2010–2019
Tsis Txhob Saib tej Yam Dawb Ceev Tsis Rau Nqi
October 2014


Tsis Txhob Saib tej Yam Dawb Ceev Tsis Rau Nqi

Ua tib zoo xav seb nej yuav xaiv li cas thaum nej nug qhov no hais tias, “Kuv tej kev txiav txim puas tuaj cag tob tob hauv cov av zoo ntawm Yexus Khetos txoj moo zoo?”

Cov kwv tij thiab cov muam, peb tej kev txiav txim siab hloov tau peb lub neej ntau heev nyob mus ib txhis. Muaj tej yam yus pom thiab tsis pom uas yeej rub los kom yus xaiv nyob hauv yus lub neej. Tsib xyoos tas los muaj xwm txheej uas ua rau kuv kawm txog lub ntsiab cai no.

Peb twb nrog tsev neeg thiab phooj ywg mus ua si nyob hauv Oman sab qab teb. Peb twb txiav txim siab tias peb yuav so nyob ntawm ntug dej hiav txwv Indian Ocean. Tsis ntev tom qab peb los txog, wb tus ntxhais uas muaj 16 xyoo, Nellie, nug seb wb puas cia nws ua luam dej mus rau ntawm ib pawg av xuab zeb. Vim kuv pom dej nphau nphwv, kuv qhia rau nws hais tias cia kuv mus ua ntej, vim kuv xav tias tej zaum muaj dej tsaws ntxhee.

Tom qab kuv ua luam dej ib chim, kuv nug kuv tus poj niam seb kuv puas nyob ze rau ntawm pawg av xuab zeb. Nws teb tias, “Koj twb mus dhau lawm los sav.” Kuv tsis tau paub tias dej tsaws ntxhee1 rub kuv mus deb rau hauv dej hiav txwv sai sai heev.

Kuv tsis tau paub kuv yuav ua li cas. Tib qho uas kuv xav txog yog kuv yuav tsum tig mus thiab ua luam dej rov qab mus rau ntawm ntug dej. Kuv ua yuam kev xav li ntawd. Tej ntawd ua rau kuv qaug zog heev. Cov dej uas kuv tswj tsis tau rub kuv mus deb rau hauv dej hiav txwv. Thiab haj yam tsis zoo uas kuv tus poj niam, vim nws tso siab rau kuv txoj kev txiav txim, twb raws kuv qab lawm.

Cov kwv tij thiab cov muam, kuv xav tias ntshe kuv yuav tso lub ntiaj teb no tseg thiab los ntawm kuv txoj kev txiav txim, kuv twb yuav ua rau kuv tus poj niam xiam thiab. Tom qab kuv sib zog ua luam dej thiab muaj Vajtswv txoj kev pab, wb sab ko taw chwv cov av xuab zeb thiab wb tau mus ko taw rov qab mus cuag peb cov phooj ywg thiab tus ntxhais.

Muaj tej yam uas rub tau peb hauv lub neej no—ib txhia rub peb rau qhov zoo thiab ib txhia rau qhov tsis zoo. Thawj Tswj Hwm Spencer W. Kimball qhia hais tias nyob hauv peb lub neej muaj tej kev rub zoo ib yam li muaj nyob hauv dej hiav txwv uas neeg tsis pom.2 Muaj tej kev rub no tiag tiag. Peb yuav tsum ceev faj txhua lub sij hawm.

Cia kuv qhia nej txog ib txoj kev rub, uas los ntawm Vajtswv los, uas yog ib txoj koob hmoov loj hauv kuv lub neej. Kuv yog ib tug uas tau hloov siab los ntseeg lub Koom Txoos. Ua ntej kuv hloov siab los ntseeg, kuv nyiam caij ski xwb, thiab yog li ntawd, kuv mus nyob hauv Europe tom qab kuv kawm high school tiav lawm kom kuv thiaj ua raws li kuv lub siab nyiam. Tom qab kuv ua neej nyob zoo tau ob peb hlis, kuv xav tias kuv yuav tsum mus nyob lwm qhov. Thaum lub sij hawm ntawd kuv tsis tau to taub lub hauv paus ntawm txoj kev xav ntawd, tiam sis kuv xaiv ua raws li kuv txoj kev xav. Kuv twb mus nyob hauv Provo, Utah, nrog ob peb tug phooj ywg, uas zoo li kuv, yog mej zeej ntawm ib txoj kev teev ntuj txawv.

