se avega mamafa o le tiga lea na matua puna mai ai le toto i pu afu uma,²⁰ O se tino na matua sasaina ma le fatu na nutimomoia i le faasatauroga.²¹ Tatou te faailoa atu lo tatou talitonuga o lena lava tino e tasi na taatia ua maliu, sa toe faatuina i le ola mai le tuugamau, e le toe oo i ai se ma’i, pala, po o le oti.²² Ma i lo tatou aai ai i le falaoa, tatou te faailoa atu ai e faapea, e pei foi o le tino o Keriso, o le a faasaolotoina foi o tatou tino mai noataga o le oti, ma toetutu manumalo mai le tuugamau, ma toefuatai atu i o tatou agaga e faavavau.²³

I se tamai ipu vai lava, tatou te faailoa atu ai tatou te manatuaina le toto o Iesu na faamaligiina ma mafatiaga faaleagaga na Ia onosaia mo tagata uma. Tatou te manatua ai le tiga na mafua ai ona puna tele mai le toto na maligi i Ketesemane.²⁴ Tatou te manatua ai le sauaina ma le sasaina na Ia onosaia mai ia i latou na faapagotaina o Ia.²⁵ Tatou te manatua ai le toto na Ia faamaligiina mai i Ona lima, vae, ma le itu a o i ai i Kalevario.²⁶ Ma e tatou te manatua ai Ona lava Ia manatu i Ona puapuaga: “O le ā le tetele o le tiga e te le iloa, o le ā le malosi e te le iloa, ioe, o le ā le faigata ona onosaia e te le iloa.”²⁷ I lo tatou inuina o le vai, tatou te faamamaluina ai Lona toto ma puapuaga na togiola ai a tatou agasala ma o le a Ia totogi a tatou agasala pe a tatou opogi ma taliaina mataupu faavae ma sauniga o Lana talalelei.

O lea, i le falaoa ma le vai, ua faamanatu mai ai ia i tatou le Togiolaina e Keriso o i tatou mai le oti ma le agasala. O le faatulagaga o le falaoa e muamua ae lona lua le vai [i le faamanatuga] e taua. O le taumafa i le falaoa, ua faamanatu mai ai ia i tatou lo tatou lava toetutu i le taimi mulimuli, lea e aofia ai le sili atu i lo le na o se toefuataiga o le tino ma le agaga. E ala i le mana o le Toetu, o le a toe foi atu ai i tatou uma i le afioaga o le Atua.²⁸ O lena tulaga ua tatou fetaiai ai ma se fesili taua o o tatou olaga. O le fesili taua o loo feagai ma i tatou uma e le faapea pe o le a tatou ola ea, ae o ai o le a tatou ola faatasi pe a mavae le oti. E ui o le a toefoi atu i tatou uma taitoatasi i le afioaga o le Atua, ae e le o i tatou uma o le a mau faatasi ma Ia.

Ona o lo tatou olaga faaletino, tatou te eleelea uma ai lava i le agasala ma le solitulafono.²⁹ O le a i ai o tatou mafaufauga, upu, ma galuega o le a le mama.³⁰ I se aotelega, o le a tatou eleelea. Ma o taunuuga o le eleelea i le afioaga o le Atua, sa faamanino atoatoa mai e Iesu: “E leai se mea le mama e mafai ona mau … i ona luma.”³¹ Na matuai manino lena mea moni ia Alema le Itiiti lea na fetaiai ma se agelu paia, sa matua mafatia, faanoanoa, ma tiga i lona le mama lea na ia manao ai ia “tinei i le agaga ma le tino, ina ia le aumaia ai o [ia] e tu i luma o [le] Atua.”³²

I le feinu ai i le vai o le faamanatuga, ua aoaoina ai i tatou i le auala e mafai ai ona faamamaina i tatou mai le agasala ma le solitulafono ma mafai ai ona tu i luma o le Atua. E ala i le faamaligiina o Lona toto lē sala, sa faamalie ai e Iesu Keriso ia manaoga o le faamasinotonu mo agasala uma ma solitulafono. Ona Ia ofo mai lea e faamama i tatou pe afai e lava lo tatou faatuatua ia te Ia e salamo ai; talia uma sauniga ma feagaiga o le faaolataga, lea e amata i le papatisoga; ma le taliaina o le Agaga Paia. O lo tatou mauaina o le Agaga Paia, e faamamaina ma faapaiaina ai i tatou. Sa matua faamanino mai e Iesu lenei aoaoga faavae:

