No Pleplei Wetem Ol Tabu Samting

Ol brata mo sista. Ol desisen we yumi mekem long laef ia oli lidim bigwan rod blong laef blong yumi we i no save finis. I gat ol paoa we yu save luk mo hemia we yu no save luk we i stap lidim ol joes blong yumi. Mi bin lanem impoten prinsipol ia faef yia i pas long wan wei we kolosap i mekem mi kasem wan nogud risal.

Mifala i stap travel wetem famle mo ol fren long saot blong Oman. Mifala i disaed blong spel nomo long sanbij we i folem Indian solwota. I no longtaem afta we mifala i kasem ples, gel blong mitufala we i gat 16 yia, Neli i askem sapos hem i save swim aot i go long wanem we hem i ting se i wan smol aelan blong sanbij. Mi luk se solwota i raf, mi talem long hem se bae mi go fastaem, wetem tingting se maet i gat sam denja taed i stap.

Afta we mi swim blong sot taem, mi singaotem waef blong mi mo askem sapos mi stap kolosap long aelan blong sanbij. Ansa blong hem long mi i, “Yu bitim finis i go.” Mi no bin save se mi bin fas insaed long wan wota we i stap tantanem¹ mo stap pulum mi hariap i go long dip solwota.

Mi no bin save wanem blong mekem. Wan samting nomo we mi save tingting long hem i blong tanem raon mo swim i gobak i go long so. Hemia i wan rong samting stret blong mekem. Mi filim se paoa i finis. Paoa we mi no save kontrolem i stap pulum mi go moa long dip solwota. Wanem i mekem i moa nogud i, waef we i trastem desisen blong mi, i bin folem mi.

Ol brata mo sista. Mi stap tingting se i gat wan hae janis se bae mi no laef, mo mi, from ol desisen blong mi, bae mi mekem waef blong mi i ded. Afta bigfala hadwok mo wanem mi bilivim i wan help we i kam long heven, ol leg blong mitufala i save tajem sanbij mo mitufala i wokbaot gud i gobak long ol fren mo famle mo gel blong mitufala.

I gat plante wota we i tantanem yumi long laef long wol ia—sam oli sef mo sam no. Presiden Spensa W. Kimbol i tijim se i gat ol strong paoa long laef blong yumi semmak olsem ol wota we i tantanem we yu save luk long solwota.² Ol paoa ia oli ril. Yumi mas neva mekem se yumi no luksave olgeta.

Bae mi talem long yu abaot wan nara wota we i tantanem, wan tabu wota we i tantanem we i bin kam wan bigfala blesing long laef blong mi. Mi bin konvet long Jos. Bifo long jenis blong laef blong mi, wan gol blong laef blong mi i blong ski mo folem hemia, mi muv i go long Yurop afta long hae skul blong mekem tingting ia i hapen. Afta sam manis long wanem i luk olsem gudfala laef, mi filim se mi mas go. Long taem ia mi no bin andastanem ples we filing ia i kam long hem, be mi jusum blong folem. Mi go kasem Provo, Yuta, wetem sam gud fren we, olsem mi, oli memba blong wan defren Jos.

Taem mi stap long Provo, mi mitim ol pipol we oli laef long wan defren laef. Mi wantem stap wetem olgeta, nomata mi no save from wanem. Afta mi winim olgeta filing ia, be mi faenem wan pis mo kamfot we mi bin neva save. Mi stat blong laekem defren wota we i tantanem ia—wan i tekem mi kam blong andastanem wan Papa long Heven we i gat lav mo Pikinini blong Hem, Jisas Kraes.

Mi bin kasem baptaes wetem ol fren blong mi long 1972. Niufala wota ia we i tantanem we mi jusum blong folem, gospel blong Jisas Kraes, i givim daereksen mo mining long laef blong mi. Be i kam wetem ol jalenj blong hem. Evri samting i niu long mi. Wan dei mi filim se mi lus mo gat fulap tingting. Kwestin mo ol jalenj i kam tugeta long ol fren mo famle.