Thaum kuv nyob hauv Provo kuv twb ntsib cov neeg uas coj lub neej txawv ntawm kuv. Kuv xav paub lawv, tiam sis kuv tsis paub yog vim li cas. Thaum xub thawj, kuv sim ua kom txhob ua raws li kuv xav, tiam sis tsis ntev kuv twb nrhiav tau ib txoj kev nyob kaj siab lug uas kuv ib txwm tsis tau paub. Kuv pib cia qhov no rub kuv mus---yog ib txoj kev rub txawv uas pab kuv paub txog ib Leej Txiv Saum Ntuj Ceeb Tsheej thiab Nws Leej Tub, Yexus Khetos.

Kuv tau ua kev cai raus dej nrog kuv cov phooj ywg thaum xyoo 1972. Qhov uas kuv cia rub kuv mus, yog Yexus Khetos txoj moo zoo, uas pab coj kuv kev thiab pab kom kuv paub lub ntsiab ntawm kuv lub neej. Tiam sis, kuv lub neej tseem muaj teeb meem thiab. Txhua yam zoo li tshiab rau kuv. Tej lub sij hawm kuv kho siab thiab tsis paub ua li cas. Kuv cov phooj ywg thiab tsev neeg twb nug kuv ntau yam.

Kuv yuav tsum txiav txim siab. Tej yam uas lawv nug ua rau kuv ua xyem xyav thiab tsis paub tseeb. Qhov uas kuv yuav xaiv yog ib qho tseem ceeb. Kuv yuav nrhiav lus teb qhov twg? Muaj ntau tus uas xav ua kom kuv ntseeg tias kuv twb ua yuam kev—tej dej tsaws ntxhee no yuav rub kuv mus tawm ntawm txoj kev rub rau kev kaj siab lug uas yog ib lub hauv paus ntawm kuv txoj kev zoo siab. Kuv kawm zoo heev txog lub ntsiab cai uas hais tias “txhua txhia yam nyias muaj nyias qhov fab ntxeev” thiab qhov uas kuv yuav tsum ua ntawm kuv tus kheej thiab txhob ywj rau lwm tus.3

Kuv nug kuv tus kheej, “Vim li cas kuv yuav tig mus ntawm qhov uas nplij kuv lub siab heev?” Zoo li tus Tswv qhia kom Oliver Cowdery nco ntsoov tias, “Kuv tsis tau hais lus ua rau koj lub siab kaj txog qhov no los?”4 Kuv zoo ib yam li ntawd. Yog li ntawd, kuv haj yam rau siab tig mus rau ib Leej Txiv Saum Ntuj Ceeb Tsheej, rau cov vaj lug kub, thiab rau cov phooj ywg uas kuv tso siab rau.

Txawm li ntawd los, tseem muaj tej lus nug uas kuv tsis paub teb. Kuv yuav ua li cas kom kov yeej tej lus nug no? Kuv txiav txim siab tias kuv yuav tsis cia tej lus nug no ua kom kev kaj siab lug thiab kev zoo siab puas tsuaj mus, es kuv muab tej lus nug tso tseg tau ib ntus, thiab cia siab tias thaum txog lub sij hawm uas tus Tswv pom zoo, Nws yuav muab txhua yam tshwm sim los. Cov lus uas Nws hais rau tus Yaj Saub Yauxej Xamiv nplij kuv lub siab hais tias: Peb yog cov me nyuam yaus uas nyiaj tsis taus txhua yam tam sim no; peb yuav tsum loj hlob los ntawm tus ntsuj plig lub hwj chim thiab ntawm txoj kev paub qhov tseeb.”5 Kuv xaiv kom tsis txhob muab tej yam uas kuv paub muaj tseeb tseg thiab tsis txhob cia ib qho uas kuv tsis paub zoo muab kuv rub—zoo li dej tsaws ntxhee. Raws li Thawj Tswj Hwm N. Eldon Tanner qhia hais tias, kuv kawm tias “qhov zoo dua yog qhov uas tib neeg txais yuav qhov tseeb ntawm txoj moo zoo … thiab muaj kev ntseeg txais yuav tej yam uas nws … tsis to taub.”6

