Txog Thaum Peb Rov Sib Pom Dua

Cov kwv tij thiab cov muam, peb tau muaj ob hnub zoo kawg nkaus mloog tej lus uas tshoov peb siab. Tau tshoov peb lub siab thiab peb txoj kev ntseeg tau dag tau zog thaum uas peb tau hnov tus ntsuj plig hauv tej tuas rau lub rooj sab laj. Thaum peb xaus, peb ua Peeb Leej Txiv Saum Ntuj Ceeb Tsheej tsaug rau Nws ntau txoj koob hmoov uas nws muab rau peb.

Peb tau kev txhawb nqa thiab kev tshoov siab los ntawm cov nkauj zoo mloog uas peb tau hnov hauv lub rooj sab laj. Tej kev thov Vajtswv tau pab peb txav mus nyob ze lub ntuj ceeb tsheej.

Rau peb cov Kwv Tij uas raug tso tawm hauj lwm hauv lub rooj sab laj no, kuv xav sawv tag nrho lub Koom Txoos cev ua nej tsaug. Peb yuav nco lawv. Lawv tau ua tej hauj lwm zoo kawg nkaus pab tus Tswv thiab ntau tiam neeg yuav tau tej yam zoo los ntawm lawv.

Thaum peb rov mus vaj mus tsev thov kom peb yuav cog lus hauv peb nruab siab hais tias peb yuav ua zoo dua yav tas los lawm. Thov kom peb yuav haj yam ua siab zoo thiab txawj xav. Thov kom peb yuav ncav tes mus pab lwm tus neeg, tsis yog peb cov mej zeej nkaus xwb tiam sis cov uas tsis ntseeg ib yam li peb ntseeg. Thaum peb nrog lawv sib raug zoo, thov kom peb yuav saib lawv rau nqis.

Yeej muaj tej tus neeg uas muaj kev cov nyom txhua txhua hnub. Cia peb qhia rau lawv paub tias peb hlub lawv, thiab ncav tes mus pab lawv. Thaum peb ib leeg saib xyuas ib leeg, peb yuav tau koob hmoov.

Thov kom peb yuav nco txog cov neeg laus thiab cov uas tawm tsis tau ntawm lawv lub tsev lawm. Thaum peb siv sij hawm mus xyuas lawv, lawv yuav paub tias peb hlub thiab saib lawv rau nqis. Thov kom peb yuav ua raws li lo lus txib uas hais tias “pab cov uas qaug zog, tsa tej txhais tes uas tsaug lawm, thiab ua rau lub hauv caug uas tsis muaj zog kom mus taus kev.”¹

Thov kom peb yuav ua cov neeg ncaj ncees thiab neeg saib dawb, sim ua qhov yog txhua lub caij nyoog hauv txhua qhov chaw. Thov kom peb yuav rau siab ntso raws Khetos qab, ua yam ntxwv txog kev ncaj ncees, yog li ntawd thiaj rais los mus ua “cov teeb rau lub ntiaj teb tau pom kev.”²

Kuv cov kwv tij thiab cov muam, kuv ua nej tsaug vim nej thov Vajtswv pab kuv. Lawv ntxiv zog thiab txhawb nqa kuv thaum kuv siv tag nrho kuv lub siab lub ntsws ua raws li Vajtswv siab nyiam thiab ua hauj lwm pab Nws thiab pab nej.

Thaum peb tawm ntawm lub rooj sab laj no kuv thov kom nej txhua tus yuav tau lub ntuj ceeb tsheej tej koob hmoov. Thov kom nej cov uas nyob deb ntawm nej tsev yuav rov mus dawb mus huv txog tsev thiab nrhiav pom tias txhua yam yeej nyob zoo. Thov kom peb yuav xav txog tej kev tseeb uas peb tau hnov, thiab thov kom peb yuav rais los mus ua neeg zoo dua peb tau ua, ua ntej lub rooj sab laj no pib.

Txog thaum peb rov los sib pom dua rau lub hli tom ntej, kuv thov tus Tswv foom koob hmoov rau nej thiab rau peb sawv daws, thiab kuv thov li no los ntawm Nws lub npe dawb huv—uas yog Yexus Khetos, peb tus Tswv thiab tus Cawm Seej—amees.