“E leai se mea le mama e mafai ona ulu atu i le malo [o le Atua]; … e leai se mea e ulu atu i lona malologa vagana ai i latou o e ua faamamaina o latou ofu i lou toto. …

“O lenei o le poloaiga lenei: Ia salamo, outou tuluiga uma o le lalolagi, ma o mai ia te au ma ia papatiso i lou igoa, ina ia faapaiaina outou i le taliaina o le Agaga Paia, ina ia outou tutu ma le le pona i ou luma i le aso gataaga.”³³

O le mataupu lenei a Keriso.³⁴ A tatou taliaina lenei aoaoga faavae ma faatautaia o tatou olaga e faatatau i ai, e fufuluina moni lava i tatou i le toto o Keriso ma mama ai.³⁵

E ala atu i tatalo o le faamanatuga, ua tatou faailoa atu lo tatou taliaina o lenei aoaoga faavae a Keriso ma lo tatou tautinoga e ola e faatatau i ai. I la tatou aioiga i le Atua lo tatou Tama Faavavau, ua tatou tautino atu ai o le a tatou “manatua pea” Lona Alo pele. Muamua, tatou te molimau atu lo tatou “naunautaiga” e manatuaina. Ona tatou molimau atu lea tatou te manatuaina. O le faia o lea mea, ua tatou faia ai ni tautinoga e faaaoga le faatuatua ia Iesu Keriso ma Lona Togiolaina o i tatou mai le oti ma le agasala.

Tatou te tautino atu foi o le a tatou “tausia ana poloaiga.” O se tautinoga faamaoni foi lea ia salamo. Afai o o tatou mafaufauga, upu, po o amioga ua le tusa ai ma le mea sa tatau ona i ai i aso ua tuanai, ia tatou toe tuuto atu i tatou lava ina ia faaogatusa atili o tatou olaga ma Lona soifuaga i aso o lumanai.

E sosoo ai, tatou te tautino atu foi ua tatou “loto e ave i o [tatou] luga le suafa o [le] Alo.”³⁶ O se tautinoga faamaoni lea e gauai atu ai i tatou lava i Lana pule ma faia Lana galuega, lea e aofia ai lo tatou mauaina mo i tatou lava o sauniga faaola uma ma feagaiga.³⁷

A tatou tuuto atu i tatou lava i nei mataupu faavae, ua folafola mai ia i tatou i tatalo o le faamanatuga o le a tatou “maua lona Agaga e faatasi ma i [tatou].”³⁸ O le toe faafouina o le Agaga o se tasi lea o faamanuiaga silisili, ona o le Agaga o le sui lea e faamamaina ma faapaiaina i tatou mai le agasala ma le solitulafono.³⁹

Uso e ma tuafafine, o le mea sili ona taua na tupu i le olaga nei ma le faavavau o le Togiola a Iesu Keriso. O Ia o le na faataunuuina le Togiola sa aumaia ia i tatou le sauniga o le faamanatuga e fesoasoani ai ia i tatou e le gata ia manatua ai ae ia tatou maua ai foi faamanuiaga o lenei faatinoga silisili o le alofatunoa. O le auai soo ma le naunautai i lenei sauniga paia e fesoasoani lea ia i tatou ia faaauau pea ona taliaina ma ola i le aoaoga faavae a Keriso pe a mavae le papatisoga ma tulitulimatagau ai ma faamaea le faagasologa o le faapaiaina. O le mea moni, o le sauniga o le faamanatuga ua fesoasoani ia i tatou ia tumau ai ma le faamaoni seia oo i le iuga ma maua ai le atoatoa o le Tama i le ala lava e tasi na maua ai e Iesu, o le alofatunoa mo le alofatunoa.⁴⁰

Ou te molimau atu o le mana o Iesu Keriso e togiola ai i tatou uma mai le oti ma le agasala ma o le mana o sauniga o Lana perisitua, e aofia ai le faamanatuga, o le saunia lea o i tatou ia “vaai i fofoga o le Atua, le Tama lava, ma ola.”⁴¹ Tau ina ia tatou mauaina le faamanatuga i le vaiaso fou, ma vaiaso taitasi e sosoo ai, i se manaoga loloto atu ma se faamoemoega sili atu ona naunautai, ou te tatalo ai i le suafa o Iesu Keriso, amene.