Qhov no puas txhais hais tias tsis muaj chaw rau tus uas muaj siab xav paub tiag tiag? Cia li nug tus me nyuam tub uas mus rau hauv ib koog ntoo vim nws xav paub nws yuav tsum koom lub koom txoos twg. Cia li tuav phau Lus Qhuab Qhia thiab Kev Khi Lus hauv nej txhais tes, thiab paub tias muaj ntau yam uas Vajtswv tau muab tshwm sim hauv phau ntawv no vim neeg txo hwj chim nrhiav qhov tseeb. Raws li Yauxej kawm, “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws.”7 Thaum peb xav paub tiag tiag thiab peb nrhiav Vajtswv tej lus teb, peb kawm, ib kab rau ib kab, ib zaj rau ib zaj,8 uas ua rau peb paub thiab muaj tswv yim zuj zus tuaj.

Lo lus nug tsis yog “Puas muaj chaw rau tus uas muaj siab xav paub tiag tiag?” tiam sis yog “Kuv yuav mus qhov twg kom nrhiav qhov tseeb thaum kuv muaj lus nug?” “Kuv puas muaj tswv yim txaus kom ntseeg ruaj khov tej yam uas kuv paub tias muaj tseeb txawm yog kuv muaj ob peb lo lus nug?” Kuv ua tim khawv tias muaj ib tug nyob saum ntuj—ib tug uas paub txhua yam, txij thaum chiv keeb mus txog qhov kawg. Nws pom txhua yam.9 Cov vaj lug kub ua tim khawv tias Nws “taug tsis tau tej kev com kawb, … thiab nws tsis pauv ntawm tej uas nws tau hais lawm.”10

Thaum peb nyob hauv lub ntiaj teb no peb yuav tsum tsis txhob xav tias tej yam uas peb xaiv yuav hloov peb lub neej xwb. Tsis ntev tas los ib tug tub hluas tau tuaj xyuas kuv tsev neeg. Nws yog ib tug neeg siab zoo, tiam sis kuv paub tias nws tsis muaj siab ntseeg koom lub Koom Txoos tag nrho. Nws qhia kuv tias nws twb loj tuaj nyob hauv ib tsev neeg uas ua raws li txoj moo zoo mus txog thaum nws txiv ua tsis ncaj rau nws niam, ces nkawd sib nrauj ua rau tag nrho nws cov kwv tij cov muam tsis paub tseeb txog lub Koom Txoos thiab lawv txawm tsis ntseeg. Kuv lub siab mob thaum kuv sib tham nrog tus txiv tsev hluas no uas tu peb tug me nyuam uas muaj nqi loj hlob tsis nrog cov koob hmoov los ntawm Yexus Khetos txoj moo zoo, vim nws txiv tau xaiv ua li ntawd.

Muaj ib tug txiv neej uas kuv paub, ib tug uas yav tas los yog ib tus mej zeej rau siab ntseeg, uas muaj lus nug txog ib lo lus qhuab qhia. Nws tsis thov Leej Txiv Saum Ntuj Ceeb Tsheej kom teb, tiam sis nws xaiv kom tso siab rau neeg ntiaj teb tej lus kom coj nws kev. Nws lub siab twb tig mus ua yuam kev vim nws nrhiav neeg ntiaj teb tej lus qhuas. Tej zaum tau ib ntus nws zoo siab vim nws ua raws li nws txoj kev muab hlob, tiam sis nws raug txiav tawm ntawm tej hwj chim saum ntuj ceeb tsheej.11 Nws tsis tau nrhiav qhov tseeb, es nws zaj lus tim khawv ploj mus thiab muaj ntau tus hauv nws tsev neeg uas ua zoo ib yam.

Ob tug txiv neej no twb raug tej dej tsaws ntxhee thiab coj coob tus neeg nrog nkawd mus.