Mi gat joes blong mekem. Sam long olgeta kwestin blong olgeta i krietem tu tingting mo no sua. Joes i wan impoten wan. ?Bae mi tanem i go wea blong kasem ansa? I gat plante oli wantem blong jenisim tingting blong mi long ol mistek blong olgeta long wei blong mi—“Ol dip solwota i wantem blong pulum mi longwe long wota we i tantanem we i gat pis we i bin kam wan naes ples blong hapines. Mi lanem klia prinsipol ia, “se i mas gat wan fasin blong go agens long evri samting.” Mo hem i impoten blong mi mekem samting blong miwan bitim we mi lego fridom blong joes blong mi long ol narawan.³

Mi askem miwan, “?From wanem bae mi tanem mi long wanem we i bin karem i kam long mi wan bigfala harem gud?” Olsem we Lod i rimaenem Oliva Kaodri, se Hem i bin givim wan filing blong pis long maen blong hem long saed blong poen ia.⁴ Eksperiens blong mi i semmak. Mo, mi bin tanem mi wetem moa komitmen, long wan Papa long Heven we i gat lav, long ol skripja, mo long fren we mi trastem.

Stil, i gat plante kwestin mi no save ansarem. ?Olsem wanem mi save ansarem ol tu tingting we olgeta i krietem? Blong no letem olgeta blong prapa spolem pis mo hapines we i bin kam long laef blong mi, mi jusum blong putum olgeta long saed blong wan smol taem, wetem tras se long taem blong Lod, bae Hem i soemaot evri samting. Mi ting se mi faenem pis long stetmen blong Hem long Profet Josef: “Luk, yufala i ol smol pikinini mo yufala i no save tekem evri samting ia naoia; yufala i mas gro wetem gladhat mo wetem save blong trutok.”⁵ Mi jusum blong no lego wanem mi save se i tru taem mi folem wan wota we i tantanem we mi no save mo mi kwestinim—“wan dip solwota.” Olsem we Presiden N. Eldon Tana i tijim, nao mi lanem se: “hem i moa waes mo gud blong man i akseptem simpol trutok blong gospel … mo akseptem wetem fet olgeta samting we hem … i no save andastanem.”⁶

?Hemia i minim se i no gat rum blong ones kwestin? Askem yang boe we i lukaotem ples blong has long tabu bus, i wantem blong save wijwan long evri Jos i tru we bae hem i joenem. Holem Doktrin mo Kavenan long han blong yu mo save se plante long wanem we oli bin talemaot long tabu rekod ia i bin ansa blong lukaotem trutok wetem tingting i stap daon. Olsem Josef i faenemaot, “Sipos wan long yufala i no gat waes, hem i mas askem long God blong i givim waes long hem,…nao God bae i save givim long hem,”⁷ Taem yumi askem wan tru kwestin mo lukaot tabu ansa, yumi lanem tijing folem tijing, rul folem rul,⁸ taem yumi stap kam antap long save mo waes.

Kwestin i no “?I gat rum blong ones, tru kwestin?” Be “?Wea nao mi save tanem mi i go long hem blong kasem trutok taem kwestin i kam?” “?Bae mi mi stap waes inaf blong holemtaet strong long wanem we mi save se i tru nomata long samfala kwestin we mi gat?” Mi testifae se i gat wan tabu ples— Wan we i save evri samting—en long stat. Evri samting i stap long fored blong hem.⁹ Ol skripja oli testifae se Hem i no wokbaot long ol rod we oli kruked, … mo hem i no stap jenis long wanem hem i bin talemaot.”¹⁰

Long laef long wol ia, yumi mas neva ting se ol joes blong yumi bae oli afektem yumiwan nomo. I no long taem i pas, wan yang man i visitim haos blong mi. Hem i gat wan gud spirit abaot hem, be mi filim se hem i no tekem pat fulwan long ol Jos aktiviti. Hem i talem long mi se hem i bin groap long wan haos we gospel i stamba long hem kasem taem papa blong hem i komitim adaltri, mo olsem risal tufala i divos mo i afektem evri yang family memba blong gat kwestin long Jos mo foldaon. Hat blong mi i soa taem mi stap toktok long yang papa ia we naoia, i harem nogud from joes blong papa blong hem, i stap lukaotem ol gudfala spirit oli groap aotsaed long ol blesing blong gospel blong Jisas Kraes.