Ua rau kuv xav txog LaRue thiab Louise Miller, kuv tus poj niam niam thiab txiv, yog ob tug uas ib txwm tsis tau muaj khoom ntau heev, es nkawd xaiv qhia lus qhuab qhia tseeb ntawm txoj moo zoo rau nkawd cov me nyuam thiab ua neej raws li tej lus ntawd txhua hnub. Vim nkawd ua li no nkawd tau foom koob hmoov rau nkawd cov poj koob yawm txwv kom muab txoj moo zoo thiab kev cia siab tias yuav muaj txoj sia nyob mus ib txhis.

Nyob hauv nkawd tsev neeg nkawd saib lub pov thawj hwj rau nqi, muaj kev hlub thiab kev sib haum xeeb, thiab tej ntsiab cai ntawm txoj moo zoo coj lawv lub neej. Louise thiab LaRue, tau nyob ua ke, qhia hais tias lub neej uas yus coj raws li Yexus Khetos zoo li cas. Nkawd cov me nyuam twb pom meej hais tias tej yam twg hauv lawv lub neej yuav rub kom lawv txais kev kaj siab lug thiab kev zoo siab. Thiab lawv xaiv qhov yog. Raws li Thawj Tswj Hwm Kimball qhia hais tias, “Yog tias peb tsim tau … tej kev rub uas ruaj khov kom mus rau peb lub hom phiaj uas yog ib lub neej ncaj ncees, ces yuav rub peb thiab peb cov me nyuam mus tom ntej txawm muaj cov cua ntawm kev nyuaj, kev poob siab, [thiab] kev ntxias uas nplawm peb.”12

Tej yam uas peb xaiv puas muaj nqi? Tej ntawd puas hloov peb tus kheej xwb? Peb puas cia txoj moo zoo uas txum tim rov qab los rub peb ruaj nrees?

Tej lub sij hawm, ua rau kuv xav txog ib qho uas txaus ntshai. Yuav ua li cas yog tias thaum lub Cuaj Hlis Ntuj ntawd, thaum kuv so ntawm ntug dej hiav txwv Indian Ocean, kuv twb hais rau kuv tus ntxhais Nellie hais tias, “Koj mus tau. Ua luam dej mus rau pawg av xuab zeb.” Los sis yog nws kuj tau raws kuv qab thiab tsis muaj zog ua luam dej rov qab los? Yuav ua neej li cas yog kuv paub tias kuv tau coj yam ntxwv uas ua rau nws raug rub mus rau hauv dej hiav txwv, es nws yeej yuav tsis rov qab los?

Tej yam uas peb cia rub peb mus puas tseem ceeb? Peb coj yam ntxwv li cas los puas tseem ceeb?

Leej Txiv Saum Ntuj Ceeb Tsheej tau muab lub txiaj ntsim Vaj Ntsuj Plig Dawb Huv uas zoo kawg nkaus kom coj peb kev. Nws tau cog lus tias peb yuav txais kev tshoov siab thiab kev tshwm sim thaum peb ua neej tsim nyog kom txais tau tej ntawd. Kuv caw kom nej siv lub txiaj ntsim uas los ntawm Vajtswv los thiab ua tib zoo xav seb nej yuav xaiv li cas thaum nej nug qhov no hais tias, “Kuv tej kev txiav txim puas tuaj cag tob tob hauv cov av zoo ntawm Yexus Khetos txoj moo zoo?” Kuv thov kom nej hloov tej yam uas nej yuav tsum hloov, tsis hais qhov me los sis qhov loj, kom nej thiab cov uas nej hlub txais tau cov koob hmoov mus ib txhis ntawm Leej Txiv Saum Ntuj Ceeb Tsheej txoj hau kev.

Kuv ua tim khawv hais tias Yexus Khetos yog peb tus Cawm Seej thiab tus Txhiv Dim. Kuv ua tim khawv hais tias peb tej kev khi lus nrog Nws yeej dawb huv. Peb yuav tsum tsis txhob saib tej yam dawb ceev tsis rau nqi.13 Thov kom peb yuav rau siab ntseeg tas mus li, kuv thov los ntawm Yexus Khetos lub npe, amees.