Wan nara man mi save, wan memba blong Jos we i bin fetful long wan taem, i gat askem kwestin long saed blong samfala doktrin. Hem i no askem Papa long Heven long ol ansa, hem i jusum blong dipen nomo long samting blong wol olsem gaed. Hat blong hem i bin go long rong daereksen taem hem i stap lukaot wanem we i luk olsem ol ona blong man. Hae tingting i bin stap ating blong smol taem, be oli bin katemaot hem long paoa blong heven.¹¹ Hem i no traem faenem trutok, hem i lusum testemoni blong hem mo karem plante famle memba wetem hem.

Tufala man ia i fas long wan smol aelan blong sanbij we yu no save luk mo karem plante wetem tufala.

Long narasaed mi tingbaot LaRu mo Luis Mila, Papa mo mama blong waef blong mi, we nomata tufala i no gat plante samting long wei blong ol samting blong wol ia, tufala i no jusum nomo blong tijim klin doktrin blong gospel we i bin kambak long ol pikinini blong tufala, be blong laef folem long evri dei laef blong tufala. Taem tufala i mekem olsem, tufala i blesem ol laen blong tufala wetem ol frut blong gospel mo hop blong laef we i no save finis.

Long haos blong tufala, tufala i putum i stap wan paten we oli respektem prishud, we lav i fulap, mo we prinsipol blong gospel i daerektem laef blong tufala. Luis mo LaRu, tufala i saedsaedem tufala, mo soem wanem i minim blong laef folem laef blong Jisas Kraes. Ol pikinini blong tufala i save luk klia wijwan long ol wota we i tantanem i save karem pis mo hapines i kam. Mo oli jusum folem. Ol presiden Kimbol i tijim, “Sapos yumi krietem wan wota we i tantanem we i strong, wan we i no muv we i ron i go from ol gol blong yumi blong stret mo gud laef, yumi mo ol pikinini blong yumi i save karem i go fored nomata long win blong hadtaem we i go long defren daereksen, harem nogud mo temtesen.”¹²

?Ol joes blong yumi oli impoten? ? Oli spolem yumiwan nomo? ?Yumi putum strong kampas blong yumi long wan wota we i tantanem we i no save finis blong gospel we i kambak?

Wanwan taem, mi stap gat wan pikja we i mekem mi fraet. ?Wanem sapos long dei blong Septemba ia, taem mi rilaks long sanbij blong Solwota blong Indiana, mi talem long gel blong mi, Neli “Yes gohed. Swim long smol aelan blong sanbij” ?O sapos hem tu i bin folem eksampol blong mi mo no save swim i kambak? ?Wanem sapos mi mas laef wetem save ia se eksampol blong mi i risal blong dip solwota i pulum hem mo bae i neva kambak?

?Ol wota we i tantanem we yumi jusum blong folem oli impoten? ?Ol eksampol blong yumi oli impoten?

Papa long Heven i bin blesem yumi wetem presen we i Tabu Spirit blong gaedem ol joes blong yumi. Hem i bin promesem yumi insperesen mo revelesen taem yumi laef klin blong kasem olgeta. Mi invaetem yu blong mekem yus long tabu presen ia mo skelem ol joes blong yuwan taem yu askem kwestin ia, “?Ol desisen blong mi oli planem strong long rij graon blong gospel blong Jisas Kraes?” Mi invaetem yu blong mekem wanem kaen jenis we i gat nid, smol o bigwan, blong mekem se ol blesing blong taem we i no save finis long plan blong Papa long Heven oli blong yu mo olgeta we yu lavem.

Mi testifae se Jisas Kraes i Sevya mo Ridima blong yumi. Mi testifae se ol kavenan we yumi mekem wetem hem oli tabu mo tabu tumas. Yumi neva mas pleplei wetem ol tabu samting.¹³ Blong yumi stap fetful oltaem, mi prea long nem blong Jisas Kraes, amen.